ZIR TUR THUZIAK 25
Rilru Hah Hunah Jehova Rinchhan Rawh
“Rilru lungngai tâwpkhâwk ka ni a.”—1 SAM. 1:15.
HLA 51 Pathian Jehova Kan Vuan Tlat
THLIR LAWKNA *
1. Engvângin nge Isua vaukhânna chu kan zawm a ngaih?
HUN hnuhnûng chungchâng a hrilh lâwknaah, Isua chuan: “Fîmkhur rawh u . . . dam chhûng khawsak ngaihtuah nên, in rilru a khat lutuk hlauh ang,” tiin a sawi a. (Lk. 21:34) Chu vaukhânna chu kan zawm a ngai a ni. Engvângin nge? Tûn laiah pawh, mi tinte hian rilru tihah theitu chutiang buainate chu kan hmachhawn avângin.
2. Kan unaute chuan rilru hahna thlentu eng harsatnate nge an hmachhawn?
2 A châng chuan, rilru hahna thlentu buaina tam tak chu a ruala kan hmachhawn a ngai a. A hnuaia entîrnate hi han ngaihtuah teh. Thazâm natna tuar Thuhretu John-a * chu an inneihna kum 19 hnuah a nupuiin a chhuahsan avângin a rilru a na hle a. A hnuah, a fanu pahnih pawhin Jehova rawngbâwlna an chawlhsan a ni. Nupa tuak khat Bob-a leh Linda-i te chuan harsatna chi hrang hrang an hmachhawn a. An pahnih chuan an hna an chân a, a hnuah an awmna in pawh an chân leh a ni. Chûng harsatnate bâkah, Linda-i chuan a nunna la bo thei lung natna leh natna do thei (immune system) tichhetu natna dang pawh a nei bawk.
3. Philippi 4:6, 7-a sawi angin, eng nge kan chian theih?
3 Min Siamtu leh hmangaihna nei tak kan Pa, Jehova chuan rilru hahnain min nghawng dân chu a hre thiam tih kan chiang thei a. Kan hmachhawn harsatnate chingfel thei tûrin min ṭanpui a duh a ni. (Philippi 4:6, 7 chhiar rawh.) Bible-ah hian Pathian chhiahhlawhte hmachhawn harsatna chungchâng tam tak a chuang a. Jehova’n chûng dinhmun harsa takte hmachhawn thei tûra a ṭanpui dânte pawh chhinchhiah a ni bawk. Entîrna ṭhenkhat i lo en ang u.
ELIJA—“KEIMAHNI NUNGCHANG ANG PU MIHRING”
4. Elija’n eng harsatnate nge a hmachhawn a, Jehova chungah eng rilru put hmang nge a neih?
4 Elija chuan hun harsa tak chhûngin Jehova rawng a bâwl a, harsatna khirh tak takte pawh a hmachhawn bawk. Israel chanchina lal rinawm lote zînga pakhat, Lal Ahaba chuan Baal betu, misual tak Jezebeli chu nupuiah a nei a. An pahnih chuan ram chu Baal biaknain an tikhat a, Jehova zâwlnei tam tak pawh an that bawk. Elija chu a tlan chhia a. Ani chu Jehova rinchhanin ṭâm nasa tak ata a dam khawchhuak tawh bawk. (1 Lal. 17:2-4, 14-16) Chu bâkah, Elija chuan Baal zâwlneite leh a betute a hmachhawn khân Jehova a rinchhan a. Israel mite chu Jehova rawngbâwl tûrin a fuih a ni. (1 Lal. 18:21-24, 36-38) Elija chuan chûng hun khirh tak chhûngin Jehova ṭanpuina tam tak a dawng a ni.
Jehova chuan Elija tichak tûrin vântirhkoh a tîr (Paragraph 5-6-na en rawh) *
5-6. Lalte pakhatna 19:1-4-a sawi angin, Elija rilru chu engtin nge a awm a, Jehova’n Elija a hmangaih tih engtin nge a târ lan?
5 Lalte pakhatna 19:1-4 chhiar rawh. Elija chuan Lalnu Jezebeli’n thah a tum chuan a hlau hle a. Chuvângin, Beer-seba khuaah a tlânchhia a ni. ‘Thih dîl’ hial khawpin a beidawng a. Engin nge chutiang rilru neihtîr? Elija chu “keimahni nungchang ang pu mihring,” ṭha famkim lo a ni a. (Jak. 5:17) A rilru a hah êm vâng leh a taksa a chauh êm vâng a ni thei ang. Elija chuan biakna dik chawisân a tumna chu engmah a sâwt lo, Israel ramah hian hmasâwnna engmah a awm lo, amah chauh hi Jehova rawngbâwltu awmchhun a ni, tiin a ngaihtuah mai thei. (1 Lal. 18:3, 4, 13; 19:10, 14) He zâwlnei rinawm tak chhân lêt dân hi mak kan ti mai thei a. Mahse, Jehova chuan Elija rilru awm dân chu a hre thiam a ni.
6 Jehova chuan Elija’n a rilru awm dân a sawi chhuah chuan a dem lo va. Chu aiin, chakna nei leh tûrin a ṭanpui zâwk a ni. (1 Lal. 19:5-7) A hnuah, Jehova chuan a thiltihtheihna ropui tak chu lantîrin, Elija ngaihtuahna chu hmangaihna nei takin a siamremsak a. Tichuan, Jehova’n Israel ramah Baal be lo mi 7,000 an la awm tih a hrilh bawk. (1 Lal. 19:11-18) Jehova’n chûng thilte chu hriattîrin, Elija chu a hmangaihna a lantîr a ni.
JEHOVA’N MIN ṬANPUI DAN
7. Jehova’n Elija a ṭanpui dân aṭangin eng nge kan chian theih?
7 Rilru hahna thlentu dinhmun i hmachhawn em? Jehova’n Elija rilru awm dân a hre thiam tih hriat chu a va thlamuanthlâk tak êm! Chu chuan kan rilru hahnate pawh a hre thiam tih a tichiang a. Ani chuan kan theih chin tâwkte a hria a, kan ngaihtuahnate leh kan rilru awm dânte pawh a hria a ni. (Sâm 103:14; 139:3, 4) Jehova rinchhana Elija kan entawn chuan, rilru hahna min thlentu buainate hmachhawn thei tûrin min ṭanpui ang.—Sâm 55:22.
8. Rilru hahna i hmachhawn hunah engtin nge Jehova’n a ṭanpui ang che?
8 Rilru hahna chuan beidawnna thlentu a ṭha lo zâwnga ngaihtuahna min neihtîr thei a. Chutiang i nih chuan, Jehova’n rilru hahna hmachhawn thei tûrin a ṭanpui ang che tih hre reng rawh. Engtin nge a ṭanpui ang che? Ani chuan i lungkhamnate hrilh tûrin a sâwm che a. Ṭanpui i dîlna aw ri chu a hria a ni. (Sâm 5:3; 1 Pet. 5:7) Chuvângin, i buainate chu ṭawngṭaiin Jehova hnênah thlen ṭhîn rawh. Ani chuan tlang taka Elija a biak angin be lo che mah se, a Thu, Bible leh a inawpna pâwl hmangin a bia ang che. Bible-a i thu chhiarte chuan thlamuanna leh beiseina a pe thei che a. Chu bâkah, i unaute pawhin an tichak thei bawk che a ni.—Rom 15:4; Heb. 10:24, 25.
9. Engtin nge ṭhian rinawm chuan min ṭanpui theih?
9 Jehova’n Elija chu Elisa hnênah mawhphurhna hlan tûra a hrilh khân, chu chu a rilru hahna tawrhpui theitu, a mamawh tak ṭhian a pe tihna a ni. Chutiang bawkin, ṭhian rinawm tak hnêna kan rilrua awm te kan hrilh hian rilru hahnate hmachhawn tûrin min ṭanpui thei a. (2 Lal. 2:2; Thuf. 17:17) I rilrua awmte i hrilh theih tûr ṭhian ṭha i nei lo a nih chuan, rilru lama ṭanpui theitu Kristian mi puitling hmu tûrin Jehova hnênah ṭawngṭaiin dîl ang che.
10. Engtin nge Elija thiltawn chuan beiseina min pêk a, Isaia 40:28, 29-a chhinchhiah thutiam chuan engtin nge min ṭanpui?
10 Jehova chuan Elija chu rilru hahna hmachhawn thei tûr leh kum tam tak chhûng rinawm taka rawngbâwl tûrin a ṭanpui a. Elija thiltawnte chuan beiseina min pe a ni. Tisa lam leh rilru lama min tichautu harsatna tam tak kan hmachhawn mai thei a. Mahse, Jehova kan rinchhan chuan, a rawngbâwl chhunzawm zêl tûra kan mamawh chakna min pe ang.—Isaia 40:28, 29 chhiar rawh.
HANI, DAVIDA, LEH “ASAPHA” TE CHUAN JEHOVA AN RINCHHAN
11-13. Engtin nge rilru hahna chuan hmân laia Pathian chhiahhlawh pathumte chu a nghawng?
11 Bible-a târ lan Pathian chhiahhlawh dangte pawhin rilru hahna nasa tak an hmachhawn a. Entîr nân, Hani chuan fa a neih 1 Sam. 1:2, 6) Hani chuan a rilru a hah em avângin a ṭapin chaw a ei thei lo.—1 Sam. 1:7, 10.
theih loh bâkah, amah ertu Penini’n a sawichhe reng bawk a ni. (12 A châng chuan, Lal David chu a rilru a hah hle a. A hmachhawn harsatnate chu han ngaihtuah teh. Thil sual tam tak a tih avângin a rilru a hah hle ṭhîn a. (Sâm 40:12) A hmangaih tak a pafa Absaloma chu a lakah helin, a hnuah a thi a ni. (2 Sam. 15:13, 14; 18:33) A ṭhian ṭha ber zînga pakhat chuan a phatsan bawk. (2 Sam. 16:23–17:2; Sâm 55:12-14) Davida ziah fakna hla tam tak chuan a beidawn thu leh Jehova a rinchhan pumhlumzia a târ lang a ni.—Sâm 38:5-10; 94:17-19.
Fakna hla phuahtu chu rilru fîm tak nei leh tûrin engin nge ṭanpui? (Paragraph 13-15-na en rawh) *
13 A hnuah, fakna hla phuahtu pakhat chuan mi sualte nun dân chu a awt ṭan a. Ani chu Asapha thlaha mi a ni thei a, “Pathian hmun thianghlimah” rawng a bâwl a ni. Chu hla phuahtu chuan rilru hahna nasa tak a neih avângin hlimna leh lungawina a nei thei lo va. Pathian rawngbâwlna aṭanga lo awm malsâwmnate chu a ringhlel ṭan a ni.—Sâm 73:2-5, 7, 12-14, 16, 17, 21.
14-15. Ṭanpuitu atâna Jehova rinchhantu Bible-a entîrna pathumte hnên aṭangin eng nge kan zir theih?
14 Tûna kan sawi tâk betu dik pathumte chuan ṭanpuitu atân Jehova an rinchhan a. Tih tak zeta ṭawngṭaiin an lungkhamnate chu a hnênah an hrilh a ni. An rilru hah chhante pawh tlang takin an sawi a. Jehova biakna hmunah an kal zâwm zêl a ni.—1 Sam. 1:9, 10; Sâm 55:22; 73:17; 122:1.
15 Jehova chuan chûng mite chu lainat takin a chhâng lêt ṭheuh va. Hani chuan rilru thlamuanna a hmu a. (1 Sam. 1:18) Davida chuan: “Mi fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn,” tiin a ziak a ni. (Sâm 34:19) Fakna hla phuahtu chuan a hnuah, Jehova’n thurâwn ṭha tak pea kaihruaiin, ‘[a] kut ding lama chelh’ ni hian a inhria a ni. Heti hian a zai a: “Kei atân erawh zawng Pathian hnaih hi a ṭha a ni: Lalpa PATHIAN chu ka inhumhimnaah ka hmang a,” tiin. (Sâm 73:23, 24, 28) Hêng entîrna aṭang hian eng nge kan zir theih? Rilru hahna thlentu buainate avânga kan phûr a rih châng a awm mai thei a. Mahse, Jehova’n mite a ṭanpui dân kan chhût ngun a, ṭawngṭaia amah kan rinchhan a, ti tûra min phûtte kan tihna hmangin chûng harsatnate chu kan hmachhawn thei, tih hi.—Sâm 143:1, 4-8.
JEHOVA RINCHHAN LA, HLAWHTLING RAWH
Unaunu chu atîr chuan, a inla hrang niin a lang; mahse, mi dangte ṭanpui dân kawng a zawn chuan dinhmunte chu a ṭha lamin a inthlâk danglam (Paragraph 16-17-na en rawh)
16-17. (a) Engvângin nge kan inlâk hran loh vang? (b) Engtin nge chakna kan neih leh theih?
16 Chûng entîrna pathumte chuan zir tûr pawimawh dang min zirtîr a—Jehova leh a mite lak aṭangin kan inla hrang tûr a ni lo, tih chu. (Thuf. 18:1) A pasalin a chhuahsan avânga rilru hah taka awm Nancy-i chuan: “Hun rei tak chhûng chu tumah hi hmuh leh biak pawh ka duh lo. Mahse, ka inlâk hran poh leh, ka lung a chhe lehzual,” tiin a sawi. Chûng buainate hmachhawn ve mi dangte hnên aṭanga ṭanpuina a zawn chuan dinhmunte chu a danglam ta a ni. Ani chuan: “Mite’n an harsatnate min hrilh hian ka ngaihthlâksak a. Anmahni ka khawngaih poh leh mahni inkhawngaihna ka nei tlêm lehzual tih ka hria,” tiin a sawi.
17 Kohhran inkhâwmtea kan telna chuan chakna min neihtîr leh thei a. Kan inkhâwm hian, Jehova chu ‘min ṭanpuitu leh thlamuantu’ nihtîrna hun remchâng kan nei lehzual a ni. (Sâm 86:17) Chutah chuan, a thlarau thianghlim, a Thu, leh a mite hmangin min tichak a. Inkhâwmte chuan “inthlamuan tawn theihna tûr,” hun remchâng min pe a ni. (Rom 1:11, 12) Unaunu Sophia-i chuan: “Jehova leh unaute chuan chhelna nei tûrin min ṭanpui a. Ka tâna pawimawh ber chu kohhran inkhâwmte hi a ni. Rawngbâwlnaah leh kohhran inkhâwma ka tel tam poh leh, rilru hahna leh lungkhamnate chu ka hmachhawn thei lehzual a ni,” tiin a sawi.
18. Kan beidawng a nih chuan Jehova’n eng nge min pêk theih?
18 Kan beidawn hunah, Jehova’n nakin hunah thlamuanna tluantling min pe dâwn tih leh tûna kan rilru hahnate hmachhawn thei tûra min ṭanpui tûrin min tiam tih i hre reng ang u. Ani chuan beidawnna leh beisei bo nia inhriatna chu hneh thei tûrin “chakna leh thiltihtheihna” min pe a ni.—Phil. 2:13, New World Translation.
19. Rom 8:37-39-na chuan eng tiamkamna nge min pêk?
19 Rom 8:37-39 chhiar rawh. Tirhkoh Paula chuan Pathian hmangaihna lak ata engmahin min ṭhen hrang thei lo tih a hre chiang a. Rilru hahna hmachhawn kan unaute chu engtin nge kan ṭanpui theih? A dawta thuziakah chuan rilru haha awm kan unaute thlamuanna leh ṭanpuina hmangin Jehova kan entawn theih dân kan hria ang.
HLA 38 I Rit Phurh Chu Jehova Chungah Nghat Rawh
^ par. 5 A lutuk, a nih loh leh hun rei tak chhûng rilru hahna chuan tisa lam leh rilru lamah harsatna min neihtîr thei a. Engtin nge Jehova’n min ṭanpui? Jehova’n Elija rilru hah laia a ṭanpui dân kan sawiho vang a. Bible-a entawn tûr dangte chuan rilru hahna kan neih huna Jehova ṭanpuina dawng tûra kan tih ngaite chu min zirtîr ang.
^ par. 2 He thuziaka hmingte chu thlâk a ni.