1. Tûn laia Jehova duh zâwng chu eng nge ni?

 TUN laia Jehova duh zâwng chu khawvêl puma Lalram chanchin ṭha hrilh hi a ni a. (Mk. 13:10; 1 Tim. 2:3, 4) Hei hi Jehova hna a ni a, a pawimawh êm avângin, kaihruai tûrin a Fapa duhtak chu a ruat a. Isua kaihhruaina hnuaiah, thu hrilh rawngbâwlna chu tâwpna a lo thlen hma ngeiin Jehova duh dân ang taka thawh zawh a ni ang tih kan chiang thei a ni.—Mt. 24:14.

2. He thuziakah hian eng nge kan sawiho vang?

² He thuziakah hian, Isua’n thlarau lam chaw buatsaih tûr leh mihring chanchina thu hrilh beihpuithlâkna lian ber atâna a hnungzuitute buatsaih tûra “bawih rinawm, fing tak” a hman dân kan sawiho vang a. (Mt. 24:45) Isua leh bawih rinawm thlâwp tûra mi mal tin tihtheihte pawh kan hre bawk ang.

3. Isua hnênah eng thuneihna nge pêk a nih?

³ Isua’n thu hrilh rawngbâwlna hi a kaihruai a ni. Engtin nge chu chu kan chian theih? Vâna a lâwn hma lawkin, a hnungzuitu rinawm tam tak chu Galili biala tlâng pakhatah a hmu a. An hnênah: “Lei leh vâna thuneihna zawng zawng ka hnênah pêk a ni tawh,” tiin a hrilh a ni. A dawt chiaha a sawi pawh hi lo chhinchhiah ang che: “Chutichuan, kal ula, hnam tina mi zirtîrahte siam ula,” tih hi. (Mt. 28:18, 19) Chuvângin, thil dangte bâkah, Isua chu thu hrilh rawngbâwlna kaihruai tûra thuneihna pêk a ni.

4. Isua’n thu hrilh rawngbâwlna a la kaihruai reng tih engtin nge kan chian theih?

⁴ Isua chuan thu hrilh leh zirtîr siamna hna chu ‘hnam tina  mite’ hnêna hlenchhuah a nih tûr thu leh ‘khawvêl tâwp thleng pawha’ a hnungzuitute hnêna a awm tûr thu a sawi a. (Mt. 28:20) Chûng thute chuan thu hrilh rawngbâwlna chu kan hun lai thleng hian Isua’n a kaihruai zawm zêl dâwn tih chiang takin a târ lang a ni.

5. Sâm 110:3-na thleng famkim tûrin engtin nge kan ṭanpui?

⁵ Isua chuan he khawvêl tâwpna hun chhûnga thu hriltu an indaih loh chu a hlau lo. Ani chuan fakna hla phuahtuin: “I mite chu i thiltihtheihna nîah chuan mahni duh thuin an inpe [ang],” tia a lo sawi lâwk hi a thleng famkim ngei ang tih a hria a ni. (Sâm 110:3) Thu hrilh rawngbâwlnaa i tel ve a nih chuan, Isua leh bawih rinawm i thlâwpin, hrilh lâwkna thleng famkim tûrin i ṭanpui tihna a ni a. Rawngbâwlna chuan hma lam a pan zêl a; mahse, harsatnate pawh a awm a ni.

6. Tûn laia Lalram chanchin puangtute hmachhawn harsatna pakhat chu eng nge ni?

⁶ Lalram chanchin puangtute hmachhawn harsatna pakhat chu dodâlna hi a ni a. Kalpêng te, sakhaw hruaitu te, leh politician-te chuan kan rawngbâwlna chungchângah thu dik lo tam tak an theh darh a ni. Kan chhûng te, kan ṭhian te, leh kan hnathawhpuite’n chûng thu dik lote chu an awih a nih chuan, Jehova rawngbâwl bânsan tûr leh thu hrilh bânsan tûrin min nawr lui pawh a ni thei. Ram ṭhenkhatah chuan kan unaute’n vauna te, tihṭhaihna te, manna te, leh tân ina khung hialnate ang chi dodâlnate chu an hmachhawn a. Mahse, chutianga min cheibâwl avângin mak kan ti lo. Isua’n: “Ka hming avângin hnam zawng zawng huat in ni ang,” tiin a sawi lâwk si a. (Mt. 24:9) Chutiang huatnate kan hmachhawnna chuan Jehova pawm kan hlawh tih chiang takin a nemnghet a ni. (Mt. 5:11, 12) Chûng dodâlnate kan tawh chhan ber chu Diabola vâng a ni a. Mahse, ani aiin Isua’n nasa takin thil a tithei zâwk! Isua ṭanpuinain chanchin ṭha chu hnam zawng zawng hnêna hril mêk a ni. A finfiahna hi han ngaihtuah teh.

7. Thu Puan 14:6, 7-na hi a thleng famkim tih eng finfiahna nge i hmuh?

⁷ Lalram chanchin puangtute kan nih angin, kan ṭawng hman ang hmang lotute hnêna chanchin ṭha kan hrilh hian harsatnate kan hmachhawn bawk a. Isua chuan tirhkoh Johana hnêna a thu puan chhuahah chu harsatna chu kan hun laia chinfel a nih tûr thu a sawi lâwk a ni. (Thu Puan 14:6, 7 chhiar rawh.) Eng kawngin nge? Mi a tam thei ang berte hnênah Lalram thuchah chhân lêt theihna hun remchâng kan pe a. Tûn laiah, kan website jw.org-a pho chhuah Bible ṭanchhan thu leh hla chhuahte chu ṭawng 1,000 chuanga hmuh theih a nih tawh avângin, khawvêl puma mite chuan mahni ṭawng ngeiin an chhiar thei tawh a! Governing Body chuan mite Bible zirpui nâna kan hmanraw hman ber Chatuanin I Hlim Thei! tih lehkhabu chu ṭawng 700 aia tama lehlin phalna a pe a ni. Thlarau lam chaw chu bengngawngte tân video recording hmanga buatsaih a nih bâkah, mitdelte tân mitdel hawrawp hmanga buatsaih a ni bawk. Bible hrilh lâwknate a thleng famkim tih kan hmu a ni. “Hnam tin leh ṭawng tin zînga” mite chuan “hmui [a nih loh leh, ṭawng] thianghlim” tia sawi theih Bible thutak chu an zir a. (Zak. 8:23; Zep. 3:9) Chûng zawng zawng chu Isua Krista kaihhruaina hnuaia hlen chhuah a ni.

8. Kan thu hrilh rawngbâwlna hian vawiin nî thleng hian eng rahte nge a chhuah tawh?

⁸ Tûn lai hian, ram 240-a mi 8,000,000 aia tamte chu Jehova inawpna pâwl chhûngah an awm mêk a, kum tinin mi a nuai têlin baptisma an chang ziah bawk! Mahse, kan tam lam aia pawimawh zâwk chu zirtîr tharte’n “mihring  thar,” Kristian miziate an nei chho hi a ni. Mi tam tak chuan nungchang bawlhhlawhna te, tharum thawhna te, leh mi dang pâwngpaw huatnate chu bânsanin, hnam inthliarna pawh an nei tawh lo va. (Kol. 3:8-10) Isaia 2:4-a kan hmuh “indo dân pawh an zir tawh hek lo vang,” tih hrilh lâwkna thu hi a thleng famkim a ni. Mihring thara inthuam tûra theih tâwp kan chhuah ruala Pathian inawpna pâwl chhûnga lo lût tûra mite ṭanpuina hmangin, min kaihruaitu Krista Isua hnung kan zui tih kan lantîr a. (Joh. 13:35; 1 Pet. 2:12) Hêng zawng zawng hi tihpalh thil thua thleng mai a ni lo. Isua’n kan mamawh ṭanpuinate min pêk vâng a ni.

9. Matthaia 24:45-47-a kan hmuh angin, Isua’n tâwpna hun chhûnga thilthleng tûr chungchâng eng nge a sawi lâwk?

⁹ Matthaia 24:45-47 chhiar rawh. Isua chuan tâwpna hun chhûnga thlarau chaw buatsaihtu tûr “bawih rinawm, fing tak” a ruat tûr thu a sawi lâwk a. Chuvângin, chu bawih chu kan hun lai hian a thawk rim hle ang tih kan beisei ngei ang. A thawk rim rêng bawk a. Isua chuan Pathian mite leh tuina lantîrtute tâna “a hun apianga” thlarau lam “chaw” buatsaih tûrin hriak thih zînga unaupa tlêm tê chu a hmang a. Anni chu mi dangte rinna chunga thuneitu angin an inngai lo. (2 Kor. 1:24) Isua Krista chu a mite chunga ‘hruaitu leh hotu’ a ni tih an hria a ni.—Is. 55:4.

10. Milema târ lan lehkhabute zînga a khawi ber hian nge Jehova rawngbâwl ṭan tûra ṭanpui che?

¹⁰ Kum 1919 aṭangin, bawih rinawm chuan tuina nei tharte’n thlarau lam chaw an ei theih nân thu leh hla chhuah tam tak a buatsaih a. Kum 1921-ah khân tuina neite’n Bible zirtîrna bulpuite an hriat theih nân anmahni ṭanpuitu tûr The Harp of God tih lehkhabu chu a buatsaih a. Hunte a danglam zêl rualin, thu leh hla  chhuah dangte pawh tihchhuah belh zêl a ni. Eng thu leh hla chhuahin nge kan Pa vâna mi hre tûr leh hmangaih tûra ṭanpui che? “Let God Be True,” Chatuan Nunnaa Hruaitu Thutak, You Can Live Forever in Paradise on Earth, Chatuan Nunnaa Hruaitu Hriatna, Bible Zirtîrna Dik Tak Chu Eng Nge Ni?, Bible Hian Eng Nge Min Zirtîr?, a nih loh leh kan thu leh hla chhuah thar ber Chatuanin I Hlim Thei! tihte hi a ni em? Hêng thu leh hla chhuah zawng zawngte hi an tlângzarh hun laia kan mamawh takte a ni.

11. Engvângin nge kan zavai hian thlarau lam chaw kan dawn ṭheuh a pawimawh?

¹¹ Tuina nei tharte chu Jehova leh Bible chungchâng hriatna thûk tak neih ngai awm chhun an ni lo. Kan zavai hian kan neih ṭheuh a ngai a ni. Tirhkoh Paula chuan: “Chaw rum erawh chu puitlingte tân a ni,” tiin a ziak a. Bible aṭanga kan thu zirte nunpuina chuan “chhia leh ṭha fiah tûrin” min ṭanpui ang tih a sawi belh bawk. (Heb. 5:14) Nungchang lam a tlâk chhiat zêlna he hun khirh takah hian, Jehova tehnate zawm tlat chu a harsa hle thei a. Mahse, Isua chuan kan mamawh ang chakna nei reng thei tûra thlarau lam chaw kan dawn leh dawn loh a en reng a ni. Chûng thlarau lam chawte lo chhuahna hnâr chu Pathian thlarauva thâwk khum a Thu, Bible hi a ni a. Bawih rinawm chuan Isua kaihhruaina hnuaiah thlarau lam chaw chu buatsaihin an sem chhuak a ni.

12. Isua angin engtin nge Pathian hming kan chawimawi?

¹² Isua angin, Pathian hming chu a phu ang chawimawina kan pe a. (Joh. 17:6, 26) Entîr nân, kum 1931 khân Bible ṭanchhanin Jehova Thuhretute tih hming kan pu a, chu chuan kan Pa vâna mi nêna mi mal taka inlaichînna min neihtîr a ni. (Is. 43:10-12) Chumi kum vêk October thla aṭangin Vênnainsâng magazine kâwmah Jehova hming chuantîr a ni a. Chu bâkah, New World Translation of The  Holy Scriptures-ah chuan Pathian hming chu a awmna hmun dik takah dah vek a ni. An Bible lehlin tam taka Pathian Jehova hming paih botu Kristian sakhaw dangte nên chuan kan va inang lo tak êm!

13. Isua’n “bawih rinawm, fing tak” chu tûn laiah a hmang tih engin nge rinnghehtîr che? (Johana 6:68)

¹³ “Bawih rinawm, fing tak” hmangin, Isua chuan leiah hian biakna dik chawi lârtu tûr inawpna pâwl lian tak a din a ni. Chu inawpna pâwl chu engtin nge i ngaih? Isua hnêna: “Tu hnênah nge kan kal ang? Nangin chatuana nunna thu i nei alâwm,” tia sawitu tirhkoh Petera rilru put hmang ang chu i nei mai thei. (Joh. 6:68) Jehova inawpna pâwl chhûngah awm lo ta ila chuan, tûnah hian engtin nge kan awm ang? Inawpna pâwl kal tlangin, Isua chuan Pathian chunga kan rinawm reng theih nâna kan mawmawh engkim min pe a. Kan rawngbâwlna ṭha taka kan hlen chhuah theih nân min zirtîr bawk. Chu mai bâkah, Pathian Jehova kan tihlâwm theih nâna ‘mihring thara’ inthuam tûrin min ṭanpui bawk a ni.—Eph. 4:24.

14. COVID-19 hripui lên chhûngin engtin nge Jehova inawpna pâwl chhûnga awm chu i hlâwkpui?

¹⁴ Isua chuan hun khirh takte kan hmachhawn hian kaihhruaina fing tak min pe ṭhîn a. Chûng a kaihhruainate kan hlâwkpuizia chu COVID-19 hripui lên chhûng hian a chiang lehzual a ni. Khawvêla mi tam takin tih ber tûr pawh an hriat loh laiin, Isua chuan min vênghim theitu kaihhruaina chiang tak min pe reng a. Pâwn kan chhuah huna hmai tuamna vuah tûr leh mi dangte hnaiha awm lo tûra fuih kan ni. Kohhran upate pawh kohhran chhûnga unaute be pawh reng tûr leh an tisa lam leh thlarau lam mamawhte ngaihven reng tûra hriattîr an ni bawk. (Is. 32:1, 2)  Governing Body hnên aṭanga kan dawn chanchin tharte aṭang pawhin kaihhruaina leh fuihna dangte kan dawng bawk a ni.

15. Hripui lên chhûngin inkhâwm leh thu hrilh rawngbâwlna chhunzawm zêl dân tûr chungchângah eng kaihhruainate nge pêk kan nih a, eng nge a rah chhuah?

¹⁵ Hripui lên chhûngin, kohhran inkhâwm leh thu hrilh rawngbâwlna chhunzawm zêl dân tûr chungchângah kaihhruaina chiang tak kan dawng bawk. Zan khat thil thu-ah videoconference hmangin inkhâwm te, bial inkhâwmpui te, leh regional inkhâwmpuite chu kan nei a. Khawvêl pum deuhthawah lehkhathawn leh phone hmangin thu kan hril ṭan bawk. Jehova’n kan thawhrimnate chu mal a sâwm a ni. Branch tam tak chuan nasa taka thuchhuahtu an pun thu an sawi a. Mi tam tak chuan hri lên chhûngin thiltawn ṭha tak tak an nei a ni.—“ Jehova’n Kan Thu Hrilh Rawngbâwlna Mal A Sâwm,” tih bâwm chu en rawh.

16. Eng nge kan rin tlat theih?

¹⁶ Ṭhenkhat chuan hripui chungchângah inawpna pâwl chu a fîmkhur leh lutuk niin an ngai mai thei. Mahse, hun a liam zêl a, kaihhruaina kan dawnte chu a ṭhatzia a lang telh telh a ni. (Mt. 11:19) Chu bâkah, Isua’n hmangaihna nei taka a mite a kaihhruai dân kan chhût ngun hian, nakin hunah eng thil pawh lo thleng se, Jehova leh a Fapa duh tak chuan min awmpui ang tih kan ring tlat a ni.—Hebrai 13:5, 6, chhiar rawh.

17. Isua kaihhruaina hnuaia rawngbâwl chu engtin nge i ngaih?

¹⁷ Isua kaihhruaina hnuaia rawng kan bâwl thei hi malsâwmna a va ni tak êm! Hnam dân te, hnam te, leh ṭawngte inan loh avânga inthliar hranna awm lohna inawpna pâwl chhûngah kan awm a ni. Thlarau lam chaw hnianghnâr taka pêk kan nih bâkah, thu hrilh rawngbâwlna hlen tûra ṭha taka zirtîr kan ni a. Mihring thara inthuam tûrin mi mal taka ṭanpui kan ni a, inhmangaih tawn kan zir bawk a ni. Isua chu min Hruaitu a nih avângin, amah chhuanna tûr chhan kan va ngah tak êm!