1. Hlimna tûr chhan ṭha tak eng nge kan neih?

PATHIAN chhiahhlawhte’n an êng an ên chhuahtîr dân hriat chu a va phûrawm tak êm! Kum kalta khân, Jehova mite chuan Bible zirpui 10,000,000 aia tam an nei a ni. Ngaihventu thar mi maktaduai tam takte chu Hriatrengna inkhâwma lo tellin, Jehova hmangaihna thilpêk tlanna chungchâng an zir a ni.—1 Johana 4:9.

2, 3. (a) Engin nge “tiêngtu” kan nihna chu dâl lo? (b) He thuziakah hian eng nge kan sawiho vang?

² Khawvêl puma Jehova Thuhretute chuan ṭawng chi hrang hrang kan hmang a. Mahse, chu chuan chhûngkaw lungrual tak nia Jehova kan chawimawina chu a dâl lo. (Thu Puan 7:9) Kan ṭawng hman leh kan awmna hmun chu engpawh ni se, “khawvêlah hian tiêngtu angin,” kan êng chhuak thei a ni.—Philippi 2:15.

³ Kan rawngbâwlna, kan Kristian inpumkhatna, leh hmanhmawhna rilru put hmang kan neihte chuan Jehova a  chawimawi a. Hêng thil pathumah hian engtin nge kan êng chu kan ên chhuahtîr theih?—Matthaia 5:14-16 chhiar rawh.

4, 5. (a) Thu kan hrilh bâkah, engtin nge kan êng chu kan ên chhuahtîr theih? (b) Ngilneihna chuan eng rah ṭhate nge a chhuah? (A thupui chunga milem en rawh.)

⁴ Thu hrilhna leh zirtîr siamna hna chu kan êng, ên chhuahtîr theih dân kawng pawimawh tak a ni a. (Matthaia 28:19, 20) Kum 1925-a, “Thim Zîngah Eng Chhuak Rawh” tih thuziak chuan hun hnuhnûng chhûngin “a êng ên chhuahtîr theihna hun remchâng” hmang ṭangkai lotu chu Lalpa lakah a rinawm thei lo tiin a sawi a. Heti hian a sawi belh a ni: “Khawvêla mite hnênah chanchin ṭha a hril tûr a ni a, amah ngeiin chu êng kawng chu a zawh bawk tûr a ni,” tiin. (Vênnainsâng, June 1, 1925) Kan thu hrilhna bâkah, kan nungchang hian Jehova a chawimawi a. Mi tam takin thu kan hrilhna avângin min hria a. Nui hmêl pu a, chibai kan bûkna hian keimahni leh kan biak Pathian chungchâng a ngaihtuahtîr a ni.

⁵ Isua’n a zirtîrte hnênah: “Inah chuan in luh dâwnin chibai bûk ang che u,” tiin a hrilh a. (Matthaia 10:12) Isua thu hrilhna biala mite chuan an hmêl hriat lohte chu an ina lêng lût tûrin an sâwm ṭhîn a ni. Mahse, tûn laia hmun tam takah chuan, chutiang chu a ni tawh lo. Mite chuan an kawngkâa hmêl hriat loh tuemaw an hmuh hian an hlauthawngin, an thinrim fo va. Mahse, nêlawm tak leh ngilnei tak kan nihna chuan mite chu thlamuang takin a awmtîr thei ang. Thu leh hla pho chhuahna nawrlirh hmanga vântlâng hmuna thu kan hrilh hunah, nui hmêl pu a, nêlawm taka mite kan biak hian, tlângnêl taka rawn pan chein thu leh hla chhuahte an rawn la tlângpui a ni lâwm ni? Titi ṭanna neih pawh an duh mai thei a ni!

6. Kum upa tak nupa chu rawngbâwlnaa tel reng tûrin engin nge ṭanpui?

⁶ England rama kum upa tak nupa tuak khat chu an hrisêl vak tawh loh avângin tûn hma angin in tinah an kal thei tawh lo va. Chuvângin, an in hmaah dawhkân hûngin thu leh hla chhuahte an pho chhuak a. School kianga awm an nih avângin, an fate rawn hmuaktu nu leh pate duh zâwng thu leh hlate an dah chhuak a ni. Nu leh pa ṭhenkhat chuan Questions Young People Ask—Answers That Work, Volumes 1 leh 2 pawh tiamin, thu leh hla chhuahte chu an la a. Pioneer unaunu pakhatin a thawhpui ṭhîn a. Chûng nu leh pate chuan unaunu nêlawmzia leh kum upa nupate’n mite ṭanpui an duhzia an hria a. Nupa tuak khat phei chuan Bible an zir hial a ni.

7. Engtin nge i awmna hmuna râl tlânte chu i ṭanpui theih?

⁷ Tûn hnai mai khân, mi tam tak chu an ram chhuahsanin ram dangah râl tlânin an awm a. In biala awm râl tlânte chu Jehova chanchin hre tûrin engtin nge i ṭanpui  theih? A hmasain, an ṭawnga inchibai dân i zir thei a. Chu bâkah, JW Language app hmangin, an rawn biak duh nân che, an ṭawng tlêm azâwng pawh i zir thei a ni. Tichuan, an ṭawnga hmuh theih jw.org-a video-te leh thu leh hla chhuahte pawh i entîr thei bawk.—Deuteronomy 10:19.

8, 9. (a) Engtin nge chawlhkâr chhûng inkhâwmna chuan min ṭanpui? (b) Nu leh pate chuan inkhâwma an fate chhânna pêk chu tihmasâwn tûrin engtin nge an ṭanpui theih?

⁸ Jehova chuan nghawng ṭha taka neia thu kan hrilh theih nân kan mamawh dik tak chu min pe a. Entîr nân, Nun leh Rawngbâwlna Inkhâwma kan thu zirte chuan tlawhkîr leh Bible zirpui nei tûrin inrintâwkna min pe a ni.

⁹ Kan inkhâwmnaa mikhualte an lo tel hian naupangte pêk chhânna chuan an rilru a khawih ṭhîn a. I fate chu mahni irâwm chhuaka chhânna pe tûrin i zirtir thei a ni. Mi ṭhenkhat chu naupangte’n an rinna târ lang a, chhânna tluang tak leh dik tak an pêk an hriat hian thutaka hîpin an awm a ni.—1 Korinth 14:25.

10. Chhûngkuaa Pathian biakna chuan chhûngkua inpumkhat lehzual tûrin engtin nge min ṭanpui theih?

¹⁰ Inpumkhatna leh remna nei tûra chhûngkuaa kan ṭanho hian Jehova chu chawimawi a ni a. Entîr nân, nu leh pate in nih chuan, Chhûngkuaa Pathian Biakna nei ṭhîn tûrin ruahman ang che u. Chhûngkaw tam tak chuan JW Broadcasting an enho va, chu mi hnuah, an thil zîrte an hman thei  dân an sawiho leh a ni. Naupangte mamawh kaihhruaina leh tleirâwlte mamawh kaihhruaina chu a inang lo tih hria ang che. I chhûngkuaa mi tinte chuan chhûngkuaa Pathian biakna chu an hlâwkpui tak zet theih nân i tih theih apiang chu ti rawh.—Sâm 148:12, 13.

11-13. Kohhran inpumkhat lehzual tûrin engtin nge kan ṭanpui theih?

¹¹ Tleirâwl pawh ni la, kohhrana mi tin hi mamawh nia inhriatna nei tûrin i ṭanpui thei a ni. Tih theih dân kawng khat chu kum upa deuh unaute ṭhiana siam hi a ni. Kum tam tak chhûng Jehova rawngbâwl zêl tûra anmahni ṭanpuitu thilte chu zâwt rawh. Zir tûr hlu tak takte an hrilh thei che a ni. Chu chuan a tichak ang che! Naupang emaw, upa emaw pawh ni ila, kan za hian, Kingdom Hall-a lo kalte chu lawm hlawh nia inhre tûrin kan ṭanpui thei a ni. Chibai te, nui hmêl hmuh te, ṭhutna tûr zawnsak te, leh mi dangte nên i inhmêlhriattîr thei a ni. Tlângnêl taka awm tûrin ṭanpui rawh.

¹² Thlawhhma rawngbâwlna atâna inhmuhkhâwmna kaihruai tûra chanvo i neih chuan kum upate chu an êng, ên chhuahtîr zêl tûrin i ṭanpui thei a ni. An kal theihna tûr thu hrilhna bial pe la. Thawhpuitu tûr atân ṭhalaite ruahmansak ang che. Kum upate leh hrisêl vak lo unaute chu tûn hma anga thu an hrilh theih tawh loh avângin an lunghnual ṭhîn a. I ngaihsakin, an dinhmun i hriatthiampui tih an hriat chuan nuam an ti ngei ang. An upa tawhin, thutaka an awmna chu eng anga rei pawh ni se, i ngilneihna chuan phûr taka thu hril zawm zêl tûrin a tichak thei a ni.—Leviticus 19:32.

¹³ Israel mite chuan a huhova Jehova biak chu nuam an ti a. Fakna hla phuahtu chuan: “Unaute inngeih dial diala awm khâwm hi a va ṭhain, a va nuam êm!” tiin a ziak a ni. (Sâm 133:1, 2 chhiar rawh.) Chu inpumkhatna chu vun ti mâm thei rimtui tak hriak nên a khaikhin a. Chutiang bawkin, mi hawihhawm tak leh ngilnei tak niin kan unaute chu kan tihahdam thei a ni. Chu chuan kohhran chu inpumkhatna a neihtîr lehzual ang. In kohhrana unaute chu i hre chiang lehzual thei ang em?—2 Korinth 6:11-13.

14. Engtin nge i awmna bialah i êng chu i ên chhuahtîr theih?

¹⁴ Khawi hmunah pawh awm mah la, i êng chu i ên chhuahtîr thei a. I ngilneihna chuan i vêngte chu Jehova chungchâng zir belh duhna a neihtîr thei a ni. Heti hian inzâwt rawh: ‘Ka vêngte hian engtin nge min thlîr? Ka in chu a fel fai em? Chu chuan chhehvêl a tinuam em? Vêngte tâna mi ṭangkai ka ni em?’ tiin. Unaute chu an ngilneihna leh an entawn tûr ṭha siamin an chhûngkhat te, an vêng te, an hnathawhpui te, leh an school kalpuite chunga nghawng a neih dân zâwt ang che.—Ephesi 5:9.

15. Engvângin nge kan ngaihven reng a ngaih?

¹⁵ Kan êng chu ên chhuahtîr reng kan duh chuan tûn lai hun hi kan hriat a  ngai a. Isua’n a zirtîrte hnênah: “ngaihven rawh u,” tiin vawi tam tak a hrilh a ni. (Matthaia 24:42; 25:13; 26:41) “Hrehawm nasa tak” chu a la thleng lawk lo ang tia kan ngaih chuan, mi dangte hnêna Jehova chungchâng zirtîr theihna hun remchâng kan neih chu kan ngaihthah ang. (Matthaia 24:21) En chhuah a hnêkin, kan êng chu zawi zawia dîmin a tâwpah a mit thei a ni.

16, 17. Hmanhmawhna rilru put hmang nei reng tûrin eng nge i tih theih?

¹⁶ Tûnah hian, tûn hma zawng aia kan ngaihven lehzual a ngai a. Khawvêl dinhmunte chuan chhiat lam a pan zêl a. Mahse, tâwpna chu Jehova hun ruat dik takah a lo thleng ang tih kan hria a ni. (Matthaia 24:42-44) Chutih chhûng chu, dawhthei takin hma lam kan thlîr tlat tûr a ni. Ni tin Bible chhiar la, Jehova hnênah bâng lovin ṭawngṭai rawh. (1 Petera 4:7) Kum tam tak chhûng Jehova rawngbâwl tawh unaute hnên aṭangin inzir rawh. Kan Kristian unaute chanchin chu kan thu leh hla chhuahahte kan hmu thei bawk.

¹⁷ Jehova rawngbâwlnaah buai reng rawh. Mi dangte tân thil ṭha ti la, unaute  nên hun hmang ang che. Tichuan, i hlim ang a, hunte chu a liam chak hle niin i hria ang. (Ephesi 5:16) Jehova chhiahhlawhte chuan kalta kum za chhûng khân thil tam tak an hlen chhuak a. Mahse, tûn lai hian, tûn hma zawng aiin kan buai zâwk a ni. Jehova hnate chu kan ngaihtuah phâk bâkin a ṭhang chho va. Kan êng chu a va êng chhuak nasa êm!

18, 19. Engtin nge upate chuan phûr taka Jehova rawngbâwl tûra min ṭanpui theih? Entîrna pe rawh.

¹⁸ Thil tam tak kan tisual chung pawhin, Jehova chuan a rawngbâwl min phalsak a. Min ṭanpuitu atân ‘mihringte hnêna thilpêk’ kohhran upate chu min pe a ni. (Ephesi 4:8, 11, 12 chhiar rawh.) Chuvângin, upate’n an rawn tlawh che chuan, an finna leh thurâwnte aṭanga hlâwkna hmu tûrin chu hun chu hmang ṭangkai ang che.

¹⁹ Entîr nân, England rama nupa tuak khat chuan an nupa inkârah harsatna ṭhenkhat an nei a, upa pahnihte hnênah ṭanpuina an dîl a ni. A nupui chuan a pasalin Jehova rawngbâwlnaah hma a hruai lo niin a hria a. A pasal lahin zirtîrtu ṭha nia a inngaih loh avângin chhûngkaw Pathian biakna a neihpui ziah loh thu tlang takin a sawi a. Upate chuan Isua entawn tûr siam chu ngaihtuah tûrin an ṭanpui a. Isua’n a zirtîrte a ngaihsak dân entawn tûrin a pasal chu an fuih a ni. A nupui chu a pasal laka dawhtheihna nei tûrin an fuih bawk. An fate pahnih nêna chhûngkuaa Pathian biakna neih theih dân chungchângah thurâwn ṭhenkhat an pe bawk a. (Ephesi 5:21-29) A pasal chuan chhûngkaw lu ṭha lehzual ni tûrin theih tâwp a chhuah a. Upate chuan beidawng lo tûr leh Jehova thlarau thianghlim rinchhan tlat tûrin an fuih a ni. Upate lantîr hmangaihna leh ngilneihna chuan chu chhûngkua chu a va ṭanpui tak êm!

20. I êng, ên chhuahtîrna chuan eng nge a rah chhuah ang?

²⁰ “LALPA ṭih apiang chu an eng a thâwl e, a kawng zawhtute chu.” (Sâm 128:1) I êng i ên chhuahtir chuan i hlim ang. Chuvângin, mi dangte chu Pathian chungchâng zirtîr la, i chhungkuaah leh kohhranah inpumkhatna awmtîr tûr leh ngaihvenna nei reng tûrin i tih theih apiang ti ang che. Mi dangte chuan i entawn tûr ṭha siam chu an hmu ang a, kan Pa Jehova chawimawi chu an duh ngei ang.—Matthaia 5:16.