1. Ṭawngṭaia Jehova pan theihna chanvo chu engtin nge kan thlîr ang?

 LEI leh vân Siamtu chuan thilpêk hlu tak, ṭawngṭaia amah pan theihna chanvo min pe a. Hei hi han ngaihtuah teh: Phalna lâk hmasak ngai lovin eng hunah leh eng ṭawng pawhin Jehova hnênah kan thinlung kan leihbaw thei a. Hmangaihna nei tak kan Pa chuan min ngaihthlâksak ang tih ring tlat chungin damdawi in leh tân in aṭang pawhin kan ṭawngṭai thei bawk. Chu thilpêk avâng chuan kan lâwm tak zet a ni.

2. Engtin nge Davida’n ṭawngṭai theihna chanvo a ngaihlutzia a lantîr?

² Lal Davida chuan ṭawngṭai theihna chanvo chu a ngaihlu hle a. “Ka ṭawngṭaina hi englo rimtui tak angin i hmaah tihchhuahin . . . awm rawh se,” tiin Jehova fakin a zai a ni. (Sâm 141:1, 2) Davida hun lai chuan, biakna dik atâna puithiamte hman ṭhin rimtui thianghlim chu fîmkhur taka siam a ni a. (Ex. 30:34, 35) Davida’n rimtui tih ṭawngkam a hmanna chuan, a Pa vâna mi hnêna a sawi tûrte chu ngun taka ngaihtuah a duh tih a târ lang a ni. Keini pawhin chutianga tih tak zeta tih chu kan duh a. Kan ṭawngṭainain Jehova a tihlâwm chu kan duh a ni.

3. Ṭawngṭaia Jehova kan pan hunah eng ang rilru put hmang nge kan neih ngai a, engvângin nge?

³ Jehova hnêna kan ṭawngṭai hunah a lutuka innêlna ang chi chu kan pumpelh tûr a ni a. Chu aiin, zahna thûk tak neiin kan ṭawngṭai zâwk tûr a ni. Isaia te, Ezekiela te, Daniela te, leh Johana te hmuh inlârna ropui takte hi han ngaihtuah teh. Chûng inlârnate chu a danglam ṭheuh va; chutih rualin, inanna pakhat erawh an nei a ni. Pathian Jehova chu Lal ropui tak a nih  thu an sawi vek a. Isaia chuan ‘Jehova chu lalṭhutphah sâng tak chawisâna a ṭhu a hmu a.’ (Is. 6:1-3) Ezekiela chuan ‘chhimbâl ang tak êngin’ a hual vêl vân tawlailîr chunga ṭhuin a hmu a ni. (Ezek. 1:26-28) Daniela chuan silhfên vâra inthuam, a lalṭhutthlêng aṭanga mei alh chhuak “Hmâkhawsânga” a hmu a. (Dan. 7:9, 10) Johana erawh chuan smaragdin lung mawi tak ang chhimbâlin a hual vêl lalṭhutthlênga Jehova ṭhu chu a hmu a ni. (Thup. 4:2-4) Tehkhin rual loh Jehova ropuinate kan ngaihtuah hian, chu chuan ṭawngṭaia amah kan pan thei chu chanvo ropui tak a ni tih leh zahna thûk tak nêna amah kan pan a pawimawhzia min hriatnawntîr a ni. A nih chuan, engtin nge kan ṭawngṭai ang?

4. Matthaia 6:9, 10-naa kan hmuh Lal ṭawngṭaina tîr lam thute aṭangin eng nge kan zir?

⁴ Matthaia 6:9, 10 chhiar rawh. Tlâng Chunga a Thusawiah, Isua chuan a zirtîrte chu Pathian tilâwm zâwnga ṭawngṭai dân a zirtîr a. “Chutichuan, nangni chu hetiang hian ṭawngṭai rawh u,” tia a sawi zawhah, ani chuan Pathian thiltumte nêna inkûngkaih thil pawimawhte chu a târ lang hmasa a ni: Pathian hming tihthianghlimna te, Pathian dodâltu zawng zawng tiboraltu tûr Lalram lo thleng tûr te, leh nakin huna leilung leh mihringte chunga Pathian thlentîr tûr malsâwmnate chu. Chûngte chu ṭawngṭainaa kan telhna hmangin, Pathian duh zâwng chu kan tân a pawimawhzia kan lantîr a ni.

5. Mi mal thil atâna ṭawngṭai chu thil tih âwm a ni em?

⁵ A dawtah, Isua chuan mi mal thil atâna ṭawngṭai pawh thil tih âwm tak a ni tih a târ lang a. Jehova hnênah nî tin kan ei khawp chaw min pe tûr te, kan thil tihsual ngaidam tûr te, thlêmna laka min vênghim tûr te, leh mi sual laka min chhandam tûrtein kan dîl thei a ni. (Mt. 6:11-13) Jehova hnêna ṭawngṭaia chûng thilte kan dîlna chuan, a ṭanpuina kan mamawh tih kan hriatzia leh amah tihlâwm kan duhzia a târ lang a ni.

6. Kan ṭawngṭai hunah Lal ṭawngṭainaa târ lante chauh kan sawi tûr tihna a ni em? Hrilhfiah rawh.

⁶ Isua chuan Lal ṭawngṭaina chu a hnungzuitute’n a ngial a ngana an chham nawn a duh lo. Amah ngei pawhin a ṭawngṭaina  dangah, a dinhmun azirin thu dangte pawh a telh a ni. (Mt. 26:39, 42; Joh. 17:1-26) Chutiang bawkin, kan lungkhamna eng pawh chu ṭawngṭaiin kan thlen thei a ni. Thu tlûkna kan siam a ngaih hunah, finna leh hriatthiamna dîlin kan ṭawngṭai thei a. (Sâm 119:33, 34) Chanvo harsa tak kan thawh dâwn hunah, a thawh dân tûr kan hriat theih nân ṭawngṭaiin ṭanpuina kan dîl thei a ni. (Thuf. 2:6) Nu leh pate chuan an fate tân leh naupangte pawhin an nu leh pate tân an ṭawngṭaisak thei a, kan zavai hian kan Bible zirpuite leh kan thu hrilhna biala mite tân kan ṭawngṭai theiin, kan ṭawngṭai ngei tûr a ni bawk. Chutih rualin, Jehova hnêna kan ṭawngṭai hunah dîlna chauh kan thlen tûr a ni lo.

7. Engvângin nge kan ṭawngṭai hunah Jehova kan fak ang?

⁷ Kan ṭawngṭai hunah Jehova fak kan theihnghilh tûr a ni lo. Kan Pathian aia fak phû tu mah an awm si lo va. Ani chu ‘a ṭhain, ngaihdam a peih a.’ Chu bâkah, “lainatnaa khat, mi khawngaih thei, thinnel, ngilneihna leh thutak ngah” a ni bawk. (Sâm 86:5, 15) A miziate leh a thiltihte avângin Jehova fak chhan tûr ṭha tak kan nei a ni.

8. Jehova chunga lâwmthu kan sawi chhân tûr ṭhenkhat chu eng nge ni? (Sâm 104:12-15, 24)

⁸ Kan ṭawngṭai huna Jehova kan fak bâkah, a thil min pêk ropui tak takte avânga lâwmthu sawi tûra chêttîrin kan awm a. Entîr nân, pangpâr rawng mawi tak tak te, chhiar sên loh ei tûr tui tak tak te, leh ṭhian ṭha tak min pêkte avâng hian lâwmthu kan sawi thei a ni. Hmangaihna nei tak kan Pa chuan kan hlimna tûrin chûng thilte bâkah, thil dang tam tak pawh min pe a. (Sâm 104:12-15, 24 chhiar rawh.) Chûng zawng zawngte aia pawimawh zâwk, thlarau lam chaw hnianghnâr tak min pêk avâng leh nakin hun beiseina ropui tak min pêk avângin Jehova chungah lâwmthu kan sawi a ni.

9. Engin nge Jehova chunga lâwmthu sawi theihnghilh lo tûra min ṭanpui thei? (1 Thessalonika 5:17, 18)

⁹ Kan tâna a thiltih zawng zawngte avânga Jehova chunga lâwmthu sawi theihnghilh chu a awlsam hle thei a ni. A nih leh, engin nge chutianga theihnghilh lo tûra min ṭânpui thei? A bîk taka i thil dîlte chu ziaka chhinchhiahin,  Jehova’n a chhân dân che chu a khât tâwkin endik ṭhîn la. Tichuan, a ṭanpuina avângin ṭawngṭaiin lâwmthu sawi ang che. (1 Thessalonika 5:17, 18 chhiar rawh.) Hei hi han ngaihtuah teh: Mi dangin kan chunga lâwmna an lantîr hian kan hlim hle ṭhîn a. Chutiang bawkin, Jehova hnênah kan ṭawngṭainate a chhân avânga lâwmthu sawi nachâng kan hriat hian, chu chuan a thinlung a tilâwm a ni. (Kol. 3:15) A nih leh, kan Pathian chunga lâwmthu sawi chhan tûr pawimawh tak dang leh chu eng nge ni?

10. Petera thawn khat 2:21-a sawi angin, engvângin nge leia Isua a rawn tirh avânga Jehova chunga lâwm chhan tûr kan neih?

¹⁰ Petera thawn khat 2:21 chhiar rawh. Min zirtîr tûra a Fapa duh tak a rawn tirh avângin Jehova chungah kan lâwm tûr a ni. Isua nun kawng chanchin zirna aṭangin Jehova chanchin leh amah tihlâwm theih dân tam tak kan hria a. Krista inthawina chunga rinna kan lantîr chuan, Pathian Jehova nêna mi mal inlaichînna duhawm tak leh amah nêna inremna kan nei thei ang.—Rom 5:1.

11. Engvângin nge Isua hminga kan ṭawngṭai?

¹¹ A Fapa kal tlanga a hnêna kan ṭawngṭai theih avângin Jehova chungah kan lâwm hle a. Ani chuan Isua hmangin kan thil dîlte chu min pe a ni. Isua hminga kan ṭawngṭainate chu a ngaithlain, a chhâng a. Isua chuan: “Ka hmingin eng pawh in dîl apiang chu ka ti zêl ang, Pa chu Fapa avânga chawimawia a awm theih nân,” tiin a sawi a ni.—Joh. 14:13, 14.

12. A Fapa avânga Jehova chunga kan lâwm chhan tûr dang leh chu eng nge ni?

¹² Jehova chuan Isua tlanna inthawina ṭanchhanin kan sualte min ngaidam a. Bible chuan Isua chungchângah, kan ‘puithiam lalber, vâna Ropuibera lalṭhuphah ding lama ṭhu’ a nih thu a sawi a. (Heb. 8:1, 2) Ani chu “Pa hnêna min sawipuitu” a ni. (1 Joh. 2:1) Kan chak lohnate min hriatthiampuitu leh kan tâna “min sawisaktu” khawngaihna nei tak Puithiam Lalber min pêk avângin Jehova chungah kan va lâwm tak êm! (Rom 8:34; Heb. 4:15) Ṭha famkim lo kan nih avângin, Isua inthawina tel lo chuan ṭawngṭaiin Jehova kan pan thei lo vang. Chuvângin, thilpêk hlu tak, a Fapa duh tak min pêk avânga Jehova chunga kan lâwmzia chu sawi sên rual a ni lo tih i pawm ngei ang!

13. A thih hma zân khân, Isua’n a zirtîrte a hmangaihzia engtin nge a lantîr?

¹³ A thih hma zânah, Isua chuan rei tak ṭawngṭaiin, a Pa hnênah a zirtîrte chu ‘mi sual laka hum’ tûrin a dîlsak a ni. (Joh. 17:15) Chu chuan a zirtîrte a hmangaihzia a va târ lang chiang tak êm! Hrehawm a tuar thuai dâwn tih hre mah se, a tirhkohte ṭhatna tûr a ngaihtuah reng a ni.

14. Engtin nge kan unaute kan hmangaih tih kan lantîr theih?

¹⁴ Isua entawnin, keini pawhin kan mamawhte chauh kan ngaihven lo. Chu aiin, kan unaute tân kan ṭawngṭaisak ṭhîn zâwk a ni. Chutianga kan tih chuan, inhmangaih tawn tûra Isua thupêk kan zâwm tihna a ni a, kan Kristian unaute kan hmangaihzia Pathian Jehova hmaah kan lantîr tihna a ni bawk. (Joh. 13:34) Kan unaute tâna ṭawngṭai chu hun khawhralna a ni lo. Pathian Thu chuan, “Mi fel ṭawngṭaina chuan thil nasa tak a ti ṭhîn,” tiin min hrilh a ni.—Jak. 5:16.

15. Engvângin nge kan Kristian unaute’n kan ṭawngṭaisak an mamawh?

¹⁵ Kan unaute chuan harsatna chi hrang  hrang an hmachhawn avângin kan ṭawngṭaisak an mamawh a. Dam lohna te, leilung chhiatna te, indona te, tihduhdahna te, leh harsatna dangte chhel taka hmachhawn thei tûrin Jehova ṭanpuina kan dîlsak thei a ni. Chu bâkah, ṭanpui ngaite ṭanpui tûra mahni inpe kan unaute tân pawh kan ṭawngṭai thei bawk. Chutiang harsatnate hmachhawn mêk tu emaw hriat i nei mai thei. Chutiang a nih chuan, i ṭawngṭainaah an hming lamin dîlsak ang che. Kan unaute kan hmangaih tak zetzia chu harsatna an tawhte chhel taka tuar chhuak thei tûra Jehova hnêna dîlsakna hmangin kan lantîr a ni.

16. Engvângin nge kan zînga hmahruaitute chu kan ṭawngṭaisak ang?

¹⁶ Kohhrana hmahruaitute chu an tâna kan ṭawngṭaisak avângin an lâwm hle a, chûng kan ṭawngṭaisaknate chuan anni chu a ṭanpui a ni. Tirhkoh Paula pawhin mi dangte ṭawngṭaisak a mamawh tih a hria a. Ani chuan: “Chanchin ṭha thurûk huai taka puang tûra ka kâ ka âna, thu sawitîra ka awm theih nân ka tân pawh mi dîlsak rawh u,” tiin a ziak a ni. (Eph. 6:19) Tûn laiah pawh, kan zîngah hmahruaitu unaupa thawkrim tak takte an awm a. Jehova hnênah an hnathawhte malsâwm tûra dîlsakin kan hmangaihzia kan lantîr a ni.

17-18. Eng hunah nge mi dangte aiawha ṭawngṭai tûra sâwm kan nih mai theih a, eng nge kan hriat reng ang?

¹⁷ A châng chuan mi dangte tâna ṭawngṭai tûra sâwm kan ni ṭhîn a. Entîr nân, Bible zirna kaihruaitu unaunu chuan amah zuitu unaunu chu ṭawngṭai tûrin a sâwm mai thei a. Mahse, Bible zirlai chu a hriat chian lutuk loh avângin zirna neih zawha ṭawngṭai chu a thlang pawh a ni thei. Chutiang chuan, a ṭawngṭai hunah zirlai tâna a dîlsak tûrte chu a hre lehzual thei a ni.

¹⁸ Unaupa chu rawngbâwlna inkhâwmah emaw, kohhran inkhâwmah emaw ṭawngṭai tûra sâwm a ni mai thei a. Chutiang chanvo nei unaupate chuan kan inkhâwmnain a tum chu an hre reng tûr a ni. Ṭawngṭaina chu kohhrana unaute zilh nân emaw, zirtîr nân emaw a hmang tûr a ni lo. Kohhran inkhâwm zawng zawng deuhthawah hian, hla sak leh ṭawngṭaina atân minute nga ruat a ni tlângpui a. Chuvângin, ṭawngṭai tûra ruat unaupa chu, a bîk takin inkhâwm ṭanna atâna ṭawngṭai tûra ruat  a nih chuan “ṭawng tam” lutuk loh a tum tûr a ni.—Mt. 6:7.

19. Engin nge Pathian rorêlna nî atâna inpeih renga awm tûra min ṭanpui ang?

¹⁹ Jehova rorêlna nî kan hnaih zêl rual hian, ṭawngṭaina hi kan nunah kan dah pawimawh lehzual a ngai a. Chumi chungchângah Isua chuan: “Chutichuan, chûng thil lo thleng tûr zawng zawng chu pumpelh . . . tlâka ruat in nih theihna tûrin, eng lai pawhin ṭawngṭai chungin ngaihven rawh u,” tiin a sawi a ni. (Lk. 21:36) Kan ṭawngṭai ziah a nih chuan kan rinna a chak ang a, Pathian rorêlna nî lo thlen hun atân kan inpeih reng ang.

20. Engtin nge kan ṭawngṭainate chu rimtui tak ang a nih theih?

²⁰ Eng chungchâng nge kan sawiho tawh? Ṭawngṭai theihna chanvo hi kan ngaihlu hle a. Kan ṭawngṭai hunah Jehova thiltum nêna inkûngkaih thilte chu kan ngai pawimawh ber a. Pathian Fapa leh a Lalram rorêlna avânga kan lâwmzia kan lantîr bâkah, kan Kristian unaute tân pawh kan ṭawngṭaisak bawk. Chu bâkah, mahni tisa lam leh thlarau lam mamawhte atân pawh kan ṭawngṭai thei bawk a ni. Ṭawngṭainaa kan sawi tûrte ngun taka kan ngaihtuah hian, chu chanvo ropui tak kan ngaihhlutzia kan lantîr tihna a ni a. Chutianga kan tih chuan, kan ṭawngṭainate chu Jehova tân “a lâwm zâwng,” rimtui tak ang a ni ang.—Thuf. 15:8.