Nghawng Nei Zâwk leh Nuam Ti Zâwka Bible I Zir Theih Dân

PLAY RAWH

JOSUA chuan Israel hnam chu Ram Tiamah a hruai lût dâwn a. Chu chu thil harsa tak a ni ngei ang. Mahse, Jehova chuan: “Chak tak leh huai takin awm phawt mai rawh,” tia fuihin, a tichak a. Josua hnênah Dân thu chu a chhiar a, a zawm phawt chuan thu tlûkna fingte siamin a hlawhtling dâwn tih a hrilh a ni.—Josua 1:7, 8.

“Hun khirh takte a,” kan awm avângin nun chu a harsa hle thei bawk. (2 Timothea 3:1) Josua anga hlawhtlin kan duh chuan Jehova pêk thurâwnte kan zawm a ngai a ni. Bible kan chhiar ziah a, kan thu hriatte chu thu tlûkna ṭha siamna atân kan hmang tûr a ni.

Mahse, kan zînga mi ṭhenkhat chuan Bible zir dân kan hre lovin, zirna chu nuam kan ti lo mai thei a. Mahse, mi mala Bible zirna chu thil pawimawh tak a ni. “Hêng Rawtnate Hi Hmang Rawh,” tih bâwm i en chuan i zirna hlâwkpui tûr leh nuam ti lehzual tûra ṭanpuitu tih tûr ṭhenkhatte i hmu ang.

Fakna hla phuahtu chuan: “I thupêk kawngah mi kaltîr ang che; chu mi-ah chuan ka lâwm si a,” tiin a sawi a. (Sâm 119:35) Nang pawhin Pathian Thu chu nuam ti takin i zir thei. Bible i zir zawm zêl chuan ngaihtuahna ṭha tak takte i chhar chhuak ang.

Josua angin hnam pakhat chu hruaitu ni lo mah la, mi mal harsatnate i nei ngei ang. Chuvângin, Josua angin Pathian Thu zir la, zâwm rawh. Chutianga i tih chuan, thu tlûkna fingte siamin i hlawhtling ngei ang.

HENG RAWTNATE HI HMANG CHHIN RAWH

Zirna i neih hmain ṭawngṭai rawh. Bible-ah hian Jehova ngaihtuahnate a chuang a, chûngte chu i hlâwkpui tûra ziah a ni. Chuvângin, Bible i chhiar hunah, i thu chhiarte hre thiam tûrin Jehova hnênah ṭanpuina dîl la, i chhiarte chu i nuna thu tlûkna ṭhate siam nân hmang ang che.—Ezra 7:10.
Mahni inzâwt ṭhîn rawh Bible leh Bible ṭanchhan thu leh hla chhuahte i chhiar hunah heti hian inzâwt ṭhîn rawh. Entîr nân: ‘He thu hian Jehova chungchâng eng nge min zirtîr? Bible thupui nên engtin nge inzawmna a neih? Hêng thute hi mi dangte ṭanpui nân engtin nge ka hman theih?’
I thil zirte chu chhût ngun rawh. Châwl lawkin, i thu chhiarte chu ngaihtuah la. Heti hian inzâwt rawh: ‘Hei hian engtin nge min awmtîr? Engvângin nge hetianga min awmtîr? Hei hian tûn hmaa ka thiltawn, tûna ka tawn mêk, a nih loh leh nakina ka tawn mai theih tûr nên eng inkûngkaihna nge a neih? Engtin nge hêng Bible thu bulte leh fuihnate hi ka nunpui theih?’ tiin. (Joba 23:5; Sâm 49:3) Chutianga i chhût ngun hunah, Jehova’n a mite hnênah thil ṭhenkhat pumpelh tûra a hrilh chhan i hrilhfiah theih leh theih loh hriat tum la. A nih loh leh, i thu chhiara miin a thiltih chu kawng dangin lo ti ta se, a rah chhuah tûrte chu ngaihtuah ang che.—Deuteronomy 32:28, 29.
Mitthla theihna chu hmang rawh i chhiar hunah chutiang chuan i ti thei a. Entîr nân, Josefa unaute’n Ismael-hote hnêna Josefa an hralh lai chu i mitthla thei em? (Genesis 37:18-28) I thil hmuh te, i ri hriat te, i rim hriatte chu eng nge ni? A changtute dinhmunah indah rawh. Engte nge an rilruah an ngaihtuah ang? I mitthla theihna i hman chuan i inzirna chuan awmzia a nei lehzual ang.
Inzirna hmanruate chu hmang rawh inawpna pâwlin min buatsaihsak hmanruate chu. Chûng hmanruate chuan i inzir bingnaah tuina a neih lehzualtîr ang che. Online leh lehkhabua in ṭawnga hmuh theih hmanruate chu a hman dân zir ang che. Chûng hmanruate ṭha taka hman dân hre tûrin mi dangte hnênah ṭanpuina dîl hreh suh. Entîr nân, Watch Tower Publications Index, a nih loh leh Research Guide for Jehovah’s Witnesses chuan i thu hriat duhte zawng hmu tûrin a ṭanpui theih che bâkah, Bible châng tam tak a hrilhfiah bawk a ni. New World Translation of the Holy Scriptures-a thu belhnate chu in ṭawnga hmuh theih a nih chuan hmang ang che. Chûng hmanruaahte chuan hmun hriatna te, hun chhuina te, rih lam tehna te, leh thil dang tehnate bâkah thu ṭangkai tak takte a chuang a ni.
Thu pawimawh laite khaikhâwm rawh. Chu chuan i thu zirte hre reng tûrin a ṭanpui ang che. Chu aia ṭha zâwk chu, i thu hriatte chu mi dangte hrilh rawh. Rawngbâwlnaa i hman theih tûr thil engemaw a awm em? Chutianga i tih chuan, a thu pawimawh laite chu i hre reng ang a, mi dangte pawhin i inzirna chu an hlâwkpui ve ngei ang.