1-2. (a) Pathian kan biakna khap beh a ni chu engvângin nge mak kan tih loh? (b) He thuziakah hian eng nge kan sawiho vang?

KUM 2018-ah, chanchin ṭha puangtu mi 2,23,000 aia tamte chu kan thlarau lam thiltihte khap behna, a nih loh leh nasa taka khuahkhirhna ramah an awm a. Chu chu thil mak a ni lo. Thuziak hmasaa kan hriat tâk angin, Kristian dikte chuan tihduhdahna chu kan beisei a. (2 Tim. 3:12) Khawi hmunah pawh awm ila, sawrkâr thuneitute chuan hmangaihna nei tak Pathian Jehova kan biakna chu beisei loh takin an khap thut thei a ni.

² I chênna ram sawrkâr chuan Jehova biakna khap beh a tum a nih chuan hêng zawhnate hi i inzâwt thei a ni: ‘Tihduhdahna chu Pathian duhsakna kan hloh ta tihna a ni em? Jehova be lo tûra khap behna chu tihtâwp a ni ang em? Zalên taka Pathian ka biak theihna ramah ka insawn a ngai em?’ tihte hi. He thuziakah hian chûng zawhnate chu kan sawiho vang a. Kan rawngbâwlna khap beh a nih huna Jehova kan biak zawm zêl theih dân leh kan pumpelh tûr thangte chungchâng kan sawiho bawk ang.

3. Korinth thawn hnih 11:23-27-a sawi angin, tirhkoh rinawm Paula chuan eng tihduhdahna nge a tawrh a, a entawn tûr siam aṭangin eng nge kan zir theih?

³ Sawrkârin kan biakna a khap bet a nih chuan, Pathian malsâwmna kan dawng lo niin kan ngai sual thei a. Mahse, tihduhdahna kan tuar chu kan chungah Jehova a lâwm lo tihna a ni lo tih hre reng ang che. Entîr nân, tirhkoh Paula hi han ngaihtuah teh. Ani chuan Pathian duhsakna a dawng a. Kristian Grik Pathian Lehkha Thu-a bu 14 ziah theihna chanvo hlu a neih bâkah, Jentailte tirhkoh pawh a ni bawk. Mahse, ani chuan tihduhdahna  nasa tak a tuar a. (2 Korinth 11:23-27 chhiar rawh.) Tirhkoh Paula thiltawn aṭangin Jehova’n a chhiahhlawh rinawmte chu tihduhdahna an tawrh a phal tih kan hre thei a ni.

4. Engvângin nge khawvêl huat hlawha kan awm?

⁴ Isua chuan dodâlna chu beisei tûr rêng kan nih chhan min hrilh a. Khawvêla mi kan nih loh avângin mite huat kan hlawh ang tih a sawi a ni. (Joh. 15:18, 19) Tihduhdahna tawrh chu Jehova malsâwmna kan dawng lo tih chhinchhiahna a ni lo. Chu aiin, thil dik kan ti tih târ lanna a ni zâwk!

5. Mihring maiin Jehova kan biakna an titâwp thei em? Hrilhfiah rawh.

⁵ Min dodâltu mihring ve maite chuan engkimtithei Pathian Jehova kan biakna chu an titâwp thei lo vang. Mi tam tak chuan an tum a, an hlawhchham a ni. Khawvêl Indopui II-na hun chhûnga thilthlengte hi han ngaihtuah teh. Chutih hun lai chuan, ram tam taka sawrkâr thuneitute chuan Pathian mite chu nasa takin an tiduhdah a. Jehova Thuhretute rawngbâwlna chu German rama Nazi pâwlte chauh ni lovin, Australia, Canada leh ram dang sawrkâr thuneitute pawhin an khap bet a ni. Mahse, thilthlengte chu lo chhinchhiah ang che. Kum 1939-a indopui a inṭan khân, khawvêl pumah thuchhuahtu mi 72,475 an awm a. Kum 1945-a indopui a tâwp chuan, Jehova malsâwmna avângin thuchhuahtu mi 1,56,299 an awm tih report chuan a târ lang a ni. A lêtin thuchhuahtu an pung!

6. Dodâlna chuan min tihhlauh ahnêkin, eng nge min tihtîr zâwk? Entîrna pe rawh.

⁶ Dodâlna chuan min tihhlauh ahnêkin tam lehzuala Jehova rawngbâwl tûrin min chêttîr thei a. Entîr nân, fa pakhat nei nupa tuak khat chu kan biakna khap behna ramah an awm a. Hlauh avânga engmah ti lova awm aiin, regular pioneer an thawk ṭan a. Chutianga thawk tûrin a nupui chuan hlawh ṭha tak hmuhna a hna chu a bansan a ni. A pasal chuan khap behnain mi tam tak chu Jehova Thuhretute chungchâng hriat belh duhna a neihtîr tih a sawi a. Chu chuan Bible zirpui neih a tiawlsam zâwk a ni. Khap behna chuan mi dangte chungah pawh nghawng ṭha a nei bawk. Chumi rama awm kohhran upa pakhat chuan Jehova rawngbâwlnaa tel tawh lo mi tam tak chu an rawn inkhâwm leh ṭan a, kohhran thiltihah an rawn tel leh tih a sawi.

7. (a) Leviticus 26:36, 37-na aṭangin eng nge kan zir? (b) Khap behna hnuaiah eng nge kan tih ang?

 ⁷ Kan hmêlmate’n kan biakna an khap beh hian, Jehova rawngbâwlnaah hlauhna min neihtîr an duh a. Khap behna bâkah, chanchin dik lote an thehdarh a, kan ina thil rawn zawng tûrin thuneitute an tîr a, rorêlnaahte min hruai a, a nih loh leh kan zînga ṭhenkhat chu tân inahte an khung a ni. Chutianga an khung theih avâng chuan hlau tûrah min beisei a. Anmahni avânga hlauhna kan neih chuan, kan biakna chu keimahni ngeiin kan khap bet, a nih loh leh kan “dang” bet ṭan a ni ang. Leviticus 26:36, 37-a târ lan mite ang nih chu kan duh lo. (Chhiar rawh.) Hlauhna avânga kan thlarau lam thiltihte tihtlêm emaw, bânsan emaw chu kan phal lo vang. Jehova kan rinchhan pumhlum avângin kan thlabâr hek lo vang. (Is. 28:16) Ṭawngṭaiin Jehova kaihhruaina kan zawng a. A ṭanpuinain, khawvêl sawrkâr thiltithei ber pawhin rinawm taka Pathian kan biakna chu min dang thei lo tih kan hria a ni.—Heb. 13:6.

8-9. (a) Chhûngkaw lû te, a nih loh leh mi tinin mi mal thu tlûkna an siam ngai chu eng nge ni? (b) Thu tlûkna ṭha siam tûrin engin nge min ṭanpui ang?

⁸ I chênna ram sawrkârin kan biakna a khap a nih chuan, zalên taka Jehova rawng i bâwl theihna rama insawn chu i ngaihtuah mai thei a. Chu chu mi dang tumahin i tân an tihtheih loh mi mal thu tlûkna a ni. Unau ṭhenkhat chuan kum zabi khatnaa Kristiante’n tihduhdahna an tawrh laia an thiltihte ngaihtuah chu a ṭha tih an hmu a. Hmêlmate’n Stephana lunga an denhlum hnu chuan, Jerusalema awm zirtîrte chu Judai leh Samari ramahte leh Phoiniki ramah te, Kupra thliarkârah te, leh Antiokei khua thlengin an kal chhuak a ni. (Mt. 10:23; Tirh. 8:1; 11:19) Mahse, unau dangte chuan kum zabi khatnaa Kristiante chunga tihduhdahna a thlen hnuah tirhkoh Paula’n thu hrilh rawngbâwlna khap beh a nihna hmun aṭanga kal chhuah a tum lo tih an hria a. Chu aiin, ani chuan a nun thâpin chanchin ṭha a hril zawm a, tihduhdahna nasa tak thlenna khuaa unaute chu tihchak a tum zâwk a ni.—Tirh. 14:19-23.

⁹ He Bible thu aṭang hian eng nge kan zir? Chhûngkaw lû berte chuan insawn tûr chungchângah thu tlûkna an siam tûr a ni. Thu tlûkna an siam hmain, an chhûngkaw dinhmun leh insawnnain an chunga nghawng ṭha leh ṭha lo a neih mai theihte chu ṭawngṭaiin, ngun takin an ngaihtuah hmasa tûr a ni. He mi chungchângah hian, Kristian tinte chuan “mahni phur an phur ṭheuh dâwn si a.” (Gal. 6:5) Mi dangte thu tlûkna siam chu kan sawisêl tûr a ni lo.

10. Branch office leh upate chuan eng kaihhruaina nge min pêk ang?

¹⁰ Engtin nge khap behna hnuaiah Jehova chu i biak zawm zêl theih? Branch office chuan thlarau lam chaw hmuh theih dân te, biakna atâna inhmuhkhâwm theih dân te, leh chanchin ṭha hrilh theih dânte chungchângah kaihhruainate leh rawtna ṭangkai takte chu tualchhûng kohhran upate hnênah an pe ang. Branch office chuan upate a be pawh thei lo a nih pawhin, upate chuan nangmah leh kohhrana awm zawng zawngte chu Jehova be zawm thei tûrin an ṭanpui ang che u. Anni chuan Bible leh kan Kristian thu leh hla chhuahte nêna inmilin kaihhruainate an pe ang che u.—Mt. 28:19, 20; Tirh. 5:29; Heb. 10:24, 25.

11. Thu leh hla chhuahte i nei ang tih engvângin nge i chian theih a, Bible leh thu leh hla chhuah i neihte chu humhim tûrin eng nge i tih theih?

¹¹ Jehova chuan a chhiahhlawhte chu thlarau lamah ṭha taka châwm an ni ang tih a  tiam a. (Is. 65:13, 14; Lk. 12:42-44) Chuvângin, a inawpna pâwl chuan i mamawh thlarau lama fuihna pe tûr chein a tih theih apiang a ti ang tih i chiang thei a ni. Nangma lamah eng nge i tih theih? Khap behna hnuaia i awm hunah, i Bible leh thu leh hla chhuah dangte i thuhrûk theihna tûr hmun ṭha chu zawng rawh. Chûng thu leh hla chhuah hlu takte chu lehkhabu-in emaw, electronic form-in emaw pawh ni se, awlsam taka hmuh theihna hmuna dah lo tûrin fîmkhur tlat ang che. Kan za hian thlarau lama chak reng tûrin kan tih theihte kan ti tûr a ni.

12. Engtin nge upate chuan inkhâwmte chu mite ngaihven loh tûr zâwnga an ruahman theih?

¹² Chawlhkâr chhûnga inkhâwmte hi eng nge ni ve? Kohhran upate chuan ṭûl lo taka mite ngaihven hlawh lo tûr zâwnga inkhâwm thei tûrin ruahmannate an siam ang. Anni chuan mi tlêm têa inkhâwmna nei tûrin an hrilh mai thei che a, inkhâwm hun leh hmunte chu an thlâk fo pawh a ni thei. Inkhâwm i rawn kal hunah leh bân hunah ring taka ṭawng lovin, i unaute chu i hum thei a. Mite mit la lo zâwnga i inthuam pawh a ngai mai thei bawk.

13. Tûn hmaa Soviet Union rama kan unaute hnên aṭangin eng nge kan zir theih?

¹³ Thu hrilh rawngbâwlna chungchângah erawh chuan a hmun azirin a inang lo va. Mahse, Jehova kan hmangaih a, mite hnêna a Lalram chanchin hrilh kan duh avângin, thu hrilh dân kawng chu kan hre thei ang. (Lk. 8:1; Tirh. 4:29) Tûn hmaa Soviet Union rama Jehova Thuhretute thu hrilhna chungchângah thilthleng chanchin ziaktu Emily B. Baran-i chuan: “Sawrkâr thuneitute’n ringtute chu mi dangte hnêna an rinna chungchâng hrilh lo tûra an tih hunah pawh, hrilh lovin an awm thei lo va, Thuhretute chuan an vêng te, an hnathawhpui te, leh an ṭhiante chu thu an sawipui ṭhîn a. Chûngte avâng chuan, hna thawk tûra chhawr luihna camp-a dah an ni a, Thuhretute chuan an tânpuite hnêna thu hrilh dân kawng an zawng a ni,” tiin a sawi. Khap beh an ni chung pawhin, tûn hmaa Soviet Union rama kan unaute chuan thu hrilh an bânsan chuang lo. I awmna ramah thu hrilh rawngbâwlna khap beh a nih chuan, anmahni entawnin tum ruhna nei ang che!

14. Sâm 39:1-na chuan eng thang pumpelh tûrin nge min ṭanpui theih?

¹⁴ Chanchin theh darhnaah fîmkhur rawh. Khap beh kan nih chuan, chu hun chu “ngawih hun,” a ni tih kan hre tûr a ni. (Thur. 3:7) Kan unaute hming te, kan inkhâwmna hmun te, kan rawngbâwl dân te, leh thlarau lam chaw kan dawn dânte ang chi chanchin pawimawhte chu kan sawi chhuak tûr a ni lo. Chûngte chu sawrkâr thuneitute kan hrilh lo vang a, kan rama awm, a nih loh leh ram danga awm kan ṭhian ṭhate leh kan chhûngte pawh kan hrilh  hek lo vang. Kan sawi chhuak a nih chuan, kan unaute himna chu kan tiderthawng a ni ang.—Sâm 39:1 chhiar rawh.

15. Setana’n kan chungah eng nge tih a tum ang a, a thang chu engtin nge kan pumpelh theih?

¹⁵ Buaina tê tham avângin inṭhen hranna awmtîr suh. Setana chuan chhûngkaw inlungrual lo chu a ding chhuak thei lo tih a hria a. (Mk. 3:24, 25) Ani chuan kan zîngah inṭhen hranna awmtîr a tum reng a ni. Chutiang kawng chuan, amah do lo va, kan indo tawn a beisei a ni.

16. Unau Gertrud Poetzinger-i chuan eng entawn tûr ṭha nge a siam?

¹⁶ Thlarau lama puitling Kristiante pawh chu thanga âwk lo tûrin an fîmkhur a ngai a. Hriak thih unau Gertrud Poetzinger-i leh Elfriede Löhr-i te thiltawn hi han ngaihtuah teh. Anni chu Nazi concentration camp-ah Kristian unau dangte nên an tâng a. Unau Elfriede-i’n camp-a unaunu dangte a fuih chuan unau Gertrud-i chuan a thîk a. A hnuah, Gertrud-i chuan a rilu put hmang avânga inthiam lohna a neih avângin Jehova hnênah ṭanpuina a dîl a. Heti hian a ziak a ni: “Mi dangin thiam bîkna an neih emaw, ngaihhlut zâwk an nih emaw hian, chu chu kan pawm thiam a ngai,” tiin. Thîkna a neih chu engtin nge a hneh theih? Unau Gertrud-i chuan Elfriede-i mize ṭhate leh a hawihhâwmnate chu a ngaihven a. Chutiang chuan, unau Elfriede-i nên inlaichînna ṭha an nei leh a ni. An pahnih chuan concentration camp aṭangin an dam khawchhuak a, an lei lam nun a tâwp thlengin, rinawm takin Jehova rawng an bâwl a ni. Kan unaute nêna buaina kan neihte chingfel tûra theih tâwp kan chhuah chuan, inlungrual lohna thang chu kan pumpelh thei ang.—Kol. 3:13, 14.

17. Engvângin nge kaihhruaina kan dawnte chu kan zawm reng a ngaih?

¹⁷ Kaihhruaina chu zâwm reng rawh. Rin tlâk tak leh mawhphurhna nei unaute hnên aṭanga kan dawn kaihhruainate kan zawm chuan buainate kan pumpelh ang. (1 Pet. 5:5) Entîr nân, kan rawngbâwlna khap behna ramah, mawhphurhna nei unaupate chuan thuchhuahtute chu rawngbâwlnaa thu leh hla chhuahte pe chhuak lo tûrin an hrilh a. Mahse, chumi hmuna awm pioneer unaupa chuan hre zâwk nia a inngaih avângin thu leh hla chhuahte chu a sem chhuak a ni. Eng nge a rah chhuah? Amah leh unau dangte’n tawn chawpa thu an hrilh hnu rei vak lovah, police-te’n an rawn zâwt a. Thuneitute chuan an lo zuiin, unaute sem thu leh hla chhuahte chu an lo la khâwm niin a lang. He thiltawn aṭang hian eng nge kan zir? Hre zâwk nia kan inngai a nih pawhin kaihhruaina kan zui a ngai a. Jehova’n kan zînga  hotua a ruat unaupate kan thawhpui chuan mal min sâwm reng ang.—Heb. 13:7, 17.

18. Engvângin nge ṭûl lo taka dân zam chu kan pumpelh ang?

¹⁸ Ṭûl lo takin dânte zam suh. Upate’n ṭûl lo taka dânte an zam chuan, mi dangte tân phurrit an siam a ni ang. Unau Juraj Kaminský-a chuan tûn hmaa Czechoslovakia rama khap a nih chhûnga thilthleng chu heti hian a hre chhuak a ni: “Mawhphurhna nei unaupate leh kohhran upa tam tak man an nih hnu chuan, kohhrante leh bial chhûnga hruaitu ṭhenkhatin thuchhuahtute awm dân tûr chungchângah tih tûrte leh tih loh tûrte siamin dân an zam a,” tiin. Jehova chuan mi dangte tân mi mal thu tlûkna siamsak tûrin thuneihna min pe lo. Ṭûl lo taka dânte zamtu chuan a unaute vênhim a hnêkin, an rinna chungah lalna neih a tum zâwk a ni.—2 Kor. 1:24.

19. Setana beihna tâwk chung pawhin, 2 Chronicles 32:7, 8-na chuan rin nghehna nei tûrin eng chhan ṭha nge min pêk?

¹⁹ Kan khingpui, Diabol-Setana chuan Jehova chhiahhlawh rinawmte tihduhdah chu bânsan a tum lo vang. (1 Pet. 5:8; Thup. 2:10) Setana leh a ṭhuihhruaite chuan Jehova kan biakna chu khap beh an tum dâwn a. Mahse, hlauh avânga engmah tithei lova kan awmna chhan tûr a awm lo! (Deut. 7:21) Jehova chu kan lam ṭang a nih avângin kan rawngbâwlna khap beh a nih hunah pawh min ṭanpui zawm zêl ang.—2 Chronicles 32:7, 8 chhiar rawh.

20. Eng nge tih i tum tlat?

²⁰ An hun laia rorêltute hnêna: “Pathian mithmuhin Pathian thu zawm aiin nangni thu zawm a dik zâwk emaw chu ngaihtuah rawh u. Keini zawng thil kan hmuh leh kan hriatte kha sawi lovin kan awm thei lo,” tia sawitu kum zabi khatnaa kan unaute neih ang tum ruhna chu neih ve i tum ṭheuh ang u.—Tirh. 4:19, 20.