ZIR TUR THUZIAK 23
“I Hming Tihthianghlim Ni Rawh Se”
“Aw LALPA [a nih loh leh, JEHOVA], i hming chu kumkhuain a awm ang.”—SAM 135:13.
HLA 10 Kan Pathian Jehova Chu Fak Rawh U!
THLIR LAWKNA *
1-2. Jehova Thuhretute’n eng thu pawimawh tak nge kan ngaihven?
TUN laiah, Jehova lalchungnunna leh a hming tihthianghlimna chungchânga thu buai pawimawh tak chu kan hmachhawn a. Jehova Thuhretute kan nih angin, chûng thu ngaihvenawm takte sawiho chu nuam kan ti a ni. Mahse, Pathian lalchungnunna leh a hming tihthianghlimna chu inkûngkaihna nei lo a ni em? Ni lo ve.
2 Kan za hian Pathian hming chu tihthianghlim a ngai tih kan hre ṭheuh va. Jehova lalchungnunna, a nih loh leh a rorêl dân chu a ṭha ber tih finfiah a ngaih chhan kan hre bawk. Chûng thu buaite chu kan tân thil pawimawh tak a ni.
3. Jehova hmingah chuan eng nge tel?
3 Dik tak chuan, Jehova hmingah hian a rorêl dân pawh tiamin, a chungchâng engkim a tel a. Chuvângin, sawichhiatna zawng zawng laka Jehova hming tihthianghlimnaah chuan, a rorêl dân chu a ṭha ber tih finfiahna pawh a tel a ni. Jehova hming chu lei leh vâna Chungnungber a nih anga a rorêl dân nên a inzawm tlat a ni.—“ Thu Buai Pawimawh Taka Tel Chu,” tih bâwm chu en rawh.
4. Sâm 135:13-na chuan engtin nge Pathian hming a târ lan a, he thuziakah hian eng zawhnate nge kan sawiho vang?
4 Jehova hming chu danglam tak a ni. (Sâm 135:13 chhiar rawh.) A nih leh, engvângin nge Pathian hming chu chuti taka a pawimawh? Engtin nge sawichhiat ṭan a nih? Pathianin a hming chu engtin nge a tihthianghlim? Engtin nge a hming humhimnaa kan ṭanpui theih? Chûng zawhnate chu i lo sawiho vang u.
HMING PAWIMAWHNA
5. Pathian hming tihthianghlimna chungchâng kan sawiho hunah eng nge kan ngaihtuah mai theih?
5 “I hming tihthianghlim ni rawh se.” (Mt. 6:9, NW) Chu chu ṭawngṭainaa Isua ngaih pawimawh ber a ni. A sawi awmzia chu eng nge ni? Thil engemaw tithianghlim tih chu tifai, a nih loh leh bawlhhlawh kai lova siam tihna a ni a. Mahse, mi ṭhenkhat chuan, ‘Jehova hming chu a thianghlim sa reng a ni lâwm ni?’ tiin an ngaihtuah mai thei. A chhânna hre tûr chuan hmingin a ken telte kan hriat a ngai a ni.
6. Engvângin nge hming chu chuti taka a pawimawh?
6 Hming chuan lehkha phêka thu mal ziah emaw, lam rîk a nih dân emaw aia tam a keng tel a. Bible-in: “Sum tam tak aiin hming ṭhat hi thlan zâwk tûr a ni,” tia a sawi hi chhinchhiah ang che. (Thuf. 22:1; Thur. 7:1) Engvângin nge hming chu chuti taka a pawimawh? Mite’n chu hming putu an thlîr dân a ken tel vâng a ni. Chuvângin, lehkha phêka hming a lan dân, a nih loh leh lam rîk a nih dân chu a pawimawh ber lo; chu aiin, mi dangte rilru leh thinlungah chu hming putu leh a hmingin awmzia a neih dânte chu a pawimawh zâwk a ni.
7. Engtin nge mite’n Pathian hming an sawichhiat?
7 Mite’n Jehova chungchânga dâwt thu an sawi hian, a hming ṭhatna an sawichhia tihna a ni a. A hming ṭhatna an sawichhiat hian a hming tihchhiat an tum tihna a ni. Pathian hming sawichhiatna hmasa ber chu mihring chanchin tîr lamah a thleng a. Chu sawichhiatna aṭanga kan zir theihte chu i lo ngaihtuah ang u.
A HMING SAWICHHIAT A NIH ṬAN DAN
8. Adama leh Evi chuan eng nge an hriat a, eng zawhnate nge lo chhuak?
8 Adama leh Evi chuan Jehova hming an hriat bâkah, chu hming Putu chungchânga thu dik pawimawh tak takte pawh an hria a. Siamtu, an nunna Petu, Paradis in nuam tak leh kawppui ṭha famkim petu a ni tih an hre bawk. (Gen. 1:26-28; 2:18) Mahse, an ngaihtuahna ṭha famkim chu an tâna Jehova thiltih zawng zawngte chhût ngun nân an hmang zawm zêl ang em? Jehova an hmangaihna leh a chunga an lâwmna chu an tipung zêl ang em? Pathian hmêlma fiaha an awm chuan a chhânna chu chiang takin a lang ta a ni.
9. Genesis 2:16, 17 leh 3:1-5-naa sawi angin, Jehova’n nupa tuak hmasa berte hnênah eng nge a hrilh a, engtin nge Setana chuan thu dik chu a veiherh zâwnga a zawh?
9 Genesis 2:16, 17 leh 3:1-5 chhiar rawh. Setana chuan rûl hmangin Evi hnênah: “Pathianin, ‘Huana thing rah rêng rêng hi in ei tûr a ni lo,’ a ti elo maw?” tiin a zâwt a. Chu zawhnaah chuan fing vervêk taka sawi dâwt a tel a, chu chu hmuh theih loh tûr ang a ni. Dik tak chuan, Pathianin thing pakhat rah tih loh, thing dang zawng zawng rah chu an ei thei tih a hrilh a. Chuvângin, Adama leh Evi chuan thei rah chi hrang hrang ei tûr an nei ngei ang. (Gen. 2:9) Ni e, Jehova chu thilphal tak a ni. Mahse, Pathianin Adama leh Evi hnênah thing pakhat rah ei lo tûrin a hrilh a. Chuvângin, Setana chuan thu dik chu a veiherh zâwngin a zâwt a. Ani chuan Pathian chu mi uikawm tak angin a chhuah a ni. Evi chuan, ‘Pathian hian min pêk phal loh thil ṭha engemaw a nei emaw ni le?’ tiin a ngaihtuah mai thei.
10. Engtin nge Setana chuan Pathian hming chu tlang taka a sawichhiat a, chu chuan eng nge a rah chhuah?
10 Chutih lai chuan, Evi chuan Jehova chu a chunga Rorêltu angin a la thlîr reng a. Ani chuan Pathian pêk kaihhruaina chiang tak chu sawiin Setana chu a chhâng a ni. Chu thing chu tawh pawh an tawk tûr a ni lo tih a sawi belh a. Thu an âwih loh chuan an thi ang tia Pathian vaukhânna chu a hria a ni. Mahse, Setana chuan: “Thi teh suh e,” tiin a hrilh a. (Gen. 3:2-4) Tûnah chuan, Setana’n fing vervêk takin a sawi tawh lo. Pathian hming chu tlang taka sawichhiain, Evi hnênah Jehova chu dâwt sawiah a puh a. Chuvângin, Setana chu diabola, a nih loh leh sawichhetu a lo ni ta a ni. Evi chu buma awmin, ani chuan Setana chu a ring ta a. (1 Tim. 2:14) Jehova aiin Setana chu a rinchhan zâwk a ni. Chu chuan Evi tân thu tlûkna ṭha lo siam chu a ti awlsam a. Jehova thu âwih loh chu a thlang ta a ni. Jehova’n ei lo tûra a khap thei rah chu a ei ta a. A hnuah Adama pawh a pe ve a ni.—Gen. 3:6.
11. Kan nu leh pa hmasa berte’n eng nge an tih theih a; mahse, eng nge an tih tâk loh?
11 Evi’n Setana hnêna a sawi tûr âwm tak chu ngaihtuah la, hetianga a sawi ang hian han mitthla teh: “Tu nge i nih ka hre lo che; mahse, ka Pa, Jehova chu ka hre chiang a, ani chu ka hmangaihin ka ring a ni. Adama nêna kan thil neih zawng zawng hi ama min pêk vek a ni a. Engtia a chungchâng a ṭha lo zâwnga sawi ngam nge maw i nih le? Kal bo nghâl rawh!” tiin. Jehova’n a fanu duh takin a chunga a rinawmzia târ langtu chûng thute a sawi a han hriat chuan, a va hlim dâwn tak êm! (Thuf. 27:11) Mahse, Evi chuan Jehova chungah hmangaihna rinawm a nei lo va, Adama pawhin a nei hek lo. An Pa chunga chutiang hmangaihna an neih loh avângin, Pathian hming sawichhiatna chu an humhim thei ta lo a ni.
12. Engtin nge Setana chuan Evi thinlungah rinhlelhna chi a tuh a, Adama leh Evi chuan eng nge an tih loh?
12 Kan hriat tâk angin, Setana chuan Evi thinlungah rinhlelhna chi a tuh a. Jehova tih hming Putu nihna chungchângah rinhlelhna a neihtîr a ni. Tichuan, Adama leh Evi chuan Setana’n Jehova hming a sawichhiatna chu an humhim thei ta lo va. An Pa laka hel tûra Setana rawtna chu awlsam takin an pawm ta a ni. Tûn laiah pawh, Setana chuan chutiang tih dân chu a la hmang reng a. Ani chuan Jehova hming chu a sawichhia a. A dâwt sawi ringtute chu Jehova rorêlna fel hnâwl tûra awlsam taka thunun theih an ni.
JEHOVA’N A HMING A TITHIANGHLIM
13. Ezekiela 36:23-na chuan Bible thuchah bul ber chu engtin nge a târ lan?
13 Jehova chuan chutianga sawichhiatna chu chhâng lêt lovin a pawm mai em? Pawm mai lo! Eden huana a chungchâng sawichhiatna zawng zawng a dik lohzia finfiah nâna Jehova hma lâk dân chu Bible bu pumah chhinchhiah a ni a. (Gen. 3:15) Dik tak chuan, Bible thuchah bul ber chu heti hian kan khaikhâwm thei ang: Jehova chuan a Fapa Lalram rorêlna hmanga a hming tithianghlimin, leiah hian felna leh remna a awmtîr ang. Bible-ah hian Jehova’n a hming a tihthianghlim dân hre thiam tûra min ṭanpuitu thute a chuang a ni.—Ezekiela 36:23 chhiar rawh.
14. Engtin nge Jehova chuan a hming tithianghlim tûrin Eden huana helna chu a chhân lêt?
14 Setana chuan Jehova thiltumte a hlawhtlin loh nân a tih theih apiang a ti a. Mahse, a hlawhtling ngai lo. Bible chuan Pathian Jehova thiltih dân chu a târ lang a, chu chuan amah ang tu mah an awm lo tih a târ lang chiang hle. Dik takin, Setana helna leh a lam ṭang zawng zawngte chuan Jehova rilru an tina hle a ni. (Sâm 78:40) Mahse, Jehova chuan a hming sawichhiatna chu fing tak, dawhthei tak, leh dik takin a chhâng lêt a. A thiltihtheihna chu kawng tam takin a lantîr bawk. A pawimawh ber chu, a thiltih a piangah hmangaihna a lantîr hi a ni a. (1 Joh. 4:8) Ani chuan a hming tithianghlim tûrin thil a ti reng a ni.
Setana chuan Evi chu Jehova chungchângah dâwt thu a hrilh a, vawiin nî thlengin Pathian hming chu a la sawichhe zawm zêl a ni (Paragraph 9-10, 15-na en rawh) *
15. Tûn laiah engtin nge Setana chuan Pathian hming chu a sawichhiat a, chu chuan eng nge a rah chhuah?
15 Tûn laiah pawh, Setana chuan Pathian hming a la sawichhe reng a. Ani chuan Pathian thiltihtheihna te, dikna te, finna te, leh hmangaihnate ringhlel tûrin mite chu a bum a ni. Entîr nân, Jehova chu Siamtu a ni lo tih mite rintîr a tum a. Chu bâkah, mite’n Pathian a awm nia an pawm a nih pawhin, Pathian tehnate chu khirh lutuk leh dik tâwk lo nia ring tûrin anni chu a thlêm a ni. Ani chuan Jehova chu meidîla mite hremtu, Pathian hmangaihna nei lo leh râwng tak angin a zirtîr bawk. Mite’n chutiang sawichhiatnate an ring a nih chuan, Jehova rorêlna fel hnâwl chu an tân a awlsam lehzual ang. Setana chuan hneh pumhlûm a nih hma chu beihpui thlâkin Pathian hming a sawichhe chhunzawm zêl ang a, nang ngei pawh bum a tum ang che. Ani chu a hlawhtling ang em?
THU BUAI PAWIMAWH TAKA KAN TEL DAN
16. Adama leh Evi te tih tâk loh eng thil nge kan tih theih?
16 Jehova chuan mihring ṭha famkim lote chu a hming tihthianghlimnaa tel theihna chanvo a pe a. Dik tak chuan, Adama leh Evi tih tâk loh thilte chu kan ti thei a ni. Jehova hming sawichhetute hual vêlin awm mah ila, mite hnênah Jehova chu Pathian thianghlim, fel leh ṭha, leh hmangaihna a nihzia sawiin thutak chu kan hum thei a. (Is. 29:23) A rorêlna chu kan thlâwp thei bawk. Chu bâkah, Jehova rorêlna chu thil siam zawng zawngte chunga remna leh hlimna thlentu tûr rorêlna fel awmchhun a ni tih hre thiam tûrin mite chu kan ṭanpui thei a ni.—Sâm 37:9, 37; 146:5, 6, 10.
17. Engtin nge Isua’n a Pa hming chu a hriattîr?
17 Jehova hming kan humhim hian, Isua Krista entawn tûr siam kan zui tihna a ni a. (Joh. 17:26) Isua chuan Jehova hming chu mite a hriattîr mai bâkah, Jehova hming ṭhatna pawh a humhim bawk. Entîr nân, ani chuan Jehova chu râwng tak, khirh tak, hnaih theih loh, leh zahngaihna nei lo anga kawng hrang hranga sawitu Pharisaite chu a dodâl a. A Pa chu hriatthiamna nei tak, dawhthei tak, hmangaihna nei tak, leh ngaihdam peih tak anga hre tûrin mite chu a ṭanpui a. A nî tin nuna a Pa miziate ṭha famkima entawnna hmangin, Jehova chungchâng hre tûrin mite chu a ṭanpui bawk a ni.—Joh. 14:9.
18. Engtin nge Jehova chungchânga dâwt thu leh sawichhiatnate chu kan hai lan theih?
18 Isua angin, mite hnênah Jehova chanchin kan hrilh thei a. Chu chuan anni chu Jehova hriatna leh a hming thianghlim zahna a neihtîr ang. Hmangaihna leh ngilneihna Pathian a nihnate pawh kan zirtîr thei a. Chutianga kan tih chuan, Jehova chungchânga dâwt thu leh sawichhiatnate chu kan hai lang a ni ang. Chu bâkah, Jehova kan entawn thei bawk. Ṭha famkim lo kan ni chung pawhin, chu chu kan tithei a ni. (Eph. 5:1, 2) Kan thusawi leh thiltihte hmanga Jehova nihna dik tak kan lantîr hian, a hming kan tithianghlim a ni. Pathian chungchâng thu dik hre tûra mite ṭanpuina hmangin, a hming chu thiam kan chantîr a. * Mihring ṭha famkimlote hi Pathian chungah kan rinawm tlat thei tih kan lantîr bawk.—Job. 27:5.
Kan Bible zirpuite chu Jehova ngilneihna leh hmangaihna miziate hre thiam tûra ṭanpui kan duh a ni (Paragraph 18-19-na en rawh) *
19. Engtin nge Isaia 63:7-na chuan mite kan zirtîr huna kan tum ber hre tûra min ṭanpui?
19 Pathian hming tithianghlim tûra kan tih theih dangte pawh a la awm a. Mite hnêna Bible thutak kan zîrtîr hian, Pathian lalchungnunna—lei leh vâna rorêl tûra dikna a neih—chu kan sawi uar fo ṭhîn a. Mahse, mite hnêna Pathian dânte zirtîr chu thil pawimawh tak a nih rualin, kan tum ber chu kan Pa, Jehova hmangaihna nei tûr leh a chunga rinawm tlat tûra ṭanpui hi a ni. Chuvângin, Jehova mize duhawm takte leh a nihna dik takte chu kan sawi uar a ngai a. (Isaia 63:7 chhiar rawh.) Chutianga kan zirtîr chuan, mite chu Jehova hmangaih tûr leh a chunga rinawm an duh avânga a thu âwih tûrin kan ṭanpui a ni ang.
20. A dawta thuziakah eng nge kan sawiho vang?
20 A nih leh, kan nungchang leh zirtîrna chuan mite chu Jehova chungchâng dik taka hre tûr leh amah hnaih tûrin a ṭanpui tih engtin nge kan chian theih? A dawta thuziak chuan chu zawhna chu a chhâng ang.
HLA 2 I Hming Chu Jehova
^ par. 5 Finna nei thil siamte’n eng thu buai pawimawh tak nge an hmachhawn? Engvângin nge chu chu thil pawimawh tak a nih a, chu thu buaiah chuan eng chanvo nge kan neih ve? Chûng zawhnate leh a kaihhnawih zawhna dangte chhânna hriatthiamna chuan Jehova nêna kan inlaichînna tinghet lehzual tûrin min ṭanpui ang.
^ par. 18 Pathian chuan Jehova tih hming pu tûrin dikna a nei lo tia sawitu an awm loh avângin, kan thu leh hla chhuahte chuan “Jehova hming chu thiam chantîr a ngai lo,” tia min zirtîr châng a nei a. Mahse, kum 2017-a kum tin intawhkhâwmnaah (annual meeting) chiang lehzuala hriatthiamna chu hrilhfiah a ni. Chairman chuan: “A tâwi zâwnga sawi chuan, Jehova hming ṭhatna chu thiam chantîr a ngaih avângin, a hming thiam chantîr a nih theih nâna ṭawngṭai chu thil sual a ni lo,” tiin a sawi a ni.—JW.ORG® website-a January 2018 (English) program chu en rawh. LIBRARY > JW BROADCASTING® tih hnuaiah lût ang che.
^ par. 62 MILEM HRILHFIAHNA: Diabola chuan Pathian chu sawichhiain, Evi hnênah Pathian chu dâwt sawiah a puh a. Kum zabi tam tak chhûng chu, Setana chuan Pathian chu râwng tak leh mihringte siamtu a ni lo tih ang chi zirtîrna dik lote chu a chawi lâr a ni.
^ par. 64 MILEM HRILHFIAHNA: Bible zirna a kaihhruai laiin, unaupa chuan Pathian miziate a sawi uar.
