Hêng Bible chângte hian: “Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te a ni zâwk e,” tiin Kristian mizia chi kua a târ lang a. Mahse, chûng miziate chu Pathian thlarau thianghlimin nei tûra min ṭanpui theih mize ṭha awmchhun niin kan ngai tûr a ni lo.

A châng hmasa lamah tihrkoh Paula chuan: “Tisa thiltihte chu . . . inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te, chutiangte chu,” tia a ziah hi chhinchhiah ang che. (Gal. 5:19-21) Chuvângin, Paula chuan duh se chuan, Kolossa 3:5-a târ lan ‘tisa thiltih’ dangte pawh a târ lang thei a ni. Chutiang bawkin, mize ṭha pakuate a târ lan hnuah ani chuan: “Chutiang kalhzâwngin Dân thupêk rêng a awm lo,” tiin a sawi a. Chuvângin, ani chuan thlarau thianghlim ṭanpuina hmanga kan neih theih mize ṭha zawng zawng chu târ lan vek a tum lo a ni.

Chu chu Ephesi khuaa kohhran hnêna: “Eng rah chu ṭhatna leh, felna leh thutak zawng zawngah a lang si a,” tia Paula ziah nên kan khaikhin hian kan hre thiam thei a ni. (Eph. 5: 8-10) Ni e, “ṭhatna” leh felna leh thutak hi “êng rah” pêng a nih ang bawkin, “thlarau rah” pêng a ni bawk.

Chutiang bawkin, Paula chuan Timothea chu mize ṭha paruk, “felna te, Pathian ngaihsakna te, rinna te, hmangaihna te, dawhtheihna te, thuhnuairawlhna te ûm zêl” tûrin a fuih a. (1 Tim. 6:11) Chûng zînga pathum (rinna te, hmangaihna te, leh dawhtheihna, a nih loh leh ngilneihna te) chauh chu “thlarau rah” pêng anga târ lan a ni. Mahse, Timothea chuan felna te, Pathian ngaihsakna te, leh chhelnate pawh a neih a ngai tih a hria a, chûng miziate nei tûrin thlarau thianghlim ṭanpuina a mamawh tih a hre bawk.—Kolossa 3:12; 2 Petera 1:5-7 nên khaikhin rawh.

Chuvângin, Galatia 5:22, 23-na chuan Kristian mizia zawng zawng a târ lang vek lo. Pathian thlarau thianghlim chuan “thlarau rah” pêng pakuate nei tûrin min ṭanpui thei a. Mahse, Kristian mi puitling nia kan ṭhan chhoh zêl rual hian mize dang tam tak pawh kan neih a ngai a; chu bâkah, ‘mihring thar, thutak felna leh thianghlimnaa Pathian anga siam khân kan inthuam’ a ngai bawk a ni.—Eph. 4:24.