1, 2. He khawvêlah hian engvângin nge mi retheite an awm reng?

TUN lai sumdâwnna hi a râwngin, a dik lo hle a. Entîr nân, ṭhalai tam tak tân hna hmuh a harsa hle a ni. Mi ṭhenkhat chuan ram hausaa pêm lût tûrin an nun pawh an thâp hial a. Ram hausaahte pawh mi rethei tam tak an awm a. Khawvêl pumah mi reitheite chu an retheih telh telh laiin, mi hausate erawh an hausa tulh tulh thung. Tûn hnai lawka chhût dân chuan khawvêla mi hausa tawntaw zaa pakhat chuan a dang, zaa 99-te neih zât belhkhâwm chu a nei a ni. Mi ṭhenkhatin chhuan tam tak chhûng daih tûr pawisa an neih laiin, mi maktaduai tam tak chu an rethei hle. Isua chuan: “Mi retheite chu kumkhuaa in hnêna awm an ni,” tia sawiin a hriatzia a târ lang a ni. (Marka 14:7) A nih leh, engvângin nge chutiang khawpa dik lohna chu a awm?

² Isua chuan Pathian Ram chu he khawvêl sumdâwnna thlâkthleng theitu awmchhun a ni tih a hria a. Bible chuan politics te, sakhaw pâwl te, leh “sumdâwngtute” a nih loh leh sumdâwnnate hi Setana khawvêla mi an ni tih a sawi. (Thu Puan 18:3) Pathian mite chu politics leh sakhaw dik lo lakah an inthiarfihlîm thei a. Mahse, an zînga a tam zâwkte  chu Setana khawvêla sumdâwnna ṭhenkhat aṭangin an inthiarfihlîm thei lo a ni.

3. Eng zawhnate nge kan ngaihtuah ang?

³ Kristiante kan nih angin, khawvêl sumdâwnna lama kan rilru put hmang chu kan bihchian a ngai a. Chutianga ti tûr chuan, heti hian kan inzâwt thei a ni: ‘Pathian chungah ka rinawm tih târ lan nân engtin nge ka sum leh paite chu ka hman theih? Engtin nge sumdâwnna khawvêl nêna inzawmna ka neih tlêm lehzual theih ang? Tûn laia Pathian mite’n amah an rinchhan tlat tih eng thiltawnte’n nge târ lang?’ tiin.

4, 5. (a) Isua sawi sum enkawltu chungah eng thil nge thleng? (b) Isua chuan a hnungzuitute chu engti tûrin nge a hrilh?

⁴ Luka 16:1-9 chhiar rawh. Isua sawi sum enkawltu fel lo chanchin hian ngun taka thil ngaihtuah chiang ṭheuh tûrin min chêttîr a. Sum enkawltu chu sum khawhral nia hêk a nih avângin a pûin bân a tum a ni. * (Footnote en rawh.) Mahse, sum enkawltu chuan ‘rem hriatna’ a hmang a. A hna a bânsan hmain, a hnua amah ṭanpui theitu tûrte chu ṭhianah a siam a ni. Isua chuan a zirtîrte chu an dam khawchhuah theih nân fel lo taka thilti tûra a duh avângin he chanchin hi hrilh a ni lo. Mahse, he khawvêla mite chuan fel lo takin thil an ti a. Isua’n sum enkawltu chanchin chu zir tûr pawimawh tak zirtîr nân a hmang zâwk a ni.

⁵ Isua chuan dinhmun harsa taka ding thut sum enkawltu ang bawkin, he khawvêl fel lo takah hian a hnungzui tam zâwkte tân eizawn a harsa hle ang tih a hria a. Chuvângin, an hnênah: “Sum lemin in tân, ṭhiante siam rawh u,” tiin a hrilh a ni. Engvângin nge? Chutiang sum lemte a boral hunah i ṭhian siam Jehova leh Isua’n ‘chatuana awmnaa a awmtîr theih’ che vâng a ni. Isua fuihna aṭangin eng nge kan zir theih?

6. Engtin nge tûn laia sumdâwnnate hi Pathian thiltum zîngah a tel lo tih kan hriat?

⁶ Isua chuan sum “lem” tia a sawi chhan chu hrilhfiah lo mah se, Bible chuan sum tak tak neih tum chu Pathian thiltumah a tel lo tih a târ lang chiang hle a. Entîr nân, Jehova chuan Eden huanah khân Adama leh Evi chu an mamawh aia tam phal takin a pe a. (Genesis 2:15, 16) A hnuah, Pathianin hriak thihte hnêna a thlarau thianghlim a pêk khân, “an zînga pakhat mahin an sum neih, ‘Ka ta bîk a ni,’ an ti lo; thil zawng zawng an inṭâwm zâwk ṭhîn,” a ni. (Tirhkohte 4:32) Zâwlnei Isaia chuan mihring zawng zawngin lei rah chhuahte an chên hun a awm dâwn tih a sawi lâwk a. (Isaia 25:6-9; 65:21, 22) Mahse, chumi hun a lo thlen hma chu Isua hnungzuite chuan ‘rem hriatna’ an neih a ngai ang. He khawvêla sum lemte chu eizawnna atâna an hman a ngaih rualin Pathian tihlâwm an tum bawk a ni.

7. Luka 16:10-13-ah Isua’n eng thurâwn nge a pêk?

⁷ Luka 16:10-13 chhiar rawh. Isua sawi sum enkawltu chuan ama hlâwkna atân ṭhiante a siam a. Mahse, Isua chuan a hnungzuite chu mahni hmasialna tel lovin  vânah ṭhiante siam tûrin a duh a ni. Kan sum lemte kan hman dânin Pathian chunga kan rinawm leh rinawm loh a târ lang thei tih hre thiam tûrin min duh zâwk a. Chu chu engtin nge kan tih theih?

8, 9. Mi ṭhenkhatin an rinawmna lantîr nân sum lem an hman dân entîrna pe rawh.

⁸ Kan rinawmna kan lantîr theih dân kawng khat chu Isua sawi lâwk khawvêl pum huap thu hrilh rawngbâwlna atâna kan sum leh pai te thawhlâwm thawh hi a ni a. (Matthaia 24:14) India rama hmeichhe naupang pakhat chuan a pawisa khâwlna bâwmah chuan pawisa a khâwl ṭhîn a. Chutianga khâwl thei tûr chuan infiamna milemte a lei tawh lo a ni. A bâwm a khah chuan a pawisa khâwl zawng zawng chu thu hrilh rawngbâwlna atân thawhlâwmah a thawh vek a ni. India rama unaupa pakhat chuan coconut (narial) huan a nei a. Narial tam tam chu Malayalam-a remote translation office (RTO) atân a thawh a ni. Office chuan coconut an lei a ngaih ṭhin avângin pawisa thawh aiin coconut thawh chu hlu tak niin a ngai a. Chu chu ‘rem hriatna’ a ni. Chutiang bawkin, Grik rama awm unaute chuan olive hriak te, cheese (bawnghnute khal aṭanga siam) te, leh thil dang ei tûrte chu Bethel chhûngkaw tân an thawh ṭhîn a ni.

⁹ Sri Lanka rama unaupa chuan a hmun ram chu inkhâwmna leh inkhâwmpuina tân leh hunbi kima rawngbâwltute chênna atân a siam a. Chu chu atân sum leh pai lama chânna nasa tak ni mah se, chuta awm thuchhuahtu rethei takte tân ṭanpuina nasa tak a ni. Thu hrilh rawngbâwlna khap behna ramahte chuan unaute’n an inte chu Kingdom Hall atân an hmang a. Chu chuan pioneer-te leh mi rethei dangte chu sum tam tak sênga hawh ngai lovin inkhâwmna hmun a neihtîr thei a ni.

10. Phal taka kan pêk hian eng hlâwkna ṭhenkhatte nge kan dawn?

¹⁰ Hêng entîrnate hian Pathian mite chu “tlêmte chunga rinawm” an ni tih a târ lang a. (Luka 16:10) An thil neihte chu mi dangte hlâwk nân an hmang a ni. Engtin nge chûng Jehova ṭhiante chuan chutianga inpêkna chu an ngaih? An thilphal hian vânah “sum tak” an nei tih an hria a, an hlim tak zet a ni. (Luka 16:11) Lalram rawngbâwlna atân pawisa thawh ṭhîn unaunu pakhat chuan kum tam tak chhûng chu thil dangdai tak a chungah a thleng tih a sawi a. Ani chuan: “Sum leh pai lama ka thilphal poh leh mi dangte chunga thilphal lehzual duhna ka nei a. Mi dangte ngaihdamnaah leh dawhtheihnaah hma ka sawn lehzualin, lunghnualna leh zilhnate chu ka pawmthiam lehzual a ni,” tiin a sawi. Mi tam tak chuan thilphalna chu a mi mal  takin an hlâwkpui tih an hria a ni.—Sâm 112:5; Thufingte 22:9.

11. (a) Engtin nge kan thilphalna chuan ‘rem hriatna’ a târ lan? (b) Tûn laiah Pathian mite zîngah eng thil nge thleng? (A thupui chunga milem en rawh.)

¹¹ Rawngbâwlnaa mi dangte ṭanpui nân kan sum leh paite kan hman hian ‘rem hriatna’ kan lantîr bawk a. Hunbi kimin, a nih loh leh mamawh lehzualna hmunah rawng kan bâwl thei lo a nih pawhin mi dangte ṭhatna tûr ka la ti thei tho a ni. (Thufingte 19:17) Entîr nân, kan thlawhhlawm thawhte hian kan thu leh hla chhuahte ti chhuak tûr leh mi tam tak thutak hmuhna, ram reitheia thu hrilh rawngbâwlna thlâwp tûrin a ṭanpui thei a ni. Congo, Madagascar, leh Rwanda ang chi ram retheiahte chuan Bible man a to hle a. A châng chuan bu khat man chu chawlhkâr tin hlawh emaw, thla tin hlawh emaw nên a inhen a ni. Kum tam tak chhûng chu, kan unaute chuan an chhûngte tân ei tûr an lei dâwn nge, Bible an lei zâwk dâwn tih duh thlanna an siam a ngai a. Tûnah chuan mi dangte thawhlâwm thawhte leh sum lama ‘inchawhrualna’ avângin, Jehova inawpna pâwl chuan Bible-te letlingin, chhûngkaw zînga mi tinte leh Bible zirpuite hnênah a thlâwnin a sem a. (2 Korinth 8:13-15 chhiar rawh.) Chuvângin, a petute leh a dawngtute chu Jehova ṭhian an ni ve ve thei a ni.

12. Engtin nge Abrahama’n Pathian a rinchhanzia a târ lan?

¹² Sumdâwnna khawvêl nên kan inhnamhnawih tlêm a, “sum tak” kan zawn hian Jehova nên kan inṭhian thei bawk a ni. Chu chu mi rinawm Abrahama’n a ti a ni. Jehova ṭhian nih a duh avângin puan ina awm tûrin Ur khawpui hausa tak chu chhuahsanin A thu a âwih a. (Hebrai 11:8-10) Ani chuan sum leh pai aiin Pathian a rinchhan ṭhîn a ni. (Genesis 14:22, 23) Isua chuan mi dangte chu chutiang rinna entawn tûrin a fuih a. Ṭum khat chu mi hausa tlangvâl pakhat hnênah: “Ṭha famkima awm i duh chuan, kal la, i neih chu hralh la, pachhiate hnênah pe rawh, chutichuan vânah ro i nei ang; tin, lo kal la, mi zui ang che,” tiin a hrilh a ni. (Matthaia 19:21) Chu tlangvâl chuan Abrahama neih ang rinna a nei lo. Mahse, Pathian rinchhantu mi dangte an awm.

13. (a) Paula chuan Timothea hnênah eng fuihna nge a pêk? (b) Tûn laiah Paula fuihna chu engtin nge kan nunpui theih?

¹³ Timothea chu rinna nei mi a ni a. Ani chu “Krista Isua sipai ṭha tak” tia a koh hnuah Paula’n: “Sipaia awm tûra thlangtu chu a tihlâwm theih nân, sipai tumah indo laiin tûn damchhûng khawsaknate hian a intihnawk ngai lo va,” tiin a hrilh a ni. (2 Timothea 2:3, 4) Hunbi kima rawngbâwl mi maktaduai khat aia tamte pawh tiamin tûn laia Isua hnungzuitute chuan Paula fuihna hi nunpui tûrin theih tâwp an chhuah a. He duhâmna khawvêlin thlêmna atâna a hman faknate chu an do a ni. Anni chuan: “Pûktu chu a pûktîrtu chhiahhlawh  a ni,” tih thu bul hi an hre reng a. (Thufingte 22:7) Setana chuan kan hun leh tha zawng zawngte chu a sumdâwnna khawvêl tâna hmang tûrin min duh a. Mi ṭhenkhat chuan in te, car te, zirna te, leh inneihna atânte sum tam tak an pûk a ni. Kan fîmkhur loh chuan kum tam tak chhûng leibâ kan nei thei a. Kan nun tisamkhai a, ba neih kan pumpelh a, pawisa kan hman tlêm hian rem hriatna kan lantîr a ni. Chutianga kan tih chuan tûn lai sumdâwnna khawvêl bâwiha awm lovin, Pathian rawngbâwl tûrin kan zalên thei ang.—1 Timothea 6:10.

14. Eng nge tih kan tum tlat ang? Entîrna pe rawh.

¹⁴ Nun tisamkhai reng tûr chuan, Pathian Ram kan dah hmasa ber tûr a ni a. Nupa tuakkhat chuan sumdâwnna lian tak leh hlâwk tak an nei a. Mahse, hunbi kima rawngbâwl leh an duh avângin, an sumdâwnna te, an lawng te, leh an thil neih dangte chu an zuar a. Warwick, New York-a world headquarters sakna ṭanpui tûrin mahni duh thuin an inpe a ni. Chutah chuan Bethel-a rawngbâwl an fanute nupa leh Warwick insaknaa thawk ve bawk an fanu pasala nu leh pate nên chawlhkâr engemaw zât an thawhho theih avângin chu chu an tân hun hlu tak a ni bawk. U.S.A., Colorado-a pioneer thawk unaunu pakhat chuan hunbi neiin bank-ah hna a thawk a. A thawh ṭhat êm avângin a hnathawhna pu chuan hunbi kima thawhtîr a, a hlawh pawh a lêtthuma pêk a duh thu a hrilh a ni. Mahse, chu hna a thawh chuan rawngbâwlnaa rilru a pêk theih dâwn loh avângin, chu sâwmna îtawm tak chu a hnâwl a ni. Hêngte hi Jehova rawngbâwltute’n mahni inpêkna an neih entîrna tam tak zînga tlêmtê chauh a ni a. Lalram zawn hmasak kan tum tlat chuan sum leh pai aiin Pathian nêna kan inṭhianna leh sum tak kan ngaihlu tih kan târ lang a ni.

15. Eng ang hausaknain nge lungawina nasa tak min thlen?

¹⁵ Hausak hi Pathian malsâwmna kan dawng tihna a ni kher lo. Jehova chuan ‘thil ṭha tih ngahtute’ chu mal a sâwm a ni. (1 Timothea 6:17-19 chhiar rawh.) Entîr nân, unaunu Lucia-i chuan Albania ramah rawngbâwltute an mamawh tih a hria a. * (Footnote en rawh.) Chuvângin, kum 1993-ah Italy aṭangin chutah chuan a insawn a. Hna nei lo mah se, Jehova’n a ṭânpui ang tih a ring tlat a ni. Albania ṭawng a zir a, inpumpêk tûrin mi 60 aia tam a ṭanpui a ni. Chutiang chiah chuan kan bial chhûnga thu hrilhnaah rah ṭha tak a chhuak lo pawh a ni mai thei. Mahse, Jehova chanchin hre tûr leh a ṭhian ni tûra mi dangte kan ṭanpuinaa kan thiltih engpawh chu chatuana kan hlut tûr thil pawimawh tak a ni.—Matthaia 6:20.

16. (a) Tûn lai sumdâwnnaah eng thil nge thleng ang? (b) Chu chuan sum leh pai kan thlîr dânah engtin nge a nghawng ang?

¹⁶ Isua chuan tûn lai sumdâwnna khawvêlte chu a tâwp ang tih chiang takin a sawi a. ‘Sum a boral tâkin’, ti lovin ‘a boral hunah’ tiin a sawi a ni. (Luka 16:9) Ni hnuhnûngahte hian bank ṭhenkhat chu tihtâwp a ni a, ram ṭhenkhatah chuan sumdâwnna a tla chhia hle a ni. Mahse, nakin lawkah chuan thil awm dânte chu a chhe  lehzual dâwn. Setana khawvêla politics te, sakhua te, leh sumdâwnnate chu a boral ang. Zâwlnei Ezekiela leh Zephania chuan sumdâwnnaa thil pawimawh tak ni ṭhîn rangkachakte leh tangkaruate chuan hlutna an nei tawh lo vang tiin an sawi lâwk a. (Ezekiela 7:19; Zephania 1:18) Sum lem hmuh theih nân sum tak kan lo chân reng a ni tih he khawvêla kan nun tâwp dâwn lamah inhre chhuak ta ila, engtin nge kan awm ang? Hausak tuma a dam chhûng zawng hna a thawh hnua a sum neih chu a lem vek a ni tih hre chhuaktu ang niin kan inhre ngei ang. (Thufingte 18:11) He khawvêl sum leh paite hi a boral dâwn a. Chuvângin, vâna ṭhiante siam nân i sum leh paite hman theihna hun remchâng chu hloh suh. Jehova leh a Lalram tâna kan thiltihte chuan hlimna dik tak min pe ang.

17, 18. Pathian ṭhiante’n eng nge an beisei?

¹⁷ Pathian Ram a lo thlen hunah chuan tuman chhiah an pêk emaw, sum an pûk emaw a ngai tawh lo vang. Ei tûr tam tak a awmin, a thlâwnin kan ei tawh ang a, doctor-te leh damdawite atâna insenso a ngai tawh lo vang. Jehova ṭhiante chuan leiin a chhuah thil ṭha tak takte chu an chên ang. Rangkachak te, tangkarua te, leh lunghlute chu an mawina atân an hmang ang a, tuemaw hausak nân an hmang lo vang. In mawi tak takte sak nân hmanraw ṭha tak tak thing te, lung te, leh thîr chi hrang hrangte chu a thlâwna hman theih a ni tawh ang. Kan ṭhiante chuan hlawh kan pêk vâng ni lovin, an duh thuin min ṭanpui tawh ang a. Lei aṭanga thil chhuak zawng zawngte chu kan hmang tlâng dial dial tawh ang.

¹⁸ Hei hi vâna ṭhian siamtute tân lâwmman hlu tak zînga tel a ni a. Leia Jehova betute’n Isua thusawi: “Ka pa voh bîkte u, lo kal ula khawvêl siam ṭantirh ata in tâna ram buatsaih chu chang rawh u,” tih an hriat hunah chuan hlim takin an au vang.—Matthaia 25:34.