ISUA’N chanchin ṭha hrilh dân tûr a hnungzuite a zirtîr khân, mite’n an ngaithla duh reng dâwn lo tih a vaukhân a. (Luka 10:3, 5, 6) Kan rawngbâwlnaah pawh chutiang bawk chu a ni. Kan mi tawn ṭhenkhatte chu mi chaltlai tak, a nih loh leh thinrim hma tak pawh an ni thei a. Chutianga min chhâng lêt a nih chuan an chunga khawngaihna lantîr chu a harsa mai thei a, thu kan hrilh duh tawh lo pawh a ni thei.

Mi khawngaih theitu chuan mi dangte mamawh leh harsatnate chu a hmuin, a tawrhpui a, ṭanpui a duh bawk. A nih leh, rawngbâwlnaa kan mi tawnte chunga khawngaihna kan neih loh chuan engtin nge ni ang? Kan ṭhahnem ngaihna kan hloh ang a, thu hrilhnaah kan phûr tawh lovin, ṭanpui duhna kan nei tawh lo vang. Kan ṭhahnemngaihna chu mei nên kan khaikhin thei a. Mei alh reng tûr chuan thing kan tuah belh zêl a ngai a. Chutiang bawkin, ṭhahnemngaihna nei reng tûr chuan khawngaihna kan neih a ngai!—1 Thessalonika 5:19.

Engtin nge a harsat hunah pawh khawngaihna kan lantîr reng theih? Kan entawn theih mi pathumte chungchâng kan sawiho vang: Jehova, Isua, leh tirhkoh Paula.

Kum sâng tam tak chhûngin, mite chuan Jehova chungchâng dik lo takin an sawi ṭhîn a. Mahse, ani chuan “lâwm nachâng hre lote leh mi sualte a khawngaih ṭhîn.” (Luka 6:35) Engtin nge a khawngaihna chu a lantîr? Jehova chu mi zawng zawng chungah a dawhthei a. “Mi zawng zawng” chhandama awmah a duh a ni. (1 Timothea 2:3, 4) Pathianin sualna a haw chung pawhin, mite chu a tân an hlu a, tuma boral a duh lo a ni.—2 Petera 3:9.

Jehova chuan Setana chu mite bum thiam tak a ni tih a hria a. (2 Korinth 4:3, 4) Mi tam tak chu an naupan têt aṭangin Pathian chungchâng dik lo taka zirtîr an ni a. Chuvângin, an ngaihtuah dân leh an thlîr dân chuan thutak pawm a ti harsa mai thei. Mahse, Jehova chuan ṭanpui a châk hle. Engtin nge kan hriat?

Entîr nan, Jehova’n Ninevi khuaa mite a thlîr dân hi han ngaihtuah teh. Anni chu tharum thawh hmang ni mah se, Jehova’n Jona hnênah: “Ninevi khua, khawpui ropui tak, a chhûnga mi nuaikhat leh sînghnih aia tam, an ding leh vei pawh thliar thei lote leh ran rual tam tak awmna hi ka khawngaih lo vang em ni?” tiin a hrilh a ni. (Jona 4:11) Jehova’n a chungchânga thu dik la hre lo chûng mite chu a khawngaih a. Chuvângin, anmahni vaukhân tûrin Jona a tîr a ni.

Jehova’n mite a thlîr dân angin keini pawhin kan thlîr ve a. Anni chu an hlu a ni. Jehova angin, thutak pawm duh lo anga an lan hunah pawh a chungchâng zirtîr chu kan duh tak zet a ni.

 Mite’n kan thuchah ken ṭha lo taka an chhân lêt hunah chutianga an tih chhan hriatthiam kan tum tûr a ni. Anni chuan Kristian nia inchhâlte’n thil sual takte an ti ṭhîn tih an hmuh avângin Bible, a nih loh leh Kristiante chungchângah ngaih dân dik lo tak an nei pawh a ni thei. Mi dangte chuan kan thurin chungchângah dâwt thu an hriat vâng pawh a ni thei a. Mi dang lehte chuan min biak chuan an chhûngte leh khawtlâng mite nuihsawh an hlauh vâng pawh a ni thei bawk.

Kan mi tawn ṭhenkhatte chuan thiltawn râpthlâk tak an tawng pawh a ni mai thei a. Missionary thawk mêk Kim-i chuan a rawngbâwlna biala mi tam tak chu indona ata dam khawchhuak a, an thil neih zawng zawng chânte an ni tih a sawi. Anni chuan nakin hun beiseina dik tak an nei lo. An rilru a nâin, tumah an ring ngam tawh lo va. Chu mi biala awmte chuan Thuhretute chu thu hril tawh lo tûrin an ti fo ṭhîn. Ṭum khat chu Kim-i chuan rawngbâwlnaa a tel laiin beihna a tâwk hial a ni.

Mite’n ṭha lo taka an cheibâwl chung pawhin engtin nge Kimi’n khawngaihna a neih reng theih? Thufingte 19:11-a: “A ngaihruat thiamnain mi a thin a tihnelsak ṭhîn,” tih thu hi hriat reng a tum a ni. A rawngbâwlna biala mite thiltawn a ngaihtuah chuan anni chu a khawngaih êm êm a. A mi tawnte chu mi hawihhawm an ni vek lo. Chu mi bialah tho chuan tlawhkîr ṭha tak takte a nei a ni.

Heti hian kan inzâwt thei a: ‘Thutak hre lo ni ta ila, Jehova Thuhretute’n thu min rawn hrilh chuan engtin nge ka chhân lêt ang?’ tiin. Entîr nân, Thuhretute chungchâng dâwt thu tam tak lo hre ta ila, engtin nge ni ang? Keini pawhin ṭha lo takin kan chhâng lêt ang a, khawngaihna nei taka cheibâwl ngai kan ni ngei ang. Isua chuan miin kan chungah min cheibâwl tûra kan duh angin, mi dangte pawh kan cheibâwl tûr a ni tiin a sawi. Chuvângin, a harsat hunah pawh mi dangte ngaih dân hriatthiam kan tum ang a, an chungah kan dawhthei tûr a ni.—Matthaia 7:12.

Tirhkoh Paula chuan tharum thawhna hmanga a thu hrilhna chhâng lêttute chungah pawh khawngaihna a lantîr a. Engvângin nge? Tûn hmaa a lo tih ṭhin dân a hriat reng vâng a ni. Ani chuan: “Hmânah sawichhetu leh tiduhdahtu leh sawisatu ni mah ila, rinawma mi ngaiha, a rawngbâwltua mi ruat tâk avâng hian,” tiin a sawi. (1 Timothea 1:12- 13) Jehova leh Isua’n a chungah zahngaihna nasa tak an lantîr tih a hria a. Amah ngeiin a lo tih ṭhin tawh avângin, a thu hrilh tih tâwp tumtute chu a hre thiam a ni.

A châng chuan, Paula’n zirtîrna dik lo ring nghet tlattute pawh a tawng a. Chûng mite chu engtin nge a thlîr? Tirhkohte 17:16-ah Atheni khuaa a  awm laiin “khua chu Pathian lema khatin a hmu a, a rilruin a helh ta a,” tiin kan chhiar a ni. Mahse, Paula chuan a rilru helhkamtu chu mite zirtîr nân a hmang a. (Tirhkohte 17:22, 23) A thu hrilh dân a siam rem a, a “chhandam theihna tûrin mi zawng zawng,” ṭobul hrang hranga mite hnênah kawng chi hrang hrangin thu a sawi a ni.—1 Korinth 9:20-23.

Ṭha lo taka min chhâng lêttute, a nih loh leh thurin dik lo neite hnêna thu kan hrilh hunah Paula angin kan ti ve thei a. An chungchâng kan hriatte chu “thil ṭha chanchin ṭha” hriattîr nân kan hmang thei a ni. (Isaia 52:7) Unaunu Dorothy-i chuan: “Pathian chu a râwngin, thiam loh chantîr hmang tak a ni tiin kan rawngbâwlna biala mi tam tak chu zirtîr an ni a. Chûng mite chu Pathiana rinna nghet tak an neih avângin ka fâk a, tichuan, Jehova mize duhawm takte leh nakin hun atâna a thutiamte chungchâng Bible sawi chu ka ngaihventîr a ni,” tiin a sawi.

Unaute nên rawngbâwlnaa kan tel hunah anni chu fuih ka tum tûr a ni a. Jessica-i chuan unaute nên rawngbâwlnaa an tel laiin an zînga pakhat chuan thil ṭha lo tak a tawng a, chu chu rilrua pai reng a tum lo. Chu aiin, mi ṭhenkhatin a ṭha lo zâwngin chhâng lêt ṭhîn mah se, kan thu hrilhnain rah ṭha a chhuahte ang chi thiltawn ṭhate chu a sawi a ni.

Jehova chuan kan tân thu hrilh harsat châng a awm tih a hre chiang hle a. Mahse, a khawngaihna kan entawn hian a lâwm hle! (Luka 6:36) Ni e, Jehova chuan he khawvêla mite chu a khawngaihin, a dawhthei kumkhua lo vang. Tâwpna chu a hun takah a thlentîr ang tih kan hre thei a ni. Chu mi hun a thlen hma chu kan thu hrilhna hi a hmanhmawhthlâk hle. (2 Timothea 4:2) Chuvângin, “mi zawng zawng” chunga khawngaihna dik tak lantîrin, ṭhahnemngai takin thu i hril zawm zêl ang u.