1-2. Eng kawngin nge Kristian pakhat chu inchhâwngsâng ang a nih? (1 Korinth 15:58)

 KUM 1980 tlin dâwn hnaih lamah, Japan rama Tokyo khawpuiah chhâwng 60-a sâng in sâng tak sak a ni a. Chumi khuaah chuan lîr a nghîn zin êm avângin mite chuan chu in sâng sakin a dâwl zawh dâwn leh dâwn loh an ngaihtuah a. A dâwl theihna thurûk chu eng nge ni? Engineer-te chuan nghet tak si, lîrnghîngin a nghawng dân azira insiamrem zêl thei tûrin an duang a. Kristiante pawh chu in sâng ang chu kan ni. Eng kawngin nge?

² Kristian tu emaw chu nghet taka a din rualin inbûk tâwk takin a insiamrem zêl tûr a ni a. Pathian dânte leh a tehnate zawmna chungchângah tihchêt rual lohvin nghet taka a din a ngai a ni. (1 Korinth 15:58 chhiar rawh.) Ani chu “a tihnuam a,” a rinawm tlat a ni. Kawng lehlamah chuan, dinhmun a zirin, a tih theih emaw, a ṭûl emaw a nih hunah “remhriatna” a lantîr, a nih loh leh a insiamrem a ngai a. (Jak. 3:17, NWT) Chutianga inbûk tâwk taka thlîr thiam Kristian chu a khirh lutuk emaw, a nêm lutuk emaw lo vang. He thuziakah hian, tihchêt rual lohva kan awm theih dân sawiho a ni ang a. Ding nghet tlat tûra kan tumna tichhe tûra Setana min beih dân kawng chi ngate leh chumi kan do lêt theih dânte sawiho a ni bawk ang.

3. Tirhkohte 15:28, 29-ah Dân Petu Chungnungberin a pêk eng dânte nge kan hmuh?

³ Pathian Jehova chu Dân Petu Chungnungber a nih angin,  a dânte chu mite hnênah hriatthiam awlsam takin a hriattîr ṭhîn a. (Is. 33:22) Entîr nân, kum zabi khatnaa governing body chuan Kristiante an din ngheh theih dân kawng thum a târ lang a ni: (1) milem biakna hnâwl a, Jehova chauh biakna (2) thisen thianghlimna zahna, leh (3) nungchang lama Bible tehna sâng tak zawmna a ni. (Tirhkohte 15:28, 29 chhiar rawh.) Tûn laia Kristiante pawh hêng kawng chi thumah hian engtin nge an din ngheh tlat theih?

4. Engtin nge Jehova hnênah kan inpêk pumhlûm? (Thu Puan 4:10, 11)

⁴ Pathian Jehova chauh biain milem biakna kan hnâwl. Ani chuan Israel mite hnênah amah chauh be tûrin thu a pe a. (Deut. 5:6-10) Diabola’n a thlêm khân, Isua chuan Pathian Jehova chauh kan be tûr a ni tiin chiang takin a sawi a. (Mt. 4:8-10) Chuvângin, milem kan be lo a ni. Mihringte—sakhaw hruaitu te, politics lama thuneitu te leh, infiamna leh intihhlimna lama khawvêl mi larte—chu chibai bûkin Pathian tlukin kan cheibâwl lo. ‘Engkim siamtu’ Jehova lamah ṭangin amah chauh chu kan bia a ni.—Thu Puan 4:10, 11 chhiar rawh.

5. Engvângin nge nunna leh thisen thianghlimna chungchânga Jehova dân siam chu kan zawm ang?

⁵ Nunna leh thisen thianghlimna chungchânga Jehova dân siam chu kan zâwm tlat. Engvângin nge? Jehova hnên aṭanga nunna thilpêk hlu tak kan dawn chu thisen nêna ang khat chiaha a sawi vâng a ni. (Lev. 17:14) Ani chuan mihringte hnêna sa ei theihna a pêk hmasak ber khân, a thisen ei lo tûrin thu a pe a. (Gen. 9:4) Israel mite hnêna Mosia Dân a pêk khân chu thupêk chu a pe nawn leh a ni. (Lev. 17:10) Chu bâkah, kum zabi khatnaa governing body hmangin Kristian zawng zawngte chu “sa thisen ei kawngah te . . . inthiarfihlîm” tûrin thu a pe bawk. (Tirh. 21:25) Chuvângin, damdawi lama inenkawlna chungchânga thu tlûkna kan siam hunah pawh chu thupêk chu kan zâwm tlat tûr a ni. b

6. Nungchang lama Jehova tehna sâng tak zâwm tûrin eng angin nge hma kan lâk?

⁶ Nungchang lama Jehova tehna sang takte chu kan zâwm tlat. (Heb. 13:4) Tirhkoh Paula chuan entîr nei ṭawngkam hmangin kan taksa pêngte “tihlum” tûrin min fuih a—chu chu tisa lam châkna bawlhhlâwh tibo tûr chuan nasa taka beih a ngai a tihna a ni. Nungchang bawlhhlawhna lama min hruai thei thil eng pawh en leh tih chu kan hnâwl a. (Kol. 3:5; Job. 31:1) Thil dik lo eng emaw ti tûra thlêm kan nih hunah Pathian nêna kan inlaichînna tichhe thei thil ngaihtuah emaw, tih emaw chu kan hnâwl nghâl a ni.

7. Eng nge tih kan tum tlat ang a, engvângin nge?

⁷ Jehova chuan ‘rilru tak zeta a thu âwih’ tûrin min beisei a. (Rom 6:17-18) Kaihhruaina min pêkte chu kan tâna ṭha ber tûr a ni a, a dânte chu kan tihdanglam theih a ni lo. (Is. 48:17, 18; 1 Kor. 6:9, 10) Pathian Jehova tihlâwm kan tum tlat a, “kumkhuain, a tâwp thlengin, i thuruatte anga ti tûrin ka thinlung ka thlêktîr,” tia sawitu fakna hla phuahtu rilru put hmang ang neih chu kan tum tlat a ni. (Sâm 119:112) Mahse, Setana chuan chu kan tumna chu tihchhiat a tum ang. Eng kawngte nge a hman?

8. Engtin nge Setana’n din ngheh tlat kan tumna chu tihduhdahna hmanga tihchhiat a tum?

⁸ Tihduhdahna. Diabola chuan din ngheh tlat kan tumna tichhe tûrin tisa lam leh rilru lama beihna hmangin ṭan a la a. A thiltum ber chu Jehova nêna kan inlaichînna tichhe tûra  min “ei” hi a ni. (1 Pet. 5:8) Kum zabi khatnaa Kristiante chu din ngheh tlat an tum avângin vauna te, vuakna te leh tihhlumte an tâwk a. (Tirh. 5:27, 28, 40; 7:54-60) Tûn laiah pawh Setana chuan tihduhdahna chu a la hmang zawm zêl a ni. Chu chu Russia ram leh ram danga awm kan unaute râwng taka cheibâwl an nihna leh dodâltute laka mi mal taka beihna an tawhnate aṭangin chiang takin a lang a ni.

9. Vervêk taka nêksâwrna chungchânga fîmkhur a ngaihzia entîrna pe rawh.

⁹ Vervêk taka neksâwrna. Setana chuan tihduhdahna mai bâkah, vervêk taka “ngamthlêmnate” a hmang a. (Eph. 6:11) Damdawi ina inzaipui hmachhawn tûra mu unau Bob-a chungchâng hi lo ngaihtuah ta ila. Ani chuan doctor-te hnênah eng dinhmun pawh thleng se, thisen thun a duh loh thu a hrilh a. A zaitu tûr chuan a thu tlûkna siam chu zahthiam takin a pawmsak a ni. Mahse, a inzai hma zâna a chhûngte in lama an haw hnu chuan Bob-a chu hnim hlum hmang thiam (anesthesiologist) doctor-in a rawn tlawh a. Bob-a hnênah thisen thun a ngaih rinawm lo mah se, a lo mamawh tâk thuta hman atân thisen hman tûr a awm thu a hrilh a. Doctor chuan Bob-a chu a bula a chhûngte an awm loh chuan a rilru a thlâk tûrah a ngai pawh a ni mai thei. Mahse, Unau Bob-a chuan eng thil pawh thleng se, thisen a thun loh tûr thu hrilhin a thu tlûkna siamah a ding nghet tlat a ni.

10. Engvângin nge mihringte ngaihtuahna chu hlauhawm tak a nih? (1 Korinth 3:19, 20)

¹⁰ Mihringte ngaihtuahna. Mihring ngaihtuah dâna thil kan thlîr a nih chuan Jehova leh a tehnate chu kan hnâwl thei a. (1 Korinth 3:19, 20 chhiar rawh.) “He khawvêl finna” hian mite chu Pathian thu zâwm lo tûrin a thunun ṭhîn a ni. Pergamos khua leh Thuatira khuaa Kristian ṭhenkhat chu milem biakna leh nungchang bawlhhlawhna kawngah an chheh vêla mite thununin an awm a. Isua chuan chu kohhran pahnih chu nungchang bawlhhlawhna an pawisak loh avângin zilhna khauh tak a pe a ni. (Thup. 2:14, 20) Tûn laiah pawh, kan chheh vêla mite chuan an ngaih dân dik lote pawm tûrin min thunun an tum thei a. Kan chhûngte leh kan hmêlhriatte chuan kan khirh lutuk tia sawiin, Jehova dânte zâwm lo tûrin min hmin an tum thei a ni. Entîr nân, thianghlim taka nun chu a pawimawh lova, nungchang lama Bible tehnate chu hmân lai tawh lutuk angin an sawi mai thei bawk.

11. Kan din ngheh tlat rualin, eng nge kan pumpelh ang?

¹¹ Jehova kaihhruaina min pêkte chu chiang tâwk lo anga hriat châng kan nei thei a. ‘Thu ziakte khûm tûra’ thlêm kan ni thei bawk. (1 Kor. 4:6) Isua hun laia sakhaw hruaitute chuan chu thil sual chu an ti a. Anni chuan mihring siam dânte belhchhahin, mi nâwlpuite chu phurrit tak an phurhtîr a. (Mt. 23:4) Jehova chuan a Thu Bible leh a inawpna pâwl kaltlangin kaihhruaina chiang tak min pe a ni. Kaihhruaina min pêkte chu belhchhah chhan tûr kan nei lo. (Thuf. 3:5-7) Chuvângin, Bible-a thu ziakte chu kan khûm lo va, Bible-in a phût loh, mi mal thil chungchângah unaute tân dânte kan siam bawk hek lo.

12. Engtin nge Setana chuan ‘bumna mai mai’ chu a hman?

¹² Bumna. Setana chuan mite chu kawng dik lo zawh tûr leh inṭhen hrang tûrin ‘bumna mai mai’ leh “khawvêl A Aw B” te chu a hmang a. (Kol. 2:8) Kum zabi khatnaa chûng zîrtîrnaahte chuan Bible zirtîrna ni lo, mihring ngaih dânte, Judate zirtîrnate leh Kristiante chuan Mosia Dân an zâwm tûr a ni tih zirtirnate a tel a ni. Chûng zirtîrnate chuan finna dik tak lo chhuahna Hnâr Jehova lak ata mite rilru a lâk pên avângin, chu chu inbumna a ni. Tûn laiah pawh, Setana chuan politics  hruaitute chanchin phuahchhawp leh thu belh chian dâwl lo theh darh nân media-te leh social network-te chu a hmang a. Chutiang chanchin dik lo chu COVID-19 hripui a lên chhûng khân tam tak kan hmu a ni. c Kan inawpna pâwl aṭanga kaihhruaina zâwmtu Jehova Thuhretute chu chanchin dik lo ngaithlatute angin an mangang lutuk lo a ni.—Mt. 24:45.

13. Engvângin nge rilru kal pêntîr lo tûra kan fîmkhur ang?

¹³ Rilru kal pêntîrtu thilte. “Thil pawimawh zâwkte” chu kan ngaihven tlat tûr a ni a. (Phil. 1:9, 10, NWT) Rilru kal pêntîrna chuan kan hun tam tak a lain, min tichau thei a. Nuna kan thiltih pângngaite—ei leh in te, chawlh hahdamna te, leh ei zawnna hnathawhte—chu nuna kan dah pawimawh ber a nih chuan, chu chuan kan rilru a kal pêntîr thei a ni. (Lk. 21:34, 35) Chu bâkah, nî tin hian khawtlâng inlungrual lohna leh politics thila inhnialna chanchin hriat tûr a tam hle a. Chûng thilte’n kan rilru la pêng lo tûrin theih tâwp kan chhuah tûr a ni. Chutiang a nih loh chuan kan rilru leh thinlungah ṭan lam kan nei ṭan thei a. Satana chuan thil dik ti tûra kan tumna chu min tihchhiatsak tumin kan târ lan tâk thil chi ngate chu a hmang a ni. Chu a thil tum chu do lêt a, kan din ngheh tlat theih dân i lo ngaihtuah ang u.

14. Engin nge Jehova lama ding nghet tlat tûra min ṭanpui thei?

¹⁴ Inpumpêka, baptisma i channa ngaihtuah lêt rawh. Jehova lama ṭan i duh avângin baptisma changin i inpumpêk a. Thutak i hmu tih rinna nei tûra ṭanpuitu che kha ngaihtuah lêt ang che. Pathian Jehova chungchâng hriatna dik i rawn nei a, i Pa vâna mi a nih anga zahna thûk tak neiin, i hmangaih lehzual a. Rinna i nei chho va, chu chuan inchhîrna nei tûrin a chêttîr che a. I thil chîn dân ṭha lote bânsan tûr leh Pathian duh zâwng mila nung tûrin a chêttîr che a ni. Pathianin ngaidam che nia i inhriat avângin i hahdam huai bawk. (Sâm 32:1, 2) Inkhâwmah i tel a, i thu hriat ṭha tak  takte chu mi dangte i hrilh ṭan bawk. Tûnah chuan, Kristian inpumpêka baptisma chang tawh i nih angin, nunna kawngah i kal a, chu kawng chu theih tâwp chhuaha zawh i tum tlat a ni.—Mt. 7:13, 14.

15. Engvângin nge zirna leh chhût ngunna chu kan hlâwkpui?

¹⁵ Pathian Thu zirin chhût ngun rawh. Thingkûng chu thûk taka zung a kaih a, nghet taka a ding thei angin, Pathian Thua kan rinna a ngheh chuan nghet takin kan ding reng thei a ni. Thingkûng chu a ṭhan len rualin zung a kai thûk telh telh a, a inpharh zau telh telh bawk a ni. Keini pawh Pathian Thu zira kan chhût ngun chuan kan rinna a chak lehzualin, Pathian kawngte chu a ṭha ber tih kan ring nghet tlat ang. (Kol. 2:6, 7) Jehova zirtîrna, kaihhruaina, leh vênhimnain tûn hmaa a chhiahhlawhte a ṭanpui dân chu ngaihtuah lêt ang che. Entîr nân, Ezekiela chuan inlârnaah vântirhkoh pakhatin uluk taka biak in a teh lai chu ngun takin a en a. Chu inlârna chuan Ezekiela chu a tichak lehzual a; chu bâkah, biakna thianglim atân Jehova tehnate zawm kan tum tlat theih dân chungchângah zir tûr ṭangkai tak min pe bawk a ni. d (Ezek. 40:1-4; 43:10-12) Chuvângin, keini pawhin hun pea Pathian Thu rilte zira, chhût ngunna chu kan hlâwkpui thei a ni.

16. Engtin nge Unau Bob-a chu thinlung nghet tak a putnain a vênhim? (Sâm 112:7)

¹⁶ Thinlung nghet tak pu rawh. Lal Davida chuan: “Ka thinlung hi a nghet a ni, aw Pathian,” tia a sak khân, Jehova a hmangaihna chu a nghet tlat tih a chiang hle a. (Sâm 57:7) Keini pawh Jehova chu thinlung nghet tak puin, kan rinchhan pumhlûm thei a ni. (Sâm 112:7 chhiar rawh.) Chu chuan kan târ lan tâk Unau Bob-a a ṭanpui dân hi han ngaihtuah teh. A mamawh palh hlauhva hman atân thisen thun tûr a awm thu an hrilh khân, ani chuan a chhan eng vâng pawha thisen an pe dâwn a nih chuan damdawi in a chhuahsan nghâl tûr thu a hrilh a. A hnuah, Bob-a chuan “Hrehna emaw, huphurhna emaw reng reng ka nei lo,” tiin a sawi a ni.

17. Unau Bob-a thiltawn aṭangin eng nge kan zir theih? (Milem en bawk rawh.)

 ¹⁷ Unau Bob-a chu damdawi in a luh hma daih aṭanga thu tlûkna nghet tak a siam avângin a ding nghet a. Pakhatnaah, ani chuan Jehova tihlâwm a duh a ni. Pahnihnaah, nunna leh thisen thianghlimna chungchâng sawina Bible leh Bible ṭanchhan thu leh hla chhuahte chu ngun takin a zir a ni. Pathumnaah, Jehova kaihhruaina zawmna chuan hlâwkna tluantling a thlen ṭhîn tih a ring tlat bawk. Keini pawh harsatna eng pawh tâwk mah ila, thinlung nghet tak kan pu ve thei a ni.

18. Engtin nge Baraka thiltawn chuan Jehova rinchhan tlat tûra min zirtîr? (A kâwma milem en rawh.)

¹⁸ Jehova rinchhan rawh. Jehova kaihhruaina a rinchhan tlat avânga Barak-a hlawhtlin dân hi han ngaihtuah teh. Isreal mite chuan âwmphawte, feite nei lo mah se, Jehova chuan Baraka hnênah râlthuam ṭha tak nei Kanaan sipai hotu Sisera leh a sipai rual chak tak chu do tûrin kaihhruaina a pe a. (Ro. 5:8) Zâwlneinu Debori chuan Baraka hnênah tlâng hnuai lama kala, Sisera leh a tawilailîr 900 te chu va hmu tûrin a hrilh a. Chûng tawlailîrte chu mual zâwlah an tlân chakin an dinhmun a ṭha zâwk dâwn tih a hre chung pawhin Baraka chuan a thusawi chu a zâwm a ni. Baraka sipai rualte chu Tabor tlâng aṭanga an chhuk chuan, Jehova’n vân aṭangin ruahpui vân âwn a sûrtîr a. Sisera tawilailîrte chu chirhah an tâng a, Jehova chuan Baraka chu hnehna a pe ta a ni. (Ro. 4:1-7, 10, 13-16) Chutiang bawkin, Jehova leh a inawpna pâwl hmanga min pêk kaihruainate kan rinchhan tlat chuan hnehna kan chang ve thei ang.—Deut. 31:6.

19. Engvângin nge din ngheh tlat i duh?

¹⁹ He khawvêla kan awm chhûng hian ding nghet tlat tûra kan beih zawm zêl a ngai a. (1 Tim. 6:11, 12; 2 Pet. 3:17) Tihduhdahna te, vervêk taka nêksâwrna te, mihring ngaihtuahna te, bumna te, leh rilru kal pêntîrtu thilte avângin lemlam lehlama hruai kawia awm loh i tum tlat ang u. (Eph. 4:14) Chu aiin, Jehova hnêna kan inpumpêknaah leh a thupêkte kan zawmnaah tihchêt rual lohvin i ding nghet tlat ang u. Chutih rualin, a âwm tâwk kan hriatthiam a ngai a. A dawta thuziakah chuan Jehova leh Isua chu a âwm tâwk hriatna kawnga entawn tûr ṭha famkim an nih dân kan sawiho vang.