Jehova Ta Kan Ni
“LALPA Pathiana nei hnam chu an eng a thâwl e; ama rochana a thlan mite chu.”—SAM 33:12.
HLA: 31, 48
1. Engvângin nge engkim hi Jehova ta a ni kan tih theih? (A thupui chunga milem en rawh.)
ENGKIM hi Jehova ta a ni a! “Vân te, vânte vân leh leilung leh a chhûnga awm zawng zawng hi,” a ta vek a ni. (Deuteronomy 10:14; Thu Puan 4:11) Jehova chu mihringte siamtu a nih avângin kan za hian ama ta kan ni a. (Sâm 100:3) Mahse, Pathianin mihring zîng aṭangin ama ta bîk tûr ṭhenkhatte a thlang a ni.
2. Bible sawi dân chuan Jehova ta bîkte chu tute nge an nih?
2 Entîr nân, Sâm 135-na chuan hman lai Israel rama rinawm taka Jehova chibai bûktute chu “a ro bîk” tiin a târ lang a. (Sâm 135:4) Chu bâkah, Hosea chuan Israel mi ni lo, mi ṭhenkhatte chu Jehova mite an ni ang tih a sawi lâwk a ni. (Hosea 2:23) Chu hrilh lâwkna chu Jehova’n vâna Krista nên rorêl tûra Israel mi ni lote a thlan aṭang khân a thleng famkim a. (Tirhkohte 10:45; Rom 9:23-26) Thlarau thianghlima hriak thihte chu “hnam thianghlim,” tia koh an ni. Anni chu Jehova “mite ngei” an ni. (1 Petera 2:9, 10) A nih leh, leia chatuan nun beiseitu tûn laia Kristian mi rinawm zawng zawngte chungchâng hi eng nge ni ve? Jehova’n anni chu “ka mite” tih leh “ka mi thlante,” tiin a ko bawk a ni.—Isaia 65:22.
3. (a) Tûn laiah tute’n nge Jehova nêna inlaichînna ṭha bîk nei? (b) He thuziakah hian eng nge kan sawiho ang?
3 Tûn laiah, vâna chatuan nun beiseitu “pâwl tlêmte,” leh leia chatuan nun beiseitu “berâm dang” chuan ‘pâwl khat’ angin Jehova an be tlâng a. (Luka 12:32; Johana 10:16) Jehova nêna inlaichînna ṭha tak kan neih avânga a chunga kan lâwmzia lantîr chu kan duh a ni. He thuziakah hian, chawimawi bîkna kan dawn avânga Jehova chunga kan lâwmzia lantîr theih dân kan sawiho vang.
JEHOVA HNENAH KAN INPUMPEK
4. Jehova’n amah nêna inlaichînna ṭha neih min phalsak avângin engtin nge kan lâwmzia kan lantîr theih a, engtin nge Isua’n chutiang chu a tih?
4 Jehova hnêna kan inpumpêk a, baptisma kan chan hian a chunga kan lâwmzia kan lantîr a. Tichuan, Jehova ta kan ni tih leh a thu âwih kan duh tih mi zawng zawngin an hmu a ni. (Hebrai 12:9) Isua pawhin baptisma a chan khân chutiang chuan a ti a. Ani chu Jehova hnêna inpumpêk tawh hnama mi ni mah se, Jehova hnênah a inhlân a. Chu chu “I duhzâwng tih hi ka lâwmzâwng tak a ni,” tia sawi ang a ni.—Sâm 40:7, 8.
5, 6. (a) Isua baptisma a chan khân Jehova’n eng nge a sawi? (b) Kan inpumpêkna avânga Jehova ngaih dân hre thiam tûrin eng tehkhin thuin nge min ṭanpui thei?
5 Isua baptisma a chan khân Jehova’n engtin nge a ngaih? Bible chuan: “Isua baptisma a chan veleh tui ata a chhuak ta nghâl a: tin, ngai teh, a tân vân a lo inhawng a, Pathian thlarau chu ṭhuro anga lo chhukin, a chunga lo fu a hmu a. Tin, ngai teh, vân aṭangin awin, “Hei hi ka Fapa duh tak, ka lawm êm êma chu a ni,” tiin a sawi. (Matthaia 3:16, 17) Isua chu Pathian ta a ni sa reng a. A rawng chauh bâwl tûrin a nun hman a duh tih Jehova’n a hmuh chuan a hlim hle. Chu bâkah, a hnêna kan inpumpêk hian a lâwm a, mal min sâwm ang.—Sâm 149:4.
6 Mahse, engkim hi Jehova ta a ni si a! Eng nge kan pêk theih? Pangpâr huan mawi tak nei mi pakhat chu han mitthla teh. Nî khat chu a fanuin pangpâr pakhat thliakin, a pa chu a pe a. Chu pangpâr chu a pa ta ni sa reng mah se, hmangaihna nei tak a pa chu a fanu thilpêk avângin a hlim hle a ni. Chu chu a fanuin a pa a hmangaihzia a târ lanna a ni a. A fanu pêk pangpâr chu huana pangpâr dang zawng zawng aiin a pa tân a hlu zâwk a ni. Chutiang bawkin, Jehova hnêna inhuam taka kan inpumpêk hian ani chu a lâwm hle.—Exodus 34:14.
7. Jehova’n inhuam taka a rawngbâwltute a thlîr dân hre thiam tûrin Malakia’n engtin nge min ṭanpui?
7 Malakia 3:16 chhiar rawh. Jehova hnêna inpumpêk a, baptisma chan chu engvângin nge a pawimawh tak zet? I pian phat aṭangin nangmah Siamtu Jehova ta i ni reng tih chu a dik ngei mai. Mahse, Jehova hnêna i inpumpêk a, i Rorêltu atâna i pawm huna a lâwm dân tûr chu han ngaihtuah teh. (Thufingte 23:15) Jehova chuan a rawngbâwl duhtute chu a hria a, an hming chu a ‘hriat rengna lehkhabuah’ a ziak a ni.
8, 9. Jehova’n a ‘hriat rengna lehkhabua’ an hming a ziah luhte hnênah eng nge a phût?
8 Jehova ‘hriat rengna lehkhabua,’ kan hming chuantîr reng kan duh chuan thil pakhat kan tih a ngai a. Malakia chuan Jehova kan ṭih a, a hming awmzia kan chhût ngun a ṭûl tih a sawi a ni. Mi dang emaw, thil dang emaw kan bia a nih chuan Jehova lehkhabu ata kan hming thai bo a ni ngei ang!—Exodus 32:33; Sâm 69:28.
Kan dam chhûng hian Jehova thu kan âwih tih kan thiltihin kan lantîr tûr a ni
9 Chuvângin, Jehova duh zâwng ti tûra thu kan tiam hnua baptisma chan mai chu a tâwk lo. Chûngte chu vawikhat chauh tih ngai a ni a, Jehova biakna erawh chu dam chhûnga tih tûr a ni a. Kan dam chhûng hian Jehova thu kan âwih tih kan thiltihin nî tin kan lantîr tûr a ni.—1 Petera 4:1, 2.
KHAWVEL CHAKNATE CHU KAN HNAWL
10. Jehova rawngbâwltute leh bâwl lotute inkârah eng ang danglamna langsâr tak nge awm?
10 Thuziak hmasaah khân, Kaina, Solomona, leh Israel mite chuan Jehova betu niin inchhâl mah se, a chungah an rinawm lo tih kan hre tawh a. Chûng entîrnate chuan Jehova kan bia tia sawi mai chu a tâwk lo tih min zirtîr a ni. Sual kan huat a, thil ṭha kan ngainat a ngai a. (Rom 12:9) Jehova chuan “mi fel leh mi suaksual, Pathian rawngbâwltu leh bâwl lotu” chu an danglam hle dâwn tih a sawi a ni.—Malakia 3:18.
11. Jehova chauh chibai kan bûk tih engvângin nge mite’n awlsam taka an hmuh a ngaih?
11 Jehova’n a mi ni tûra min thlan avângin kan va lâwm tak êm! Jehova lamah kan ṭang a ni tih mite’n awlsam takin an hmu tûr a ni. (Matthaia 5:16; 1 Timothea 4:15) Heti hian inzâwt rawh: ‘Jehova chungah ka rinawm tlat tih mi dangin an hmu em? Jehova Thuhretu pakhat ka ni tih mite hnênah inchhuang takin ka sawi em?’ tiin. Jehova ta kan ni tih mite kan hrilh hreh a nih chuan Jehova pawi tih dân tûr chu ngaihtuah rawh.—Sâm 119:46; Marka 8:38 chhiar rawh.
I nun dân chuan Jehova Thuhretu pakhat i ni tih a târ lang chiang em? (Paragraph 12, 13-na en rawh)
12, 13. Engtin nge mi ṭhenkhat chu Jehova Thuhretute an nihzia lantîr tumtute tân harsatna thlentu an nih?
12 Lungchhiatthlâk takin, Thuhretu ṭhenkhatin “khawvêl thlarau” an en tawn a. Chuvângin, anni chu Jehova be lotute nên hriat hran an harsa a ni. (1 Korinth 2:12) “Khawvêl thlarau” chuan mite chu mahni châkna ringawt a ngaihtuahtîr a. (Ephesi 2:3) Entîr nân, fuihna tam tak kan dawng chung pawhin, mi ṭhenkhat chu mawi lo takin an inthuam a ni. Kristian inkawm khâwmnaahte tâwt lutuk leh lang lutukin an inthuam a. A nih loh leh, an samte chu a lutukin an siam danglam a ni. (1 Timothea 2:9, 10) Chuvângin, mi dangte tân Jehova Thuhretu an nih leh nih loh hriat hran a harsa mai thei a ni.—Jakoba 4:4.
13 Thuhretu ṭhenkhatte chu khawvêl laka an danglam lutuk loh dân kawng dang pawh a awm a. Entîr nân, party-ahte chuan ṭhenkhat chu Kristiante pawm theih loh kawngin an lâmin, an che a ni. Mi dang lehte chuan an thlalâkte chu facebook-ah post-in, an comment-te chuan tisa lam thil an ngaihtuahzia a târ lang a. Chûng mite chuan thil sual pawi tak avânga Kristian kohhranah zilhna tâwk khêr lo mah se, khawvêl laka danglam tum unaute chungah nghawng ṭha lo tak an nei thei a ni.—1 Petera 2:11, 12 chhiar rawh.
Jehova lama ṭang pumhlûm lotute thununin awm suh
14. Jehova nêna kan inṭhian ṭhatna humhim tûrin eng nge kan tih ngai?
14 Khawvêla thil awm zawng zawng hi “tisa châkna te, mit châkna te, dam chhûng ropuina lem te” ngaihven tûra duan a ni a. (1 Johana 2:16) Keini chu Jehova ta kan nih avângin kan danglam a ni. “Pathian ngaihsak lohna leh khawvêl châknate bânsanin, tûn lai khawvêlah hian insûm leh fel tak leh Pathian ngaihsakin kan awm,” zâwk a ni. (Tita 2:12) Kan ṭawng te, kan ei leh in te, kan silhfên te, leh kan hnathawh dânte pawh tiamin, kan nun kawng pumhlûm hian Jehova ta kan nihzia a lantîrna chu mite’n an hre chiang tûr a ni.—1 Korinth 10:31, 32 chhiar rawh.
‘INHMANGAIH TAWN I UAR ANG U’
15. Engvângin nge kan Kristianpuite chungah ngilneihna leh hmangaihna kan lantîr ang?
15 Kan unaute kan cheibâwl dânin Jehova nêna kan inṭhian ṭhatna kan ngaihhlutzia a târ lang a. Keimahni ang bawkin, anni pawh Jehova ta an ni. Chu chu kan hriat reng chuan ngilnei tak leh hmangaih takin kan cheibâwl reng ang. (1 Thessalonika 5:15) Chu chu eng anga pawimawh nge a nih? Isua’n a hnungzuitute hnênah: “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a hrilh a ni.—Johana 13:35.
16. Mosia Dân aṭangin Jehova’n a mite a ngaihsakzia engtin nge kan hriat?
16 Mosia Dâna entîrna chuan kohhrana mi dangte kan cheibâwl dân hre thiam tûrin min ṭanpui thei a. Jehova biak inah chuan biakna atân chauhva hman tûr hmanruate a awm a ni. Dân chuan Levia mite chu chûng hmanruate an enkawl dân tûr a hrilh a, chu kaihhruaina zâwm lotu apiang chu tihhlum an ni. (Numbers 1:50, 51) Jehova’n amah biaknaa hman tûr chûng thilte enkawl dânah chuti taka a ngaihsak a nih chuan a hnêna inpumpêk a, rinawm taka amah chibai bûktute cheibâwl dân chu a va ngaihsak nasa lehzual dâwn êm! “Nangmahni khawihtu chuan a mit nautê a khawih a ni mai,” tih thu hian min ngaihhlutzia min hriattîr a ni.—Zakaria 2:8.
Khualchhâwn thiamna te, thilphalna te, ngaihdamna te, leh ngilneihna kan lantîrte chu Jehova’n a hria
17. Jehova’n eng nge ‘a lo ngaihthlâk a, a lo hriat’?
17 Malakia chuan Jehova’n a mite an indâwr tawn dân chu “a lo ngaithla a,” tiin a sawi a. (Malakia 3:16) Jehova’n “ama tate chu a hria.” (2 Timothea 2:19) Kan thiltih leh thusawi engkim hi a hre vek a ni. (Hebrai 4:13) Kan unaute chunga ngilneihna kan lantîr loh hunah pawh a hria a. Mahse, khualchhâwn thiamna te, thilphalna te, ngaihdamna te, leh ngilneihna kan lantîrte chu Jehova’n a hre bawk tih kan chiang thei a ni.—Hebrai 13:16; 1 Petera 4:8, 9.
“JEHOVA CHUAN A MITE A PAIH THLA DAWN SI LO VA”
18. Jehova’n a mi ni tûra min thlan avângin engtin nge kan lâwmzia kan lantîr theih?
18 Jehova ta leh a mite kan nih avângin a chunga kan lâwmzia lantîr chu kan duh a. A hnêna kan inpumpêk hian, duh thlânna ṭha ber kan siam tih kan hria a ni. “Chhuan bengtla lo leh tihmawhte zînga,” awm ni mah ila, ‘sual nei lo leh sawisêlbovin’ ‘khawvêla tiêngtu angin’ kan la êng thei reng a ni. (Philippi 2: 15) Chuvângin, Jehova huat zâwng thil engmah tih loh chu kan tum tlat a. (Jakoba 4:7) Kan unaute pawh Jehova ta an nih avângin kan hmangaihin, kan zah tûr a ni.—Rom 12:10.
19. Jehova’n ama tate chu engtin nge lâwmman a pêk?
19 Bible-in: “LALPA chuan a mite a paih thla dâwn si lo va,” tih min tiam a. (Sâm 94:14) Chu chu intiamkamna a ni. Eng thil pawh thleng se, Jehova’n min awmpui ang. Kan thi a nih pawhin min theihnghilh lo vang. (Rom 8:38, 39) “Kan nun chuan Lalpa tân kan nung a; kan thih pawhin Lalpa tân kan thi a ni si; chuvângin kan nun pawhin, kan thih pawhin, Lalpa ta kan ni.” (Rom 14:8) Jehova’n thi tawh a ṭhian mi rinawm zawng zawngte a kaihthawh hun tûr chu kan nghâkhlel tak zet a. (Matthaia 22:32) Tûnah ngei pawh kan Pa hnên aṭangin thilpêk ropui tak takte kan dawng a ni. Bible-in “LALPA Pathiana nei hnam chu an eng a thâwl e; Ama rochana a thlan mite chu,” tia a sawi angin.—Sâm 33:12.
