1. Kolossa 2:4, 8-a sawi angin, engtin nge Setana’n kan rilru leh ngaihtuahna chu thunun a tum?

SETANA chuan Jehova hawisan tûrin min duh a. A thiltum hlawhtling tûrin, kan ngaihtuahna thunun a tum a, dik tak chuan, kan rilru hneh a, a thu âwihtîr min tum a ni. Ani chuan kan ngaihven zâwng thilte hmangin min hmin emaw, min bum emaw a tum bawk.—Kolossa 2:4, 8 chhiar rawh.

2-3. (a) Kolossa 2:8-a chhinchhiah vaukhânna chu engvângin nge kan ngaihven ang? (b) A dawta thuziakah eng nge kan sawiho vang?

² Setana bum theih dinhmun hlauhawm takah kan awm tak zet em? Awm tak meuh mai! Paula chuan Kolossa 2:8-a chhinchhiah vaukhânna thu hi ring lotute hnêna a ziah a ni lo tih hre reng ang che. Thlarau thianghlima hriak thih Kristiante hnêna a ziah a ni a. (Kol. 1:2-5) Chutih hun laia chûng Kristiante chu dinhmun hlauhawmah an awm a, tûn laiah keini pawh chu aia dinhmun hlauhawm zâwkah kan awm a ni. (1 Kor. 10:12) Engvângin nge? Setana chu leia paihthlâk a ni tawh a, Pathian chhiahhlawh rinawmte chu bum a tum tlat a. (Thup. 12:9, 12, 17) Chu bâkah, misual leh tihdertute “an sual zual deuh deuh” hunah kan nung a ni.—2 Tim. 3:1, 13.

³ He thuziakah hian, Setana’n kan ngaihtuahna thunun tûra min ‘bum’ dânte kan sawiho vang a. A “ngamthlêmnate” zînga pathum kan hria ang. (Eph. 6:11.) Tichuan, a dawta thuziakah, chûng a hmanruate’n kan ngaihtuahnaa nghawng ṭha lo a neihte kan hnâwl theih dân kan sawiho vang. A nih chuan, Setana’n Ram Tiama Israel mite an luh hnua a bum  dân aṭanga kan zir theihte chu kan sawiho hmasa ang.

4-6. Deuteronomy 11:10-15-a sawi angin, Israel mite’n Ram Tiam an thlen khân thlai enkawlna chungchângah eng inthlâk danglamna nge an siam ngai?

⁴ Setana chuan Israel mite chu milem biakna suala tlu lût tûrin fing thiam takin a thlêm a. Engtin nge a thlêm? Mahni inchâwm nâna an mamawh chu hun remchângah a la a. Ram Tiam an luh chuan, an thlai chîn dânte chu an thlâk danglam a ngai a ni. Aiguptaa an awm lai chuan, an lova thlaite châwm nân Nile luipuia tuite an hmang a. Mahse, Ram Tiama an thlai chînte enkawl dân chu luipui aṭanga lâk pên tui ni lovin, a hun taka sûr ṭhîn ruah leh thlai tihnâwngtu dai tlaah a innghat a ni. (Deuteronomy 11:10-15 chhiar rawh; Is. 18:4, 5) Chuvângin, Israel mite chuan thlai enkawl dân thar an zir a ngai a. Mahse, thlai enkawlna lama thiltawn nei mi a tam zâwkte chu thlalêra an boral tâk avângin, chu chu thil awlsam a ni lo vang.

⁵ Jehova chuan a mite chu an dinhmun a inthlâk tawh tih a hrilh a. Tichuan, thlai chîn dân nêna inkûngkaihna nei lo anga lang mai thei, he vaukhânna hi a pe a ni: “Fîmkhur rawh u khai; chutilochuan in thinlung chu bumin a awm ang a; in pêng ang a, pathian dang rawng te in bâwl ang a, in be mai dah ang e,” tiin. (Deut. 11:16, 17) Engvângin nge Jehova’n thlai chîn dân thar zirna chungchâng a sawi laia pathian dik lote be lo tûra vaukhânna a pêk?

⁶ Jehova chuan Israel mite’n an chhehvêla milem bia hnamte hnên aṭangin tualchhûnga thlai chîn dânte an zir duh ngei ang tih a hria a. Ni e, an ṭhenawm hnamte chu Israel mite aiin thlai chîn dânah thiltawn ngah zâwk an nih avângin Pathian mite chuan chûng  mite thiamna ṭhenkhat chu zir an duh mai thei; mahse, chu chu thil hlauhawm tak a ni. Chûng Kanaan mite chuan Baal pathian an biak avângin an sakhuanain an ngaihtuahnate chu a thunun tlat a. Anni chuan Baal chu vân siamtu leh ruah petu angin an thlîr a. Jehova chuan a mite chu chutiang rinna dik lo buma an awm chu a duh lo. Mahse, Israel mite chuan Baal pathian chu vawi tam tak an bia a ni. (Num. 25:3, 5; Ro. 2:13; 1 Lal. 18:18) Tûnah chuan, Setana’n Israel mite a bum theih dân chu chhinchhiah ang che.

7. Israel mite Ram Tiam an luh khân, eng angin nge an rinna fiah a nih?

⁷ Setana bum dân hmasa ber chu ruah tuia châwm, lo ram hmuh châkna an neih ṭanchhana thlêm hi a ni. Ram Tiamah chuan kum tinin April thla nawi aṭanga September thlengin ruah a sûr mang meuh lo va. An nunna leh hausakna chu October thla vêl aṭanga sûr ṭhîn ruah tuiah a innghat a ni. Setana chuan Israrel mite chu hausa tûr chuan milem bia an chhehvêl hnamte tih dân an zir a ngai nia rinna neihtîrin a bum a. Chûng hnamte chuan an pathiante’n an mamawh ruah rawn sûrtîr tûr chuan sakhaw thiltih engemaw an tih a ngai niin an ring a ni. Jehova rinchhan lotute chuan chutianga tih chu khawkhêng pumpelh dân awmchhun nia an rin avângin, pathian dik lo Baal chawimawi nân milem betute thiltihte chu an zâwm ve ta a ni.

8. Setana hman, hmanraw pahnihna chu eng nge ni? Hrilhfiah rawh.

⁸ Setana chuan Israel mite chungah bum dân kawng hnihna a hmang a. Ani chuan nungchang bawlhhlawh châkna hmangin a thlêm a ni. Milem be hnamte chuan nungchang bawlhhlawhnaah nasa taka inhmangin an pathiante chu an bia a. He biak dân tenawm takah hian biak ina nawhchizuar mipa leh hmeichhia a tel a ni. Mawngkawhurna leh nungchang bawlhhlawhna dangte chu an ngaithiam mai ni lovin, an pawm hial a! (Deut. 23:17, 18; 1 Lal. 14:24) Chûng milem be hnamte chuan an sakhaw thiltihin an pathiante chu ram leilung a tihṭhattîr niin an ring a ni. Israel mi tam tak chuan nungchang bawlhhlawhna chîng ṭhîn chûng milem be hnamte tih dân chu zui an châk a, tichuan, pathian dik lo be tûra thlêmin an awm ta a. Dik tak chuan, Setana bumin an awm a ni.

9. Hosea 2:16, 17-a târ lan angin, Israel mite’n Jehova an thlîr dân chu engtin nge Setana’n a tihfiah loh?

⁹ Setana chuan bum dân kawng thumna chu a hmang leh a. Ani chuan Israel mite’n Jehova chunga an thlîr dân chu a tifiah lo a ni. Zâwlnei Jeremia hun laiin, Jehova chuan zâwlnei dêrte’n ‘Baala avângin’ A mite chu A hming an theihnghilhtîr tih a sawi a. (Jer. 23:27) Pathian mite chuan Jehova hming chu an hmang tawh lo niin a lang, chu hming aiah “Neitu,” a nih loh leh “Pu” tih awmze nei Baal hmingin an thlâk a ni. Chu mi avâng chuan, Israel mite rilruah Jehova leh Baal pathian danglamna chu fiah taka hmuh theih a ni tawh lo va, chuvângin, Baal biakna leh Jehova biakna chu chawhpawlh a tiawlsam thei a ni.—Hosea 2:16, 17 chhiar rawh.

10. Setana’n tûn laiah eng hmanruate nge a hman?

¹⁰ Setana chuan tûn laiah pawh chutiang bum dân bawk chu a hmang a. Ani chuan tisa châkna hmanga thlêmna te, nungchang bawlhhlawhna chawi lârna te, leh Jehova chunga mite thlîr dân tifiah lovin mite chu a bum a ni. A hmanraw hnuhnûng ber hi i lo en hmasa ang u.

11. Engtin nge Setana’n Jehova chunga mite thlîr dân chu a tihfiah loh?

 ¹¹ Setana chuan Jehova chunga mite thlîr dân chu a tifiah lo. Isua tirhkohte an thih hnuah, Kristian nia inchhâl mi ṭhenkhat chuan zirtîrna dik lo an thehdarh ṭan a. (Tirh. 20:29, 30; 2 Thes. 2:3) Chûng kalpêngte chuan Pathian dik awmchhun nihna chu an tifiah lo ṭan a ni. Entîr nân, an Bible hmanahte chuan Pathian hming chu thai bovin, “Lalpa” tih ṭawngkam hman chu an duh zâwk a. Pathian hming bil chu thai bova “Lalpa” tih ṭawngkama thlâkin, anni chuan Bible chhiartute tân Jehova chu Bible-a târ lan “pathian” dangte laka a danglamna hriatthiam theih lovin an siam a ni. (1 Kor. 8:5) Jehova leh Isua tâna “Lalpa” tih ṭawngkam an hman kawpna chuan Jehova leh a Fapa chu mi hran an ni a, an chanvo pawh a inang lo tih hriatthiam a tiharsa bawk. (Joh. 17:3) Chutianga tihfiah lohna chuan Pathian Thu-a zirtîrna ni lo, Trinity thurin tidarhzau tûrin a ṭanpui a. Chumi avâng chuan, mi tam takin Pathian chu hriatthiam theih loh leh hriat chian theih loh niin an ngai a ni. Dâwt a va ni chiang êm!—Tirh. 17:27.

12. Sakhaw dik lovin eng nge a chawi lâr a, Rom 1:28-31-a târ lan angin, a rah chhuahte chu eng nge ni?

¹² Setana chuan nungchang bawlhhlawh châkna hmangin mite a thlêm a ni. Hmân lai Israel mite hun laiin, Setana chuan nungchang bawlhhlawhna chawi lâr nân biakna dik lo a hmang a. Tûn laiah pawh, chutiang bawk chu a ni. Sakaw dik lo chuan nungchang bawlhhlawhna chu a pawm mai ni lovin, a chawi lâr a. Chuvângin, Pathian rawngbâwl nia inchhâl mi tam tak chuan nungchang lama a tehna chiang tak chu an hnâwl a ni. Tirhkoh Paula chuan Rom mite hnêna a lehkha thawnah chûng thiltihte rah chhuah chu a târ lang a. (Rom 1:28-31 chhiar rawh.) “Thil mawi lote” zîngah chuan neih inang inkawpna pawh tiamin, nungchang bawlhhlawhna chi hrang hrang a tel a ni. (Rom 1:24-27, 32; Thup. 2:20) Bible zirtîrna chiang tak zawm chu a va pawimawh tak êm!

13. Setana hmanraw dang leh chu eng nge ni?

¹³ Setana chuan pianpui châkna kan neihte chu remchângah a hmang a ni. Mahni leh chhûngkaw châwm nâna thiamnate neih chu kan duh a. (1 Tim. 5:8) Chûng thiamnate chu school-a kan thil zirte leh zirlai taima tak kan  nihna aṭangin kan nei thei a ni. Mahse, kan fîmkhur erawh a ngai. Ram tam takah chuan, zirlaite’n thiamna ṭangkai tak takte bâkah, mihring finnate pawh an zir tel a. Zirlaite chu Pathian a awm tih ringhlel tûr leh Bible zah lohna nei tûra fuih an ni. Chanchhâwnna thurin chu nun inṭan dân hrilhfiahna dik awmchhun tia zirtîr an ni bawk. (Rom 1:21-23) Chûng zirtîrnate chu ‘Pathian finna’ nên a inkalh a ni.—1 Kor. 1:19-21; 3:18-20.

14. Mihring finnain eng nge a chawi lâr?

¹⁴ Mihring finna chuan Jehova tehna fel chu a ngaihthah, a nih loh leh a kalh a. Chu chuan Pathian thlarau rah hmêlhmangte aiin “tisa thiltihte” min neihtîr zâwk a ni. (Gal. 5:19-23) Chapona leh intihveina min neihtîr avângin mite chu “mahni inhmangaihtu te” an lo ni. (2 Tim. 3:2-4) Chûng miziate chu Pathian chhiahhlawhte neih tûr thuhnuairawlhna leh inngaihtlâwmna mizia nên a inkalh a. (2 Sam. 22:28) University zirna ûmtu Kristian ṭhenkhat chu Pathian ngaihtuahna ni lovin mihringte ngaihtuahna thununin an awm a ni. Thilthleng thei entîrna pakhat i lo en ang u.

15-16. Unaunu thiltawn aṭangin eng nge i zir?

¹⁵ Kum 15 aia tam hunbi kima rawngbâwl tawh unaunu chuan: “Baptisma chang tawh Thuhretu ka nih angin, university zirna ûm a hlauhawmzia chu ka chhiarin ka hre tawh a; mahse, chûng vaukhânnate chu ka ngaihthah a. Chu fuihna chu ka tân ni lovin ka hria,” tiin a sawi. Eng harsatnate nge a tawh? Ani chuan: “Ka zirna atâna hun leh tha tam tak pêk a ngaih avângin tûn hma angin Jehova hnêna ṭawngṭaina hun pawh ka nei thei  meuh lo va, mi dangte nên Bible sawihona nei thei lo leh inkhâwm atâna ṭha taka inbuatsaih thei lo khawpin ka chau va. Thil lâwmawm tak mai chu, zirna sânga inpêk pumhlumnain Jehova nêna ka inlaichînna a tichhia tih ka hriat veleh ka chawlhsan a ngai tih ka hria hi a ni. Ka chawlhsan ta reng a,” tiin a sawi.

¹⁶ Zirna sâng chuan unaunu ngaihtuahnaah eng nghawng nge a neih? Ani chuan: “Zirna ka ûmna chuan mi dangte sawisêl duhna, a bîk takin kan unaute sawisêl duhna min neihtîr a, an laka thil tam tak beisei tûr leh inla hrang tûrin min zirtîr a ni tia tlang taka sawi chu ka hreh khawp mai. Chu ngaihtuahna bânsan tûr chuan hun rei tak a ngai a. He ka thiltawn hian a inawpna pâwl kaltlanga kan Pa vâna mi vaukhânna min pêkte ngaihthah a hlauhawmzia min hriattîr a ni. Jehova chuan mahni ka inhriat aiin min hre chiang zâwk a. A thu lo ngaithla ta i la chuan aw!” tiin a sawi.

17. (a) Eng nge tih kan tum tlat ang? (b) A dawta thuziakah eng nge kan sawiho vang?

¹⁷ Setana khawvêl ‘thu fing leh bumna mai maia’ râl lâka awm loh chu tum tlat la. Setana hmanruate lakah invêng zawm zêl ang che. (1 Kor. 3:18; 2 Kor. 2:11) Jehova i thlîr dân tifiah lo tûra Setana beihnate chu do tlat rawh. Nungchang lama Jehova tehna sâng takte milin nung ang che. Jehova thurâwnte ngaihthah khawpin Setana inbumtîr suh. A nih leh, khawvêl ngaihtuahna thununin i lo awm tawh reng tih i hriat chuan engtin nge ni ang? A dawta thuziak chuan Pathian Thuin “kulhpui nghet takte” ang ngaihtuahnate leh chîn dânte ṭhiat tûra min ṭanpui theih dân a târ lang ang.—2 Kor. 10:4, 5.