1. Tûn hnai kum sâwmbîah, ram ṭhenkhatah chuan eng inthlâk danglamnate nge awm?

KUM sâng tam tak chhûngin, khawvêla mi a tam zâwkte chuan sakhaw thurin engemaw tak an nei niin a lang. Mahse, tûn hnai kum sâwmbi-ahte chuan inthlâk danglamna nasa tak a awm a. Sakhaw vawn nei lova inchhâlte chu an pung telh telh a. Dik tak chuan, ram ṭhenkhata mi a tam zâwkte chuan sakhaw vawn nei lo niin an insawi a ni. *—Mt. 24:12.

2. Engvângin nge mi tam takin sakhuana an ngaihven loh?

² Engvângin nge sakhaw vawn nei lova inchhâlte chu an pun zual deuh deuh? * Mi ṭhenkhat chu nawmsaknate, a nih loh leh lungkhamnate avângin an rilru a kal pêng a. (Lk. 8:14) Ṭhenkhat chuan Pathian a awm lo an ti a. Ṭhenkhat dangte chuan Pathian chu ring mah se, sakhuana chu a hmân lai tawh, hlutna nei lo, leh science leh mihring ngaihtuahna nên a inmil lo niin an ngai a. Anni chuan nun chu chanchhâwnna aṭanga lo awm a ni tia an ṭhiante, zirtîrtute, leh chanchin theh darhtute sawi chu an hria pawh a ni thei; mahse, Pathian rinna tûr chhan ṭha tak an sawi thu erawh an hre ngai mang meuh lo. Mi dangte chu sum leh thuneihna ngainatu sakhaw hruaitute avângin sakhuanaah an beidawng a. Hmun ṭhenkhatah chuan, sawrkâr thuneitute’n sakhuana thiltih chu dân ang takin an khap a ni.

3. He thuziakin a tum chu eng nge ni?

³ Isua chuan “hnam tina mi zirtîrahte siam” tûrin min beisei a. (Mt. 28:19) Sakhaw vawn nei lo mite chu Pathian hmangaih tûr  leh Krista zirtîr rawn ni tûrin engtin nge kan ṭanpui theih? Miin kan thuchah ken a chhân lêt dân chu a seilenna hmun a zirin a ni thei tih kan pawm tûr a ni. Entîr nân, Europe khawmuala mite chuan Asia khawmuala mite angin an chhâng lêt lo mai thei a. Engvângin nge? Europe khawmuala mi tam tak chuan Bible chungchâng engemaw chen an hria a, Pathianin thil engkim a siam tih ngaih dân pawh an hria a ni. Mahse, Asia khawmuala mi a tam zâwkte chuan Bible chungchâng an hre tam lo, a nih loh leh an hre lo hulhual a, Siamtu a awm an ring lo pawh a ni thei bawk. He thuziakin a tum chu rawngbâwlnaa kan mi tawhte chuan rin dân hrang hrang nei mah se, an thinlung thlen tûra min ṭanpui hi a ni.

4. Engvângin nge rilru put hmang dik chu kan neih reng theih?

⁴ Rilru Put Hmang Dik Nei Rawh. Kum tin hian, sakhaw vawn nei lo mite chu Jehova Thuhretute an rawn ni a. Chûng zînga tam tak chu nungchang lama tehna sâng tak nei te an ni a, anni chuan sakhaw vervêknate chu an duh lo a ni. Mi dangte chuan nungchang lama tehna hniam tak an nei a, mi tam tak chuan bansân ngai chîn dân ṭha lote an nei a ni. Jehova ṭanpuinain, “chatuana nun duhna rilru dik tak neite” kan hmu ang tih kan chiang thei a ni.—Tirh. 13:48, New World Translation; 1 Tim. 2:3, 4.

5. Kan thuchah ken ṭha taka chhâng lêt tûra mite chhêttîr ṭhîntu chu eng nge ni?

⁵ Ngilnei Tak leh Remhre Tak Ni Rawh. A tlângpui thuin, mite chuan kan thusawite vâng ni lovin, kan thusawi dân vâng zâwkin kan thuchah ken chu ṭha takin an chhâng lêt ṭhîn a. Ngilnei tak leh remhre tak kan nih a, an chungah ngaihvenna dik tak kan lantîr hian an ngaihlu hle a. Kan thusawite chu kan ngaihthlâk luihtir lo va. Chu aiin, sakhaw lama an thlîr dânte hriatthiam kan tum zâwk a ni. Entîr nân, mi ṭhenkhat chuan a mi hriat ngai loh nêna sakhaw lam chungchâng sawi chu an duh lo tih kan hria a. Mi dangte chuan Pathian chungchânga mite ngaih dân zawh chu thil mawi lovah an ngai a ni. Mi dang lehte chuan, a bîk takin, Jehova Thuhretute nêna Bible an chhiar lai mite’n an hmu chu thil zahthlâkah an ngai bawk. A enga pawh chu ni se, keini chuan mite rilru awm dân hriat kan tum a ni.—2 Tim. 2:24.

6. Tirhkoh Paula’n dinhmun azira a insiamrem theihzia engtin nge a târ lan a, ani chu engtin nge kan entawn theih?

⁶ Miin “Bible,” “thil siam,” “Pathian,” a nih loh leh “sakhua” tih ang chi ṭawngkamte kan hman a duh loh chuan eng nge kan tih theih? Tirhkoh Paula entawnin, kan thusawi dân chu kan siamrem thei a ni. Juda mite a biak hunah, Paula chuan Pathian Lehkha Thu aṭangin a chhûtpui ṭhîn a. Mahse, Areopagi-a Grik mi fingte nêna an inbiak chuan, Bible châng engmah a târ lang lo. (Tirh. 17:2, 3, 22-31) Paula entawn tûr siam chu engtin nge kan zui theih? Bible pawm lo tuemaw i tawng a nih chuan, amah i chhûtpui hunah Bible sawi lan loh chu a ṭha ber mai thei. Miin Bible i chhiarpui chu nuam a ti lo nia i hriat chuan phone leh tablet aṭangin, a langsâr lo zâwngin chhiarsak tum ang che.

7. Paula ang ni tûr chuan, 1 Korinth 9:20-23-a târ lan angin eng nge kan tih ngai?

⁷ Mite Hre Thiamin, Ngaithla Rawh. Kan mi tawnte nun thununtu thilte chu hriatthiam kan tum tûr a ni. (Thuf. 20:5) Paula entawn tûr siam hi han ngaihtuah nawn leh ta ila. Ani chu Judate zînga seilian a ni a. Jehova leh Pathian Lehkha Thu tlêm azâwng hria, a nih loh leh hre lo hulhual Jentailte hnênah chuan a thu hrilh dân a thlâk danglam tih a chiang a ni. Kan rawngbâwlna biala mite hre thiam thei tûr chuan zir bingna engemaw kan neih a, kohhrana thiltawn ngah unaute kan zawh a ngai thei a ni.—1 Korinth 9:20-23 chhiar rawh.

8. Bible chungchâng sawiho theih dân kawng khat chu eng nge ni?

 ⁸ Kan thiltum chu “a thleng tlâk mi” hmuh hi a ni a. (Mt. 10:11) Rawngbâwlnaa hlawhtling tûr chuan, mite chu an ngaih dânte zâwtin, ngun taka kan ngaihthlâk a ngai a ni. England rama unaupa chuan mite chu inneihna hlimawm neih theih dân te, fate enkawl seilen dân te, leh rorêlna dik lo hmachhawn dânte chungchânga an ngaih dânte a zâwt a. An thusawite a ngaihthlâk hnuah, ani chuan: “Kum 2,000 dâwn lai kal taa ziah, he thurâwn hi engtin nge i ngaih?” tiin a zâwt a. Tichuan, “Bible,” tih ṭawngkam hmang lovin, a thlan sa Bible chângte chu a phone aṭangin a hmuh a ni.

9. Pathian chungchâng sawi duh lo mite chu engtin nge kan ṭanpui theih?

⁹ Pathian chungchâng sawi duh lo mite hnênah an nun nghawngtu thilte sawipuina hmangin an thinlung kan thlen thei a ni. Entîr nân, mi tam tak chuan leilung pianken thilte hi mak an ti a. Chuvângin, hetiang hian kan sawi thei ang: “Scientist-te chuan leilunga thil awmte entawnin, thil thar tam tak an siam chhuak tih i lo hre tawh mai thei. Entîr nân, microphone siam chhuaktu chuan beng chungchâng a zir a, camera siam chhuaktu chuan mit chungchâng a zir a ni. Leilung pianken thilte i ngaihtuah hian i rilruah eng nge lo lang? Hêngte hi amaha lo awm nge ni a, a nih loh leh mi pakhat siam emaw, thil dang vâng emawa lo awm niin i ring em?” tiin. Ngun taka kan ngaihthlâk hnuah, heti hian kan sawi thei a ni: “Engineer-te’n beng leh mit awm dân an zir hian, tu hnên aṭanga zir nge an nih tiin kan ngaihtuah mai thei. Hmân lai hla phuahtu thuziak pakhat hi mak ka tikhawp mai: ‘Beng vuahtu chuan a hre lo vang em ni? Mit siamtu chuan a hmu lo vang em ni? . . . Mihring finna zirtîrtu chuan?’ tih hi. Scientist ṭhenkhat chuan he thu hi an pawm a, Siamtu a awm tih an ring a ni,” tiin. (Sâm 94:9, 10) Chumi hnuah, kan wibesite jw.org^®-a “Nunna Lo Inṭan Dân Chungchânga Ngaih Dânte,” thuziak inzawma “Interviews and Experiences” tih hnuaia video pakhat chu kan chhuahsak thei a ni. (PUBLICATIONS > VIDEOS tih hnuaiah lût ang che.) A nih loh leh Nunna Hi Siam A Ni Em? tih emaw, Nunna Lo Inṭanna—Zawhna Inâwm Tak Pangate tih brochure emaw chu kan pe thei bawk.

10. Engtin nge Pathian chungchâng sawi duh lo tuemaw chu tîtîna kan neihpui ṭan theih?

¹⁰ Mi tam tak chuan nakin hun ṭha zâwk neih chu an châk hle a. Mahse, leilung hi tihchhiat emaw, awmna tlâk lova siam a nih emaw chu an  hlau a ni. Norway rama bial kantu pakhat chuan Pathian chungchâng sawi duh lotute’n khawvêl dinhmun chungchâng sawi chu an duh tlângpui tih a sawi. Mite a chibai hnu chuan, heti hian a sawi ṭhîn a ni: “Nakin hun ṭha zâwk kan thlîr dân chungchâng hi engtin nge i ngaih? Kan beisei theih ṭha ber chu politician te, scientist te, a nih loh leh mi dang tuemawa innghat a ni em?” tiin. Ngun taka a ngaihthlâk hnuah, hma lam hun êng tak kawh hmuhtu Bible châng pakhat a chhiarsak a. Mi ṭhenkhat chuan leilung hi chatuanin a awm ang a, chutah chuan mi ṭhate chu kumkhuain an chêng ang tih Bible thutiam an hriat chuan mak an ti hle a ni.—Sâm 37:29; Thur. 1:4.

11. Engvângin nge mite pan dân chi hrang hrang hman kan tum ang a, Rom 1:14-16-a târ lan angin, engtin nge Paula entawn tûr siam chu kan entawn theih?

¹¹ Kan mi tawhte chu kawng chi hrang hrangin kan pan thei a. Engvângin nge? Mi tinte chu kan inan loh vâng a ni. Mi pakhat ngaihven zâwng chu mi dang tân a ngaihvenawm lo thei a. Mi ṭhenkhat chuan Pathian leh Bible chungchâng sawi an duh laiin, mi dang erawh chuan thil dang sawi hmasak chu an duh zâwk mai thei. A enga pawh chu ni se, mi zawng zawng biak theihna hun remchâng neih chu kan tum tûr a ni. (Rom 1:14-16 chhiar rawh.) Ni e, Jehova chu rilru dik tak pute thinlunga thutak ṭhan chhohtîrtu a ni tih kan hre reng tûr a ni.—1 Kor. 3:6, 7.

12. Siamtu a awm tih ngaihtuah ngai lo Asia rama mite thinlung thlen tûrin eng nge kan tih theih?

¹² Khawvêl pumpuia thuchhuahtu tam tak chuan sawrkârin sakhuana thiltih a khap behna hmuna awmte pawh tiamin, Asia khawmuala awmte chu an tawng ṭhîn a. Asia khawmuala ram ṭhenkhatah chuan, mi tam takin Siamtu a awm tih ngaih dân hi ngun takin an chhût ngai lo va. Mi ṭhenkhat chuan hriat duhna an neih avângin Bible zir tûra sâwmna chu an pawm a; mahse, mi dangte chuan ngaih dân thar pawm nghâl mai chu an hreh deuh a ni. Chûng mite zirtîr tûrin eng nge kan tih theih? Thiltawn tam tak nei thuchhuahtu ṭhenkhat chuan tîtîna pângngai tak neihpui te, mi mal ngaihsakna lantîr te, leh Bible thu bulte nunpuinain nun a tihhmasâwn dânte sawipuiin hlawhtlinna an hmu a ni.

13. Mite chu Bible ngaihven tûrin engin nge ṭanpui thei? (A kâwma milem en rawh.)

¹³ Mi tam tak chuan Bible-a kan hmuh finna chhawr tlâk tak chu ṭha an ti nghâl mai a. (Thur. 7:12) New York khawpuia, Mandarin ṭawng hmangte va tlawhtu unaunu chuan: “Mite ngaihsakna lantîr a, an thusawi ngaihthlâk chu ka tum a. Hmun dang aṭanga rawn pêm lût an ni tih ka hriat chuan, heti hian ka zâwt ṭhîn a ni: ‘In rawn insawn chu nuam in ti em? Hnate in hmu tawh em? Tualchhûnga mite’n an cheibâwl ṭha che u em?’” tiin. A châng chuan, chutianga biak ṭanna chuan Bible-a thute sawi a tiawlsam a ni. A remchân chuan heti hian a sawi belh a ni: “Mite nêna inlaichînna ṭha neih dân chu eng nge nia i rin? Bible thufing pakhat ka hmuhtîr thei che ang em? Heti hian a sawi a: ‘Inhnial hi tuikhuah hnâm tîr ang a ni a, chuvângin insualna a awm ṭan hmain inhnial bâng rawh,’ tiin. He thurâwn hian mi dangte nêna inlaichînna ṭha nei tûrin min ṭanpui theih i ring em?” tiin. (Thuf. 17:14) Chutianga tîtîpui ṭanna chuan tlawhkîr theih âwmte chu hre tûrin min ṭanpui thei a ni.

14. Khawchhak Lama awm unaupa chuan Pathian ring lo mite chu engtin nge a ṭanpui?

¹⁴ Pathian ka ring lo tia sawitute chungchâng hi eng nge ni ve? Khawchhak Lama awm sakhaw vawn nei lo mite hnêna thu hrilhnaa thiltawn ngah tak unaupa chuan: “A tlângpui thuin, miin, ‘Pathian ka ring lo,’ a tih chuan, mi tam zâwkte biak pathiante a ring lo a tihna a ni.  Chuvângin, pathian tam zâwkte chu mihringte siam an ni a, a tak tak an ni lo tih ka pawm a. Jeremia 16:20-a: ‘Miin pathiante a insiamsak thei em ni? Chûng chu pathian an ni hlei nêm,’ tih thu hi ka chhiarsak ṭhîn a. Chumi hnuah, heti hian ka zâwt a ni: ‘Mihringte siam pathian chu engtin nge a tak tak a ni kan tih theih ang?’ tiin. A chhan chu ngun takin ka ngaithla a, tichuan, Isaia 41:23-a: ‘Pathian in ni tih kan hriat theihna tûrin tûn hnua thil lo la thleng tûrte chu sawi rawh u le,’ tih hi ka chhiar a. Chumi hnuah, Jehova’n nakin hun a hrilh lâwk dânte chu ka hmuh a ni,” tiin a sawi.

15. Asia Chhak Lama awm unaupa entawn tûr siam aṭangin eng nge kan zir theih?

¹⁵ Asia Chhak Lama awm unaupa’n tlawhkîr a neih chuan, a hnuaia tih dân hi a hmang a ni. Ani chuan: “Bible finna te, Bible hrilh lâwk thlen famkimna te, leh lei leh vân thununtu dânte chungchânga entîrnate ka hmuh a. Chumi hnuah, chûng zawng zawng chuan nunna nei Siamtu fing tak a kawhhmuh dân chu ka hrilh a ni. Miin Pathian a awm tih chu thil ni thei nia a pawm chuan, Bible-in Jehova chungchâng a sawite chu ka hrilh ṭan ta a ni,” tiin a sawi.

16. Hebrai 11:6-a sawi angin, engvângin nge Bible zirlaite chuan Pathian leh Bible-a rinna an neih a ngaih a, chutianga nei tûrin engtin nge kan ṭanpui theih?

¹⁶ Sakhaw vawn nei lo mite, Bible kan zirpui hunah, Pathian a awm tih an rinna chu kan tihnghehsak zawm zêl tûr a ni. (Hebrai 11:6 chhiar rawh.) Bible ring tûra kan ṭanpui pawh a ngai bawk. Thu pawimawh zualte chu vawi engemaw zât kan sawi nawn a ngai tihna a ni. Bible kan zirpui apiangin, Bible chu Pathian Thu a nihzia kan sawipui a ngai mai thei a. Chutah chuan Bible hrilh lâwkna thlen famkim dân te, science lam leh thilthleng chanchinte nêna a inmil dân te, leh Bible-in nî tin nuna min ṭanpui dânte chu tawi têa sawipuina pawh a tel a ni.

17. Mite kan hmangaihna chuan eng nghawng nge a neih theih?

¹⁷ Mite chu sakhaw vawn nei emaw, nei lo emaw pawh ni se, an chunga hmangaihna lantîrin Krista zirtîrte ni tûrin kan ṭanpui a. (1 Kor. 13:1) Kan zirtîr huna kan thiltum ber chu Pathianin min hmangaih a, amah hmangaih lêt ve tûrin min duh tih hrilh hi a ni. Kum tin hian, sakhaw lam ngaihsakna nei ngai lote leh nei lo hulhual mi a sâng têlte chuan Pathian hmangaihna an neih chhoh avângin baptisma an chang a. Chuvângin, rilru put hmang dik nei la, mi zawng zawng chungah ngaihsakna duhawm tak lantîr rawh. An thusawite chu ngaithlain, anni chu hriatthiam tum rawh. An tân entawn tûr siamin, anni chu Krista zirtîrte ni tûrin zirtîr ang che.