Jehova chuan inneite chu hlim taka awm tûr leh inlaichînna nghet tak nei tûrin a duh ngei mai. (Mt. 19:4-6) Nupui pasal neih i duh chuan engtin nge kawppui tûr ṭha i hmuh theih ang? Jehova chuan min Siamtu a nih angin inneihna hlimawm nei thei tûra kan tih ngaite chu a hria a. Chuvângin, chumi chungchânga thu bul min pêkte i zawm chuan hlimna dik tak i nei ang. Chûng thu bul zînga ṭhenkhat chu i lo ngaihtuah ang u.

A hmasain, keimahni chungchângah: “Thinlung hi thil zawng zawng aiin bumhmang ber, chhe lailet dêr a ni,” tih hi kan hriatthiam a ngai a. (Jer. 17:9) Nupui pasal nei duhte an intawna an inngaihzâwn ṭan hian, an induhna chu rang takin a ṭhang chho thei a, chutiang hunah chuan an tân thu tlûkna fing siam a harsa ṭhîn a ni. Mite hian an thinlung duhna ṭanchhana nupui pasal tûr an thlan hian, chu chuan a tâwpah chhiatna a thlen tlângpui ṭhîn. (Thuf. 28:26) Chuvângin, an inngaihzâwn ṭan tîr lama inngainatna inlantîr emaw, an inhriat chian tak tak hmaa thu intiam emaw chu a tute tân pawh a finthlâk lo hle.

Thufingte 22:3-na chuan: “Mi hmanghria chuan thil ṭha lo chu a hmuhin a biru ṭhîn a; mi mâwl erawh chuan a tâwn mai ṭhîn a, a tuar phah ṭhîn,” tiin a sawi a ni. Kawppui zawnna website hman chu eng ang chiahin nge a hlauhawm theih? Lungchhiatthlâk takin, mi ṭhenkhat chu an hmêl hriat lohte nên online aṭanga inchhaiin, an inngaizâwng a, a hnuah bum an tâwk tih an inhre leh ṭhîn. Chu bâkah, mi ṭha lote chuan thiltawn la nei lote hnên aṭanga sum an rûk bo theih nân account lemte an siam a. A châng chuan, chutiang mi ṭha lote chu Thuhretute niin an insawi hial a ni.

A hlauhawmna dang pakhat hi han ngaihtuah teh. Kawppui tûr zawnna website ṭhenkhat chuan chhiarkawp chawh dân chi khat hmangin mite kawppui tûr âwm rawtnate a pe a. Mahse, chutiang tih dân chu a hman tlâk tak zet tih finfiahna a awm lo. Thil pawimawh tak inneihna ang chi tâna mihring siam computer program rin chu a finthlâk dâwn em ni? Engtin nge computer program chu Bible thu bulte nêna khaikhin ṭan a nih rêng rêng?—Thuf. 1:7; 3:5-7.

Thufingte 14:15-ah chuan: “Mi mâwl chuan  thu tin a ring a, mi remhria erawh chuan a kalna a en ṭha ṭhîn,” tih thu bul kan hmu a. Tu emaw chu i kawppui ni thei tûr âwm anga i ngaihtuah hmain, ani chu hriat chian hle i duh ngei ang. Mahse, online aṭang mai chuan chutianga hriat chian theih a ni ṭhîn lo. Mi mal chanchinte inhmuhsakin leh online-a inbiak nân hun tam tak hmang mah ula, ani chu i hre chiang thei tak tak ang em? An hmangaih takte tawng nia inngaitu mi ṭhenkhat chuan a tâwpa hmaichhana an han inhmuh hian an rin ang an nih loh avângin mak an ti hle a ni.

Fakna hla phuahtu chuan: “Mi eng mah lo mai maite hnênah ka ṭhu ngai lo va; vervêkte [“an nihna thuptute,” NW] hnênah pawh ka lût hek lo vang,” tiin a sawi a. (Sâm 26:4) Mi tam tak chuan online-a inchhainaah an thlalâkte chu a tak aia duhawm zâwk tûrin an siam ṭhîn a; chu chu thil pângngai tak niin an ngai a ni. Online-a an inbiaknaah an mize ṭha lote an thup emaw, a lang chhuak hman lo emaw a ni thei. Mi ṭhenkhat chu Jehova Thuhretute angin an insawi mai thei a; mahse, anni chu baptisma chang tawh an ni tak tak em? Thlarau lama mi puitling an ni em? Jehova nên mi mal inlaichînna an nei em? An kohhrana mite zah an kai em? Nge ni a, entawn tlâk loh leh “ṭhian sualte” an ni zâwk? (1 Kor. 15:33; 2 Tim. 2: 20, 21) Bible thu bulte nêna inmilin nupui pasal nei thei an ni em? Chûng thilte chu i hriat a ngai a; mahse, anmahni hre chiangtu Thuhretu dangte ṭanpuina tel lo chuan hriat chian a harsa thei a ni. (Thuf. 15:22) Chu bâkah, Jehova chhiahhlawh rinawm chuan ring lotu nêna ‘nghâwngkawl bah dun’ chu a ngaih pawh a ngaihtuah ngai lo vang.—2 Kor. 6: 14; 1 Kor. 7: 39.

Kawppui tûr zawnna website hman chu a hlauhawm a; mahse, kawppui tûr zawn dân leh inneihna chawimawi tlâk min neihtîr thei inlaichînna nghet tak neih theih dân kawng ṭha zâwk a awm a ni. Khawiah nge kawppui tûr ṭha tak chu i hmuh theih? Inhmuhkhâwm theih a nih lai chuan, Jehova Thuhretute chuan kohhran inkhâwmah te, bial inkhâwmpuiah te, regional inkhâwmpuiah te, leh inkawmhona dangahte chuan unaute hriat chian theihna hun remchâng an nei thei a ni.

COVID-19 hripui lên hun chhûng ang chi, inhmuhkhâwm a theih loh hnuah pawh electronic hmanruate hmangin kohhran inkhâwmte kan nei a, chutah chuan kawppui nei lo Thuhretu dangte hriat chian theihna hun remchâng kan nei a ni. Inkhâwma an thusawi dânte i ngaithla thei a, chhânna pea, rinna an târ lan dânte pawh i hmu thei a ni. (1 Tim. 6:11, 12) Inkhâwm bâna breakout room-ah amah nên in inbe thei pawh a ni thei bawk. Videoconference hmanga Thuhretu unaute nêna intihhlimnaah chuan i mi ngaihven takin mi dangte a cheibâwl dân chu i lo chîk thei a; chuta ṭangin, a mize dik tak i hre thei ang. (1 Pet. 3:4) Hunte a liam zêl chuan, in inhre chiang lehzual ang a, in thiltumte leh tehnate a thuhmun leh thuhmun loh te, kawppui ṭha a nih dâwn leh dâwn lohte chu i hre thei ang.

Bible thu bul nêna inmila kawppui tûr zawngte chuan, Bible sawi thufing: “Nupui ṭha [a nih loh leh, pasal ṭha] hmu chuan thil ṭha a hmu a, Jehova duhsakna a dawng ṭhîn,” tih a dikzia chu an tawng lehzual ngei ang.—Thuf. 18:22, NW.