ZIR TUR THUZIAK 29
Hrehawm Nasa Tak Atân I Inpeih Tawh Em?
“Inring rengin awm rawh u.”—MT. 24:44.
HLA 150 Chhandamna Atân Pathian Zawng Rawh
THLIR LAWKNA a
1. Engvângin nge chhiatna atâna inbuatsaih chu a finthlâk?
INBUATSAIHNA chuan nun a chhanhim thei a. Entîr nân, chhiatna a lo thlen hian inbuatsaihna ṭha neite chu an dam khawchhuak tlângpui a, mi dangte pawh an ṭanpui thei a ni. Europe-a tlâwmngaia thawk pâwl pakhat chuan: “Inbuatsaihna ṭha chuan nun a chhanhim,” tiin a sawi.
2. Engvângin nge hrehawm nasa tak atân kan inbuatsaih ang? (Matthaia 24:44)
2 “Hrehawm nasa tak” chu thâwklehkhatah a lo thleng thut ang. (Mt. 24:21) Mahse, chhiatna dangte ang lo takin hrehawm nasa tak a lo thlen chuan mak kan ti lo vang. Kum 2,000 vêl kal ta khân, Isua chuan a hnungzuitute chu chumi nî atâna inbuatsaih tûrin a vaukhân a. (Matthaia 24:44 chhiar rawh.) Kan lo inbuatsaih chuan chu hun khirh tak chu chhel taka tawrh chhuah a awlsam ang a, chutianga ti tûrin mi dangte pawh kan ṭanpui thei bawk ang.—Lk. 21:36.
3. Engtin nge chhelna, khawngaihna leh hmangaihna chuan hrehawm nasa tak atâna inpeih tûrin min ṭanpui ang?
3 Hrehawm nasa tak atâna min ṭanpui thei tûr mize pathumte chu lo ngaihtuah ta ila. Rorêlna thuchah khauh tak hril tûra tih kan nih huna ring lotute dodâlna chu engtin nge kan chhân lêt ang? (Thup. 16:21) Jehova’n min vênghim ang tih ring tlat chunga a thu awih tûrin chhelna kan mamawh ang. Kan unaute’n an thil neih ṭhenkhat emaw, an thil neih zawng zawng emaw an chân a nih chuan eng nge kan tih ang? (Hab. 3:17, 18) An mamawh ṭanpuinate pêk duhna nei tûr chuan khawngaihna kan neih a ngai ang. Hnam insuihkhâwmte beihna avânga unaute nên hmun chêp taka hun eng emaw chen kan awmkhâwm a ngai a nih chuan, engtin nge ni ang? (Ezek. 38:10-12) Chu hun khirh tak tuar chhuak thei tûr chuan unaute hmangaihna nasa tak kan neih a ngai ang.
4. Chhelna, khawngaihna leh hmangaihna kan nei chho zêl tûr a ni tih engtin nge Bible-in a târ lan?
4 Pathian Thu chuan chhelna, khawngaihna leh hmangaihna nei chho zêl tûrin min fuih a. Luka 21:19 chuan: “In chhelin in nun in chhanhim ang,” tiin a sawi a ni. Kolossa 3:12 chuan: “Lainatna. . . chuan inthuam rawh u,” a ti bawk a. Chu bâkah, 1 Thessalonika 4:9, 10 pawhin: “Inhmangaih tawn tûrin nangmahni ngei Pathian zirtîrin in awm si a. . . . Nasa lehzuala ti zêl tûrin kan ngên a che u,” tiin a sawi bawk. Chûng thute chu chhelna, khawngaihna leh hmangaihna lo lantîr tawh zirtîrte tâna ziah a ni a. Mahse, chûng miziate chu an neih chhunzawm zêl a ngai a ni. Keini pawh chutiang bawk chuan kan nei chhunzawm zêl tûr a ni. Min ṭanpuitu atân Kristian hmasate’n chûng miziate an lantîr dân i lo ngaihtuah vang u. Tichuan, chûng zirtîrte kan entawn theih dân leh chumi entawnna aṭanga hrehawm nasa tak atân kan inpeih tih lantîr theih dân kan hria ang.
CHHELNA NEI LEHZUAL RAWH
5. Engtin nge Kristian hmasate chuan harsatnate chhel taka an tawrh chhuah?
5 Kristian hmasate chuan chhelna an neih a ngai a. (Heb. 10:36) Mite tawh tlângpui buainate an hmachhawn bâkah, Kristian nih avânga harsatnate pawh an hmachhawn bawk. An zînga tam tak chuan Juda sakhaw hruaitute leh Rom thuneitute hnên aṭang mai ni lovin, an chhûngte hnên aṭang pawhin tihduhdahna an tuar a. (Mt. 10:21) Kohhran chhûngah pawh kal pêngte leh an zirtîrna dik lo thununna an do a ngai bawk. (Tirh. 20:29, 30) Mahse, chûng zawng zawng chu Kristiante chuan rinawm takin an tuar chhuak thei a ni. (Thup. 2:3) Engtin nge? Pathian Lehkha Thu-a Joba anga chhelna lantîrtute chungchâng chu ngun takin an ngaihtuah a. (Jak. 5:10, 11) Chakna an neih theih nân an ṭawngṭai a. (Tirh. 4:29-31) An chhelnain rah ṭha tak a chhuahte chu an ngaihven tlat bawk.—Tirh. 5:41.
6. Merita-i’n dodâlna chhel taka a tawrh chhuah theih nâna a thiltih aṭangin eng nge i zir?
6 Pathian Thu leh kan thu leh hla chhuahte aṭanga chhelna lantîrtute chungchâng zira kan chhût ngun ziah chuan, keini pawhin chhel takin kan tuar chhuak ve thei ang. Albania rama unaunu Merita-i chuan chutianga a tih avângin, a chhûngte dodâlna nasa tak chu a tuar chhuak thei a ni. Ani chuan: “Bible-a Joba chanchin zir chianna chuan chhel tûrin min chêttîr a. Ani chuan hrehawm tam tak a tuar a, chutianga amah tawrhtîrtu chu a hre lo chung pawhin: ‘Ka thih thlengin ka dikna ka dah bo lo vang,’ a ti a. (Job. 27:5) Amah ang lo takin hrehawm min tawrhtîrtu chu ka hria a. Joba nêna khaihkhin chuan ka hrehawm tawrhte hi engmah a nih lohzia ka hria,” tiin a sawi.
7. Tûnah fiahna nasa tak kan tâwk lo a nih pawhin, eng tih nge kan zir ang?
7 Kan rilru hahnate chu Jehova hnêna tih tak zeta thlen ziahin chhelna kan nei lehzual thei bawk a. (Phil. 4:6; 1 Thes. 5:17) Tûnah fiahna nasa tak i tâwk lo pawh a ni thei. Chutichung pawhin, lunghnualna, rilru chi-aina leh thaw-ipikna i neih apiangin Jehova kaihhruaina i zawng em? Nî tina i tawh buainate hmachhawn thei tûra ṭanpui tûr chein Pathian i pan ṭhîn a nih chuan, nakin huna buaina lian zâwk i hmachhawn hunah pawh chutianga tih chu i hreh lo vang a. Ani chuan nangmah ṭanpui hun tûr dik tak leh ṭanpui dân tûr che a hria tih i chiang ang.—Sâm 27:1, 3.
CHHELNA
Fiahnate chhel taka tawrh chhuahna chuan kan tawh leh tûr fiahnate atân min tichak thei (Paragraph 8-na en rawh)
8. Engtin nge Mira-i thiltawn chuan tûna chhelna lantîrnain fiahna lo awm tûrte chhel taka tuar chhuak tûrin min ṭanpui thei tih a târ lan? (Jakoba 1:2-4) (Milem en bawk rawh.)
8 Tûnah fiahnate chhel taka kan tuar chhuak a nih chuan, hrehawm nasa tak a lo thlen hunah pawh chhel takin kan tuar chhuak thei ngei ang. (Rom 5:3) Engvângin nge chutianga kan sawi theih? Unau tam tak chuan fiahnate rinawm taka an lo tawrh chhuahnain buaina dangte chhel taka tuar chhuak tûrin a ṭanpui tih an hria a. An chhelna chuan Jehova chu ṭanpui tûrin a inpeihin, a inhuam reng tih an rinna chu a tinghet lehzual a ni. Chuvângin, rinna chuan fiahna lo awm tûrte tuar chhuak thei tûrin a ṭanpui a ni. (Jakoba 1:2-4 chhiar rawh.) Albania rama pioneer pakhat, Mira-i chuan hun kal tawha a chhelnain tûna a buainate tuar chhunzawm zêl tûrin a ṭanpui tih a hria a. Ani chuan buaina tam tak tawngtu awm chhun nia inhriat châng a neih thu a sawi a. Mahse, ani chuan kum 20 kal ta chhûnga Jehova’n a ṭanpui nasat dân a ngaihtuah lêt chuan, heti hian a inhrilh a: ‘Rinawm tlat rawh. Khâng kum chhûng zawng zawnga Jehova ṭanpuina avânga i do hneh zawng zawngte kha thlâwntîr suh,’ tiin. Nang pawhin Jehova’n chhel taka tuar chhuak tûra a lo ṭanpui tawh dân che chu i ngaihtuah lêt thei a. Ani chuan fiahnate chhel taka i tawrh chhuah apiangin a hmu che a, mal a sâwm ang che tih ring tlat rawh. (Mt. 5:10-12) Tichuan, hrehawm nasa tak a inṭan hunah chhel taka tawrh chhuah dân i hre tawh ang a, chhel taka tawrh zawm zêl i tum nghet tlat bawk ang.
KHAWNGAIHNA LANTIR RAWH
9. Engtin nge Suria rama Antiokei kohhran chuan khawngaihna a lantîr?
9 Judai rama Kristiante’n ṭâm nasa tak an tawrh laia thilthlengte kha han ngaihtuah teh. Suria rama Antiokei kohhranin Judai rama ṭâm a tlâk thu an hriat chuan chuta unaute chu an khawngaih hle a. An khawngaihna chu thiltihin an lantîr a ni. Anni chuan “an theih tâwk ṭheuhvin, Judai rama unau awmte hnênah chuan chhawmdâwlna tûr thawn an tum a.” (Tirh. 11:27-30) Ṭâm tâwk unaute chu hmun hla taka awm ni mah se, Antiokei khuaa Kristiante chuan an ṭanpui a ni.—1 Joh. 3:17, 18.
KHAWNGAIHNA
Leilung chhiatna a thlen hian khawngaihna lantîr theihna hun remchâng kan nei (Paragraph 10-na en rawh)
10. Kan Kristian unaute’n chhiatna an tawh hunah eng kawngtein nge khawngaihna kan lantîr theih? (Milem en bawk rawh.)
10 Tûn laiah, kan Kristian unaute’n chhiatna an tawh hunah khawngaihna kan lantîr ve thei a. Chhawmdâwltu pâwl kan ṭanpui theih leh theih loh upate zâwtin emaw, khawvêl pum huap thawhlâwm thawhin emaw, chhiatna tâwk unaute tâna ṭawngṭaiin emaw inhuam takin kan chhâng lêt thei a ni. b (Thuf. 17:17) Entîr nân, kum 2020 khân chhawmdâwltu pâwl 950 chuang chu khawvêl pum huapa COVID-19 hripuiin a nghawngte ngaihsak tûra ruat an ni a. Chûng chhawmdâwltu pâwla telte chuan fak an phu hle a ni. Unaute an khawngaih avângin an tisa lam leh thlarau lam mamawhte an ṭanpui a, dinhmun ṭhenkhatah chuan an in leh biakna hmunte chu an thuam ṭha, a nih loh leh an siam ṭhatsak a ni.—2 Korinth 8:1-4 nên khaikhin rawh.
11. Engtin nge khawngaihna thiltih chuan kan Pa vâna mi a chawimawi?
11 Leilung chhiatna tâwkte chunga khawngaihna kan lantîr hian mi dangte’n kan inpêkna chu an hmu a. Entîr nân, kum 2019 khân Hurricane Dorian chuan Bahamas rama Kingdom Hall pakhat a nuai chhia a ni. Unaute’n Kingdom Hall an sak ṭhat lai chuan Thuhretu ni lo contractor pakhat chu ruaiin a rawih man tûr zât an zâwt a. Ani chuan: “Hmanrua te, ka thiamna te, leh thil ṭûl mamawhte chu thawh ka duh. . . . In pâwl tâna tihsak hi ka duh ve hrim hrim. Hetianga in inṭanpui tawnna hian ka rilru a khawih tak zet,” tiin a sawi. Khawvêla mi a tam zâwk chuan Pathian Jehova an hre lo va. Mahse, mi tam tak chuan Jehova Thuhretute thiltihte chu an hmu a ni. Kan khawngaihna thiltih avânga ‘khawngaihna ngah tak’ Pathian lama mite hîpa an awm thei chu chanvo hlu a va ni êm!—Eph. 2:4.
12. Tûn aṭanga khawngaihna lantîrna chuan engtin nge hrehawm nasa tak atâna min buatsaih? (Thu Puan 13:16, 17)
12 Engvângin nge hrehawm nasa tak chhûnga khawngaihna lantîr chu a pawimawh ang? Bible chuan he khawvêla sawrkârte thlâwp lotute chuan—tûnah leh hrehawm nasa tak chhûngin—harsatnate an hmachhawn ang tih a sawi a. (Thu Puan 13:16, 17 chhiar rawh.) Kan unaute chu an mamawh bulpuite ṭanpui an ngai thei a. Kan Lal, Krista Isua chuan rorêl tûra a lo kal hunah khawngaihna kan inlantîr tawn chu hmuin “ram buatsaih chu chang rawh u,” tia min sâwm chu kan duh ngei ang.—Mt. 25:34-40.
I HMANGAIHNA TINGHET LEHZUAL RAWH
13. Rom 15:7-in a târ lan angin, engtin nge Kristian hmasate khân an inhmangaih tawnna chu an tihngheh lehzual?
13 Hmangaihna hi Kristian hmasate chhinchhiahna a ni a. Mahse, hmangaihna lantîr chu awlsam an ti em? Rom khuaa kohhran chungchâng hi lo ngaihtuah ta ila. Chu kohhranah chuan Mosia Dân hnuaia seilian Judate bâkah, ṭobul hrang hrang aṭanga seilian Jentailte pawh an awm a. Kristian ṭhenkhat chu sal an ni a, mi dangte chu mi zalên—an zînga ṭhenkhat chu sal neitu an ni. A nih leh, engtin nge chûng Kristiante chuan an dinhmun a inang lo chung pawha an inhmangaih tawnna chu an tihngheh? Tirhkoh Paula chuan “inlâwm tawn rawh u,” tiin anni chu a fuih a ni. (Rom 15:7 chhiar rawh.) Eng a sawi duhna nge? “Inlâwm” tia lehlin thu mal chuan tu emaw chu ina ngilnei tak leh khualchhâwn thiamna nêna lo dawnsawn emaw, ṭhiana siamna emaw a kâwk a ni. Entîr nân, Paula’n Philemona hnênah sal tlân bo Onesima a dawnsawn dân tûr chungchângah: “Lo lâwm ang che,” tiin a hrilh a. (Philm. 17) Chu bâkah, Priskilli leh Akuila te chuan anmahni aia Kristian zirtîrna hre tlêm zâwk Apollova chu lâwmin “an inah an hruai” a ni. (Tirh. 18:26) Chûng Kristiante chuan an inan lohna chu inthlei hran nâna hmang lovin, an inlâwm tawn zâwk a ni.
HMANGAIHNA
Unaute hmangaihna kan mamawh (Paragraph 15-na en rawh)
14. Engtin nge Anna-i leh a pasal chuan hmangaihna an lantîr?
14 Keini pawhin unaute chu ṭhiana siama hunte hmanpuiin hmangaihna kan lantîr ve thei a. Chutianga tihna chuan hmangaihnaa min chhâng lêt tûrin a chêttîr fo vang. (2 Kor. 6:11-13) Anna-i te nupa thiltawn hi han ngaihtuah teh. Missionary nia an chavo thar thawk tûra Africa khawthlang lama an insawn hnu lawkah, COVID-19 hripui chu a lêng ṭan a. Chuvângin kohhrana unaute nên hmaichhanah an inhmu thei lo va. Engtin nge chu nupa chuan hmangaihna an lantîr? Anni chuan unaute biak pawh nân videoconferencing an hmang a, an zavaia hriatchian lehzual an duh thu an hrilh bawk. Chu chuan unaute rilru a khawih hle a, anni chuan Anna-i te nupa chu phone-a biaa SMS-te thawn ziahin an chungah hmangaihna an lantîr a ni. Engvângin nge anni chuan an kohhran thara unaute be pawh tûra hma an lâk? Anna-i chuan: “Unaute’n hun nuamah leh hrehawmah pawh kei leh ka chhûngte chunga hmangaihna an lantîr chu ka thinlungah a châm reng a, chu chuan mi dangte chunga hmangaihna lantîr tûrin min chêttîr a ni,” tiin a sawi.
15. Unau zawng zawngte hmangaihna chungchângah Vanessa-i entawn tûr siam aṭangin eng nge i zir? (Milem en bawk rawh.)
15 Kan zînga tam tak chu ṭobul hrang hrang aṭanga lo kal, mize chi hrang hrang nei unaute nên kohhran khatah kan awmho va. An mize ṭha laite ngaihven tlatin anmahni kan hmangaihna chu kan tinghet lehzual thei a ni. New Zealand-a rawngbâwl unaunu Vanessa-i chuan a kohhrana mi ṭhenkhat nêna inlaichînna ṭha siam chu harsa a ti a. Mahse, a mil loh zâwng mize nei unaute pumpelh aiin, anni chu hun tam lehzual pea kawm a tum ta a ni. Chutia tihna chuan Jehova’n anmahni a hmangaih chhan hre tûrin a ṭanpui a. Vanessa-i chuan: “Ka pasal bial kantu a nih aṭang chuan mize inang lo tak tak nei unaute nên hun kan hmangho ṭhîn a, anni chu ka kâwm thiam tawh hle a ni. Tûnah chuan, kan inan lohnate hi duhawm ka ti tawh zâwk. Jehova pawhin ṭobul hrang hranga mite chu awmkhâwm tûra min hîp avângin, chu chu a duh zâwng a ni tih a chiang hle,” tiin a sawi. Jehova’n mi dangte a thlîr anga kan thlîr hian anni chu kan hmangaihzia kan lantîr a ni.—2 Kor. 8:24.
Hrehawm nasa tak chhûnga unaute nêna kan inpumkhat tlat chuan a thutiam angin Jehova vênhim kan ni ang (Paragraph 16-na en rawh)
16. Engvângin nge hrehawm nasa tak chhûngin unaute kan hmangaih ang? (Milem en bawk rawh.)
16 Hrehawm nasa tak chhûnga unaute hmangaih chu thil pawimawh tak a ni ang. Hrehawm nasa tak a inṭan hunah, khawi aṭangin nge vênhimna kan hmuh ang? Hmân lai Babulon khawpui beih a nih khân, Jehova’n a mite hnênah: “Hawh u, ka mite u, in pindan chhûngahte lût ula, in kawngte chu inkhâr khum rawh u; lungnih lohna hi a kian hmâ loh chu, mitkhapkâr lek pawh ni se, biru rawh u,” tiin kaihhruaina a pe a. (Is. 26:20) Hrehawm nasa tak chhûngin chutiang kaihhruaina chu kan dawn ve ngei a rinawm. ‘Pindan chhûng’ tih chu kohhran sawina a ni thei a. Hrehawm nasa tak chhûngin unaute nêna kan inpumkhat tlat chuan Jehova thutiam angin vênhim kan ni ang. Chuvângin, kan unaute chungah dawhtheihna kan lantîr mai ni lovin, anni chu hmangaih tak zet tûrin tûn aṭangin theih tâwp kan chhuah tûr a ni. Kan dam khawchhuahna chu chumia innghat a ni thei si a!
TUNAH INBUATSAIH RAWH
17. Tûna kan inbuatsaih chuan hrehawm nasa tak chhûngin eng nge kan tih theih ang?
17 “LALPA ni ropui tak” chuan mi zawng zawng tân hrehawmna a thlen ang. (Zep. 1:14, 15) Jehova mite pawhin hrehawm an tuar bawk ang. Mahse, tûna kan inbuatsaih chuan thlamuang takin kan awm thei ang a, mi dangte pawh kan ṭanpui thei ang. Buaina lo thleng eng pawh chu chhel takin kan tuar chhuak ang a. Kan unaute’n hrehawm an tawrh hunah an chungah khawngaihna lantîrin theih tâwp chhuahin kan ṭanpui ang. Chu bâkah, tûn aṭanga unaute hmangaih kan zir chuan nakin hunah pawh hmangaihna kan lantîr thei ang a. Chutianga kan tih chuan, Jehova’n chhiatna leh hrehawm tawrhna zawng zawng awm tawh lohna khawvêlah chatuana nunna pein mal min sâwm ang.—Is. 65:17.
HLA 144 Lâwmman Chu Thlîr Reng Rawh
a Hrehawm nasa tak chu a lo thleng thuai ang. Chu hun hrehawm tak atâna inpeih tûrin chhelna, khawngaihna leh hmangaihna miziate chuan min ṭanpui dâwn a ni. Kristian hmasate’n chûng miziate an lantîr dân te, tûn laia chutianga kan tih theih dân te, leh chûng miziate’n hrehawm nasa tak atâna inbuatsaih tûra min ṭanpui dânte chu lo chhinchhiah ang che.
b Chhiat tâwkte chhawmdâwltu pâwl ṭanpui duhtu chuan Local Design/Construction Volunteer Application (DC-50), a nih loh leh Application for Volunteer Program (A-19) chu a ziak khat hmasa ang a, tichuan chu pâwlin a sâwmna chu a nghâk ang.