1. Eng kawngin nge Kristiante chu thingkûng ang an nih? (Milem en bawk rawh.)

 “THINGKUNG kûr âwn thei chu thlîin a titlu thei lo.” He thufing hian thli laka thingkûngte din ngheh theih nâna thil pawimawh tak, kûr âwn theihna chungchâng a târ lang a. Thlarau lama ṭhang duang tûr chuan Kristiante’n thingkûng anga kûr âwn theihna, a nih loh leh insiamrem theihna an neih a ngai a ni. Engtin nge chu mizia chu kan neih theih? Kan dinhmun a inthlâk danglam hunah insiamremin leh mi dangte thil thlîr dân leh thu tlûkna siamte zahsakin a âwm tâwk kan hriatzia kan lantîr tûr a ni.

2. Eng miziate’n nge kan dinhmun azira insiamrem tûra min ṭanpui ang a, he thuziakah hian eng nge kan sawiho vang?

² Jehova chhiahhlawhte kan nih angin a âwm tâwk hriat kan duh a. Inngaitlâwm tak leh mi dangte khawngaih thei tak nih kan duh bawk. He thuziakah hian, chûng miziate’n dinhmun inthlâk danglamna hmachhawn tûra Kristian ṭhenkhat a ṭanpui dân kan hmu ang a. Chûng miziate’n min ṭanpui theih dân pawh kan hmu bawk ang. Mahse, a hmasain a âwm tâwk hriatna chungchânga Jehova leh Isua’n entawn tûr ṭha famkim an siam chu i lo zir ang u.

3. Engtin nge Jehova’n a âwm tâwk a hria tih kan hriat theih?

³ Jehova chu tihchêt rual lohva nghet a nih avângin “Lungpuia” tiha koh a ni a. (Deut. 32:4) Chutih rualin, a âwm tâwk a hre bawk. Hun a liam zêl rualin, kan Pathian chu a thiltum  a tihhlawhtlin theih nân a insiamrem zêl a. Ama anpuiin mihringte pawh dinhmun inthlâk danglam azira insiamrem thei tûrin a siam a ni. Jehova chuan eng ang fiahna hnuaiah pawh thu tlûkna fingte siam tûra min ṭanpui tûrin Bible thu bul chiang tak min pe a. A entawn tûr siam leh thu bul min pêkte chuan “Lungpuia” a nih rualin, a âwm tâwk a hriatzia a finfiah a ni.

4. Jehova âwm tâwk hriatna chungchângah entîrna pakhat pe rawh. (Leviticus 5:7, 11)

⁴ Jehova kawngte chu a ṭha famkimin a thiltih dânte a inbûk tâwk hle a. Ani chuan khirhkhân takin mihringte a dâwr ngai lo. Entîr nân, Israelte chunga a âwm tâwka thil a phût dân hi lo ngaihtuah ta ila. Mi hausate leh mi retheite lakah inthawina atân thil hlan inang a phût lo va. Dinhmun ṭhenkhatah chuan, Israelte chu an neihin a tlin dân azira thil hlan a phalsak a ni.—Leviticus 5:7, 11 chhiar rawh.

5. Jehova inngaihtlâwmna leh khawngaihna chungchângah entîrna pakhat pe rawh.

⁵ Jehova inngaihtlâwmna leh khawngaihna chuan a âwm tâwk taka thil ti tûrin a chêttîr a. Entîr nân, Sodom khuaa mi suaksualte a tihboral dâwn khân inngaihtlâwmna a lantîr a ni. A vântirhkohte hmangin mi fel Lota chu tlânga tlânchhe tûrin a hrilh a. Lota chuan chuta tlânchhiat chu a hlau a ni. Jehova tihboral tûr zînga tel, Zoar khaw te tak têa chhûngkuaa tlânchhiat a dîl a. Jehova chuan a hrilh anga thil ti tûrin Lota chu a tilui thei a. Mahse, Lota ngenna chu phalsakin Zoar chu a zuah ta zâwk a ni. (Gen. 19:18-22) Kum za tam tak hnuah, Jehova chuan Ninevi khuaa mite chungah khawngaihna a lantîr a. Zâwlnei Jona chu, chu khua leh a chhûnga chêng mi suaksualte tihboral an nih tûr thu puang tûrin a tîr a. Mahse, Ninevi khuaa mite an inlamlêt chuan Jehova’n anni chu khawngaihin a tiboral ta lo a ni.—Jon. 3:1, 10; 4:10, 11.

6. Isua’n Jehova âwm tâwk hriatna a entawn dân entîrna ṭhenkhat pe rawh.

⁶ Isua chuan Jehova âwm tâwk hriatna chu a entawn a. Ani chu “Israel hnam berâm bo” hnêna thu hril tûra leia tirh a ni a. Mahse, chu chanvo a hlennaah a âwm tâwk a hriatzia a lantîr a ni. Ṭum khat chu, Israel mi ni lo hmeichhe pakhatin a fanu “ram huaiin a man tlat” chu tidam tûrin a ngên a. Isua chuan khawngaihna nei takin a ngenna ang chuan a fanu chu a tihdamsak ta a ni. (Mt. 15:21-28) Entîrna dang lo ngaihtuah ta ila. A rawngbâwl tirh lamah, Isua chuan: “Tu pawh . . . mi phat apiang, ka phat ve ang,” tiin a sawi a. (Mt. 10:33) Mahse, vawi thum lai amah phatsantu Petera chu a phatsan ve em? Phatsan lo ve. Petera inchhîrna leh rinna chu a hriatsak zâwk a. A thawh leh hnuah, Isua’n Petera hnênah inlârin ani chu a ngaidam tih leh, a la hmangaih reng tih a hriatchiantîr ngei a rinawm.—Lk. 24:33, 34.

7. Philippi 4:5-in a sawi angin, eng anga hriat hlawh nge kan duh?

⁷ Pathian Jehova leh Isua Krista lantîr a âwm tâwk hriatna chungchâng kan lo hre  tawh a. Keini hi eng nge ni ve? Jehova chuan a âwm tâwk hre tûrin min beisei a ni. “A âwm tâwk in hriatzia mi zawng zawng hriat ni rawh se, Lalpa chu a hnai e.” (Philippi 4:5, NWT) Bible lehlin pakhat chuan: “Rem hre tak nia hriat hlawh ni ang che u,” tiin he châng hi a letling a. Heti hian kan inzâwt thei a: ‘Mite’n a âwm tâwk hria, nunnêm leh dawhthei tak angin min hria em? Nge ni a, mi tawh khirh tak, vîn tak leh luhlul tak angin min hre zâwk? Ka duh anga thil ti tûrin mi dangte ka tilui ṭhîn em? Nge ni a, a rem phawt chuan mi dangte thusawi ngaithlain an duh angin thil ka ti ṭhîn zâwk?’tiin. A âwm tâwk kan hriatthiam poh leh Jehova leh Isua kan entawn lehzual tihna a ni. A âwm tâwk hriat a ngaihna dinhmun pahnih—kan dinhmun a inthlâk hun leh mi dangte thlîr dân leh thu tlûkna siamte kan ṭâwmpui theih loh hun—chungchâng i lo sawiho vang u.

8. Engin nge dinhmunte a inthlâk danglam hunah a âwm tâwk hre tûra min ṭanpui thei? (Footnote en bawk rawh.)

⁸ A âwm tâwk hriatnaah chuan dinhmun inthlâk danglam dân azira insiamrem theihna a tel a. Chutiang inthlâk danglamna chuan kan beisei loh harsatna tam tak min thlen thei a ni. Hrisêlna chungchângah rîkrûm thil kan tâwk thei a. A nih loh leh, kan chênna rama sum leh pai dinhmun inthlâk danglamna emaw, sawrkâr inthlâk danglamna emaw chuan nasa takin kan nun a tiharsa thei bawk. (Thur. 9:11; 1 Kor. 7:29-31) Theocratic chanvo inthlâk danglamna pawhin harsatna min thlen thei bawk a ni. Eng ang harsatna pawh tâwk mah ila, hêng rahbi palite hi kan zawh a nih chuan kan dinhmun thar milin kan insiamrem thei ang: (1) tûna i dinhmun chu pawm rawh, (2) hma lam hun thlîr rawh, (3) a êng zâwngin thil thlîr tlat rawh leh, (4) mi dangte thil tihsak rawh. b Chûng rahbite’n min ṭanpui thei tih târ langtu thiltawnte i lo ngaihtuahho vang u.

9. Missionary nupa tuak khatin beisei loh harsatnate chu engtin nge an hmachhawn?

⁹ Tûna i dinhmun chu pawm rawh. Emanuele-a leh Francesca-i te chu missionary nia rawngbâwl tûrin ram danga tirh an ni a. Ṭawng thar an han zira an kohhran thara an inbengbel hnu rei vak lovah, COVID-19 hripui avângin an inkhunghran a ngai a. A hnu lawkah, Francesca-i nu chu a boral thut a. Francesca-i chuan a chhûngte bula awm duh hle mah se, hripui lêng avâng chuan a haw thei ta lo va. Chûng dinhmun beidawnthlâk takte chu engtin nge a hmachhawn theih? A hmasa berin, Emanuele-a leh Francesca-i te chu a tûk atâna lungkham lo tûrin finna dîlin an ṭawngṭai a. Jehova chuan a inawpna pâwl hmangin an ṭawngṭaina chu a hun takah a chhânsak a ni. Entîr nân, video pakhata biangbiaknaa unaupa thusawi: “Dinhmun thar chu kan pawm ran poh leh kan hlimna kan nei lêt leh rang a, dinhmun thara hun remchâng kan neihte pawh ṭha takin kan hmang thei a ni,” tih chuan anni chu a tichak hle a. c A pahnihnaah, phone hmanga thu hrilhnaa an thiamna chu an tihmasâwn a, Bible zirpui pawh an ṭan thei hial a ni. A pathumnaah, tualchhûnga unaute fuihna duhawm tak leh ṭanpuinate chu lâwm takin an pawm bawk. Unaunu ngilnei tak pakhat chuan kum khat chhûng nî tin Bible châng telna lehkha tawi a thawn ziah a ni. Keini  pawh kan dinhmun tharte kan pawm a nih chuan, kan thil tihtheihte aṭangin lungawina kan hmu ang.

10. Engtin nge unaunu pakhat chu a nuna inthlâk danglamna lian tak mila a insiamrem?

¹⁰ Hma lam hun thlîr la, a êng zâwngin thil thlîr tlat rawh. Japan rama chêng Romanian unaunu Christina-i chu a awmna sâp kohhran ṭhiah a nih chuan a lungawi lo hle a. Mahse, hun kal tawhte chu a ngaihtuah reng lo. Chu aiin, Japanese ṭawng hmang tualchhûng kohhrana awma, chumi rawngbâwlna biala a ṭha thei ang bera inhman chu a tum tlat zâwk a ni. Japanese ṭawnga hma a sâwn theih nân tûn hmaa a hnathawhpui nu pakhat hnênah ṭanpuina a dîl a. Chu nu chuan Japanese ṭawng zirtîr nân Bible leh Chatuanin I hlim Thei! tih brochure hman chu a remti a. Christina-i chuan Japanese ṭawnga hma a sâwn mai bâkah, chu a zirtîrtunu chuan thutak a rawn ngaihven ṭan bawk a ni. Hma lam hun kan thlîr a, a êng zâwnga thil kan thlîr tlat chuan hriat lâwk loh inthlâk danglamnate chuan beisei loh malsâwmnate min thlen thei a ni.

11. Engtin nge nupa tuak khatin sum leh pai lama harsatna an hmachhawn?

¹¹ Mi dangte thil tihsak rawh. Kan rawngbâwlna khapbeh a nihna rama chêng nupa tuak khat chuan ram chhûng sum leh pai dinhmun a tlâkchhiat chuan an sum lâkluhna an chân a. Engtin nge an insiamrem? A hmasain, an nun tihsamkhai an tum a. A dawtah, an harsatna chauh ngaihtuah reng aiin mi dangte ṭanpui nâna thu hrilhnaa buai reng chu an tum ta a ni. (Tirh. 20:35) A pasal chuan heti hian a sawi: “Rawngbâwlnaa buai rengna chuan a thim zâwnga thil ngaihtuah lutuk lo tûr leh Pathian duh zâwng tihnaa hun hmang tam lehzual tûrin min ṭanpui a ni,” tiin. Kan dinhmunte a inthlâk danglam hunah, a bîk takin kan Kristian rawngbâwlna hmanga mi dangte ṭanpui a pawimawhzia kan hre reng tûr a ni.

12. Engtin nge tirhkoh Paula entawn tûr siam chuan rawngbâwlnaa inthlâk danglamnate mila insiamrem tûra min ṭanpui theih?

¹² Kan rawngbâwlnaah mi insiamrem thei tak kan nih a ngai a. Rinna, mizia, leh ṭobul hrang hranga mite hnênah thu kan hril a ni. Tirhkoh Paula chu mi insiamrem thei tak a nih avângin, a entawn tûr siam aṭangin kan inzir thei a. Isua’n ani chu “Jentailte tirhkoh” ni tûrin a ruat a ni. (Rom 11:13) Chu chanvo a hlennaah Paula chuan Juda mite, Grik mite, lehkha thiamte, lo neitute, sawrkâr thuneitute leh, lalte hnênah thu a hril a. A thu ngaithlatu mi chi hrang hrangte thinlung a thlen theihna tûrin ani chu “mi zawng zawng hnênah engkim” a lo ni ta a ni. (1 Kor. 9:19-23) A thu ngaithlatute hnam dân, ṭobul leh, an thurinte a zirin a thu hrilh dân a siamrem ṭhîn a. Keini pawh kan rawngbâwlnaah remhre tak kan nih a, kan thu ngaithlatute mamawh azira kan insiamrem a nih chuan kan hlawhtling lehzual ang.

13. Mi dangte thil thlîr dân kan zahsak chuan 1 Korinth 8:9-a târ lan eng thil hlauhawm nge kan pumpelh theih?

¹³ A âwm tâwk hriatna chuan mi dangte thil thlîr dân zahsak tûrin min ṭanpui thei bawk. Entîr nân, unaunu ṭhenkhat chuan makeup hman an duh laiin, mi dangte chuan an duh lo thei a. Kristian ṭhenkhatin a âwm tâwka zû an in laiin, mi dangte erawh chuan an in lo hul hual pawh a ni thei bawk a. Kristian tinte chuan hrisêlna ṭha neih an duh rualin inenkawlna an thlante erawh a inang lo thei bawk a ni. Kan duhthlanna siamte ṭha nia kan hriat avâng maia kohhrana mi dangte pawh chutianga ti ve tûra kan nawrlui a nih chuan, anni chu kan titlu theiin inlungrualna kan tichhe  thei a. Chutiang chu thlentîr kan duh lo ngei ang! (1 Korinth 8:9 chhiar rawh; 10:23, 24) Bible thu bulte nunpuinain inbûk tâwk tak ni tûr leh remna vawng tûra min ṭanpui dân târ langtu entîrna pahnih i lo ngaihtuahho vang u.

14. Silhfên leh inchei dân chungchângah eng Bible thu bulte nge kan inkaihhruaitîr ang?

¹⁴ Silhfên leh inchei dân. Jehova chuan inchei dân tûr chungchângah kaihhruaina khauh takte pêk aiin, thu bulte min pe zâwk a. Pathian rawngbâwltute kan nih angin a âwm tâwk tak, mawihnai tak leh ‘inchawih tâwk’ takin kan inchei tûr a ni. (1 Tim. 2:9, 10; 1 Pet. 3:3) Chuvângin, kan inchei dân hmanga ṭûl lo taka mi dangte ngaihvenna lâk chu kan duh lo. Bible thu bulte chuan upate chu silhfên leh sam put dân chungchângah ṭha an tih ang zâwnga dânte zam lo tûrin a ṭanpui thei bawk a. Entîr nân, kohhran pakhata upate chuan sam put dân lâr tak pakhat, sam tawi chunga fel fai lo taka dah ang chi pu ve kohhrana ṭhalai ṭhenkhat chu ṭanpui an duh a. Upate chuan dân zam chuang si lovin anni chu engtin nge an ṭanpui theih ang? Bial kantu chuan upate hnênah, “Stage-a thu i sawi laiin i thu ngaithlatute’n i thusawi aia i lan dân an ngaihven zâwk a nih chuan, i silhfên leh inchei dânah thil fel lo a awm tihna a ni,” tia chûng unaute hnêna sawi tûrin thurâwn a pe a. Chutianga mâwlmang taka chhûtpuina chuan dân zam ngai lova harsatna chingfel tûrin a ṭanpui a ni. d

15. Hrisêlna lama inenkawlna thlan chungchângah eng Bible dânte leh thu bulte’n nge min kaihruai? (Rom 14:5)

¹⁵ Hrisêlna lama inenkawlna. Kristian tinte chuan inenkawl dân tûr chungchângah duhthlanna an siam ṭheuh tûr a ni a. (Gal. 6:5) Bible-ah hian Kristiante tân inenkawlna an thlan hunah, thisen leh dawi laka inthiar  fihlîm tûra thupêk ang chi dân tlêm azâwng chauh a chuang a ni. (Tirh. 15:20; Gal. 5:19, 20) Inenkawlna chungchânga thil dangte erawh mi mal duhthlannaah a innghat thung. Mi ṭhenkhat chuan damdawi lama mi thiamte chauh râwn an duh laiin, mi dangte erawh chuan chutiang ni lo inenkawlna dang an thlang pawh a ni thei. Inenkawl dân eng emaw chungchângah ngaih dân eng ang khawpa nghet pawh nei mah ila, unaute’n hrisêlna lama inenkawlna chungchânga duhthlan theihna an neih chu kan zahsak tûr a ni. Chumi chungchângah chuan, hêng thilte hi rilruah kan vawng reng tûr a ni: (1) Pathian Ram chauhvin a tidam hlen thei ang. (Is. 33:24) (2) Kristian tinte chuan an tâna ṭha ber tûr chu an ‘hre chiang’ tûr a ni. (Rom 14:5 chhiar rawh.) (3) Mi dangte chu kan sawisêlin, an tlûkna tûr thil kan ti lo vang. (Rom 14:13) (4) Kristiante chuan hmangaihna an lantîr a, zalên taka duhthlan theihna an neih chu kohhran inlungrualna tihchhiat phah nân an hmang lo. (Rom 14:15, 19, 20) Chûng thilte chu rilrua kan vawn reng chuan, unaute nêna inlaichînna ṭha kan nei reng theiin kohhrana remna chu kan tipung thei dâwn a ni.

16. Kohhran upa pakhat chuan upa dangte a dâwr dânah engtin nge a âwm tâwk hriatna a lantîr theih? (Milem en bawk rawh.)

¹⁶ Upate chuan a âwm tâwk hriatna kawngah entawn tûr ṭha an siam tûr a ni. (1 Tim. 3:2, 3) Entîr nân, upa pakhat chuan kum lama a upat zâwk avâng maiin a ngaih dânte chu upa dangte’n an thlâwp reng a beisei tûr a ni lo. Ani chuan upa tu pawh chu thu tlûkna fing tak siam tûrin Jehova thlarauvin a chêttîr thei tih a hria a. Mi mal duh dân nei ṭheuh mah se, Bible thu bul a kalh loh phawt chuan a âwm tâwk hria upate chuan upa tam zâwkte thu tlûkna siam chu tih tak zetin an thlâwp a ni.

17. A âwm tâwk hria Kristiante chuan eng malsâwmnate nge an dawn?

¹⁷ Kristiante chuan a âwm tâwk an hriat avângin malsâwmna tam tak an dawng a. Unaute nêna inlaichînna ṭha kan neih avângin kohhranah remna a awm a. Jehova betu inlungrual takte zînga awm mizia leh hnam dân chi hrang hrangte chungah lâwmna kan nei a. A pawimawh berah chuan, a âwm tâwk hre tak kan Pathian Jehova chu kan entawn tih kan hriat avângin lungawina kan nei a ni.