1, 2. Engvângin nge lusûnte thlamuan theih dân kan sawiho a ngaih? (A thupui chunga milem en rawh.)

SUSI-A chuan: “Kan fapa thih hnu chuan kum khat dâwn lai chu kan tuarin, na kan ti hle,” tiin a sawi a. A nupui a thih thut tâk hnu chuan, unaupain: “tisa lamah sawi hleih theih lovin na” a tuar thu a sawi bawk. Mi tam takin hetiang natna an tuar hi a lungchhiatthlâk hle. Tûn laia Kristian kohhranah kan unau tam tak chuan Armageddon thlen hmain an hmangaih takte’n an boralsan chu an beisei lo. I hmangaih tak tuemaw chu a boral mai thei a, a nih loh leh lusûn tuemaw chu i hre mai thei bawk. Chutiang a nih chuan: ‘Engtin nge lusûntu chuan thlamuanna a hmuh theih ang?’ tiin i ngaihtuah mai thei a ni.

² Hunin engkim a tidam ṭhîn tiin ṭhenkhat chuan an sawi a. Mahse, chutiang chuan a ni reng em? Hmeithai pakhat chuan: “Min tidamtu chu hun a liam zêl chhûnga kan thiltih hi a ni tia sawi hi a dik zâwkin ka hria,” tiin a sawi. Taksa  hliam dam tûr chuan hun leh ṭha taka enkawl a ngai a. Rilru lam natna dam tûr chuan chutiang bawka hun pêka, kan enkawl a ngai a ni. Lusûnte rilru natna tiziaawm tûrin engin nge a bîk takin ṭanpui thei?

3, 4. Engvângin nge Jehova chuan kan lungngaihna a hre thiam tih kan chian theih?

³ Khawngaihna nei tak kan Pa, Jehova chu kan mamawh thlamuanna min petu ber a ni a. (2 Korinth 1:3, 4 chhiar rawh.) Ani chu mite tawrhpuina kawnga entawn tûr ṭha ber a ni a, a mite chu: “Nangmahni thlamuantu che u ka ni,” tiin a tiam a ni.—Isaia 51:12; Sâm 119:50, 52, 76.

⁴ Hmangaihna ngah tak kan Pa chuan a hmangaih tak a chhiahhlawh Abrahama te, Isaaka te, Jakoba te, Mosia te, leh Lal  Davidate chu a chân a. (Numbers 12:6-8; Matthaia 22:31, 32; Tirhkohte 13:22) Bible chuan Jehova’n chûng a mi rinawmte a kaihthawh hun tûr nî chu a nghâkhlel tak zet tih a sawi a ni. (Joba 14:14, 15) Chutih hunah chuan an hlimin hrisêlna ṭha famkim an nei tawh ang. Jehova chuan a fapa piang hmasa ber thihna pawh a tawng a. Bible chuan Isua chu Pathian “lâwmna” a ni tih a sawi. (Thufingte 8:22, 30) Jehova’n a Fapa na tuara a thi lai a hmuh huna a tawrh dân tûr chu kan ngaihtuah phâk bâk a ni.—Johana 5:20; 10:17.

5, 6. Engtin nge Jehova’n min thlamuan?

⁵ Jehova chuan min ṭanpui ang tih kan ring nghet tlat a. Chuvângin, a hnênah zalên taka ṭawngṭaiin, kan rilru natna leh lungngaihna nasa takte chu kan hrilh ṭhîn tûr a ni. Jehova’n kan ngaihtuahnate a hre thiamin, kan mamawh thlamuanna min pe tih hriat chu a va thlamuanthlâk tak êm! Mahse, chu chu engtin nge a tih?

⁶ Jehova min thlamuan dân kawng tam tak zînga pakhat chu a thlarau thianghlim hmangin a ni a. (Tirhkohte 9:31) Kan Pa chuan a dîltu zawng zawng hnenah a thlarau thianghlim thiltithei tak a pe ang tih Isua’n a tiam a ni. (Luka 11:13) A hmaa kan sawi tâk Susi-a chuan: “Jehova hnênah thlamuanna min pe tûrin vawi tam tak ṭhingṭhiin kan ṭawngṭai a. Pathian thlamuanna chuan kan thinlung leh ngaihtuahnate chu min vênsak reng a ni,” tiin a sawi.—Philippi 4:6, 7 chhiar rawh.

7, 8. Engvângin nge Isua’n min thlamuan ang tih kan rin theih?

⁷ Isua leia a awm lai khân, a thusawi leh thiltihah a Pa mize duhawm takte chu sawisêl bovin a entawn a. (Johana 5:19) Jehova chuan Isua chu “thinlung lungchhiate” leh ‘lungngai zawng zawngte’ thlamuan tûrin leiah a rawn tîr a. (Isaia 61:1, 2; Luka 4:17-21) Mite chuan an hrehawm tawrhte Isua’n a hre thiampuiin, ṭanpui a duh tak zet tih an hria a ni.—Hebrai 2:17.

 ⁸ Isua chuan a naupan laiin a ṭhian ṭhate leh a chhûngkaw zînga mite thihna chu a tawh ngei a rinawm. Entîr nân, a puitlin hmain a pa hrawn Josefa chuan a boralsan niin a lang. * (Footnote en rawh.) Mite ngaihsak tak tleirâwl tân chuan a nu leh a unaute lungngaihna bâkah, ama lusûnna tawrh a harsat dân tûr chu han ngaihruat teh.

9. Lazara a thih khân engtin nge Isua’n a tawrhpuizia a târ lan?

⁹ A rawngbâwl chhûngin, Isua chuan mite chu a hre thiamin, a tawrhpui tak zet tih a târ lang a. Entîr nân, a ṭhian ṭha tak Lazara a thih khân, Mari leh Marthi te tawrhna nasa tak chu a tawrhpui a. Lazara chu a kaitho dâwn tih hre mah se, a tawrhpui êm avângin a ṭap a ni.—Johana 11:33-36.

10. Isua’n tûn laia kan tawrh dân a hre thiam tih engtin nge kan chian theih?

¹⁰ Engtin nge hmân laia Isua thlamuanna ṭawngkam chuan tûn laiah min ṭanpui theih? Bible chuan Isua chu a danglam lo tih chiang takin a sawi a. Heti hian a sawi a ni: “Isua Krista chu niminah nên, vawiinah nên, kumkhua pawhin a pângngaiin a awm fo vang,” tiin. (Hebrai 13:8) Ani chu chatuan nunna nei thei tûra kawng min hawnsaktu a nih avângin “nunna Siamtu” tia koh a ni. Lusûnte chu mi mal takin a hre thiam a, “thlêmna tâwkte chu a ṭanpui thei a ni.” (Tirhkohte 3:15; Hebrai 2:10, 18) Chuvângin, Isua chuan mi dangte’n hrehawm an tawrh hian a tawrhpui ve tih kan chiang thei a. An lusûnnate chu a hre thiam a, ‘puih an ngaih hunah’ thlamuanna a pe thei a ni.—Hebrai 4:15, 16 chhiar rawh.

11. Eng Bible chângte’n nge a bîk taka thlamuan che?

¹¹ Lazara thih laia Isua’n nasa taka a tawrhna thuziak chu Pathian Thu-a kan hmuh min thlamuan thei Bible châng tam tak zînga pakhat mai a ni a. ‘Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tura ziak’ a nih avângin hei hi mak kan ti lo. (Rom 15:4) Lusûn i nih chuan, a hnuaia Bible chângte aṭang hian thlamuanna i hmu thei a ni:

• “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn.”—Sâm 34:18, 19.

• “Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn.”—Sâm 94:19.

• “Kan Lalpa Isua Krista ngei leh Pathian kan Pa, min hmangaihtu leh khawngaihna avânga chatuana thlamuanna leh beiseina ṭha min petu chuan, in thinlungte chu tithlamuangin, . . . tinghet rawh se.”—2 Thessalonika 2:16, 17. *—Footnote en rawh.

12. Engtin nge mi dangte kan thlamuan theih?

¹² Lusûnte chuan Kristian kohhranah thlamuanna an hmu thei bawk a. (1 Thessalonika 5:11 chhiar rawh.) ‘Thinlung lungchhiate’ chu engtin nge i tihchak theih a, i thlamuan theih? (Thufingte 17:22) “Ngawih hun a awm a, ṭawng hun a awm” tih hi hre reng ang che. (Thuhriltu 3:7) Hmeithai Dalene-i chuan lusûnte hian an ngaihtuahna leh rilru veizâwngte an sawi chhuah a ngai tih a sawi a. Chuvângin, i tihsak theih pawimawh ber chu an thusawi lai pawtchat lova ngaihthlâksak hi a ni. A unaupa chu mahnia a intihhlum hnuah, Junia-a chuan heti hian a sawi a: “An lungngaihna a nasat dân chu hre thiam vek lo mah la, a pawimawh ber chu an tawrh dân hriatthiam duhna neih hi a ni,” tiin.

13. Lusûnna chungchângah eng nge kan hriat reng ngai?

¹³ Kan vai hian kan lusûn dân leh kan tawrh dânte a inang vek lo tih kan hriat reng a ngai a. A châng chuan kan tawrh nasat dân chiah chu a sawi chhuah theih loh va. Pathian Thu chuan: “Mahni lungngaihna mahni chauh hriat a ni a, a lâwmna pawh mi dangin an hriatpui lo,” tiin a sawi. (Thufingte 14:10) Tuemaw chuan rilrua a tawrh dânte sawi chhuak mah se, mi dangte tân a sawi tum tak hriat thiam chu a awlsam ṭhîn lo a ni.

14. Lusûnte thlamuan tûrin eng nge kan sawi theih?

¹⁴ Lusûn tuemaw hnêna thusawi tûr hriat chu a harsa thei a. Mahse, Bible chuan “khandaih chhun anga na taka mi chhun thu sawi an awm,” tih a sawi a ni. (Thufingte 12:18) Mi tam tak chuan When Someone You Love Dies tih brochure-ah sawi tûr thlamuanna thute an hmu a ni. * (Footnote en rawh.) Chuti chung pawhin, i tih theih ṭanpuina ṭangkai ber chu “ṭapte chu ṭahpui” hi a ni. (Rom 12:15) A pasalin a boralsan Gaby-i chuan a châng chuan rilrua a tawrhnate sawi chhuah dân awmchhun chu ṭah hi a ni tih a sawi a. “Chuvângin, ka ṭhiante’n min ṭahpui hian thlamuana engemaw chen ka nei a. Chutih hunah chuan, ka lusûnna avângin khawhar lutuk niin ka inhre lo,” tiin a sawi belh bawk.

15. Mahni ngei kal a, thlamuanna thu sawi harsa kan tih chuan engtin nge kan la thlamuan theih? (“Tidamtu Thlamuanna Ṭawngkamte” tih bâwm chu en rawh)

¹⁵ Mahni ngei kal la, thlamuanna thu sawi harsa i tih chuan card te, e-mail te, SMS te, leh lehkhate thawn chu a awlsam zâwk thei a. Bible châng thlamuanthlâk takte i la chhuak thei a, mitthi ta mize ṭha i hriatte i ziak tel thei a, a nih loh leh i ngaihhlut tak ni hriatrêng tlâkte chu i ziak tel thei bawk a ni. Junia-a chuan heti hian a sawi bawk a ni: “SMS-a mi tichak thei thu tawitê ka dawnte, leh Kristian unaute nêna hun hmangho tûra sâwmna ka dawnte chuan  ka sawi theih aia nasain min ṭanpui a. Chûng a thusawite chuan min hmangaihin, min ngaihsak tih min hriattîr a ni,” tiin a sawi.

16. Mi dangte thlamuan dân kawng hlawhtling tak chu eng nge ni?

¹⁶ Kan ṭawngṭainain kan unau lusûnte chu a ṭanpui thei a. An tân kan ṭawngṭaisak theiin, anmahni nên pawh kan ṭawngṭai thei a ni. I ṭawngṭai laiin i ṭap chhuak ang tih i hlauh avângin harsa pawh i ti mai thei, mahse, thinlung taka i ṭawngṭaina chuan thlamuanna nasa tak a pe thei a ni. Delene-i chuan: “Unaunute min thlamuan tûra an lo kal hian, a châng chuan ṭawngṭai tûrin ka sâwm a. Hnuk ulh tak chungin an ṭawngṭai ṭan a; mahse, rei lo te hnuah chuan an aw rawn pângngai chhovin, thinlunga tih tak zetin an ṭawngṭai ṭhîn a. An rinna nghet tak, an mi hmangaihna, leh an mi ngaihtuahnate chuan ka rinna a tinghet ṭhîn hle,” tiin a sawi.

17-19. Engvângin nge mite kan thlamuan ṭhin a ngaih?

¹⁷ Mi tinte lusûn hun reizâwng chiah hriat chu thil theih a ni lo va. Hmangaih takte an thih hian, atîrah chuan ṭhiante leh chhûngkhatte’n an thlamuan a. Mahse, an nî tin nun pângngaia an kîr leh hnuah pawh lusûnte chu thlamuan an la ngai cheu a ni. Chuvângin, ṭanpui tûrin inpeih reng ang che. “Ṭhian chuan englai pawhin a hmangaih reng a, mangan nî atâna unauva piang a ni.” (Thufingte 17:17) Lusûnte chuan min mamawh chhûng chu kan thlamuan tûr a ni.—1 Thessalonika 3:7 chhiar rawh.

 ¹⁸ Mi chu engtik hunah pawh a lusûnnain a tihrehawm thut thei tih hre reng ang che. Chutianga awmtîrtu chu ni pawimawh champha te, rimawi engemaw bîk tak ngaihthlâk te, thlalâk en te, thiltihte bâkah, thil rim leh thâwm engemaw tak hriat te, a nih loh leh sik leh sâ awm dânte pawh a ni thei a. Pasal sûn te leh nupui sûn te chuan an kawppuite tel lova inkhâwmpui, a nih loh leh Hriatrengna inkhâwma an tel hmasak ber ṭumahte chuan mal nia inhriatna an neiin, tawrh harsa an ti hle thei a ni. Unaupa pakhat chuan, “Ka nupui boral hnua kan inneih champha a vawi khatna chu ka beisei ang ngeiin a awlsam lo. Mahse, unau ṭhenkhat chuan khawhar taka ka awm loh nân ka ṭhian kawmngaih takte nêna intihhlimna nei tûrin ruahmanna min siamsak a ni,” tiin a sawi.

¹⁹ Lusûnte chuan hun eng emaw bîkah chauh fuihna an mamawh tihna a ni lo tih hre reng ang che. Junia-a chuan, “Ni eng emaw bîk lovah pawh ṭanpuina pêk leh inkawmhona neihpui ṭhinna chu a ṭangkai hle a. Chutianga thiltihhona chu a hlûin, thlamuanna nasa tak min pe a ni,” tiin a sawi. An lusûnna leh an khawharna kan la bo thei lo tih chu a dik ngei mai; mahse, an tâna thiltihsakin lusûnte chu kan thlamuan thei a ni. (1 Johana 3:18) Gaby-i chuan: “Ka harsatna tinrênga tuar chhuak tûra min ṭanpuitu hmangaihna ngah tak upate avâng hian Jehova chungah ka lâwm tak zet a. Jehova’n hmangaih taka min kuah anga inngai thei tûrin anni chuan min ṭanpui a ni,” tiin a sawi.

20. Engvângin nge Jehova thutiamte chu thlamuanna nasa tak lo chhuahna bul ber a nih?

²⁰ Thlamuanna zawng zawng Pathian Jehova chuan thawhleh hunah lusûnna zawng zawng a tihtâwp ang tih hriat chu a thlamuanthlâk hle a. (Johana 5:28, 29) Pathian thutiamte chu, “thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang,” tih a ni. (Isaia 25:8) Leia mi tinte chuan “ṭapte chu ṭahpui,” aiin ‘lâwmte chu an lâwmpui’ tawh zâwk ang.—Rom 12:15.