1. Jehova’n i tân eng nge a tih?

ENGTIN nge Jehova Thuhretute zînga mi i rawn nih? A hmasain, i nu leh pa te, i hnathawhpui te, i school kalpui te, a nih loh leh in tin kala thu hrilh rawngbâwlna aṭangin “chanchin ṭha” i hria a. (Mk. 13:10) Chumi hnuah, unau tu emaw chuan hun tam tak pein Bible a zirpui che a. Bible zirna aṭangin, Jehova hmangaihna i rawn neiin, ani pawhin a hmangaih che tih i hria a. Jehova’n thutaka a hîp che avângin Isua Krista zirtîr i rawn ni a, tûnah chuan chatuan nun beiseina i nei ta a ni. (Joh. 6:44) Jehova’n unau tu emaw chu thutak zirtîr tûr chea a chêttîr avâng leh a chhiahhlawh pakhat anga a pawm che avângin i lâwm hle ngei ang.

2. He thuziakah hian eng nge kan sawiho vang?

² Thutak kan hriat tawh avângin, kan ruala nunna kawnga kal ve tûrin mi dangte ṭanpui theihna hun remchâng kan nei a ni. In tin kal rawngbâwlna chu nuam kan ti mai thei; mahse, mite hnêna Bible zir an duh leh duh loh zawh emaw, mi Bible zirpui emaw chu harsa kan ti mai thei a. Chutiang chuan i awm em? I awm a nih chuan, he thuziaka rawtna ṭhenkhat hi a ṭangkai hle tih i hmu ang. Zirtîr siam duhna nei tûra min chêttîrtu chu kan sawiho vang a. Chu bâkah, Bible zirpui neih min hrehtîrtu harsatnate kan hneh theih dân pawh kan sawiho bawk ang. Tûnah, chanchin ṭha hriltute mai ni lo va, zirtîrtute kan nih a ngaih chhan i lo sawiho hmasa ang u.

3. Engvângin nge thu kan hrilh?

³ Isua leia a awm lai khân, a hnungzuitute hnênah thupêk pahnih a pe a. Pakhatna, ram chanchin ṭha hril tûrin a hrilh a,  a tih dân tûr pawh a kawhhmuh bawk a ni. (Mt. 10:7; Lk. 8:1) Isua’n a zirtîrte hnênah mite’n chanchin ṭha an pawm huna an tih tûr leh an hnâwl huna an tih tûrte pawh tiamin, thil tam tak a hrilh a. (Lk. 9:2-5) Chu bâkah, a hnungzuitute chuan chanchin ṭha chu ‘hnam zawng zawng hnêna an hriattîr’ tûr thu sawiin rawngbâwlna a darh zau dân tûr pawh a sawi lâwk a ni. (Mt. 24:14; Tirh. 1:8) Mite chuan thu hrilh rawngbâwlna chu engtiang pawhin chhâng lêt mah se, a zirtîrte chuan Pathian Ram leh chumiin a hlen chhuah tûrte chu mite hnênah an hrilh tûr a ni.

4. Matthaia 28:18-20-a sawi angin, Lalram chanchin hrilh bâkah, eng nge kan tih ngai?

⁴ Isua’n a zirtîrte hnêna a pêk thupêk pahnihna chu eng nge ni? A hnungzuitute hnênah zirtîr ni thei âwm mite chu a thupêk zawng zawng pawm tûra zirtîr tûrin a hrilh a. Mahse, mi ṭhenkhat sawi angin, thu hrilh leh zirtîr siam rawngbâwlna chu kum zabi khatna hun lai atân chauh a ni em? Ni lo, Isua chuan he rawngbâwlna pawimawh tak hi kan tûn lai hun, ‘khawvêl tâwp thlenga’ hrilh a ni dâwn tih a sawi a ni. (Matthaia 28:18-20 chhiar rawh.) Isua’n chu thupêk chu zirtîr 500 aia tam hnêna a inlâr laia a pêk a nih a rinawm. (1 Kor. 15:6) Johana hnêna inlârna a hmuhtîrah chuan, a zirtîr zawng zawngte chu Jehova chanchin zir tûra mi dangte ṭanpui tûrin a beisei tih chiang takin a târ lang a ni.—Thup. 22:17.

5. Korinth thawn khat 3:6-9-a sawi angin, engtin nge Paula’n thu hrilhna leh zirtîr siam rawngbâwlnain inkûngkaihna a neih dân chu a khaikhin?

⁵ Tirhkoh Paula chuan zirtîr siam rawngbâwlna chu thlai chîn nên a khaikhin a, thla chi tuh mai aia tam kan tih a ngai tih a sawi a ni. Ani chuan Korinth khuaa mite hnênah: “Keiin ka phun a, Apollovan tuiin a châwm a, . . . nangni Pathian thlawhhma chu in ni,” tiin a sawi. (1 Korinth 3:6-9 chhiar rawh.) ‘Pathian thlawhmaa’ hnathawktute kan nih angin, thlai chi kan tuh mai bâkah, tui pein, a ṭhan chhoh dân chu kan endik reng a. (Joh. 4:35) Chutih rualin, a ṭhantîrtu chu Pathian a ni tih kan hria a ni.

6. Mite kan zirtîr hunah, eng ti tûrin nge kan ṭanpui ang?

⁶ “Chatuana nun duhna rilru dik tak neite” chu kan zawng reng a. (Tirh. 13:48, NW) Zirtîrte ni tûra chûng mite ṭanpui tûr chuan, Bible aṭanga an thu zirte (1) hre thiam tûrin, (2) pawm tûrin, leh (3) nunpui tûrin kan ṭanpui tûr a ni. (Joh. 17:3; Kol. 2:6, 7; 1 Thes. 2:13) Kohhrana unau zawng zawngte chuan Bible zirlaite chu an lo inkhâwm hunah ṭha taka lo lâwm a, an chunga hmangaihna lantîrin an ṭanpui thei a. (Joh. 13:35) Zirlaiin ‘kulhpui nghet tak’ ang thurin leh chîn dân a neihte hneh tûr chuan, Bible zirtîrtuin hun leh tha tam tak a pêk a ngai thei bawk. (2 Kor. 10:4, 5) Zirlai chu a nuna inthlâk danglamna siam tûr leh a tâwpa baptisma chang thei tûra ṭanpui tûr chuan, thla eng emaw zât a duh pawh a ni thei. Mahse, chu chu thawhrim hmanhla tak a ni.

7. Thu hrilh leh zirtîr siam rawngbâwlnaa tel tûrin engin nge min chêttîr?

⁷ Engvângin nge thu hrilh leh zirtîr siam rawngbâwlnaa kan tel? Pakhatna, Jehova kan hmangaih vâng a ni a. Thu hrilh leh zirtîr siam tûra thupêk chu theih tâwp chhuaha kan zawm chuan, Pathian kan hmangaihzia kan lantîr a ni ang. (1 Joh. 5:3) Hei hi han ngaihtuah teh: Jehova i hmangaihna chuan in tin kala rawngbâwl tûrin a chêttîr che a. Chu thupêk zawm chu a awlsam em? Awlsam lo mai thei. Thu hrilh rawngbâwlnaa i tel hmasak ber ṭum khân, i zâm deuh em? Zâm deuh ngei  ang! Mahse, chu chu Isua’n thawhtîr min duh hna a ni tih i hriat avângin zawm i duh a. Hunte a liam zêl chuan, thu hrilh rawngbâwlnaa tel chu a awlsam telh telh a ni. A nih leh, Bible zirna kaihhruai chungchâng hi eng nge ni ve? Chumi ngaihtuahna ringawt pawhin a tizâm che em? Tizâm ngei ang. Mahse, Jehova hnênah i hlauhnate hneh tûr leh Bible zirna kaihruai thei tûra huaisenna i dîl chuan, ani chuan zirtîr siam duhna nei lehzual tûrin a ṭanpui thei che a ni.

8. Marka 6:34-a sawi angin, mi dangte zirtîr duhna nei tûrin engin nge min ṭanpui thei?

⁸ Pahnihna, vêngte hmangaihna chuan mite chu thutak zirtîr tûrin min chêttîr a. Ṭum khat chu, Isua leh a zirtîrte chu thu an hrilh nasat êm avângin an chau hle a. Châwl hahdam tûra hmun pakhat an pan chuan, mipuiin an rawn hmu a. Isua chuan mite chu a khawngaih êm avângin anni chu “thu tam tak” a zirtîr a. (Marka 6:34 chhiar rawh.) Chumi ṭum pawh chuan ṭhahnemngai takin a inhmang a ni. Engvângin nge? Isua chu mipuite dinhmunah a inchan a. Hrehawm an tawrh nasat dân leh beiseina an mamawhzia a han hmuh chuan ṭanpui a duh a ni. Tûn laia mite pawh hi hlim tak leh nun lungawithlâk tak nei angin lang mah se, harsatnate an neiin beiseina an mamawh a. Anni chu vêngtu nei lo berâm bo ang an ni a. Tirhkoh Paula chuan chutiang mite chu Pathian leh beiseina rêng nei lo angin a sawi a ni. (Eph. 2:12) Anni chu ‘boralnaa kalna kawngkaa’ awm an ni. (Mt. 7:13) Kan rawngbâwlna biala mite thlarau lam dinhmun kan ngaihtuah chuan, hmangaihna leh khawngaihnain anmahni ṭanpui tûrin min chêttîr ang. Kan ṭanpui theih dân kawng ṭha ber chu Bible zirna neihpui hi a ni.

9. Philippi 2:13, NW-a sawi angin, engtin nge Jehova’n a ṭanpui theih che?

⁹ Mite Bible zirpui tûr chuan hun tam tak pêk a ngai dâwn tih i hriat avângin zirpui an duh leh duh loh zawh chu i hreh mai thei a. Chutianga i awm a nih chuan, Jehova hnênah i rilru vei zâwngte chu hrilh la. Bible i zirpui theih tûr tu emaw zawn hmuh châkna nei tûrin a ṭanpuina dîl ang che. (Philippi 2:13 chhiar rawh.) Tirhkoh Johana chuan Pathianin a duh zâwng mila ṭawngṭainate chu a chhâng ang tih min hrilh a. (1 Joh. 5:14, 15) Chuvângin, Jehova chuan zirtîr siamnaa tel duhna nei tûrin a ṭanpui ang che tih i chiang thei a ni.

10-11. Engvângin nge Bible zirna kaihhruai chu kan hreh mai theih?

¹⁰ Zirtîr siam rawngbâwlnaa tel tam thei lova min siamtu harsatnate kan hmachhawn chung pawhin, kan mawhphurhna dawn chu kan ngai pawimawh hle a ni. Tûnah, chûng harsatna ṭhenkhat leh kan hneh theih dânte chu i lo sawiho vang u.

¹¹ Kan duh angin kan thawk tam thei lo mai thei. Entîr nân, thuchhuahtu ṭhenkhat chu kum lama upa emaw, hrisêlna ṭha vak lo emaw an ni a. Chutiang dinhmuna awm i ni em? I nih chuan, COVID-19 hripui aṭanga kan zir theih pakhat hi han ngaihtuah teh. Phone leh tablet-te hmangin Bible zirna hlawhtling tak kan kaihruai thei tih kan hria! Chuvângin, Bible zirna chu mahni in chhûng lum aṭanga hahdam taka kaihhruai theih a ni. Hlâwkna dang pawh a awm a. Mi ṭhenkhat chuan Bible zir chu an duh a; mahse, unaute’n thu an va hrilh hunah an hman lo pawh a ni thei. Nimahsela, anni chu zîng lamah emaw, zân lamah emaw an hman mai thei a. Chutiang hunah chuan Bible i zirpui thei ang em? Isua pawhin Nikodemna duh angin ani chu zânah a zirtîr a ni.—Joh. 3:1, 2.

12. Zirtîrtu hlawhtling tak ni tûrin engin nge mahni inrintâwkna min neihtîr thei?

 ¹² Bible zirna kaihruai tûrin thiam tâwk lo niin kan inhre mai thei. Tu emaw Bible kan zirtîr theih hmain hriatna emaw, thiamna emaw kan neih belh a ngai niin kan inhria pawh a ni thei. Chutianga i inhria a nih chuan, mahni inrintâwkna nei lehzual tûra min ṭanpuitu thil pathum hi ngaihtuah ang che. Pakhatna, Jehova’n mite zirtîr tûra tlingah a ngai che. (2 Kor. 3:5) Pahnihna, “Lei leh vâna thuneihna zawng zawng” neitu Isua’n mite zirtîr tûrin thu a pe che. (Mt. 28:18) Pathumna, nangmah ṭanpui tûr chein unaute i rinchhan thei. Isua chuan a thusawi tûrte hrilhtu a Pa a rinchhan angin, nang pawhin chutiang chuan i rinchhan thei a ni. (Joh. 8:28; 12:49) Chu bâkah, Bible zirna kaihruai ṭan tûrin in rawngbâwlna group overseer emaw, pioneer emaw, thiltawn ngah thuchhuahtu emaw hnênah ṭanpuina i dîl thei a. Mahni inrintâwkna i neih theih dân kawng khat chu, chûng thuchhuahtu dangte’n Bible zirna an kaihhruai huna tel ve hi a ni.

13. Engvângin nge kan insiamrem a ngaih?

¹³ Tih dân tharte leh hmanraw tharte chu hman thiam harsa kan ti mai thei. Tûnah chuan, Bible zirna kan kaihhruai dân chu a danglam tawh a. Zirtîr nâna kan hman ber Chatuanin I Hlim Thei! tih lehkhabu chuan zirna atâna inbuatsaih dân leh kaihhruai dân chu tûn hmaa kan tih ṭhin dân nêna inang lova ti tûrin min phût a. Paragraph chhiar tûr a tlêm tawhin, zirlai nêna tîtîna hun kan nei tam lehzual a. Kan zirtîr hunah, video-te leh JW Library^® ang chi electronic app-te chu kan hmang tam lehzual a. Chûng hmanruate chu i la hmang thiam lo a nih chuan, a hmang thiamte hnênah ṭanpuina dîl ang che. Keini mihringte hi thil chîn dawklak nei kan ni a. Thil tihdân thar mila insiamrem chu kan tân a awlsam ṭhîn lo. Mahse, Pathian Jehova leh unaute ṭanpuinain, insiamremna neih chu i awlsam lehzual ang a, mite zirpui chu nuam i ti lehzual ang. Pioneer unaupa pakhat chuan he zirtîr dân thar hi “zirlai leh zirtîrtu tân nuam tak a ni,” tiin a sawi.

14. Mite’n kan thuchah ken an ngaihsak lohna biala rawng kan bâwl hunah eng nge kan hriat reng ang a, 1 Korinth 3:6, 7-nain engtin nge min tihchak?

¹⁴ Bible zirpui neih ṭan a harsatna bialah kan awm pawh a ni thei. Mite chuan kan thuchah ken chu an ngaithla duh lo emaw, an dodâl emaw hial thei a. Chutiang bialah chuan rilru put hmang dik tak nei tûrin engin nge min ṭanpui ang? He khawvêl buai takah hian mite dinhmun chu a inthlâk danglam thuai thei tih leh a tîra ngaihven lote pawhin an thlarau lam mamawhte an rawn hre ṭan thei tih hre reng ang che. (Mt. 5:3) Tûn hmaa kan thu leh hla chhuahte pawm duh ngai lotu mi ṭhenkhat chuan a hnuah Bible zirna neih an duh a. Chu bâkah, Jehova chu buh Neitupa a ni tih kan hre bawk. (Mt. 9:38) Ani chuan buh chi tuh a, tui pe reng tûrin min duh a; mahse, ṭhan chhohtîr tûra mawhphurhna latu erawh Amah a ni. (1 Kor. 3:6, 7) Tûnah, Bible zirna kan la kaihruai thei lo a nih pawhin, Jehova’n kan thawhrahah ni lovin, kan thawhrimnaah mal min sâwm ang tih hriatna chuan min va tichak tak êm! *

15. Miin Bible zirna a pawm a, a thuzirte a nunpui hian engtin nge Jehova chu a awm?

¹⁵ Jehova chu miin Bible thutak a pawm a, mi dang hnêna a hrilh chhâwn hian a hlim a. (Thuf. 23:15, 16) Jehova’n tûn laia thilthlengte  a hmuh hian a va hlim dâwn tak êm! Entîr nân, kum 2020 rawngbâwl kum chhûng khân khawvêl pumah hripui lêng mah se, Bible zirna 7,705,765 kaihhruai a ni a, mi 2,41,994-te chu Jehova hnênah inpumpêk a, baptisma chang tûra ṭanpui an ni. Chûng zirtîr tharte chuan Bible zirnate kaihruaiin, zirtîr dangte an siam belh a. (Lk. 6:40) Zirtîr siam rawngbâwlnaa kan tel hian Jehova kan tihlim tih a chiang hle.

16. Thiltum ṭha chu eng nge ni?

¹⁶ Zirtîr siam chu a harsa a; mahse, Jehova ṭanpuinain amah hmangaih tûra mi tharte zirtîrnaah kan tel thei a ni. A lo berah pawh, Bible zirpui pakhat neih ṭan chu thiltumah i insiam thei ang em? Kan mi tawh apiangte chu Bible zirpui an duh leh duh loh kan zâwt a nih chuan an chhân lêtna chu mak kan ti mai thei. Jehova chuan kan thawhrimnate chu mal a sâwm ang tih kan chiang thei a ni.

17. Bible zirna kan kaihruai thei a nih chuan eng thiltawn nge kan neih ang?

¹⁷ Mite hnêna thutak kan hrilh thei leh zirtîr thei hi chanvo hlu a va ni tak êm! He rawngbâwlna hian min tihlim tak zet a ni. Zirtîrte ni tûra Thessalonika khuaa mi tam tak ṭanpuitu Tirhkoh Paula chuan a rilru put hmang chu heti hian a sawi a: “Kan beiseina emaw, kan hlimna emaw, kan lallukhum chhuan emaw eng nge ni le? . . . Nangmahni ngei in ni dâwn lâwm ni? Nangmahniho hi kan chhuan leh kan hlimna in ni asin,” tiin. (1 Thes. 2:19, 20; Tirh. 17:1-4) Tûn laia unau tam takte rilru put hmang pawh chutiang chiah chu a ni a. A pasal nêna mi eng emaw zât baptisma chang tûra ṭanpuitu Unaunu Stéphanie-i chuan, “Pathian Jehova hnêna mahni inpumpêk tûra mite ṭanpui aia hlimna nasa zâwk a awm lo,” tiin a sawi a ni.