ZIR TUR THUZIAK 24
Pathian Hriatna Nêna Inkalh Ngaih Dânte Chu Ṭhiat Rawh!
‘Hnialnate leh thil sâng tinrêng Pathian hriatna dâl tûra sâng taka siamte chu kan ṭhiat a.’—2 KOR. 10:5.
HLA 18 Hmangaihna Nghet Pathian
THLIR LAWKNA *
1. Tirhkoh Paula’n hriak thih Kristiante hnênah eng vaukhânna nge a pêk?
TIRHKOH Paula’n “he khawvêl dân ang hian awm suh ula” tiin min vaukhân a. (Rom 12:2) He thu hi Paula’n kum zabi khatnaa Kristiante hnêna a ziah a ni a. Engvângin nge he fuihna khauh tak hi Pathian hnêna inpumpêk a, thlarauva hriak thih a hmei a pate hnêna a pêk?—Rom 1:7.
2-3. Engtin nge Setana chuan Jehova hawisan tûra min beih a tum a; mahse, kan rilrua “kulhpui nghet” tak anga awm thilte chu engtin nge kan ṭhiah theih?
2 Kristian ṭhenkhat chu Setana khawvêlin a chawi lâr ngaih dân ṭha lo leh mihring finnate thununa awm nia an lan avângin Paula chuan a ngaihtuah hle a. (Eph. 4:17-19) Chutiang chu kan chungah pawh a thleng thei a ni. He khawvêl pathian Setana chuan Jehova hawisan tûra min beihnaah tih dân chi hrang hrang a hmang a. Chûng zînga pakhat chu kan neih mai theih mahni ropuina ûmna, a nih loh leh mahni inchawi lâr duhna hman ṭangkai hi a ni. Ani chuan a ngaihtuah dân anga min ngaihtuahtîr tûrin kan ṭobul te, hnam dân te, leh zirna aṭanga kan thil hriatte pawh a hmang thei a ni.
3 Kan rilrua “kulhpui nghet” tak anga awm thilte chu kan ṭhiat thei ang em? (2 Kor. 10:4) “Hnialnate leh thil sâng tinrêng Pathian hriatna dâl tûra sâng taka siamte chu ṭhiatin, ngaihtuahna tinrêng Krista thu âwihna salah kan hruai a,” tia Paula chhânna hi lo chhinchhiah ang che. (2 Kor. 10:5) Ni e, Jehova ṭanpuina nên chuan, ngaihtuahna dik lote chu kan thunun thei a ni. Damdawiin tûr chakna a hneh thei angin, Setana khawvêlin tûr anga nghawng ṭha lo a neihte chu Pathian Thu-in a hneh thei a ni.
“IN RILRU A THARA AWMIN”
4. Kan zînga a tam zâwk chuan, thutak an hriat tîrhin, eng inthlâk danglamna nge an siam?
4 Pathian Thu-a thutak i hriat a, Jehova rawngbâwl tûra i inpumpêk laia inthlâk danglamna i siam ngaite kha han ngaihtuah leh teh. Chûngah chuan, kan zînga a tam zâwk tân nungchang ṭha lo ṭhenkhat bânsan a tel a. (1 Kor. 6:9-11) Jehova ṭanpuina avânga chûng chîn dân ṭha lote kan bânsan thei chu a va lâwmawm tak êm!
5. Rom 12:2-ah thiltih ngai pahnih eng nge târ lan a nih?
5 Mahse, inthlâk danglamna siam ngai tawh lo tûrah kan inngai tûr a ni lo. Baptisma kan chan hmaa kan lo tih ṭhin sual lian takte chu bânsan tawh mah ila, tûn hmaa chûng kan thiltihte lama min hîp thei engpawh pumpelh tûrin theih tâwp kan chhuah a la ngai reng a. Chu chu engtin nge kan tih theih? Paula chuan: “He khawvêl dân ang hian awm suh ula; . . . in rilru a thara awmin lo danglam zâwk tawh rawh u,” tiin a sawi. (Rom 12:2) Chuvângin, thil pahnih kan tih a ngai a ni. Pakhatnaah, he khawvêl dân anga ‘awm tawh loh,’ a nih loh leh a thununa awm loh hi a ni. Pahnihnaah, kan rilru a thara siam a, “danglam” hi a ni.
6. Matthaia 12:43-45-a chhinchhiah Isua thute aṭangin eng zir tûr pawimawh tak nge kan zir theih?
6 Paula sawi danglamnaah chuan pâwn lam lan dân mai aia tam a tel a. Chutah chuan, kan nun kawng tinrêng a tel a ni. (“ Inthlâk Danglamna Nge Insiam Chawpna?” tih bâwm chu en rawh.) Kan rilru—chhûng lama kan rilru put hmang te, kan vei zâwng te, leh kan rilru thlêk dânte chu a thara kan siam a ngai a. Chuvângin, kan zain heti hian kan inzâwt tûr a ni, ‘Kristian ni tûra inthlâk danglamna ka siamte chu a pâwnlâng mai nge ni a, thinlungah tih tak zetin ka inthlâk danglam zâwk?’ tiin. Chumi pahnih inan lohna chu thil pawimawh tak a ni. Matthaia 12:43-45-a chhinchhiah a thusawiah, Isua’n thiltih ngaite a târ lang a. (Chhiar rawh.) Chûng thute chuan he zir tûr pawimawh tak hi min zirtîr a ni: Ngaihtuahna ṭha lo kan neih chu paih bo mai a tâwk lo va; kan rilru chu Pathian ngaihtuahnaa kan tihkhah a ngai, tiin.
“IN RILRU LEH THINLUNG CHU TIHTHAR NI SELA”
7. Chhûngrila kan nihna chu engtin nge kan thlâk danglam theih?
7 Chhûngril taka kan ngaihtuahna, a nih loh leh chhûngrila kan nihna dik tak chu thlâk danglam theih a ni em? Pathian Thu chuan heti hian a chhâng a: “In rilru leh thinlung chu tihthar ni sela, thutaka chhuak, dikna leh thianghlimnaa Pathian anga siam mihring thar chuan inthuam rawh u,” tiin. (Eph. 4:23, 24, C.L. Re-edited) Chhûngrila kan nihna chu thlâk danglam theih a ni a; mahse, thil awlsam zawng a ni lo. Ngaihtuahna ṭha lote leh thiltih ṭha lote hnâwl mai aia tam kan tih a ngai a. Kan “rilru leh thinlung” chu kan thlâk danglam a ngai a ni. Chutah chuan kan châk zâwng te, rilru vei zâwng te, leh min chêttîrtute thlâk danglamna a tel a. Chutiang ni thei tûr chuan theih tâwp kan chhuah reng a ngai a ni.
8-9. Rilru chhûngrila inthlâk danglam a ngai tih kan unaupa thiltawnin engtin nge a târ lan?
8 Tharum thawh hmang tak lo ni ṭhîn unaupa thiltawn hi i lo ngaihtuah ang u. Zu in leh insualte a bânsan hnu chuan, baptisma a chang thei ta a, chu chu a chênna khuaa mite hnêna thu hriattîrna ṭha tak a ni. Mahse, baptisma a chan hnu rei vak lovah, tlai khat chu beisei loh takin fiahna a tâwk a. Zu ruih hmang pakhat a inah lo kalin, a rawn cho va. A tîr chuan unaupa chu a insûm thei a. Mahse, chu pa chuan Jehova hming a sawichhiat tâkah chuan a insûm thei ta lo va. Pâwnah va chhuakin chu pa chu a va hnek ta hrep a ni. Engvângin nge chutianga a tih tâk? Bible zirnain insual châkna a neih chu do thei tûrin ṭanpui mah se, a rilru chhûngril tak tak a la thlâk danglam loh vâng a ni. Thu danga sawi chuan, chhûngrila a nihna dik tak a la thlâk danglam lo a ni.
9 Mahse, kan unaupa chu a beidawng lo. (Thuf. 24:16) Kohhran upate ṭanpuinain, ṭha takin hma a sâwn chho zêl a. A tâwpah chuan, kohhran upa nih a tling ta a ni. Chumi hnuah, tlai khat chu, Kingdom Hall hma chiahah, kum tam tak kal taa a hmachhawn ang chona chu a tawng leh a. Zu rui pakhatin kohhran upa pakhat chu hnek a tum a. Kan unaupa chuan eng nge a tih tâk? Zaidam tak leh inngaitlâwm takin, chu zu rui pa chu thil a chhûtpui a, a thinrim a tihdaihsak a, ina haw tûrin a ṭanpui a ni. Engvângin nge kan unaupa’n tûn ṭumah chuan danglam taka a chhân lêt? A rilru chhûngril tak tak a thlâk danglam tawh vâng a ni. Zaidam tak leh mi inngaitlâwm tak ni tûrin chhûngrila a nihna a thlâk danglam tawh a, chu chuan Jehova a va chawimawi tak êm!
10. Chûngrila kan nihna thlâk danglam tûr chuan eng thilte nge kan tih ngai?
10 Chûng inthlâk danglamnate chu zan khat thil thua awm mai a ni lo va; amaha lo awm mai pawh a ni hek lo. Kum tam tak chhûng “taihmâk” chhuah a ngai a ni. (2 Pet. 1:5) Hun engemaw tichhûng “thutaka” kan awm avâng maiin chutiang inthlâk danglamna a awm ang tihna a ni lo. Chhûngrila inthlâk danglamna siam tûr chuan theih tâwp kan chhuah a ngai a ni. Chûng inthlâk danglamna siam tûr chuan, kan tih theih thil ṭhenkhat a awm a. Chûng zînga ṭhenkhat i lo en ang u.
RILRU PUT HMANG KAN THLAK DANGLAM THEIH DAN
11. Engtin nge ṭawngṭaina chuan kan rilru leh thinlung inthlâk danglam tûra min ṭanpui?
11 Ṭawngṭaina hi rahbi pawimawh hmasa ber chu a ni. Fakna hla phuahtu angin heti hian kan ṭawngṭai tûr a ni: “Aw Pathian, keimahah hian thinlung thianghlim siam la, rilru thar nghet tak min pe ang che,” tiin. (Sâm 51:10 C.L. Re-edited) Kan rilru leh thinlung thlâk danglam a ngai tih kan pawm tûr a ni a, tichuan, Jehova ṭanpuina kan dîl tûr a ni. Inthlâk danglamna siam tûrin Jehova’n min ṭanpui ang tih engtin nge kan chian theih? Ezekiela hun laia, Israel luhlul takte chungchânga Jehova thutiam aṭangin chakna kan hmu thei a ni: “Thinlung hmun khat ka siamsak ang che u a, rilru thar ka pe ang che u . . . thinlung nêm [Pathian kaihhruaina zâwm duhna] an hnênah ka pe ang,” tih hi. (Ezek. 11:19) Jehova chuan chûng Israel mite chu inthlâk danglam tûrin ṭanpui a duh a, keini pawh min ṭanpui a duh a ni.
12-13. (a) Sâm 119:59-a sawi angin, eng nge kan chhût ngun a ngaih? (b) Eng zawhnate nge kan inzawh ang?
12 Chhût ngunna hi rahbi pawimawh pahnihna a ni. Nî tina Pathian Thu kan chhiar hian, inthlâk danglam ngai ngaihtuahna te, leh rilru put hmangte chu hun pea kan chhût ngun a ngai a. (Sâm 119:59 chhiar rawh; Heb. 4:12; Jak. 1:25) Kan ngaihtuahna leh rilru vei zâwngte chu khawvêl ngaih dân thununa a awm leh awm loh kan hriat a ngai a. Chak lohnate kan nei tih inngaitlâwm taka pawmin, chûngte chu hneh tûrin theih tâwp kan chhuah tûr a ni.
13 Entîr nân, heti hian inzâwt rawh: ‘Ka thinlungah îtsîkna tlêm azâwng a awm em?’ (1 Pet. 2:1) ‘Ka dinhmun, ka zirna, leh ka ro sumte avângin chapona engemaw chen ka nei em?’ (Thuf. 16:5) ‘Ka thil neih ang nei ve lote, a nih loh leh ka hnampui ni lote chu ka ngainêp em?’ (Jak. 2:2-4) ‘Setana khawvêlin a pêk thilte chu neih ka châk em?’ (1 Joh. 2:15-17) ‘Nungchang bawlhhlawhna leh tharum thawhna lam hawi intihhlimnate chu ka ennawm tih zâwng a ni em?’ tiin. (Sâm 97:10; 101:3; Amos. 5:15) Mi mal taka inzawh tûr chûng zawhnate i chhânna chuan insiamrem i ngaihna laite a târ lang ang. Kan thinlunga “kulhpui nghet takte” ang chûng ngaihtuahnate leh rilru vei zâwngte kan hneh theih chuan kan Pa vâna mi kan tilâwm ang.—Sâm 19:14.
14. Engvângin nge ṭhian ṭha thlan chu a pawimawh?
14 Ṭhian ṭha thlan hi hma lâk ngai rahbi pathumna a ni. Kan hria emaw, hre lo emaw pawh ni se, kan ṭhian kawmte chuan nasa takin min thunun thei a. (Thuf. 13:20) Hnathawhnaah leh school-ahte chuan Pathian ngaihtuah anga ngaihtuah lote hual vêlin kan awm mai thei a ni. Mahse, Kristian inkhâwmnaahte chuan ṭhian ṭha berte chu kan hmu thei a. Chu chu “hmangaih leh thil ṭha tiha” inchawh thawhna hmun a ni.—Heb. 10:24, 25.
‘RINNAAH CHUAN NGHET TAKIN AWM RAWH’
15-16. Engtin nge Setana chuan kan ngaihtuahna thlâk danglam a tum?
15 Mahse, Setana chuan kan ngaihtuahna thlâk danglam a tum tih hre reng ang che. Ani chuan Bible thutakin min thunun loh nân chhût dân chi hrang hrang a hmang a ni.
16 Setana chuan Eden huana Evi hnêna a zawh ang “Pathianin. . . a ti elo maw?” tih zawhna chu a la hmang reng a. (Gen. 3:1) Setana thununa awm he khawvêlah hian, rinhlelhna min neihtîr thei hêng zawhnate hi kan hre fo a ni: ‘Pathianin neih inang inneihna chu a pawm lo tak tak maw? Pathianin Krismas leh birthday i lâwm chu a duh lo tak tak maw? Pathianin thisen thun lo tûrin a beisei tak tak che maw? Hmangaihna Pathian chuan i hmangaih tak hnawhchhuaha awm chu kâwm lo tûrin a beisei tak tak che maw?’ tihte hi.
17. Mite’n kan rinna chungchângah rinhlelhna min neihtîr thei zawhnate an zawh hunah, Kolossa 2:6, 7-na chuan a rah chhuah ni thei eng nge a târ lan?
17 Kan thurin chu kan hriat chian a ngai a. Kan thurin chungchânga zawhna pawimawhte chhânna kan hriat loh chuan, rilruah rinhlelhna kan nei lehzual thei a ni. Chûng rinhlelhnate chuan kan ngaihtuahna a tikhaw lo theiin, kan rinna pawh a tichhe hial thei a. A nih leh, eng nge kan tih ngai? Pathian Thu chuan, “Pathian duhzâwng, a ṭha leh lawm tlâk leh, ṭhat famkim chu” kan hriatfiah theih nân, kan rilru leh thinlung chu a thara awm tûrin min hrilh a. (Rom 12:2) Inzirna neih ziahna hmangin, Bible aṭanga kan hriat thutak chu kan hre fiah thei a ni. Jehova tehna felte chu a dik a ni tih kan ring nghet tlat thei a. Tichuan, thûk taka zung kaih thingkûng angin, “rinnaah chuan nghet taka awmin” zung kan kaih thei ang.—Kolossa 2:6, 7 chhiar rawh.
18. Setana khawvêl thununna ṭha lo tak do thei tûrin engin nge min ṭanpui ang?
18 Tumahin i rinna chak tûra an tihsak theih loh che avângin i rilru leh thinlung chu a tharin siam chhunzawm zêl rawh. Ṭawngṭai fo la, Jehova thlarau thianghlim dîl zêl ang che. Ṭha takin chhût ngun la; i ngaihtuahna leh thil ti tûra chêttîrtu che chu en dik ṭhîn rawh. Ṭhian ṭhate zawng la; i ngaihtuahna siam ṭha tûra ṭanpui theitute chu ṭhianah siam rawh. Chutianga i tih chuan, Setana khawvêl thununna ṭha lo tak chu i do thei ang a, “hnialnate leh thil sâng tinrêng Pathian hriatna dâl tûra sâng taka siamte chu” i ṭhiat thei ang.—2 Kor. 10:5.
HLA 48 Nî Tin Jehova Nêna Lêng Dûnin
^ par. 5 Kan ngaihtuahna chu kan ṭobul te, hnam dân te, leh zirnate’n a ṭha zâwngin emaw, a chhe zâwngin emaw a thunun thei a. Ngaihtuahna dik lo ṭhenkhat chu kan miziaah a lo bet tlat tawh tih kan hre mai thei a ni. He thuziak hian kan lo neih mai theih ngaihtuahna dik lo engpawh kan thunun theih dân a târ lang ang.