LUNGNGAIHNAA khat khawvêla kan awm avângin remna neih chu a harsa thei a. Remna engemaw chen kan nei a nih pawhin, awlsam takin kan hloh leh thei a ni. Remna tluantling leh dik tak neih theih dân chungchâng Bible-in eng nge a sawi? Chutiang chu nei ve tûrin engtin nge mi dangte kan ṭanpui theih?

Remna dik tak nei tûr chuan, him leh vênhim nia kan inhriat a ngai a. Ṭhian ṭhate kan neih a ngai a, a bîk takin, Pathian kan hnaih a ngai a ni. Chu chu engtin nge kan tih theih?

Jehova thupêkte leh thu bulte chu engtik lai pawhin kan tân a ṭha a. Chûngte chu kan zawm chuan, Jehova kan rinchhanin, amah nên inlaichînna ṭha neih kan duh tih kan târ lang a ni ang. (Jeremia 17:7, 8; Jakoba 2:22, 23) Tichuan, Jehova’n min hnaih ang a, rilru thlamuanna min pe ang. Isaia 32:17 chuan: “Felna hnathawh chu remna a ni ang a, felnaa thil chhuak chu kumkhuaa muang taka awmna leh ring tlata awmna a ni ang,” tiin a sawi. Inhuam taka Jehova thu kan âwih chuan remna dik tak kan nei thei ang.—Isaia 48:18, 19.

Jehova chuan remna tluantling nei tûra min ṭanpuitu thilpêk hlu tak pawh min pe a. Chu chu thlarau thianghlim a ni.—Tirhkohte 9:31.

Tirhkoh Paula chuan remna chu “thlarau rah” pêng pakhat a ni tih a sawi a. (Galatia 5:22, 23) Remna chu Pathian thlarau rah pêng pakhat a nih avângin, remna neih kan duh chuan, thlarau thianghlim kan inkaihhruaitîr tûr a ni. Chu chu engtin nge kan tih theih?

Pakhatnaah, Pathian Thu chu kan chhiar ziah tûr a ni. (Sâm 1:2, 3) Kan chhiarte ngun taka kan ngaihtuah chuan, dinhmun hrang hranga Jehova  ngaihtuah dân hre thiam tûrin thlarau thianghlimin min ṭanpui ang. Entîr nân, remna a vawn reng dân leh a tâna a pawimawh chhante kan hria ang a. Bible-a kan thu hriatte kan nunpui chuan kan nunah remna kan nei lehzual ang.—Thufingte 3:1, 2.

Pahnihnaah, Pathian thlarau thianghlim dîlin kan ṭawngṭai tûr a ni. (Luka 11:13) Jehova chuan a ṭanpuina dîltute chu: “Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin a tiam a. (Philippi 4:6, 7) Jehova kan hnaih a, a thlarau thianghlim kan rinchhan tlat chuan rilrua thlamuanna dik tak chu min pe ang.—Rom 15:13.

Bible chuan mi tam tak chu an nun thlâkthleng tûrin a ṭanpui a, tûnah anni chuan Jehova nêna inremna, rilru thlamuanna, leh mi dangte nêna inremnate an nei tawh a ni. Engtin nge chutianga an inthlâkthleng?

Thutaka an awm hmain, kan unau ṭhenkhatte chu mi thinchhe tak leh nunrawng takte an ni a. Mahse, inthlâkthleng tûrin theih tâwp an chhuah a, tûnah chuan min ngilnei tak, dawhthei tak, leh mi dangte nêna inrem tak an ni tawh a ni. * (Footnote en rawh.) (Thufingte 29:22) Unau David-a leh Rachel-i te’n an mizia an thlâkthleng dânte chu en ang che.

Thutaka a awm hmain David-a chu mi sawisêl chîng tak a nih bâkah a chhûngte lakah a vin ṭhîn a. Mahse, a hnuah, a inthlâk danglam a ngai tih a hria a. A nih leh, engtin nge remna a neih theih? David-a chuan, “Bible thu bulte ka nunpui ṭan a, tichuan, ka chhûngte nên inzah tawnna kan nei chho ta a ni,” tiin a sawi.

 Rachel-i chu a seilenna hmunin a thunun hle a. Ani chuan “Mi thinchhe tak chhûngkuaa seilian ka nih avângin tûnah pawh ka la thinchhe reng a ni,” tiin a sawi. Remna nei tûrin ani chu engin nge ṭanpui? “Ṭawngṭai a, Jehova ka rinchhan vâng a ni,” tiin a sawi.

David-a leh Rachel-i te chu Bible thu bulte nunpui a, Pathian thlarau thianghlim an rinchhan avânga remna neitute zînga pahnih mai an ni a. Thinûrnaa khat khawvêlah awm mah i la, rilru thlamuanna kan nei thei a ni. Chu chuan kan chhûngkuate leh kohhrana unaute nên inrem a ti awlsam ang. Mahse, Jehova chuan ‘mi zawng zawng nên inrema awm’ tûrin min hrilh a ni. (Rom 12:18) Chu chu thil ni thei a ni em? Engvângin nge mi dangte nên inrem kan tum ang?

Thlawhhma rawngbâwlnaah, Pathian Ram chungchânga remna thuchah kan hril a. (Isaia 9:6, 7; Matthaia 24:14) Mi tam takin chu thuchah chu an duhin, an pawm a. Chuvângin, khawvêla thilthlengte avânga beisei bo leh thinrimin an awm tawh lo. Tûnah chuan, nakin hun atân beiseina dik tak an nei tawh a, chu chuan ‘remna zawn’ duhna a neihtîr a ni.—Sâm 34:14.

Mahse, kan thuchah ken chu mi zawng zawngin an duh nghâl mai ṭhîn lo. (Johana 3:19) Mite chuan engtiang pawhin min chhâng lêt mah se, Pathianin a thlarau thianghlim min pe a. Chu chuan remna vawng tlat tûr leh kan thu hrilhnaa mite zah tûrin min ṭanpui a ni. Chutiang chuan, he Isua fuihna: “Inah chuan in luh dâwnin chibai bûk ang che u. Tin, ina mite chu chibai bûk tlâk an nih chuan in thlamuanna thu chu an chungah lo thleng rawh se; an tlâk loh erawh chuan in thlamuanna thu chu in chungah lo kîr leh rawh se,” tih hi kan zâwm a ni. (Matthaia 10:11-13) Chu rilru put hmang chu kan neih chuan, mite’n eng ang pawhin min sawiin, min ti mah se, remna kan vawng tlat thei ang. Chûng mite chu ṭanpui theihna hun remchâng kan la nei thei tih kan hria.

Sawrkâr thuneitute’n kan hna an khap a nih pawhin, anmahni kan biak huna zahna lantîrna hmangin remna kan awmtîr thei a ni. Entîr nân, Africa rama hmun pakhatah, sawrkârin Kingdom Hall sak an phal lo va. Kan unaute chuan chu buaina chu mite tithinrim lo zâwnga chinfel a ṭha tih an hria a. Chu rama missionary lo thawk tawh ṭhîn unaupa chu England ram, London khawpuia High Commissioner va hmu a, Jehova Thuhretute remna hnathawh chungchâng hrilh tûrin an tîr a ni.

Unaupa chuan: “Khualchhâwnna hmun ka va thlen chuan, khual min lo chhâwntunu inthuam dân ka’n enin tûn hmaa ka lo zir tawh ṭawng hmang hnam inthuam dân ni hian ka hria a. Chuvângin, an ṭawngin ka’n be ṭan a. Mak ti takin, ‘Eng nge i lo kal chhan chu?’ tiin min zâwt a. Hawihhawm takin High Commissioner ka hmuh duh thu ka hrilh a. Thuneitu a’n phone a, min hmu tûrin a lo chhuak a, thualchhûng ṭawngin min bia a. Chu mi hnuah, Thuhretute remna hnathawh dânte ka’n hrilhfiah chuan ngun takin min ngaihthlâksak a ni,” tiin a sawi.

High Commissioner chuan unaupa sawite a ngaihthlâk hnu chuan, kan hnathawhte chu a hre thiam lehzual a, tûn hma angin pâwngpaw huatna a nei tawh lo a ni. Chu mi hnu rei vâk lovah, chu sawrkâr chuan a thu tlûkna siam chu thlâkin, Jehova Thuhretute chu Kingdom Hall sak a phalsak ta a. Unaute chu an hlim hle! Zah taka mi dangte kan cheibâwlna chuan remna a awmtîr tih a chiang a ni.

Tûn laiah, Jehova mite chuan boruak muanawm tak hnuaiah Amah chu biain thlarau lam paradis an chên a. Kan za hian remna vawn kan tum tlat chuan chu remna chu kan tipung thei ang. Chutiang a nih chuan, Jehova lawm kan hlawh tih kan chiang ang a. A khawvêl tharah, chatuan remna min pe ang.—2 Petera 3:13, 14.