1, 2. Jehova en tlat tih awmzia chu eng nge ni?

TUN kan hun hi “hun khirh tak” a ni a. (2 Timothea 3:1) Jehova’n he khawvêl suaksual a tihboral a, he leiah remna dik tak a thlentîr hma chuan nun chu a harsa zual sauh dâwn a ni. Chuvângin, ‘Ṭanpuina leh kaihhruaina hmu tûrin tu lam nge ka en?’ tiin kan inzâwt tûr a ni. “Jehova lamah” tiin kan chhâng nghâl ngei ang, chu chu chhânna ṭha ber a ni.

² Jehova en tlat tih awmzia chu eng nge ni? Buaina kan neih hunah engtin nge ani chu kan en tlat theih? Tûn hmain Bible ziaktu pakhat chuan ṭanpuina kan mamawh hunah Jehova kan en a ṭûlzia a lo hrilhfiah tawh a. (Sâm 123:1-4 chhiar rawh.) Jehova kan en hian, a pu entu chhiahhlawh ang kan ni tih a sawi a ni. Chu chu engtin nge a nih theih? Chhiahhlawh chuan ei tûr hmu tûr leh humhim ni tûrin a  pu chu a en, a nih loh leh a rinchhan tlat a. A puin ti tûra a duhte a hriat theih nân a pu chu a en reng a ngai a, chu chu a ti ngei bawk tûr a ni. Chutiang bawkin, Jehova’n ti tûra min duhte hre thiam tûrin Pathian Thu chu nî tin ngun taka kan zir a ngai a, kan nunpui ngei tûr a ni a. Chutiang a nih chuan, ṭanpui kan ngaih hunah Jehova’n min ṭanpui ang tih kan chiang thei a ni.—Ephesi 5:17.

3. Engin nge Jehova en tlat lo tûra kan rilru la pêng thei?

³ Jehova chu kan en tlat tûr a ni tih hre mah ila, a châng chuan kan rilru a kal pêng thei a. Isua ṭhian hnai tak Marthi chungah chutiang chiah chuan a thleng a ni. Ani chu “rawngbâwl ngawtin a buai hle a.” (Luka 10:40-42) Marthi ang mi rinawm pawh Isua bula a awm chung pawha a rilru a kal pêng a nih chuan, kan rilru a kal pêng thei chu mak kan ti tûr a ni lo. Chuvângin, Jehova kan enna ata kan rilru kal pêntîr theitu chu eng nge ni? He thuziakah hian, mi dangte thiltihin kan rilru a kal pêntîr theih dân kan sawiho ang a. Jehova kan en tlat theih dân pawh kan sawiho bawk ang.

4. Mosia’n Ram Tiam luh theihna chanvo hlu a hloh chu engvângin nge mak kan tih mai theih?

⁴ Mosia chuan kaihhruaina hmu tûrin Jehova a en tlat tih chu a chiang hle a. Bible chuan “hmuh theih lohva chu a hmuh avângin a tuar ṭan ṭan a ni,” tiin min hrilh a ni. (Hebrai 11:24-27 chhiar rawh.) “Chuta chin chu Israelte zîngah Mosia anga LALPAN hmaichhan meuhva a biak zâwlnei rêng rêng an lo awm ta lo va,” tiin a sawi bawk. (Deuteronomy 34:10) Mahse, Mosia chuan Jehova nêna inṭhian ṭhatna a nei chung pawhin, Ram Tiama luh theihna chanvo hlu a neih chu a hloh a ni. (Numbers 20:12) Eng thil nge a tihsual?

5-7. Israel mite’n Aigupta an chhuahsan hnu lawkah eng thil nge thleng a, Mosia’n eng nge a tih?

⁵ Israel mite’n Aigupta an chhuahsan hnu thla hnih a tlin hma leh Sinai Tlâng an thlen hmain thil pawi tak a thleng a. Mite chu tui an neih loh avângin an phunnawi ṭan a ni. Mosia chungah an phunnawi a, an thinrim êm avângin “Mosian, ‘Hêng mipuihote hi engtin nge ka tih ang? Lunga min denhlum hial pawh an duh âwm hi,’ tiin LALPA hial a au va.” (Exodus 17:4) Jehova’n Mosia chu kaihhruaina chiang tak a pe a. A tiang la a, Horeb-a lung vaw tûrin a hrilh a ni. Bible chuan: “Mosian Israela thlahte upaho mithmuhah chuan chutiang chuan a han ti a,” tiin a sawi. Tichuan, tui a lo chhuak a, Israel mite chuan tui in tûr an nei ta a, an buaina chu chinfel a ni ta a ni.—Exodus 17:5, 6.

⁶ Bible chuan Mosia’n chu hmun chu “Fiah” tih awmze nei Massa tih leh “Beih” tih awmze nei Meriba tih hming a vuah thu min hrilh a. Engvângin nge? “Israela thlahten an beih avâng leh, ‘Kan zîngah hian LALPA chu a awm nge maw awm lo le?’ tia LALPA chu an fiah avângin.”—Exodus 17:7.

⁷ Meriba-a thilthleng chu Jehova’n engtin nge a ngaih? Israelte chu Mosia chungah ni lovin, a chungah leh a thuneihna lakah an hel niin a ngai a. (Sâm  95:8, 9 chhiar rawh.) Israelte thiltih chu sual lian tak a ni. Mahse, Mosia chuan thil dik a ti a. Jehova a en tlat a, a kaihhruainate chu fîmkhur takin a zâwm a ni.

8. Israel mite thlalêra an khual zin tâwp dâwn lamah eng thil nge thleng?

⁸ Mahse, kum 40 vêl a liam hnuah chutiang dinhmunah chuan eng thil nge thleng? Israel mite thlalêra an khual zinna chu a tâwp ṭêp tawh a. Ram Tiam ramri Meriba tia hriat ni bawk, Kades bul chu an thleng tawh a ni. * (Footnote en rawh.) Engvângin nge? Israel mite chu tui a awm loh avângin an phunnawi leh a. (Numbers 20:1-5) Tûn ṭumah erawh chuan Mosia’n thil sual pawi tak a ti ta a ni.

9. Jehova’n Mosia hnênah eng kaihhruaina nge a pêk a; mahse, Mosia’n eng nge a tih? (A thupui chunga milem en rawh.)

⁹ Mite an hel chuan Mosia’n eng nge a tih? Kaihhruaina hmu tûrin Jehova a en leh a. Mahse, tûn ṭumah chuan Jehova’n Mosia chu lungpui vaw tûrin a hrilh lo. A tiang la a, mite chu lungpui bula hruai a, lungpui chu hrilh tûrin a ti a ni. (Numbers 20:6-8) Chutiang chuan Mosia’n a ti em? Ti lo. A rilru a buai a, a thinrim êm avângin: “Helhmanghote u, ngai teh u, he lungpui ata hi tui kan lâk chhuahsak dâwn che u em ni?” tiin a ânkhum a. Tichuan, lungpui chu vawi khat mai ni lovin, vawi hnih a vua a ni.—Numbers 20:10, 11.

10. Engtin nge Jehova’n Mosia thiltih chu a chhân lêt?

¹⁰ Jehova chu Mosia chungah a thinrim hle a. (Deuteronomy 1:37; 3:26) Engvângin nge? A chhan pakhat chu Jehova pêk kaihhruaina thar a zawm loh vang a ni thei.

11. Mosia’n lungpui a vuak khân engvângin nge Israel mite’n Jehova thilmak tih ni lo anga an ngaih theih?

¹¹ Jehova thinrim chhan dang pawh a la awm thei a. Meriba hmun hmasa zâwka lungpui lian takte chu lung chang tak a ni a. Miin lung chang tak chu theih tâwp chhuahin vaw mah se, tui rawn chhuak tûrin tumahin an beisei lo ang. Mahse, Meriba hmun hnuhnûng zâwka lungte chu a danglam hle a. A tam zâwk chu chinai lung ang chi a ni. Chinai lung chu lung chang vak lo a nih avângin a chhûngah tui a lût theiin, lei hnuaiah a khawlkhâwm thei a ni. Tichuan, mite’n lungpui chu kher kuain tui an hmu thei a. Chuvângin, Mosia’n lung chu hrilh lo va a vuak chuan Jehova thilmak tih vâng ni lovin, amaha tui rawn pût chhuak ve maiah Israel mite’n an ngai thei ang em? * (Footnote en rawh.) A nih dân chiah chu kan sawi thei lo.

12. Mosia leh Arona chunga Jehova thinrim chhan dang leh chu eng nge ni thei?

¹² Mosia leh Arona chunga Jehova thinrim êm êm chhan dang pawh a la awm thei a. Mosia’n mite hnênah: “He lungpui ata hi tui kan lâk chhuahsak dâwn che u em ni?” tiin a hrilh a. Mosia’n “kan” tia a sawi khân amah leh Arona a sawina a ni thei. Chu thil mak tihna avânga chawimawina zawng zawng chu Jehova a pêk loh avângin Mosia thusawi chu zah lohna lantîrna a ni. Sâm 106:32, 33 chuan: “Meriba tuiahte pawh chuan ani chu an tithinur a, chutichuan anmahni avângin Mosia chungah thil ṭha lo a thleng ta hial a: A thlarau chunga an hel a, a hmuia ṭha lo taka a sawi avângin,” tiin a sawi. * (Footnote en rawh.) (Numbers 27:14) Mosia chuan Jehova chu a phu angin chawimawina a pe lo va. Jehova’n Mosia leh Arona hnênah: “Ka thu dodâla in hel avâng khân,” tiin a hrilh a ni. (Numbers 20:24) Chu chu sual pawi tak a va ni êm!

13. Jehova’n Mosia a hrem dân chu engvângin nge thil dik leh inâwm tak a nih?

¹³ Jehova’n Mosia leh Arona chu A mite hruaitu an nih avângin an lakah a beisei sâng hle a. (Luka 12:48) Tûn hmain, Jehova’n Israel hnam pumpui chu a chunga an hel avângin Ram Tiama an luh a phal lo a ni. (Numbers 14:26-30, 34) Chuvângin, Mosia a hel khân, Jehova’n chutianga a hrem chu a dikin thil inâwm tak a ni. Helho dangte ang bawkin, Mosia pawh Ram Tiama luh phal a ni lo.

14, 15. Mosia chu Jehova laka hel tûrin engin nge chêttîr?

¹⁴ Mosia chu Jehova laka hel tûrin engin nge chêttîr? Sâm 106:32, 33 sawi hi lo chhinchhiah leh ang che: “Meriba tuiahte pawh chuan ani chu an tithinur a, chutichuan anmahni avângin Mosia chungah thil ṭha lo a thleng ta hial a: A thlarau chunga an hel a, hmuia ṭha lo taka a sawi avângin,” tih hi. Israel mite chu Jehova chungah hel mah se, lo thinrim êm êmtu chu Mosia a ni a. Insumtheihna a lantîr lo va, a sawhkhawk tûr ngaihtuah lovin thu a sawi a ni.

¹⁵ Mosia chuan mi dangte thiltihin a rilru a lâk pêntîr avângin Jehova a en tawh lo va. Tui chungchânga mite phunnawi hmasak ṭum khân Mosia chuan thil dik a ti a. (Exodus 7:6) Kum tam tak chhûng Israel mite an hel avângin a ningin a rilru a hah pawh a ni thei. Tûnah chuan, Pathian Jehova chawimawi aiin a rilru vei zâwng ringawt a ngaihtuah a ni thei ang.

16. Mosia thiltih chu engvângin nge kan ngaihtuah ang?

¹⁶ Mosia ang zâwlnei rinawmte mah an rilru a pêng thei a nih chuan chutiang thil chu kan chungah pawh awlsam takin a thleng ve thei a. Mosia chu Ram Tiamah  a lût ṭep tawh ang bawkin, keini pawh khawvêl tharah kan lût ṭep tawh a ni. (2 Petera 3:13) Chu chanvo hlu tak chu hloh kan duh lo. Mahse, khawvêl thara lût tûr chuan Jehova kan en zawm zêl a, a thu kan âwih reng a ngai a ni. (1 Johana 2:17) Mosia thil tihsual aṭangin eng nge kan zir theih?

17. Kan rilru tihbuaia a awm hunah insumtheihna hloh chu engtin nge kan pumpelh theih?

¹⁷ I rilru tihbuaia a awm hunah insumtheihna lantîr rawh. A châng chuan kan buaina ngai bawk hi ka hmachhawn leh ṭhîn a. Mahse, Bible chuan: “Tichuan thil ṭha tih i ning suh ang u; kan inthlahdah loh zawngin a hun takah chuan kan seng dâwn si a,” tiin a sawi a ni. (Galatia 6:9; 2 Thessalonika 3:13) Thil engemaw, a nih loh leh tuemawin min tihbuai fo hunah kan ṭawng chhuah hmain kan ngaihtuah hmasa em? Kan rilru kan thunun em? (Thufingte 10:19; 17:27; Matthaia 5:22) Mite’n min tihthinrim hunah “Pathian thinurna kian zâwk” dân kan zir a ngai a. (Rom 12:17-21 chhiar rawh.) Chu chuan eng awmzia nge a neih? Thinrim nghâl mai aiin, Jehova’n kan buaina chungchângah hma lâk ngai nia a ngaih  huna thil engemaw a tih tûr chu dawhthei takin kan nghâk zâwk tûr tihna a ni. Jehova en lo va, phuba lâk kan tum chuan amah kan zah lo tihna a ni ang.

18. Kaihhruainate zuina chungchângah eng nge kan hriat reng ang?

¹⁸ Kaihhruaina thar ber chu fîmkhur takin zui rawh. Jehova min pêk kaihhruaina thar berte chu rinawm takin kan zui em? Tûn hmaa kan lo tih ṭhin dân a nih vâng maiin, chutiang chuan kan ti zawm zêl tûr tihna a ni lo. Chu ai chuan, Jehova’n a inawpna pâwl hmanga min pêk kaihhruaina thar engpawh chu kan zui vat zâwk tûr a ni. (Hebrai 13:17) Chu bâkah, ‘thu ziakte khûm’ lo tûrin kan fîmkhur tûr a ni bawk. (1 Korinth 4:6) Jehova kaihhruainate fîmkhur taka kan zui hian amah kan en tlat tihna a ni.

19. Mi dangte thil tihsual avânga Jehova nên kan inṭhianna tihchhiat chu engtin nge kan pumpelh theih?

¹⁹ Mi dangte thil tihsualin Jehova nêna in inṭhianna tichhe suh se. Jehova kan en tlat chuan, mi dangte thiltih avângin Jehova nêna kan inṭhianna a chhe lo vang a, kan thinrim lo bawk ang. Pathian inawpna pâwlah Mosia anga mawhphurhna ṭhenkhat kan nei a nih chuan, chu chu a pawimawh lehzual a ni. Dik tak chuan, kan za hian kan thawhrim a, chhandam ni tûra Jehova thu ka âwih a ngai a. (Philippi 2:12) Mahse, mawhphurna kan neih tam poh leh Jehova’n kan lakah a beisei tam lehzual a ni. (Luka 12:48) Jehova kan hmangaih tak zet chuan engmahin min titlu lovin, a hmangaihna ata min ṭhen hrang thei lo vang.—Sâm 119:165; Rom 8:37-39.

20. Eng nge tih kan tum tlat ang?

²⁰ Hun harsa tak leh khirh takah kan awm a. Chuvângin, “vâna ṭhu ṭhîn” Jehova chu en tlat a, ti tûra min duhte hriatthiam tum chu a pawimawh hle. Mi dangte thiltihin Jehova nên kan inṭhianna a tihchhiat chu kan phal ngai lo vang. Mosia chunga thilthleng chuan chu zir tûr pawimawh tak chu min zirtîr a ni. Mi dangte’n thil an tihsual hunah a lutuka chhân lêt aiin, kan mitin “LALPA kan Pathian lam a en ṭhîn angin, min khawngaih hmâ loh chuan,” en tlat i tum ang u.—Sâm 123:1, 2.