Mi dangte laka mahni invênhim nân silai eng pawh hman chu Kristiante tân a dik lo tih chûng thu bulte chuan a târ lang a ni. A hnuaia thute hi ngaihtuah ang che:

Mihring nunna chu Jehova tân thil thianghlim a ni. Fakna hla phuahtu Davida chuan Jehova chungchângah: “Nunna tuikhur chu i hnênah a awm si a,” tiin a ziak a. (Sâm 36:9) Chuvângin, Kristian chuan mahni leh a thil neihte vênghim tûra duh thlanna a siam chuan, thisen chhuahna—mi dangte thihna thlen theihna—pumpelh tûrin a tih theih apiang chu a ti ngei ang.—Deuteronomy 22:8; Sâm 51:14.

Mahni inhumhim nâna a thil hman eng pawhin thisen chhuahna a thlen thei tih chu a dik ngei mai. Mahse, silaite chuan mi chu tih palh thil thuin emaw, tum rêng vângin emaw awlsam takin a tihlum thei a ni. * (Footnote en rawh.) Chu bâkah, min beitu chu a hlauthawngsa pawh a ni thei a, chuvângin silai a hmuh chuan dinhmun chu a hlauhawm lehzualin tuemaw thihna a thleng thei a ni.

Isua chuan a thih hma zâna a hnungzuitute hnêna khandaihte keng tûra a hrilh khân, mahniin an invênghim thei a tihna a ni lo. (Luka 22:36, 38) Chu aiin, Isua chuan zir tûr ṭha tak zirtîr a duh a: A hnungzuite’n hriamhrei keng mipuite an hmachhawn hunah pawh tharum an thawh tûr a ni lo tih hi. (Luka 22:52) Petera’n puithiam lalber chhiahhlawh bei tûra a khandaih a hman hnu khân, Isua’n a hnênah: “I khandaih kha a dahnaah dah leh rawh,” tiin a hrilh a. Isua chuan tûn laia Kristiante zâwm tûr he thu bul hi a sawi a ni: “Khandaih ruaitute zawng zawng chu khandaih vêkah an thi dâwn si a,” tiin.—Matthaia 26:51, 52.

Mika 4:3-a sawi lâwk angin, Pathian mite chuan “an khandaihte chu leilehna hmâwr zumahte an chher ang a, an feite chu thei kûng ahchhumna chem kawmahte an chher ang.” Kristian dikte chu remna siamtute nia hriat hlawh an ni a. Anni chuan tirhkoh Paula hmanga Pathian thupêk “tu sual pawh sualin thungrûl suh u,” tih leh “mi zawng zawng nên inremin awm rawh u,” tih chu an zâwm a ni. (Rom 12:17, 18) Paula chuan ‘suamhmangte laka hlauhawmte’ pawh tiamin dinhmun harsa tak a tâwk chung pawhin mahni invênhim nân Bible thu bulte a dodâl ngai lo. (2 Korinth 11:26) Chu ai chuan, Pathian a rinchhan a, Bible zilhna fing tak chu “indona hriamhei aiin a ṭha zâwk” tih a hria a ni.—Thuhriltu 9:18.

Kristiante tân nunna chu sum leh pai aiin a hlu zâwk. “Sum ngah hi mihring dam chhan a ni lo,” tih kan hria a ni. (Luka 12:15) Chuvângin, silai keng suamhmang chuan ṭawngkam nêm taka kan biak pawh a pawm duh loh chuan, Isua thurâwn pêk: “Mi sual dodâl suh u,” tih chu kan zâwm a ni. Chu chu a duh apiang a lâk kan phalsak tihna a kâwk thei a. (Matthaia 5:39, 40; Luka 6:29) * (Footnote en rawh.) Ni e, mi sualte bitum nih pumpelh chu  a ṭha ber a ni. Bible thurâwnte kan zui a, “dam chhûng ropuina lem te” kan pumpelh chuan mi sualte beihna kan pumpelh thei a ni. (1 Johana 2:16) Kan vêngte chuan remna duhtu, Jehova Thuhretute nia min hriat chuan chu chu kan tân invênhimna a ni bawk ang.—Thufingte 18:10.

Kristiante chuan mi dangte chhia leh ṭha hriatna an zah. (Rom 14:21) Unau ṭhenkhatte chuan an Kristian unaute zînga pakhatin mi dangte laka invênhim nân silai a nei tih an hriat chuan mak an tiin, an tlûk phah hial thei a. Dânin a phal avângin silai kan nei pawh a ni thei a; mahse, kan unaute kan hmangaih avângin anmahni titlu thei thil engmah kan ti ngai lo vang.—1 Korinth 10:32, 33; 13:4, 5.

Kristiante chuan mi dangte tân entawn tûr ṭha siam an duh. (2 Korinth 4:2; 1 Petera 5:2, 3) Kristianin mi dangte laka invênhim nân silai pakhat a neih chuan upate’n ani chu Bible aṭangin zilhna an pe ang. Silai neih a tum tlat chuan, entawn tûr ṭha a ni lo vang. Chuvângin, kohhranah mawhphurhna eng mah, a nih loh leh chanvo sâng bîkte chu a chelh thei bawk lo vang. A hnathawh avânga silai keng zawm zêltu Kristian tân pawh chutiang bawk chu a ni. Theih tâwp chhuaha hna dang a zawn chu a tân a ṭha zâwk ang. *—Footnote en rawh.

Kristian chuan a chhûngte leh a thil neihte a vênhim dân tûr leh a hnathawhna hmun tûr chungchângah thu tlûkna a siam tûr a ni a. Mahse, chutianga duh thlanna a siam hunah, Bible thu bulte a ṭanchhan tûr a ni. Finnaa khat kan Pathian chuan min hmangaih avângin chûng thu bulte chu min pe a. Chuvângin, Jehova nêna inlaichînna nghet tak nei Kristiante chuan mi dangte laka invênhim nân silai neih loh chu an thlang a ni. Pathian an rinchhan a, an nunah Bible thu bulte an zawm chuan chatuanin himna dik tak an nei ang tih an hria a ni.—Sâm 97:10; Thufingte 1:33; 2:6, 7.