1-3. (a) Sâm 147-na hi engtik huna ziak nge a nih mai theih? (b) Sâm 147-na zirna aṭangin eng nge kan zir theih?

TUEMAW chu a thusawi emaw, a thiltih emawin kan rilru a khawih hian kan fak ṭhîn a. Pathian Jehova fak tûra chêttîrin kan va awm nasa lehzual dâwn êm! A thilsiam ropui tak aṭanga kan hmuh a thiltihtheihna nasa tak avângin kan fak a, a Fapa tlanna inthawinaa kan hmuh min hmangaihna nasa tak avâng pawhin kan fak bawk a ni.

² Sâm 147-na kan chhiar hian, a ziaktuin Jehova fak duhna nasa tak a nei tih a chiang hle a. Mi dangte pawh amah nêna Pathian fak tûrin a fuih bawk a ni.—Sâm 147:1, 7, 12 chhiar rawh.

³ Sâm 147-na ziaktu chu kan hre lo va. Mahse, ani chu Jehova’n Israel mite Babulon aṭanga a hruai chhuah hnu Jerusalema an kîr leh hun lai vêla awm a nih a rinawm. (Sâm 147:2) Fakna hla phuahtu chuan Jehova mite’n anmahni  ram ngeia Pathian an biak leh theih avângin Jehova chu a fak a. Ani chuan chutianga fak chhan tûr tam tak a nei a ni. Chûngte chu eng nge ni? “LALPA chu fak rawh u,” tia au chhuah chhan tûr eng nge i neih?—Sâm 147:1.

4. Lal Kura’n Israel mite a chhuah khân, anni chu engtin nge an awm a, engvângin nge?

⁴ Israel mite Babulon sala an tân laia an rilru awm dân tûr chu han mitthla teh. Sala hruaia awmte chu: “Zion hla pakhat min saksak rawh u,” tiin an nuihzabûr a. Mahse, Juda mite chuan hla chu an sa duh lo. An hlimna ber Jerusalem chu tihchhiat a ni tawh si a. (Sâm 137:1-3, 6) An lungngaih êm avângin thlamuanna an mamawh a. Bible sawi lâwk angin Jehova’n a mite chu a ṭanpui a ni. Engtin nge? Persia Lal Kura chuan Babulon chu a hneh a, Jehova chungchângah: “Jerusalem-ah chuan a in saksak tûrin thu min pe a ni,” tiin a sawi. Kura chuan Israel mite hnênah: “In zînga ama mite tawh phawt hnênah chuan LALPA a Pathian chu awm sela, han chho rawh se,” tiin a hrilh bawk a ni. (2 Chronicles 36:23) Babulona awm Israel mite tân a va thlamuanthlâk dâwn êm!

5. Fakna hla phuahtu chuan min tidam tûra Jehova thiltihtheihna chungchâng eng nge a sawi?

⁵ Jehova chuan Israel mite chu a hnam ang chauh ni lovin, a mimal tinin a thlamuan a. Tûn laiah pawh kan tân chutiang bawk chuan a ti a ni. Fakna hla phuahtu chuan Pathianin “lungchhiate chu a tidam a, an hliamnate chu a tuam ṭhîn,” tiin a ziak a. (Sâm 147:3) Kan dam loh emaw, kan lungngaih emaw hunah Jehova’n min ngaihsak ang tih kan chiang thei a ni. Jehova chuan min thlamuan a, kan rilru hliamte tihdam a châk hle a. (Sâm 34:18; Isaia 57:15) Harsatna kan neih engpawh chu kan hmachhawn theih nân finna leh chakna min pe a ni.—Jakoba 1:5.

6. Engtin nge Sâm 147:4-naa fakna hla phuahtu thusawite chu kan hlâwkpui theih? (A thupui chunga milem en rawh.)

⁶ A hnuah fakna hla phuahtu chuan vân lam enin, Jehova’n “arsi tam chin a chhiar a; an hming a vuah ṭheuh hlawm ṭhîn,” tiin a sawi. (Sâm 147:4) Arsite chu hmu thei mah se, eng zât chiah nge an nih erawh a hre lo. Tûn laiah, scientist-te’n galaxy (thlasik kawng)-ah arsi tlûklehdingâwn tam tak a awm tih an hria a. Universe-ah hian galaxy tlûklehdingâwn sâng tam tak a awm mai thei bawk! Mihringte chuan arsi awm zât chu an chhiar vek thei lo va; mahse, Siamtu chuan a chhiar thei a ni. A nihna takah chuan, arsite chu a mal malin a hria a, hming a pe ṭheuh a ni. (1 Korinth 15:41) Arsi mal tinte hretu Pathian chuan nang pawh a hria che a. I awmna hmun te, i ngaihtuah dân te, leh i mamawhte chu englai pawhin a hria a ni!

7, 8. (a) Jehova chuan kan chungchângah eng nge a hriatthiam? (b) Jehova khawngaihna târlangtu entîrna pe rawh.

⁷ Jehova chuan i harsatnate a hriain ṭanpui  tûr chein thiltihtheihna a nei a. (Sâm 147:5 chhiar rawh.) I dinhmun chu a harsain, hmachhawn thei lo tûrin i inngai mai thei. Pathian chuan “vaivut mai kan ni tih a hriat reng avângin,” kan tlin tâwk a hria a. (Sâm 103:14) Ṭha famkim lo kan nih avângin thil kan tisual nawn fo ṭhîn a, kan lunghnual mai thei bawk. Kan thusawi ṭhenkhat te, châkna ṭha lo ngaihtuahna kan neih te, leh îtsîkna kan neihte avângin kan inchhîr hle a ni! Jehova chuan chaklohna engmah a nei lo va; mahse, kan ngaihtuah dânte chu a hre thiam vek a ni.—Isaia 40:28.

⁸ Hrehawm tuar chhuak thei tûrin Jehova kut chak takin a ṭanpui che niin i inhria em? (Isaia 41:10, 13) Hei hi pioneer pakhat Kyoko-i chuan a tawng a. Chanvo thar a dawnna hmuna a insawn hnu chuan a lunghnual hle a. Mahse, a harsatna chu Jehova’n a hre thiam tih engtin nge a hriat? A awmna kohhran tharah chuan a rilru hriatthiampui thei mi tam tak an awm a. Jehova’n: “Pioneer i nih vâng chauh ni lovin, ka fanu i nih vângin leh ka hnêna i inpumpêk avâng zâwkin ka hmangaih che a ni. Ka Thuhretu pakhat nia nun hlim tak i neih ka duh a ni!” tia hrilh angin a inngai a. Engtin nge Jehova chuan ‘a finnain tawpintai a nei lo’ tih a hmuhtîr che?

9, 10. Jehova min ṭanpui dân kawng pawimawh ber chu eng nge ni? Entîrna pe rawh.

⁹ Kan vai hian ei tûr te, silhfên te, leh awmna hmunte kan mamawh ṭheuh va. Ei tûr khamkhawp neih loh i hlau pawh a ni thei. Mahse, Jehova chuan “choâk no hrâm hrâmte” tân pawh tiamin kan vai tân lei aṭangin ei tûr tam tak a tichhuak a. (Sâm 147:8, 9 chhiar rawh.) Choâkte mah a châwm a nih chuan, kan tisa lam mamawhte chu min pe ngei ang tih kan chiang thei a ni.—Sâm 37:25.

¹⁰ A pawimawh ber chu Jehova chuan kan rinna tinghet reng tûrin kan mamawhte min pe a, “Pathian thlamuanna, rilru rêng rênga hriat sên loh” chu min pe bawk a ni. (Philippi 4:6, 7) Unau Mutsuo-a te nupa chuan Jehova’n a ṭanpui dân an hmu a. Kum 2011-a tsunami-in Japan ram a nuai khân, an in chung khuhah an lâwn a, thihna an pumpelh hrâm a ni. Chu mi nî chuan an thil neih zawng zawng deuhthaw an chân a. An in chhâwng hnihnaa room vawt takah chuan zân thim tak hnuaiah an awm a ni. A tûk zîngah chuan, anmahni tichak theitu tûr thil engemaw an zawng a. An hmuh theih awm chhun chu kum 2006-a Jehova Thuhretute Yearbook a ni. Mutsuo-a’n lehkhabu a han keu chuan “Chhinchhiah Tawh Azawnga Tsunami Nasa Ber,” tih thupui chu a hmu ta a. Chutah chuan kum 2004-a Sumatra thliar kâra lîrnghîng chungchâng a chuang a, chu chu chhinchhiah tawh azawnga tsunami vânga chhiatna nasa ber a ni. An unaute thiltawn an han chhiar chuan an nupain an mittui a tla a. Chu chu Jehova’n an mamawh tak fuihna a pe niin an ngai a ni. Jehova’n anni chu kawng dangin a ngaihsak bawk a. Japan ram hmun danga awm unaute’n an tân ei tûr leh silhfênte an rawn pe a. Pathian inawpna pâwlin a tirh unaupate’n kohhran an va tlawhna chuan anni chu a tichak hle a ni. Mutsuo-a chuan: “Jehova chu kan bul  hnai ṭheuhvah awmin min ngaihsak niin ka hria. A va thlamuanthlâk tak êm!” tiin a sawi. Pathian chuan kan rinna tinghet tûrin kan mamawhte min pe hmasa a, chumi hnuah kan tisa lam mamawhte min pe a ni.

11. Pathian ṭanpuina hlâwkpui tûrin eng nge kan tih ngai?

¹¹ Jehova chuan “thuhnuairawlhte chu a chelh reng” a. Min hmangaih a, min ṭanpui a inpeih reng a ni. (Sâm 147:6a) Engtin nge a ṭanpuina chu kan hlâwkpui theih? Amah nêna inlaichînna nghet tak kan neih a ngai a. Chumi nei tûr chuan mi thuhnuairawlh tak kan nih a ngai bawk. (Zephania 2:3) Thuhnuairawlhte chuan rorêl dik lohna eng pawh siam ṭha tûr leh an hrehawm tawrhnate titâwp tûrin Jehova an rinchhan a. Jehova pawm an hlawh a ni.

12, 13. (a) Pathian ṭanpuina hlâwkpui tûrin eng nge kan pumpelh ang? (b) Tute nge Jehova’n a lawm?

 ¹² Kawng leh lamah chuan, Pathianin “mi suaksualte chu leiah a titlâwm ṭhîn” a. (Sâm 147:6b) Chu chu kan chunga a thlen kan duh lo! Pathianin a hmangaihna rinawm kan chunga a lantîr chu kan duh a. Chuvângin, a thil huatte chu kan haw tûr a ni. (Sâm 97:10) Entîr nân, nungchang bawlhhlawhnate hi kan haw tûr a ni a. Chu chu saruak lem leh thuziakte pawh tiamin nungchang bawlhhlawhna lama min hruai thei thil eng pawh chu kan pumpelh tûr tihna a ni. (Sâm 119:37; Matthaia 5:28) Chûng thilte chu do harsa tak a ni thei a; mahse, Jehova malsâwmna kan dawn theih avângin thawhrim phû tak a ni.

¹³ Chu chu mahni chauhvin kan do thei lo va. Jehova kan rinchhan tûr a ni. Ṭanpuitu atâna mihringte rinchhan ṭhin thilte kan rinchhan chuan ani chu a lâwm ang em? Lâwm lo vang. Jehova chu “sakawr chakna chungah chuan a lâwm lo va.” Mahni chakna emaw midangte emaw chu kan rinchhan tûr a ni em? Jehova chu “mihring ke chungahte pawh lâwmna rêng rêng a nei ṭhîn lo.” (Sâm 147:10) A hnêna ṭanpuina dîl tûr leh kan chak lohna ata min chhanhim tûrin kan ṭawngṭai ṭhîn tûr a ni. Chûng kan ṭawngṭainate ngaithla tûrin ani chu a hah ngai lo vang. “LALPA chuan amah ṭihtute chungah chuan lâwmna a nei ṭhîn, a ngilneihna beiseitute chungah chuan.” (Sâm 147:11) A rinawm avâng leh min hmangaih avângin kan châkna ṭha lote do hneh tûrin min ṭanpui zêl ang tih kan hria a ni.

14. Fakna hla phuahtu chuan eng nge a rin ngheh tlat?

¹⁴ Jehova chuan harsatnate kan neih hunah min ṭanpui ang tih min tiam a. Israel mite Jerusalema an kîrleh khân, fakna hla phuahtu chuan Jehova’n anmahni a ṭanpui dân a ngaihtuah a ni. “Ani chuan i kulh kawngkhârte kalhna thing tlâwnte a tikhauh va; i chhûnga i fanau  awmte chu mal a sâwm si a,” tiin fakna hla phuahtu chu a zai a. (Sâm 147:13, 14) Jehova’n kulh kawngkhârte a tinghet dâwn tih a hriatna chuan fakna hla phuahtu chu him nia inhriatna a neihtîr a. Chu chuan Jehova’n a mite a vênghim ang tih a rin nghehtîr a ni.

15-17. (a) Kan harsatnate kan ngaihtuah châng hian engtin nge kan awm mai theih a; mahse min ṭanpui tûrin Jehova’n a Thu chu engtin nge a hman? (b) Bible chu min ṭanpui tûra ‘chak taka a tlân ṭhin’ dân târ langtu entîrna pe rawh.

¹⁵ I harsatnate avângin lungkhamna i nei mai thei a; mahse, hmachhawn thei tûrin Jehova’n finna a pe thei che a ni. Fakna hla phuahtu chuan Pathianin “a thupek chu leiah hian a tîr chhuak a; a thu chu chak takin a tlân ṭhîn,” tiin a sawi a. Tichuan, vûr te, dai tla te, leh tui khal chungchâng a sawi hnuah: “Ama vawhna hmâah chuan tunge ding thei ang?” tiin a zâwt a ni. Jehova’n “a thu chu a tîr chhuak a, chhûng chu a titui a,” tiin a sawi leh a. (Sâm 147:15-18) Thil engkim hretu, leh thil engkim titheitu, leh rial leh vûrte thununtu kan Pathian chuan harsatna engpawh hmachhawn thei tûrin a ṭanpui thei che tih a chiang a ni.

¹⁶ Tûn laiah Jehova chuan a Thu, Bible hmangin min kaihruai a. Fakna hla phuahtu chuan min ṭanpui tûrin Jehova thu chu “chak takin a tlân ṭhîn” tih a sawi a ni. Pathian chuan kawng dik tak leh a hun dik takah min kaihruai a. Bible te, “bawi rinawm, fing tak” tihchhuah thu leh hla te, JW Broadcasting te, jw.org te, upa te, leh kan unaute kan hlâwkpui dân chu han ngaihtuah teh. (Matthaia 24:45) I nunah hian chak taka Jehova kaihruaina i hmu tawh em?

¹⁷ Unaunu Simone-i chuan Pathian Thuin a ṭanpui dân chu a hmu a. Ani chuan hlutna nei lo niin a inhria a, a chungah Jehova a lâwm lo niin a hre bawk. Mahse, a lunghnual laiin Jehova hnênah ṭanpuina dîlin a ṭawngṭai a. Bible a zir zawm bawk a ni. Ani chuan: “Jehova chakna leh kaihhruaina dawn loh lai ka neih ka inhre lo,” tiin a sawi. Chu chuan a êng zâwnga thil thlîr tûrin a ṭanpui a ni.

18. Engvângin nge Jehova’n a hnaih che nia i hriat, ‘Lalpa fak’ chhan tûr eng nge i neih?

¹⁸ Fakna hla phuahtu chuan Jehova’n leia hnam tinrêng zîng ata a mite ni tûrin hmân lai Israel hnam chu a thlang tih a hria a. Anni chu Pathian “thu” leh “a thuruatte” dawngtu awmchhun an ni. (Sâm 147:19, 20 chhiar rawh.) Tûn laiah Pathian hming put theihna chanvo ropui tak kan nei a. Amah kan hre thei a, min kaihruai tûrin a Thu kan nei a, chu bâkah amah nên inlaichînna ṭha tak kan neih theih avângin kan lâwm tak zet a ni. Sâm 147-na ziaktu ang bawkin, ‘Lalpa fak’ chhan tûr tam tak i nei a, chuvângin mi dangte chu amah ang bawka fak ve tûrin fuih ang che.