Rehoboama pa Solomona chu kum 40 chhûng Israel lal a ni a. (1 Lalte 11:42) A pa thih hnu chuan, ani chu lal ni tûrin Jerusalem aṭangin Sekem khuaah a zin a. (2 Chronicles 10:1) Lal a ni tûr chu a huphurh em? Solomona chu a finna nasa tak avângin mite hriat hlawh tak a ni. Rei vâk lovah, Rehoboama chuan buaina khîrh tak chîngfel khawpa finna a neih leh neih loh a lantîr a ngai dâwn a ni.

Israel mite chuan awpbeh nia an inngaih avângin Rehoboama hnênah palaite tîrin heti hian an hrilh a: “I pa khân kan nghâwngkawl a tirit êm ṭhîn a; chuvângin i pain min chhawr rimna leh a nghâwngkawl rit tak kan chunga a nghah hi min tihzânsak la, tichuan i rawng kan bâwl ang,” tiin.—2 Chronicles 10:3, 4.

Rehoboama chuan duh thlânna khîrh tak a siam a ngai a. Mite duh zâwng a tihsak chuan amah leh a chhûngte leh lal ina awmte chu tûn hma angin nuamsa takin an awm thei tawh lo pawh a ni thei. Mahse, mite thil phût a hnâwl chuan a lakah an hel thei bawk a ni. Eng nge a tih tâk ang? A pa lo ṭanpui ṭhîntu upaho chu a râwn phawt a. Anni chuan mite thu zâwm tûrin an hrilh a. Mahse, a hnuah, Rehoboama chuan a rualpuite chu a râwn a, mite chu râwng takin a cheibâwl a ni. An hnênah: “Ka pan in nghâwngkawl a lo tirit a, keiin chu chu ka belhchhah zâwk dâwn a ni; ka pan vuaknain a lo hrîng ṭhîn che u a, kei erawh chuan khawmualkaikuangin ka hrîng dâwn che u a ni,” tiin a hrilh a ni.—2 Chronicles 10:6-14.

Kan tana zir tûr i hmu em? Tûn laiah, kum tam tak chhûng Jehova rawng lo bâwl a, thu tlûkna ṭha siam tûra min ṭanpui thei kum upa tam tak kan nei a ni. An thu ngaithlain i fing ang u.—Joba 12:12.

Rehoboama chuan hel pâwl bei tûrin a sipaite chu a hruai khâwm a. Mahse, Jehova chuan zâwlnei Semaia tîrin an hnênah: “Han kal suh u, Israela thlah, in unauteho chu han do hek suh u: mahni  in lamah haw leh vek tawh u; hei hi keima tih a ni e,” tiin a hrilh a ni.—1 Lalte 12:21-24. *—Footnote en rawh.

Rehoboama tân Jehova thuâwih chu a awlsam em? Mite chuan an lal thar chu engtin nge an ngaih ang? Anni chu ‘khawmualkaikuanga’ hrem tûrin a lo hrilh tawh a; mahse, tûnah chuan, chûng hel pâwl râwng takte chungah engmah a ti lo! (2 Chronicles 13:7 khaikhin rawh.) Mite’n engtiang pawhin ngai mah se, lal leh a sipaite chuan “LALPA thu chu an âwih a, LALPA thu ang chuan an kîr a, an haw leh ta vek a.”

Kan tân zir tûr eng nge awm? Pathian thu kan âwih avânga mite’n min sawisêl a nih pawhin chutianga thuâwih chu englai pawhin a finthlâk a ni. A thu kan âwih chuan Pathianin mal min sâwm zawm zêl ang.—Deuteronomy 28:2.

Rehoboama chu a thuâwihna avângin malsâwm a ni em? Ani chu Juda leh Benjamin hnamte lal a la ni reng a, chûng bialahte chuan khawpui tharte din a tum a ni. Chu bâkah, khawpui ṭhenkhatte chu “khaw nghet takah a siam hlawm a.” (2 Chronicles 11:5-12) Chu aia pawimawh zâwk chu Jehova dânte a lo zâwm tawh ṭhîn hi a ni. Hnam sâwm lalramin milem an biak ṭan avângin, chuta mi tam takte chu Rehoboama leh biakna dik thlâwp tûrin Jerusalemah an kal a. (2 Chronicles 11:16, 17) Rehoboama’n Jehova thu a âwih avângin, a lalram pawh tihnghehin a awm a ni.

Rehoboama lalram chu a rawn chak tâkah chuan, ani chuan thil danglam tak a ti ta a. Jehova dân zâwm tawh lovin, pathian dik lote a be ṭan a ni! Engvânga chutianga ti nge a nih? Amon mi a nu chuan a thu tlûkna siamah an thunun em? (1 Lalte 14:21) Kan hre lo; mahse, mite chuan a entawn tûr ṭha lo siam chu an zui a. Chuvângin, Jehova chuan Aigupta Lal Sisaka chu Juda khawpui tam tak hneh a phal ta a ni. Rehoboama’n chûng khawpuite chu a tinghet hle chung pawhin tihchhiatin a awm tho!—1 Lalte 14:22-24; 2 Chronicles 12:1-4.

Sisaka leh a sipaite’n Rehoboama lalna hmun Jerusalem an rawn beih tâkah chuan dinhmun chu a chhe ta hle a. Tûn ṭumah chuan, zâwlnei Semaia’n Rehoboama leh a miliante hnênah Pathian hnêna lo kal he thuchah hi a hrilh a ni: “Mi hawisan ta a, chuvângin kei pawhin Sisaka kutah ka dah ta che u a ni,” tih hi. Chu zilhna chu Rehoboama’n engtin nge a chhân lêt? Ṭha takin a chhâng lêt! Bible chuan: “Israel-ho puipate leh lal chu an intihnuai a, ‘LALPA chu a fel a ni,’ an ti a” tiin a sawi. Chuvângin, Jehova chuan Rehoboama chu a chhanhim a, Jerusalem chu tihchhiatin a awm ta lo a ni.—2 Chronicles 12:4-7, 12.

Chu mi hnuah, Rehoboama chu Juda ram lal a la ni zawm zêl a. A thih hmain, a fapate chu thil tam tak a pe a. A hnua lal tûr an unaupa Abijaa lakah hel lo tûra a duh vânga chutianga pe pawh a ni mai thei. (2 Chronicles 11:21-23) Chutiang kawng chuan, Rehoboama chuan a tleirâwl laia a thiltih aia fing zâwkin thil a ti ta a ni.

Rehoboama chuan thil ṭha ṭhenkhat a ti chung pawhin, Bible chuan a rorêlna chungchângah: “Thil ṭha lo a ti a,” tiin a sawi. Engvângin nge? “LALPA zawn nân a rilru a hman loh avângin.” Chuvângin, Jehova chuan ani chu a lâwm lo a ni.—2 Chronicles 12:14.

Rehoboama nun kawng aṭangin eng nge kan zir theih? Ani chuan Pathian thu âwih châng a nei a. Jehova mite tân thil ṭha engemaw pawh a ti a ni. Mahse, Jehova nên inlaichînna ṭha a nei lova, amah tihlâwm duh tak zetna a nei lo bawk. Chuvângin, thil ṭha tih a bânsan a, pathian dik lote a be ṭan a ni. Heti hian i ngaihtuah mai thei: ‘Rehoboama’n Jehova zilhna a pawm a, a thil sual tihte chu pawi a tih hle bâkah, Pathian tihlâwm a duh tak zet vâng a ni lawm ni? Nge ni a, mi dangin a tih tûrte an hrilh vâng mai zâwk?’ tiin. (2 Chronicles 11:3, 4; 12:6) A nun tâwp lamah, thil ṭha lo a ti leh a. A pu Lal Davida nên an va inang lo tak êm! Davida’n thil sual a ti tih chu a dik ngei mai. Mahse, thil sual pawi tak a tih avângin a inchhîr tak zet a. A dam chhûng zawngin Jehova a  hmangaih a, biakna dik a ngaina a ni.—1 Lalte 14:8; Sâm 51:1, 17; 63:1.

Hêng Bible thu aṭangte hian thil tam tak kan zir thei a. Mite chuan an chhûngte châwm a, mi dangte chunga thil ṭha an tih hian an fakawm hle. Mahse, Jehova duhsakna dawng tûr chuan, a lâwm zâwnga kan biak a ngai a, amah nên inlaichînna ṭha tak kan neih a ngai bawk a ni.

Chutiang ti thei tûr chuan, tih tak zeta Jehova kan hmangaih a ngai a. Mei nung reng tûra thing ka tuah belh zêl ang bawkin, Pathian kan hmangaihna chu a Thu kan zir ziah a, kan chhût ngun a, kan ṭawngṭai fan fanna hmangin kan chhawm nung a ni. (Sâm 1:2; Rom 12:12) Chu hmangaihna chuan kan thiltih engkimah Jehova tilâwm tûrin min chêttîr ang. Thil sual kan tihpalh huna inchhîr tak zet tûr leh Jehova ngaihdamna dîl tûrin min chêttîr bawk ang. Chuti a nih chuan, Rehoboama ang lovin, biakna dik chu rinawm takin kan thlâwp a ni ang.—Juda 20, 21.