1. Engvângin nge tihduhdahna atâna kan inbuatsaih a ngaih?

KAN Lalpa Isua tihhlum a nih hma zân khân, ani chuan a zirtîr zawng zawngte’n huat an hlawh ang tih a sawi a. (Joh. 17:14) Jehova Thuhretu Kristian rinawmte chuan biakna dik dodâltute tihduhdahna chu tûn thlengin an la tuar a. (2 Tim. 3:12) He khawvêl tâwpna a hnaih rual hian, kan hmêlmate chuan tûn hma zawng aia min dodâl nasat lehzual kan beisei a ni.—Mt. 24:9.

2-3. (a) Hlauhna chungchângah eng nge kan hriat ngai? (b) He thuziakah hian eng nge kan sawiho vang?

² Engtin nge tihduhdahna hmachhawn tûrin tûn aṭanga kan inbuatsaih theih? Kan chunga thilthleng thei zawng zawngte chu kan lo ngaihtuah lâwk a ngai lo va. Kan lo ngaihtuah lâwk chuan hlauhna leh lungkhamnain kan khat thei a. Fiahna tak tak kan hmachhawn hma aṭang daihin ngaihruatna maia hlauhna chuan min hneh thei a ni. (Thuf. 12:25; 17:22) Hlauhna chu kan “khingpui Diabola” min beihna hmanraw thiltithei tak a ni a. (1 Pet. 5:8, 9) A nih leh, tûnah mahni intichak tûrin eng nge kan tih theih?

³ He thuziakah hian, Jehova nêna kan inlaichînna kan tihngheh theih dân leh chu chu tûna kan tih a pawimawh chhan sawiho a ni ang a. Huaisenna kan neih lehzual theih dânte kan sawiho bawk ang. A tâwpah, dodâltute min huatna kan hmachhawn theih dân pawh kan bih chiang ang.

4. Hebrai 13:5, 6-a sawi angin, eng nge kan rin ngheh tlat ang a, engvângin nge?

⁴ Jehova’n a hmangaih chein, a kalsan ngai lo vang che tih ring tlat rawh. (Hebrai 13:5, 6 chhiar rawh.) Kum tam tak kalta  khân, Vênnainsâng chuan: “Pathian hre chiangtu chuan fiahna nasa tak kârah pawh ani chu a rinchhan tlat ang,” tiin a sawi a. A va dik tak êm! Tihduhdahnate chhel taka tuar chhuak tûr chuan, Jehova kan hmangaihin, kan rinchhan pumhlûm tûr a ni a, a hmangaihna chu kan ringhlel ngai tûr a ni lo.—Mt. 22:35-38; Jak. 5:11.

5. Jehova min hmangaihna hre tûrin engin nge min ṭanpui ang?

⁵ Jehova hnaih lehzual tumin nî tin Bible chhiar rawh. (Jak. 4:8) I chhiar laiin, Jehova mize duhawm tak takte chu ngaihven ang che. A thusawi leh thiltiha lang, a hmangaihna leh khawngaihna chu hriat tum bawk rawh. (Ex. 34:6) Hmangaihna dawng ngai lo mi ṭhenkhat tân chuan Pathianin anmahni a hmangaih tih rin chu a harsa mai thei a. Chutiang harsatna i nei a nih chuan, Jehova’n i chunga zahngaihna leh ngilneihna a lantîr dânte chu nî tin ziah chhuah tum ang che. (Sâm 78:38, 39; Rom 8:32) I thiltawnte ngaihtuah a, Pathian Thu-a i thu chhiarte i chhût ngun chuan, i tâna Jehova thiltih tam tak chu i ziak chhuak thei ngei ang. A thiltihte i ngaihhlut poh leh amah nêna in inlaichînna chu a nghet lehzual ang.—Sâm 116:1, 2.

6. Sâm 94:17-19-a sawi angin, engtin nge thinlung taka ṭawngṭaina chuan min ṭanpui theih?

⁶ Ṭawngṭai ziah rawh. A pain duat taka a pawm mipa naupang pakhat chu han mitthla teh. Him nia a inhriat êm avângin, a pa hnênah chumi nîa a thiltawn ṭha leh ṭha lote chu tlang takin a hrilh a. Nang pawh, nî tin thinlung taka ṭawngṭaia Jehova i pan chuan, chutiang inlaichînna chu i nei ve thei a ni. (Sâm 94:17-19 chhiar rawh.) Jehova hnêna i ṭawngṭai hunah “i thinlung chu tui angin leih chhuak” la, hmangaihna nei tak kan Pa chu i hlauhna leh lungkhamna zawng zawng hrilh ang che. (ṬH. 2:19) Eng nge a rah chhuah ni ang? “Pathian thlamuanna, rilru rêng rênga hriat sên loh,” tia Bible sawi chu i tawng ngei ang. (Phil. 4:6, 7) Chutianga i ṭawngṭai ngun poh leh Jehova hnaih lehzual niin i inhria ang.—Rom 8:38, 39.

7. Engvângin nge Lalram chungchânga Pathian thutiamte chu a thleng famkim ang tih kan rin ngheh tlat ang?

⁷ Pathian Ram malsâwmnate chu a thleng famkim ang tih ring nghet tlat rawh. (Num. 23:19) Chûng thutiamte i ringhlel a nih chuan, Setana leh a hote thununa awm a awlsam lehzual ang. (Thuf. 24:10; Heb. 2:15) Pathian Ram i rinna chu tûnah engtin nge i tihngheh theih? Lalram chungchânga Pathian thutiamte leh chûng thutiamte a thleng famkim ngei ang tih i chian theih chhan hre tûrin zir bingna nei ang che. Chu chuan engtin nge a ṭanpui ang che? A rinna avânga kum sarih chhûng tân ina awm Stanley Jones-a entawn tûr siam hi han ngaihtuah teh. * Rinawm taka tuar chhuak tûrin engin nge ṭanpui? Ani chuan: “Pathian ram chungchâng ka hre bel a, ka chiang a,  rinhlelhna chhe tê mah ka neih ngai loh avângin tihchêt theih ka ni lo,” tiin a sawi. Pathian thutiama rinna nghet tak i neih chuan Jehova i hnaih lehzual ang a, hlauhna i nei lo vang.—Thuf. 3:25, 26.

8. Inkhâwma tel ziahna chungchânga kan rilru put hmang chu eng târ langtu ṭha tak nge a nih? Hrilhfiah rawh.

⁸ Kristian inkhâwmahte tel ziah rawh. Inkhâwmte chuan Jehova hnaih tûrin min ṭanpui a. Inkhâwma tel ziahna chungchânga kan rilru put hmang chu tihduhdahna lo awm tûrte hlawhtling taka kan hmachhawn dâwn leh dâwn loh târ langtu ṭha tak a ni. (Heb. 10:24, 25) Engvângin nge chutianga kan sawi theih? Tûnah ngei pawh, chhuanlam chhe tê avânga inkhâwmte kan ṭhulh a nih chuan, nakin hunah kan unaute nêna inhmukhâwm tûrin kan nun thâp ngai ta se, engtin nge ni ang? Kawng leh lamah, inkhâwma tel ziah kan tum tlat chuan min dodâltute’n inhmukhâwm lo tûra khap beh an tum hunah pawh min dang thei lo vang. Tûn hi inkhâwmte ngainatna thinlung nghet tak kan neih a ngaih hun a ni. Inkhâwmte kan ngaina a nih chuan eng ang dodâlna leh sawrkâr khapna pawhin, mihring thu aia Pathian thu zawm kan tumna chu a dang thei lo vang.—Tirh. 5:29.

9. Engvângin nge Bible châng by-heart chu tihduhdahna hmachhawn thei tûra inbuatsaihna ṭha tak a nih?

⁹ I Bible châng duh berte chu by-heart tum rawh. (Mt. 13:52) I hriat rengna chu a ṭha tâwk lo a nih pawhin, Jehova chuan chûng Bible chângte hriat chhuahtîr tûr chein a thlarau thianghlim thiltithei tak chu a hmang thei a ni. (Joh. 14:26) East German-a tân ina khung hrana awm unaupa thusawi hi lo chhinchhiah ang che, ani chuan: “Chutih hun laia Bible châng a za têl ka by-heart thei chu malsâwmna a va ni tak êm! Chûng nî khawharthlâk takahte chuan Bible-a thu chi hrang hrangte ka chhût ṭhîn a ni,” tiin a sawi. Chûng Bible chângte chuan kan unaupa chu Jehova hnaih tlat tûr leh rinawm taka tuar chhuak tûrin a ṭanpui a ni.

10. Engvângin nge hlate chu by-heart kan tum ang?

¹⁰ Jehova fakna hlate chu by-heart tum rawh. Paula leh Sila chuan Philippi khuaa tân ina khung an nih laiin, Jehova fakna hlate chu en lovin an sa a. (Tirh. 16:25) Chutiang bawkin, tûn hmaa Soviet Union rama awm kan unaute chu Siberia rama hnawhchhuah an nih khân, engtin nge mahni an intihchak? Unau Mariya Fedun-i chuan: “Hla bu chhûnga kan hla hriat zawng zawngte kan sa a,” tiin a sawi. Chûng hlate chuan unaute chu a tichak a, Jehova  hnaih nia inhriatna nei tûrin a ṭanpui tih a sawi. Jehova fakna hlate zînga i duh ber i sak hian i chak phah sawt niin i inhria em? A nih chuan, chûng hlate chu tûn aṭangin by-heart tum ang che!—“ Huaisenna Min Pe Rawh,” tih bâwm chu en rawh.

11-12. (a) Samuela thawn khat 17:37, 45-47-a sawi angin, engvângin nge Davida chu huaisen tak a nih? (b) Davida entawn tûr siam aṭangin eng zir tûr pawimawh tak nge kan neih?

¹¹ Tihduhdahna hmachhawn tûr chuan huaisenna kan neih a ngai a. Huaisen tâwk lo nia i inhriat chuan eng nge i tih theih? Huaisenna dik tak chu i ruangâm, i chakna, leh i theihnaahte a innghat lo tih hre reng ang che. Goliatha a hmachhawn laia tleirâwl Davida entawn tûr siam kha han ngaihtuah teh. Chu mi hrâwl tak nêna khaihkhin chuan Davida chu pa tê tak, chak lo tak, leh râlthuam pawh nei ṭha tâwk lo a ni a. Khandaih tak ngial pawh a nei lo. Chuti chung pawhin, a huaisen hle a. Davida chuan chu mi hrâwl chapo tak chu bei tûrin huaisen takin a va pan a ni.

¹² Engvângin nge Davida chu mi huaisen tak a nih? Jehova’n a awmpui tih a rin tlat vâng a ni. (1 Samuela 17:37, 45-47 chhiar rawh.) Davida chuan amah aia Goliatha a len zâwkzia chu a ngaihtuah lo. Chu aiin, Goliatha chu Jehova laka a têtzia a ngaihtuah zâwk a ni. An chanchin aṭang hian eng nge kan zir? Jehova’n min awmpui tlat tih kan rin a, min dodâltute chu Pathian Engkimtitheia nêna khaikhin chuan engmah lo mai an nihzia kan rin chuan huaisenna kan nei ang. (2 Chro. 20:15; Sâm 16:8) Tihduhdahna a lo thlen hma, tûnah ngei hian engtin nge huaisenna kan neih lehzual theih?

13. Engtin nge huaisenna kan neih lehzual theih? Hrilhfiah rawh.

¹³ Vântlâng hmaa Pathian Ram chanchin ṭha hrilhna hmangin tûnah ngei pawh huaisenna kan nei lehzual thei a. Engvângin nge? Thu hrilhna chuan Jehova rinchhan dân leh mihring hlauhna engpawh hneh dân min zirtîr vâng a ni. (Thuf. 29:25) Kan taksa kan sawizawi hian kan tihrâwlte a chak lehzual angin, in tinah te, vântlâng hmunah te, tawnchawp leh sumdâwnna hmunahte thu kan hrilh hian huaisenna kan nei lehzual a. Thu hril tûra tûn aṭanga huaisenna kan neih chuan kan rawngbâwlna khap a nih hunah pawh thu hril zawm zêl tûrin ṭha takin kan inbuatsaih thei ang.—1 Thes. 2:1, 2.

14-15. Nancy Yuen-i leh Valentina Garnovskaya-i te hnên aṭangin eng nge kan zir theih?

 ¹⁴ Huaisenna chhinchhiah tlâk tak târ langtu unaunu rinawm tak pahnihte entawn tûr siam aṭangin zir tûr tam tak kan nei thei a. Nancy Yuen-i chu feet nga (1.5 m)-aia sâng lo, nu huaisen tak a ni a. * Ani chu Pathian Ram chanchin ṭha hril lovin a awm thei lo. Chuvângin, Communist China ramah kum 20 aia tam lung in a tâng a. Amah dâwptu thuneitute chuan an rama “hmeichhe luhlul ber” angin an sawi a ni.

¹⁵ Chutiang bawkin, Valentina Garnovskaya-i chu tûn hmaa Soviet Union an tih, tûna Russia ramah ṭum thum lung in a tâng a, a tân chhûng belhkhâwm chu kum 21 vêl a ni. * Engvângin nge? Thu hrilh a tum tlat avângin thuneitute chuan “dân bawhchhetu hlauhawm ber” tih hming an pe a. Hêng hmeichhe rinawm pahnihte hi engin nge huaisenna nasa tak neihtîr? Jehova’n a awmpui tih an rin ngheh tlat vâng a ni.

16. Huaisenna dik tak neihna bul ber chu eng nge ni?

¹⁶ Kan sawi tâk angin, huaisenna nei tûr chuan mahni chakna leh theihnate kan rinchhan tûr a ni lo. Chu aiin, Jehova’n min awmpui a, ani chu kan tâna min beihsaktu a ni tih kan ring tûr a ni. (Deut. 1:29, 30; Zak. 4:6) Chu chu huaisenna dik tak neihna bul ber a ni.

17-18. Johana 15:18-21-naa chhinchhiah angin, Isua’n eng vaukhânna nge min pêk? Hrilhfiah rawh.

¹⁷ Mi dangte zahkai nih chu kan duh a; mahse, kan hming than dân azirin hlutna kan nei niin dik lo takin kan inngai tûr a ni lo. Isua chuan: “Mihring Fapa avânga miten an huat che u a, an tuithlâra an hau che u a, in hming a ṭha lo tiin an paih bo dêr hunah in eng a la thâwl ang,” tiin a sawi a. (Luka 6:22) Isua sawi tum chu eng nge ni?

¹⁸ Isua’n Kristiante chuan mite huat an hlawh chu nuam an ti dâwn a tihna a ni lo. Chu aiin, kan chunga thilthleng theite chu min vaukhân mai zâwk a ni. Khawvêla mi kan ni lo va.  Isua zirtîrna angin kan nung a, a thuchah hrilh chu kan hril avângin, khawvêlin min hua a ni. (Johana 15:18-21 chhiar rawh.) Jehova tihlâwm chu kan duh a. Kan Pa vâna mi kan hmangaih avânga mite’n min hua a nih chuan chu chu an buaina a ni.

19. Engtin nge tirhkohte entawn tûr siam chu kan zui theih?

¹⁹ Mite thusawi leh thiltih avâng maiin Jehova Thuhretu i nihna chu zahpui suh. (Mk. 4:5) Isua tihhlum a nih hnu lawka, Jerusalema tirhkohte entawn tûr siam ngaihtuahna hmangin mihring hlauhna chu kan hneh thei a ni. Anni chuan Juda sakhaw hruaitute’n an huatzia an hria a. (Tirh. 5:17, 18, 27, 28) Chuti chung pawhin, nî tin biak inah kalin Isua zirtîrte an ni tih mite an hriattîr a ni. (Tirh. 5:42) Mi dâwihzep nih chu an duh lo. Keini pawh, hnathawhnaah, school-ah, leh khawtlângah Jehova Thuhretute kan ni tih inhriattîr fovin, mihring hlauhna chu kan hneh thei a ni.—Tirh. 4:29; Rom 1:16.

20. Engvângin nge tirhkohte chu huat an hlawh chung pawha an hlim?

²⁰ Engvângin nge tirhkohte chu an hlim? Huat hlawh an nih chhan an hria a, Jehova duh zâwng an tih avânga dik lo taka cheibâwl an ni chu chawimawinaah an ngai a ni. (Lk. 6:23; Tirh. 5:41) A hnuah, tirhkoh Petera chuan: “Felna avânga lo tuar ta ang in nih chuan in eng a thâwl ang,” tiin a ziak a. (1 Pet. 2:19-21; 3:14) Thil dik kan tih avânga huat hlawh kan ni tih kan hriat chuan mihring hlauhna avânga engmah tithei lova awm chu kan duh ngai lo vang.

21-22. (a) Tihduhdahna atâna inbuatsaih tûrin eng nge tih i tum? (b) A dawta thuziakah eng nge kan sawiho vang?

²¹ Tihduhdahna, a nih loh leh khap behnain Jehova kan biakna a nghawng hun tûr chu kan hre lo. Mahse, Jehova nêna kan inlaichînna kan tihnghehna, huaisenna nei lehzual tûra hma kan lâkna, mite huatna hmachhawn dân kan zirna hmangin tûnah kan inbuatsaih thei tih erawh kan hria a ni. Tûna kan lo inbuatsaih lâwkna chuan nakin hunah nghet taka ding thei tûrin min ṭanpui ang.

²² A nih leh, kan biakna khap beh lo ni ta se, engtin nge ni ang? A dawta thuziakah, khap behna hnuaia Jehova rawngbâwl chhunzawm zêl tûra min ṭanpuitu Bible thu bulte kan sawiho vang.