1. Bible i zir ṭan khân, eng thutakte nge i rawn hriat?

 BIBLE i zir ṭan hun lai kha i la hria em? Pathianin hming a nei tih i hriat khân, mak i ti mai thei a. Pathianin hremhmun meidîlah mite a hrem loh tih i han hriat chuan i hahdam huai pawh a ni thei bawk. Chu bâkah, hmangaih thi tawhte nên inhmuh leh a, lei paradis-a chên zaho beiseina chuan a tiphûr hle ngei ang che.

2. Bible i zirna aṭangin thutak i hriat bâkah, eng hmasâwnnate nge i neih chhoh? (Ephesi 5:1, 2)

² Pathian Thu i zir tam poh leh amah i hmangaihna chu a pung lehzual a. Chu hmangaihna chuan i thu hriatte nunpui tûrin a chêttîr che a. Bible thu bulte ṭanchhanin thu tlûkna ṭhate i siam a ni. Pathian tihlâwm i duh avângin i rilru put hmangte leh i miziate i siam ṭha a. Naupang pakhatin hmangaihna nei tak a pa a entawn ang maiin, i Pa vâna mi chu i entawn a ni.—Ephesi 5:1, 2 chhiar rawh.

3. Eng zawhnate nge kan inzawh ang?

³ Heti hian kan inzâwt thei a ni: ‘Kristian ka nih tirh lai aiin Jehova chu ka hmangaih lehzual em? Baptisma ka chan hnu chuan a bîk takin, kan unaute chunga hmangaihna lantîrna kawngah Jehova ngaihtuah dân anga ngaihtuahin, thil ka ti em?’ tiin. “I hmangaihna hmasa ber” a dai ta a nih chuan lunghnual suh. Chutiang chu kum zabi khatnaa Kristiante chungah a thleng a ni. Chutiang an nih avângin Isua chu an chungah a beidawng lo va, kan chungah pawh a beidawng lo. (Thup. 2:4, 7) Ani chuan thutak kan zir ṭan laia kan neih hmangaihna ang kan nei leh thei tih a hria a ni.

4. He thuziakah hian eng nge kan sawiho vang?

 ⁴ He thuziakah hian Jehova leh mi dangte kan hmangnaihna kan tihpun zawm zêl theih dân kan sawiho vang a. Tichuan, Jehova leh unaute kan hmangaihna kan tihnghehna aṭanga kan dawn malsâwmna ṭhenkhat kan sawiho bawk ang.

5-6. Tirhkoh Paula chuan a rawngbâwl chhûngin eng harsatnate nge a tawh a, engin nge ani chu Jehova rawngbâwl tlat tûra chêttîr?

⁵ Tirhkoh Paula chuan Pathian Jehova rawngbâwl chu nuam a ti hle a; mahse, ani chuan harsatna tam tak a hmachhawn a ni. Ram hla tak takah a zin ṭhîn a, chûng hun lai chuan khual zin chu thil awlsam a ni lo. A zinnaah chuan, “luite laka hlauhawmnate” leh “suamhmangte laka hlauhawmnate” tawh châng a nei a. Amah dodâltute vuak leh sawisak a tuar bawk. (2 Kor. 11:23-27) Chu bâkah, a Kristian unaute chuan Paula’n amahni ṭanpui tûra theih tâwp a chhuahnaah lâwmna an lantîr reng lo a ni.—2 Kor. 10:10; Phil. 4:15.

⁶ Engin nge Paula chu Jehova rawngbâwl zawm zêl tûra ṭanpui? Paula chuan Pathian Thu leh ama thiltawn ngei aṭangin Jehova chungchâng tam tak a hria a. Pathian Jehova’n a hmangaih tih a ring tlat a ni. (Rom 8:38, 39; Eph. 2:4, 5) Chuvângin, ani chuan Jehova chu a hmangaih hle a. Jehova a hmangaihzia chu ‘mi thianghlimte rawngbâwlsak zawm zêlin’ a lantîr a ni.—Heb. 6:10.

7. Jehova kan hmangaihna kan tihngheh lehzual theih dân kawng khat chu eng nge ni?

⁷ Pathian kan hmangaihna chu Bible taima taka zirna hmangin kan tinghet lehzual thei a. Bible i chhiar hunah, a châng tinin Jehova chungchâng a târ lante chu hriat tum ang che. Heti hian i inzâwt thei a ni: ‘Engtin nge he Bible châng hian Jehova’n min hmangaih tih a târ lan? Hei hian Jehova ka hmangaihna tûr chhan eng nge min zirtîr?’ tiin.

8. Engtin nge ṭawngṭaina chuan Pathian kan hmangaihna tinghet lehzual tûra min ṭanpui?

⁸ Jehova kan hmangaihna kan tihngheh lehzual theih dân kawng dang chu a hnêna ṭawngṭaia kan thinlung phawrh ziah hi a ni a. (Sâm 25:4, 5) Jehova chuan kan ṭawngṭaina chu a chhâng ang. (1 Joh. 3:21, 22) Asia rama Unaunu Khanh-i chuan: “Jehova ka hmangaihna chu hriatna aṭanga lo awm hmasa ni mah se, ka ṭawngṭaina min chhân dân ka hmuh hian ka hmangaihna a nghet lehzual a. Chu chuan a lâwm zâwng thilte tih duhna min neihtîr a ni,” b tiin a sawi.

9. Engtin nge Timothea chuan unaute a hmangaihna kawngah hma a sâwn tih a lantîr?

⁹ Paula Kristian a nih hnu chuan ṭhalai duhawm tak Timothea nên an intawng a. Timothea chuan Pathian Jehova a hmangaihin mite pawh a hmangaih a ni. Paula chuan Philippi khuaa mite hnênah: “Hetiang rilru pu, in awmzia tihtak zeta ngaihtuahsaktu tûr che u tu mah ka nei si lo,” tiin a sawi a. (Phil. 2:20) Chutah chuan Timothea huaihawt thiamnate leh thusawi thiamnate chu a sawi lo va; mahse, unaute a hmangaihna chuan a rilru a khawih zâwk tih a târ lang a ni. Timothea rawngbâwlna kohhrana unaute chuan a tlawh hun tûr chu an nghâkhlel hle ang tih rinhlelh rual a ni lo.—1 Kor. 4:17.

10. Engtin nge Anna-i te nupa chuan an unaute an hmangaih tak zet tih an lantîr?

¹⁰ Keini pawhin kan Kristian unaute ṭanpui dân kawngte kan zawng a. (Heb. 13:16) Thuziak hmasaa kan târ lan tâk Anna-i thiltawn kha han ngaihtuah ta ila. Thlipui na tak a tleh  hnuah an nupa chuan Thuhretu chhûngkua pakhat an va tlawh a, an in chung khuhte chu thlîin a lo nuai chhia a. Chu chhûngkua chuan thawmhnaw fai hâk tûr pawh an nei lo . Anna-i chuan: “An thawmhnawte chu kan sûk faisak a, kan nawhsakin kan thlehsak bawk a. Chu chu ṭanpuina tê tham tak ni mah se, chu chuan inṭhian ṭhatna min neihtîr a, chu kan inṭhianna chu tûn thlengin a la nghet zêl a ni,” tiin a sawi. Anna-i te nupa chu unaute an hmangaihnain ṭanpuina ṭangkai tak pe tûrin a chêttîr a ni.—1 Joh. 3:17, 18.

11. (a) Engtin nge hmangaihna lantir tûra theih tâwp kan chhuahna chuan mi dangte a nghawng theih? (b) Thufingte 19:17-nain a sawi angin, engtin nge hmangaihna kan lantîrna chu Jehova’n a chhân lêt?

¹¹ Hmangaihna nei tak leh ngilnei taka mi dangte kan cheibâwl hian anni chuan Jehova kan entawn tih an hria a. Kan hriat phâk bâkin kan ngilneihna chu an ngaihlu hle thei a ni. Kan târ lan tâk Khanh-i chuan, amah ṭanpuitute chu a hre reng a. Ani chuan: “Rawngbâwlnaa min hruai ṭhîntu unaunu duhawm takte chungah ka lâwm tak zet a. Anni chuan min rawn hruai a, thingpui in tûrin emaw, chhûn chaw ei tûrin emaw min sâwm a, inah min thlah leh ṭhîn a ni. Theih tâwp an chhuahnate kha thil awlsam a ni lo tih leh hmangaihna nei takin min ṭanpui tih tûnah ka hre chhuak a ni,” tiin a sawi. Mi zawng zawngin kan thil tihsakte avângin lâwm thu an sawi kher lo vang. Khanh-i chuan amah ṭanpuitute chungchângah: “Hmangaih taka min ṭanpuitu zawng zawngte kha rulh leh vek ka duh a; mahse, an awmna hmun ka hre bawk si lo. Jehova chuan a hre vek a, ka tâna min rûlsak tûrin ka ṭawngṭai ṭhîn a ni,” tiin a sawi. Khanh-i chuan a sawi dik a ni. Jehova chuan thil tê tham tak pawh ni se, mi dangte tâna ngilnei taka kan thiltihte chu a hria a. Chûng kan thiltihte chu inthawina hlu tak leh rûlh leh tûr leiba angin a ngai a ni.—Thufingte 19:17 chhiar rawh.

12. Engtin nge unaupate chuan kohhrana unaute an hmangaihna chu an lantîr theih? (Milem en bawk rawh.)

 ¹² Unaupa i nih chuan, engtin nge mi dangte chungah hmangaihna lantîr a, anmahni ṭanpui tûra hma i lâk theih? Ṭhalai unaupa Jordan-a chuan kohhran upa pakhat hnênah unaute a ṭanpui lehzual theih dân a zâwt a. Chu upa chuan a hmasâwn tawhnate hrilhin a fak a, mi dangte a ṭanpui lehzual theih dân chungchângah thurâwn ṭhenkhat a pe a ni. Entîr nân, ani chuan Jordan-a hnênah Kingdom Hall-a hma taka thlenga mi dangte lo lâwm tûr te, inkhâwma chhânna pe tûr te, rawngbâwlnaa tel ziah tûr te leh, mi dangte ṭanpui theih dân kawngte zawng tûrtein a fuih a. Jordan-a’n chu thurâwn a zawm hnu chuan, thiamna tharte a zir mai bâkah, unaute a hmangaihna pawh a pung chho lehzual a ni. Ani chuan unaupa pakhat chu kohhran rawngbâwltu a nih hian, mi dangte a ṭanpui ṭan chauh ni lovin, a ṭanpui zawm zêl tih a hre thiam a ni.—1 Tim. 3:8-10, 13.

13. Engtin nge Unau Christian-a chu hmangaihnain kohhran upa ni leh tûra a ṭanpui?

¹³ Kohhran rawngbâwltu emaw, upa emaw i ni tawh ṭhîn a nih chuan engtin nge ni ang? Jehova chuan tûn hmaa i thiltihte leh chutianga thil ti tûra chêttîrtu i hmangaihnate chu a hre reng a ni. (1 Kor. 15:58) Ani chuan hmangaihna i lantîr zawm zêl tih pawh a hmu a. Unau Christian-a chu kohhran upa aṭanga chawlhtîr a nih chuan a lunghnual hle a. Mahse, ani chuan: “Kohhran upa ka ni emaw, ni lo emaw, Jehova hmangaih a, a rawngbâwl tûrin ka tih theih apiang tih ka tum a ni,” tiin a sawi. A hnuah chuan kohhran upa ni tûra ruat a ni leh a. Ani chuan: “Kohharan upa nia rawngbâwl leh chu ka zâm deuh hlek a. Mahse, Jehova’n a zahngaihna avânga upa ni leh a, a rawngbâwl tûra min duh  a nih chuan, amah leh unaute ka hmangaihna avângin ka thawk tûr a ni tiin thu tlûkna ka siam,” tiin a sawi.

14. Georgia rama unaunu pakhat thusawi aṭangin eng nge kan zir?

¹⁴ Jehova chhiahhlawhte chuan an vêngte chungah hmangaihna an lantîr bawk a. (Mt. 22:37-39) Entîr nân, Georgia rama Unaunu Elena-i chuan heti hian a sawi a ni: “A tîr chuan, thu hril tûra min chêttîrtu awm chhun chu Jehova ka hmangaihna hi a ni a. Mahse, ka Pa vâna mi ka hmangaihna a nasat poh leh mite ka hmangaihna pawh a nasa lehzual a ni. An hmachhawn harsatnate leh an ngaihven zâwng thute chu ngaihtuah ka tum ta a. Chutiang kawnga an chungchâng ka ngaihtuah tam poh leh anmahni ṭanpui duhna ka nei lehzual a ni,” tiin.—Rom 10:13-15.

15-16. Milema kan hmuh ang hian, mi dangte chunga hmangaihna lantîrna aṭanga lo awm malsâwmnate chu engte nge ni?

¹⁵ Kan unaute chunga hmangaihna kan lantîr hian anmahni chauhvin an hlâwkpui lo. COVID-19 hripui a lên hnu khân, Unau Paolo-a te nupa chuan kum upa unaunu tam tak chu thu hrilhnaa phone, tablet leh computer-te hman dân an zirtîr a. A tîra chu hmanrua hmang thiam lo kum upa unaunu chuan a hnuah a hmang thiam ta a. Chu hmanraw hmang chuan Hriatrengna inkhâwma lo tel tûrin a chhûngte a sâwm a. A chhûngte zînga mi 60 lai videoconferencing hmangin an lo tel a. Unau Paolo-a te nupa theih tâwp chhuahna chu, chu unaunu leh  a chhûngte zawng zawng chuan an hlâwkpui a. A hnuah, chu unaunu chuan Unau Paolo-a hnênah: “Keini ang kum upa tawh tak min zirtîr avângin ka lâwm e. Pathian Jehova min ngaihsaknate leh theih tâwp chhuaha in mi ṭanpuinate chu ka theihnghilh ngai lo vang,” tiin lehkha a ziak a ni.

¹⁶ He a thiltawn aṭang hian Unau Paolo-a chuan thil pawimawh tak a zir chhuak a. Chu chuan hmangaihna chu hriatnate, a nih loh leh pianpui thiamnate aiin a pawimawh zâwk tih a hriat nawntîr a ni. Ani chuan: “Bial kantu niin rawng ka bâwl tawh ṭhîn a. Tûnah chuan, thuchhuahtute chuan ka thusawite chu an theihnghilh tawh pawh a ni thei; mahse, ṭanpuina ṭangkai tak ka pêkte erawh an la hre reng tih ka hria a ni,” tiin a sawi.

17. Hmangaihna kan lantîr hian tu dangin nge hlâwkpui ang?

¹⁷ Mi dangte chunga hmangaihna kan lantîr hian keimahni ngei pawhin beisei lo tak kawngin kan hlâwkpui a. New Zealand rama awm Unau Jonathan-a chuan chu chu a pawm a ni. Ani chuan Inrinni chawhnu lam ni sat vânglai taka kal kawnga pioneer unaupain mahni chauhva thu a hrilh lai chu a hmu a. Jonathan-a chuan a kâr leh Inrinni chawhnu lama rawngbâwlpui chu a tum ta a ni. Chutih lai chuan amah ngeiin chu ngilneihna thiltih a hlâwkpui nasat dân tûr chu a hre lo va. Jonathan-a chuan, “Chûng hun lai chuan rawngbâwlnaa tel chu nuam ka ti lo hle a. Mahse, chu pioneer unaupa zirtîr dânte ka ngaithla a, rawngbâwlnaa a hlawhtlin dânte ka hmuh chuan rawngbâwlnaa tel chu nuam ka ti ta hle a. Ani chu thlarau lama ṭhang chho tûr te, rawngbâwlnaa nuam ti tûr te leh Pathian Jehova hnaih tlat tûrtea min ṭanpuitu ka ṭhian ṭha tak a ni bawk,” tiin a sawi a ni.

18. Jehova’n eng ti tûrin nge min duh?

¹⁸ Jehova chuan amah leh mi dangte kan hmangaihna tipung chho zêl tûrin min duh ṭheuh va. Kan hriat tâk angin, a Thu chhiar a, chhût ngunnate leh a hnêna ṭawngṭai ziahnate hmangin Jehova kan hmangaihna chu kan tinghet lehzual thei a ni. Kan unaute chu an mamawh ṭanpuinate pein an chunga kan hmangaihna kan tipung thei a. Kan hmangaihna a pun zêl rualin, Pathian Jehova leh kan unaute kan hmangaihna pawh a nghet lehzual ang a. Chûng kan inṭhian ṭhatna chu chatuan daih a ni ang!