U.S.A., Minnesota biala, St. Paul khawpuiah kum 1954 khân, Roman Catholic chhûngkuaah ka lo piang a. Unau panga zînga upa ber dawttu ka ni. Catholic school-ah ka kal a, church thiltihnaah puithiamte ka ṭanpui ṭhîn. Chuti chung pawhin, Bible hriatna ka nei tlêm hle a. Engkim siamtu Pathian a awm tih ring mah ila, Catholic church hian Pathian be tûra min ṭanpui theih ka ring lo a ni.

Dân lam zirna William Mitchell College-a a kum khatna ka zir laiin, Jehova Thuhretute chuan ka inah min rawn tlawh a. Thawmhnaw sua ka buai êm avângin, chu nupa tuak khat chuan ni danga min rawn tlawh leh tûr thu ṭha takin min hrilh a. Min rawn tlawh leh chuan, zawhna pahnih: “Engvângin nge mi ṭhate hi khawvêlah an hlawhtlin theih loh?” tih leh “Hlimna nei tûrin eng nge tih ngai?” tihte hi ka lo zâwt a. Tichuan, anni chuan Chatuan Nunnaa Hruaitu Thutak tih lehkhabu leh a kâwm hring mit la tak, New World Translation of the Holy Scriptures tih lehkhabu  chu min pe a. Bible zirpui tûra min sâwmna pawh ka pawm bawk. Chu chuan thil thar tam tak min hriatthiamtîr a ni. Pathian Ram chu leia mihringte chunga rorêl tûr sawrkâr a ni tih ka hriat chuan ka hlim hle. Mihringte sawrkârna chuan natna te, hrehawm tawrhna te, rorêl dik lohna te, leh chhiatnate chauh a thlen ṭhin avângin a hlawhtling tak tak thei ngai lo tih ka hria a ni.

Kum 1982-ah Jehova hnênah ka inpumpêk a, chumi kum tâwp lamah chuan St. Paul Civic Center-a neih “Lalram Thutak” tih inkhâwmpuiah Baptisma ka chang ta a ni. Chawlhkâr khat a liam hnuah ukil ni thei tûra exam chhâng tûrin civic center-ah ka kîr leh a. October thla tîr lamah chuan chu exam chu ka pass a, ukil hna chu ka ṭan thei ta a ni.

Chu “Lalram Thutak” Inkhâwmpuiah chuan, Brooklyn Bethel-a rawngbâwl unau Mike Richardson-a’n headquarter-ah legal offfice din a nih thu min hrilh a. Tirhkohte 8:36-a Ethiopia mi tilreh thusawi chu hre chhuakin, “Legal office-a ka thawhna tûr engin nge mi dâl?” tiin ka inzâwt a. Tichuan, Bethel-a rawngbâwl tûrin dîlna ka theh lût ta a ni.

Jehova Thuhretu ka nih avângin ka nu leh pa chu an lâwm lo hle a. Ka pa chuan Watchtower tâna ka thawh avânga ka dawn tûr hlâwknate chu min zâwt a. Chuta hnathawh chu tlâwmngaia hnathawhna a nih thu ka hrilh a. Tichuan, Bethel-a rawngbâwlte’n thla tina ṭanpuina an dawn zât $75 ka dawn tûr thu pawh ka hrilh a ni.

Court-a hnathawk tûra ka lo intiam tawh avângin, Bethel-ah chuan ka lût nghâl mai thei lo va, New York, Brooklyn Bethel-ah chuan kum 1984-ah ka thawk ṭan a. Legal Office-a thawk tûra tih ka ni a. Ka luh hun tûr dik takah ka lût a ni.

New Jersey bial, Jersey khawpuia awm Stanley Ennawm Chhuahna hmun chu kum 1983, November thlaah kan lei a. Unaute chuan chu building-ah chuan electric leh tui lâknate siam ṭha tûrin phalna an dîl a. Tualchhûng thuneitute hnênah chu building chu Jehova Thuhretute inkhâwmpui nâna hman an tum thu an hrilh chuan harsatna a lo awm ta a. Jersey khawpui dânah chuan biakna atâna hman building-te chu mite chênna bialah chauh a awm tûr a ni. Stanley Ennawm Chhuahna hmun chu khawpui sumdâwnna hmuna awm a nih avângin, khawpuia thuneitute chuan unaute dîlna chu an phalsak lo va. Unaute chuan thu tlûkna chu ngaihtuah nawn leh tûrin an ngên a; mahse, an ngenna chu hnâwlsak a ni.

 Bethel ka luh aṭanga chawlhkâr khatnaah, inawpna pâwl chuan chu thu buai chu federal district court-ah a theh lût leh a. Minnesota, St. Paul-a federal district court-ah kum hnih vêl ka lo thawh tawh avângin, chutiang thu buai chu ka hre bel hle a. Kan unaute zînga ukil pakhat chuan Stanley Ennawm Chhuahna hmun chu video-te leh concert-te ang chi khawtlâng thiltih hrang hrang atâna hman ṭhin a ni a. Engvângin nge sakhuana thiltih atâna hman phal a nih loh bîk ang? tih thu a târ lang a. Court chuan chu thu chu a ngaihtuah a, Jersey Khawpuia thuneitute’n sakhuanain a neih zalênna chu an bawhchhia tih a sawi a. Tichuan, khawpuia thuneitute chu Thuhretute hnêna phalna pe tûrin thu a pe a ni. Jehova chuan rawngbâwlnain hma a sâwn theih nân a inawpna pâwla dân lama rawngbâwltute mal a sâwm dân chu ka hmu a. Dân lama rawngbâwltute zînga ka tel ve theih avângin ka hlim tak zet a ni.

Unaute chuan siam ṭhatna hna lian tak chu an thawk ṭan ta a, kum khat pawh a liam hma 1985, September 8-ah Jersey Khawpui Assembly Hall-ah Gilead School vawi 79-na graduation program neih a ni a. Legal team-a ukil pakhat nia Lalram rawngbâwlna tihhmasâwnnaa tel ve theihna chanvo ka neih avângin, Bethel ka luh hmaa dân nêna inkûngkaih thila ka hlawhtlinnate avânga ka neih hlimna aia nasa zâwk lungawina ka nei a ni. Jehova’n dân lam thilah hetiang hian min hmang ang tih rêng ka lo hre lo.

Kum 1980 chho bâwr vêl chuan, doctor-te leh damdawi ina hnathawktute’n thisen tel lova inenkawl tûra Thuhretute ngenna chu an hnâwl mai ṭhîn a. Rorêltute chuan hmeichhiate hian thisen thunna hnâwl tûrin dikna an nei lo nia an ngaih ṭhin avângin, Thuhretu naupai hmeichhiate tân a harsa lehzual a ni. Rorêltute chuan nu naupaiin thisen thun a duh loh chuan a nun a chân phah theiin, a fa chauh a dam khaw chhuak thei niin an ngai bawk.

Kum 1988, December 29-ah Unaunu Denise Nicoleau-i chu fa a hrin hnuin a thisen nasa takin a chhuak a. A hemoglobin chu 5.0 aia a hniam avângin, a enkawltu doctor chuan thisen thun tûrin a fuih reng a. Unaunu Nicoleau-i chuan a duh lo va. A tûk zîngah, damdawi ina thuneitute chuan doctor-te’n thisen thun ngai nia an hriat anga hma an lâk theih nân rorêltu pakhat hnênah phalna an dîl a. Chu rorêltu chuan Unaunu Nicoleau-i leh a pasal chu an ngaih dân sawina hun pawh a pe lo va, doctor-te hnêna thisen thun phalna a pêk thu pawh a hrilh hek lo.

December 30, Zirtâwp nîah, damdawi ina hnathawkte chuan Unaunu Nicoleau-i chu a pasal leh a chhûngte remti lo chungin, thisen an thun lui a.  Chumi tlai chuan, an chhûngte zînga ṭhenkhat leh kohhran upa pahnih khat chu Unaunu Nicoleau-i thisen thun lo tûra doctor-te dan tum nia dik lo taka puhin man an tâwk a. December 31, Inrinni zîngah, New York City leh Long Island chanchinbute chuan chumi chanchin chu a tichhuak a ni.

Thawhṭan zîngah, rorêlna sâng zâwka thuneitu Milton Mollen-a ka bia a. Rorêltu dang pakhatin sawihona pawh awm lova doctor-te hnêna thisen thun phalna a pêk thu chu sawiin, thil awm dân chu ka hrilh a. Rorêltu Mollen-a chuan chumi thu buai nêna inkûngkaih dân pawimawhte sawiho tûra tlai lama a office-a kal tûrin mi hrilh a. Chumi tlai chuan, ka overseer, Philip Brumley-a nên Rorêltu Mollen-a office-ah kan va kal a. Mollen-a chuan kan zînga lo tel ve tûrin damdawi in ukil chu a sâwm bawk a. Kan sawihona chu a so sâng hle. Unau Brumley-a chuan “inbeng dai” deuh tûrin min rawn hrilh ru hial a ni. Damdawi in ukil dik lohzia finfiah tuma ka ṭan lutuk avângin, chutianga min rawn fuih chu thil ṭha tak a ni.

Dârkâr khat vêl a liam hnu chuan, Rorêltu Mollen-a chuan thu buai chu a tûka chai hmasak ber atân a dah ta a. A office aṭanga kan chhuah rualin, Rorêltu Mollen-a’n damdawi in ukil tân “naktûk chu phurrit a ni ang,” tiin a sawi a. Chu ukil chuan hnehna a chan a rinawm loh a tihna a ni. Hnehna kan chang dâwn tih Jehova’n min hriattîr ni hian ka hria. Jehova’n a thiltumte tihlawhtling tûra min hman dân ka hmuh hian mak ka ti hle a ni.

A tûka kan thu chai tûr atân zân lamah ṭha takin kan inbuatsaih a. Rorêlna court chu Brooklyn Bethel aṭanga hla vak lova a awm avângin, kan Legal Office-a unau a tam zâwkte chu kein kan kal a. Rorêltu palite’n kan thu buai an ngaihthlâk hnu chuan, thisen thun tûra thupêk chu sût lêt tûra tih a ni ta a. High court chuan Unaunu Nicoleau-i chu hnehna chantîrin, dam lote ngaih dân zâwt hmasa lova thupêk chhuah chu mihringte dikna palzûtna a ni tih a nemnghet a ni.

New York-a rorêlna sâng ber chuan, Unaunu Nicoleau-i’n thisen tel lova inenkawl tûrin dikna a nei tih a nemnghet ta a. Hei hi state hrang hranga high court-in thisen nêna inkûngkaih thu buaia hnehna min chantîr pali zînga ka telna hmasa ber a ni. (“ State Supreme Court-a Hnehnate,” tih bâwm chu en rawh.) Legal team-in naupang inchuhna, nupa inṭhenna, in hmun lo  ram leh ramri inchuhna thu buaite a chin felnaah pawh ka tel bawk a ni.

Ka nupui Dawn-i ka hmuh hmasak ber ṭum chuan, ani chu pasal ṭhen tawh fa pathum nei a ni a. Chhûngkaw tâna eizawng pahin pioneer a thawk a. A nun chu harsa hle mah se, Jehova rawngbâwl a tum tlatna chuan ka rilru a hneh hle a ni. Kum 1992-a New York Khawpuia neih “Tiêngtute” tih District Inkhâwmpuiah kan tel tlâng a, chutah chuan nupui atân ka bia a. Kum khat a liam hnuah kan innei a. Thlarau lam ngaihsak tak leh fiamthu duh tak ka nupui chu Jehova hnên aṭanga thilpêk a ni. Ka nupui Dawn-i chu ka chungah a ṭhain, ka tân malsâwmna a ni tak meuh a ni.—Thuf. 31:12.

Kan inneih chuan naupangte chu kum 11, 13, leh 16-te an ni a. An tâna pa ṭha tak nih ka duh avângin, pahrawn ṭha tak nih dân chungchânga kan thu leh hla chhuaha awm zawng zawng chu ngun taka chhiarin, nunpui ka tum a ni. Kum tam tak chhûng chu harsatnate awm mah se, naupangte’n an ṭhian rinchhan tak leh an pa duh tak anga min pawm avângin ka lâwm hle. Kan fate leh an ṭhiante tân kan inhawng reng a, naupangte hual vêla awm chu nuam kan ti hle a ni.

Kum 2013-ah, kum upa tak kan nu leh pa te enkawl tûrin Dawn-i nên Wisconsin-ah kan insawn a. Chuti chung pawha Bethel-a rawng ka la bâwl zawm thei chu mak ka ti hle. Kan inawpna pâwla legal team ṭanpui tûrin temporary volunteer anga thawk zawm zêl tûra sâwm ka ni.

Kum 2018, September thla aṭangin ka khuh nasa hle tih ka inhre ṭan a. Kan khuaa doctor chuan min endik a; mahse, ka natna tak chu a hre thei lo a ni. A hnuah, doctor dang pakhat chuan hriatna thazâm lam zir mi doctor pan tûrin min hrilh a. Kum 2019, January thlaah doctor chuan progressive supranuclear palsy (PSP) an tih thazâm lam natna ka nei nia a hriat thu min hrilh a ni.

Ni thum a liam hnuah, ka ngainat tak infiamnaa ka tel laiin, ka bân rêk ka titliak a. Chu infiamna chu ka ngainat êm avângin, a thiam pawh ka thiam hle a. Mahse, ka thate chu ka duh angin ka hmang thei tawh dâwn lo tih ka hria. Ka thazâm natna chu a zual chak hle a; ka ṭawng te, ka chêt vêl te, leh ka thil lemte thlenga nghawng a rawn nei nghâl mai chu mak ka ti hle a ni.

Lalram hmasâwnna atâna ukil pakhat anga ka thiamnate ka hmang thei chu chanvo hlu tak niin ka hria. Jehova Thuhretute’n thisen tel lova inenkawl tûra an neih dikna chu humhim tûrin Magazine-ahte thu ka ziah bâkah, damdawi lam leh dân lama mi thiamte inhmuh khâwmnaa thu ka sawi thei chu chanvo hlu tak a ni. Mahse, Luka 17:10-a târ lan angin, kei chu ‘bâwih ṭhahnem lo ka ni a; ka tih tûr rêng ka ti a ni.’