1. Inelna rilru put hmang chuan mi chungah eng nghawng nge a neih theih?

TUN laia mi tam tak chuan inelna rilru put hmang an neih avângin mahni hmasial takin thil an ti a. Entîr nân, sumdâwng pakhat chuan mi dang aia hlawhtlin a duh avângin, a sumdâwnpuite chunga chhiatna thlen thei thil eng emaw a ti mai thei. Infiam mi chuan hnehna an chan theih nân, an tumpuite zînga mi chu na takin a hliam pawh a ni thei. A nih loh leh, zirlai chuan university ṭha taka a luh theih nâna exam a chhân hunah a rûkin a entawn pawh a ni thei bawk. Kristiante kan nih angin, chutianga tih chu a dik lo tih kan hria; chûngte chu “tisa thiltihte” zînga mi a ni si a. (Gal. 5:19-21) A nih leh, Jehova chhiahhlawh ṭhenkhatin hre miah lovin kohhranah inelna rilru put hmang an lo awmtîr reng thei em? Chu chu zawhna pawimawh tak a ni, inelna rilru put hmang chuan kan unau inpumkhatna a tichhe thei si a.

2. He thuziakah hian eng nge kan sawiho vang?

² He thuziakah hian, unaute nêna kan inkâra inelna rilru put hmang awmtîr theitu mize ṭha lote kan sawiho vang a. Bible hun laia inelna rilru put hmang do tlattu mi rinawm a hmei a pate entîrna pawh kan sawiho bawk ang. A hmasain, thil ti tûra min chêttîrtu kan en dik theih dân i lo sawiho vang u.

3. Eng zawhnate kan inzawh ang?

³ Min chêttîrtu en dik ṭhin chu thil ṭha tak a ni a. Heti hian kan inzâwt thei: ‘Mi dangte aia ṭha zâwk nia ka inngaih chauhvin ka hlim ṭhîn em? Ka thiltih apiang chu ṭha ber nia inthlîr duhna leh unau ṭhenkhatte aia ṭha zâwk nia inhriatna  neih duh vânga ti ka ni em? Nge ni a, Jehova hnênah ka neih ṭhat ber pêk ka duh mai zâwk?’ tiin. Engvângin nge chûng zawhnate chu kan inzawh ang? Bible sawi hi lo chhinchhiah ang che.

4. Galatia 6:3, 4-a târ lan angin, engvângin nge mi dangte nêna kan inkhaikhin loh vang?

⁴ Bible chuan mi dangte nêna inkhaikhin lo tûrin min fuih a ni. (Galatia 6:3, 4 chhiar rawh.) Engvângin nge? Kawng khatah chuan, mi dangte aia ṭha zâwka inngaihna chuan chapona min neihtîr thei a. Kawng leh lamah chuan, mi dangte aia tling lo zâwka inhriatna chuan lunghnualna min thlen thei bawk a ni. A eng zâwk zâwk pawh ni se, chutianga inkhaikhin chu a finthlâk lo. (Rom 12:3) Greece rama awm Katerina-i * chuan: “Kei aia hmêl ṭha zâwk, rawngbâwlnaa hlawhtling zâwk, leh ṭhian siam thiam zâwkte nêna inkhaikhin ka chîng ṭhîn a. Chu chuan hlutna nei lo nia inhriatna min neihtîr a ni,” tiin a sawi. Pathian Jehova chuan kan hmêlṭhat vâng te, ṭawngkam thiam vâng te, leh mite hriat hlawh tak kan nih vângte ni lovin, a Fapa thusawite ngaihthlâk kan duh avâng zâwkin a lamah min hîp ṭheuh tih kan hre tûr a ni.—Joh. 6:44; 1 Kor. 1:26-31.

5. Unaupa Hyun-a thiltawn aṭangin eng nge kan zir theih?

⁵ Kan inzawh theih zawhna dang leh chu, ‘Remna siamtu nia hriat nge ka nih a, mi dangte nên kan intithiam lo fo zâwk?’ tih hi a ni. South Korea rama awm unaupa Hyun-a thiltawn hi lo chhinchhiah teh. Thâwk khat lai chuan, kohhrana chanvo nei mi ṭhenkhat chuan an el niin a hre tlat a. Ani chuan, “Chûng unaupate chu ka sawisêlin, an thusawite chu ka hnial fo ṭhîn,” tiin a sawi. Eng nge a rah chhuah? “Ka rilru put hmang chuan kohhrana inpumkhatna a thlen lo,” tiin a sawi. A ṭhian ṭhenkhat chuan a rilru put hmang hre thiam tûrin an ṭanpui a. Unau Hyun-a chu a ṭûl anga insiamremin, tûnah chuan kohhran upa niin rawng a bâwl tawh a ni. Remna awmtîr aia inel duhna rilru put hmang kan awmtîr zâwk tih kan inhriat chuan, hma kan la nghâl vat tûr a ni.

6. Galatia 5:26-a sawi angin, inelna rilru put hmang awmtîrtu mize ṭha lote chu engte nge ni?

⁶ Galatia 5:26 chhiar rawh. Eng mize ṭha lote’n nge inelna rilru put hmang lan chhuahtîr thei? Pakhat chu inngaihhlutna hi a ni a. Mi inngaihlu chu mi chapo leh mahni hmasial tak a ni. A dang leh chu îtsîkna hi a ni a. Itsîkna neitu chuan mi dang thil neihte chu a awt mai ni lovin, chhuhsak duhna hial a nei ṭhîn a. Chuvângin, îtsîkna hi huatna chi khat a ni tih a chiang hle. Chûng mize ṭha lote pumpelh ṭhak chu kan duh ngei ang!

7. Inngaihhlutna leh îtsîknain chhiatna a thlen theih dân chu eng nên nge kan khaikhin theih?

⁷ Inngaihhlutna leh îtsîkna mize ṭha lote chu thlawhnaa a tui thlit fîm loh hman nên khaikhin theih a ni a. Thlawhna chu a thlâwk chhuak thei pawh a ni thei; mahse, a tuia bawlhhlawh awm chuan a luanna pipe a hnawhphui avângin a ṭum hma lawka khâwl chu tithiin, thlawhna chu a chêtsualtîr thei a ni. Chutiang bawkin, mi chuan hun engemawti chhûng Jehova rawng a lo bâwl tawh pawh a ni thei. Mahse, inngaihhlutna leh îtsîknain a chêttîr avânga rawngbâwl a nih chuan thlawhna chesual angin a chhiatpui ang. (Thuf. 16:18) Jehova rawngbâwl a bânsan mai bâkah, mahni leh mi dangte chungah chhiatna a thlen bawk ang. A nih leh, engtin nge inngaihhlutna leh îtsîkna laka kan invên theih?

8. Engtin nge inngaihhlutna chu kan do hneh theih?

 ⁸ Philippi khuaa mite hnêna Paula fuihna thu: “Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se,” tih hi rilrua vawng rengin, inngaihhlutna chu kan do hneh thei a ni. (Phil. 2:3) Mahni aia mi dangte ṭha zâwka kan ruat chuan, keini aia thiamna leh theihna neitu kan unaute chu kan el lo vang a. Chu aiin, anni chu kan lâwmpui zâwk ang. Pathian chawimawi nâna an theihnate an hman chuan kan lâwmpui lehzual dâwn a ni. Chu bâkah, chûng unaute chuan Paula fuihna hi an zâwm a nih chuan, anni pawhin kan mize ṭhate chauh hmuh an tum ang a. Chutiang a nih chuan, kan zavai hian kohhranah remna leh inpumkhatna kan awmtîr ang.

9. Engtin nge îtsîk duhna kan neih chu kan thunun theih?

⁹ Thuhnuairawlhna—mahni tlin tâwk hriatna—neihna hmangin îtsîk duhna kan neih chu kan thunun thei a. Thuhnuairawlhna kan neih chuan, mi dangte aiin kan ṭha zâwk tih lantîr kan tum lo vang a. Chu aiin, keini aia thiamna nei unaute hnên aṭanga inzir chu kan tum zâwk ang. Entîr nân, kohhrana unuapa pakhatin thusawi ṭha tak a pe angah han mitthla teh. A thusawi tûr atâna a inbuatsaih dân kan zâwt thei a. Unaunu chu ei rawng bâwl thiam tak a nih chuan, ei siam lama hma kan sâwn ve theih nân a siam dânte chu kan zâwt pawh a ni thei. A nih loh leh, Kristian ṭhalai pakhat chuan ṭhian siam a harsat a nih chuan, ṭhian siam thiam tak mi dangte hnên aṭangin ṭanpuina a dîl pawh a ni thei bawk. Chutiang kawng chuan, îtsîkna chu pumpelhin, kan thiamna chu kan tihmasâwn thei a ni.

10. Gideona’n eng harsatna nge a hmachhawn?

¹⁰ Manasea thlaha mi Gideona leh Ephraim-hote inkâra thilthleng hi lo chhinchhiah teh. Gideona leh a sipai 300-te chuan Jehova ṭanpuinain hnehna ropui tak an chang a, chu chu an chapopui thei a ni. Ephraim-hote chuan Gideona chu fak tûr ni lovin, sawisêl tûrin an va hmu a. Pathian hmêlmate beihnaa a tîr aṭanga sâwm an nih loh avângin lungni lovin,  an thin a rim a ni. Anni chuan an hnam chawimawi chu an ngai pawimawh lutuk a, chu aia pawimawh zâwk—Pathian hming chawimawi nân leh A mite humhim nâna Gideona thiltih chu an hmuh hmaih a ni.—Ro. 8:1.

11. Engtin nge Gideona’n Ephraim-hote chu a chhân lêt?

¹¹ Gideona chuan inngaitlâwm takin Ephraim-hote hnênah: “Nangni ai hian keiin eng nge ka lo tihuchuak theih bîk ni?” tiin a sawi a. Chumi hnuah, Jehova’n anmahni hmanga thil ropui tak a tihte chu a hriatnawntîr a ni. Chuvângin, Ephraim-hote “thinrim chu a reh ta a.” (Ro. 8:2, 3) Gideona chuan Pathian mite zînga remna a awm theih nân inngaihtlâwmna a lantîr a ni.

12. Ephraim-hote leh Gideona entîrna aṭangin eng nge kan zir theih?

¹² He thu aṭang hian eng nge kan zir theih? Ephraim-hote entîrna aṭangin, Pathian Jehova chawimawi aiin mahni inchawimawi chu kan ngai pawimawh zâwk tûr a ni lo tih kan zir a ni. Chhûngkaw lûte leh kohhran upate chu Gideona hnên aṭangin an inzir thei a. Kan thiltih avânga tu emaw a lungni lo a nih chuan, a thlîrna aṭanga thlîr thiam kan tum tûr a ni. Ani chu thil ṭha a lo tih tawhte avângin kan fak thei a. Chutianga ti tûr chuan inngaihtlâwmna kan neih a ngai ang, ani chu a thiam lo zâwk a ni tih chiang taka kan hriat phei chuan a ngai lehzual ngei ang. Kan dik a ni tih hai lan tum aiin, unaute nêna remna neih chu a ṭha zâwk a ni.

13. Hani’n eng harsatna nge a hmachhawn a, eng nge a tih?

¹³ Hani thiltawn pawh hi han ngaituah teh. Amah hmangaih êm êmtu Levia hnama mi Elkana nên an innei a. Mahse, Elkana chuan nupui dang Penini pawh a nei a ni. Elkana chuan Hani chu Penini aiin a hmangaih zâwk a; mahse, “Penini chuan fate a nei a, Hani erawh chuan fate a nei ve lo.” Chuvâng chuan, Hani “lungngaihna tizual tûrin” Penini chuan a deusawh ṭhîn a ni. Engtin nge Hani’n a chhân lêt? A rilru a na hle! “A ṭap a ṭap a, chaw pawh a ei lo.” (1 Sam. 1:2, 6, 7) Mahse, Hani chuan kawng engemawti takin Penini chunga phuba lâk a tum tih târ lanna a awm lo. Chu aiin, Jehova hnênah a rilru vei zâwngte chu a hrilh a, a harsatna chu a chinfelsak ang tih a ring tlat zâwk a ni. A nih leh, Penini chuan Hani chunga a rilru put hmang chu a thlâk êm? Bible-in a thlâk thu a sawi lo. Mahse, Hani chuan chhûngrila thlamuanna a nei leh tih erawh kan hria. “Lungngai hmêl a pu ta lo va,” tiin kan chhiar si a.—1 Sam. 1:10, 18.

14. Hani entawn tûr siam aṭangin eng nge kan zir theih?

¹⁴ Hani entawn tûr siam aṭangin eng nge kan zir theih? Tu emawin kawng eng emaw taka a el che a nih chuan, dinhmun chu i thunun thei tih hre reng ang che. Chu a elna chea i va tel  kher a ngai lo. Sual chu suala thungrulh aiin, amah nêna inrem tum zâwk ang che. (Rom 12:17-21) Inrem a duh lo a nih pawhin, chhûngrila thlamuanna i nei ang.

15. Apollova leh Paula inanna chu eng nge ni?

¹⁵ A tâwp berah, zirtîr Apollova leh tirhkoh Paula te entawn tûr siam aṭanga kan zir theihte hi lo chhinchhiah ang che. An pahnih chuan Pathian Thu hre tak an ni a. Mite hriat hlawh tak leh zirtîrtu thiam tak an ni ve ve a ni. Chu bâkah, mi tam tak chu zirtîrte ni tûrin an ṭanpui bawk. Mahse, an inkârah inelna a awm lo.

16. Apollova chu eng ang mi nge a nih?

¹⁶ Apollova chu “Alexandria khuaa piang” a ni a, chu khua chu kum zabi khatnaa zirna hmunpui a ni. Thusawi thiam tak a nih bâkah, “Pathian Lehkha Thute a hre nasa êm êm” bawk. (Tirh. 18:24) Korinth khuaa a awm laiin, unau ṭhenkhat chuan Paula pawh tiamin, chuta awm unau ṭhenkhat dangte aiin ani chu an ngaina zâwk a. (1 Kor. 1:12, 13) Chutiang inṭhen hranna awmtîr thei rilru put hmang chu Apollova awmtîr a ni em? A nih a rinawm lo hle. Dik tak chuan, Korinth khua a chhuahsan aṭanga hun eng emaw chen a liam hnuah, Paula chuan Korinth khuaa kîr leh tûrin a fuih a ni. (1 Kor. 16:12) Paula chuan Apollova’n kohhranah inthen darhna a awmtîr niin ngai se chuan, chutiang chuan a fuih hauh lo vang. Apollova chuan a thilpêk dawn chu chanchin ṭha hril nân leh unaute tihchak nân ṭha takin a hmang tih a chiang hle. Chu bâkah, mi inngaitlâwm tak a ni tih kan chiang thei bawk. Entîr nân Akuila leh Priskilli te’n “Pathian kawng thu fel lehzuala an hrilhfiah” pawh khân, a lungnih loh thu târ lanna a awm lo.—Tirh. 18:24-28.

17. Engtin nge Paula’n remna a awmtîr?

 ¹⁷ Tirhkoh Paula chuan Apollova thil ṭha tihte chu a hria a. Mahse, mite’n amah aia Apollova ṭha zâwka an ngaih chu pawi a ti lo. Paula inngaihtlâwmzia te, a thuhnuairawlhzia te, leh a nunnêmziate chu Korinth kohhran hnêna a lehkhathawn aṭangin a hriat theih a. Mite’n, “Paula pâwl ka ni,” tia an sawi chu a duh lo va, chu aiin, Pathian Jehova leh Isua Krista chu a ngaihventîr zâwk a ni.—1 Kor. 3:3-6.

18. Korinth thawn khat 4:6, 7 ṭanchhanin, Apollova leh Paula entawn tûr siam aṭangin eng nge kan zir?

¹⁸ Apollova leh Paula entawn tûr siam aṭangin eng nge kan zir theih? Jehova rawngbâwlnaah kan thawkrimin, baptisma chang thei tûrin mi tam tak kan ṭanpui pawh a ni thei. Mahse, hlawhtlinna kan neih eng pawh hi Jehova ṭanpuina avâng chauhva nei thei kan ni tih kan hria a ni. Apollova leh Paula hnên aṭanga kan zir theih dang leh chu, kohhranah mawhphurhna kan neih tam poh leh unaute zîngah remna awmtîr theihna kan nei tam lehzual tih hi a ni. Pathian mi ruatte’n Bible ṭanchhan fuihnate min pêk a, anmahni ni lova kan entawn tûr ber Isua Krista min ngaihventîrna hmanga kohhrana remna leh inpumkhatna an awmtîr hian kan va lâwm tak êm!—1 Korinth 4:6, 7 chhiar rawh.

19. Kan zaa kan tih theih chu eng nge ni? (“ Inelna Rilru Put Hmang Chu Pumpelh Rawh,” tih bâwm chu en bawk rawh.)

¹⁹ Mi tin hian Pathian pêk thiamna leh theihna kan nei ṭheuh va. Chu thilpêk chu “rawng inbâwl tawn” nân kan hmang thei a ni. (1 Pet. 4:10) Kan thiltih chu a beitham hle niin kan ngai mai thei. La zai sîn takin kawr a ṭhui pum angin, kan thiltih ho tê chuan inpumkhatna a awmtîr thei a ni. Chuvângin, kan za hian inelna rilru put hmang nei lo tûrin theih tâwp i chhuah ang u. Kohhranah remna leh inpumkhatna a awm theih nân theih tâwp chhuah i tum tlat bawk ang u.—Eph. 4:1-3.