“Ka unaupain (ka cousin) min rawn sual chuan a hrawkah ka rêk a. Thah ka duh hial a ni.”—Paul-a.

“Ina ka awm hian a chhan leh vâng pawh awm lovin kan thinrim nghâl mai ṭhîn a. Bungrua te, naupang infiamna thil te, leh ka ban phâka awm tawh phawt chu ka tichhe ṭhîn.”—Marco-a.

Chutiang êm chu kan ni lo mai thei. Mahse, kan zavai hian insûm harsa tih châng kan nei ṭheuh va. Chutiang a nih chhan ber chu mihring hmasa ber Adama hnên aṭanga thil sual tih châkna kan rochun vâng a ni. (Rom 5:12) Paul-a leh Marco-a te ang mi ṭhenkhat chuan an thinrimna thunun chu harsa an ti hle a. Mi dangte erawh chuan an ngaihtuahna thunun chu harsa an ti pawh a ni thei. Entîr nân, chûng mite chuan anmahni tihlautu leh tilunghnualtu thilte chu an ngaihtuah reng a. Mi dang lehte chuan nungchang bawlhhlawhna te, zu ngawlveina te, leh damdawi hman sualnate chu do harsa an ti hle thei a ni.

An ngaihtuahna te, châkna te, leh thiltihte thunun lotute chuan an nun an tichhe vek thei a. Mahse, chu chu kan pumpelh thei a ni. Engtin nge? Insûmtheihna neihna hmangin. Chumi nei tûr chuan hêng zawhna pathumte hi i lo sawiho vang u: (1) Insûmtheihna chu eng nge ni? (2) Engvângin nge chu chu a pawimawh? (3) Engtin nge he “thlarau rah” pêng zînga pakhat hi kan neih theih ang? tihte hi. (Gal. 5:22, 23) Chu bâkah, insûmtheihna kan tlâkchham huna mi mala kan tih theihte chu kan sawiho bawk ang.

Insûmtheihna nei mi chuan thil a ti thawt thawt ṭhîn lo. Chu aiin, Pathian tilâwm lo zâwnga thusawi leh thiltihte chu a pumpelh a ni.

Isua chuan insûmtheihna nei tih awmzia chu min hrilh a. Bible chuan: “Mi hauhva a awm laiin a hau ve thung lo va, a tuar laiin a vau lo va; fel taka ngaihtuah ṭhîntua hnênah chuan a inpe zâwk,” tiin a sawi. (1 Pet. 2:23) Ani chuan nghaisakna bana khai a nih laia dodâltute’n an nuihsawh khân insûmtheihna a lantîr a. (Mt. 27:39-44) A hmaa, sakhaw hruaitu vervêk takte’n a thusawia man tuma zawhnate an zawh khân, chhinchhiah tlâk takin insûmtheihna a lantîr bawk. (Mt. 22:15-22) Chu bâkah, Juda thinrim ṭhenkhatin lunga den an tum pawh khân entawn tûr a hnutchhiah a! Anni chu beih lêt aiin, ‘Isua chu a biru a, Pathian biak in ata chu a chhuak ta a ni.’—Joh. 8:57-59.

Isua entawn tûr siam chu kan zui thei ang em? Engemaw chen chu kan zui thei a ni. Tirhkoh Petera chuan: “Krista pawh khân a tuarsak che u avângin . . . a hniaka in zuina tûrin entawn tûr a hnutchhiah che u kha,” tiin a ziak a. (1 Pet. 2:21) Chuvângin, ṭha famkim lo kan ni chung pawhin, Isua entawn tûr siam chu zuiin, insûmtheihna kan lantîr thei a ni. A nih leh, engvângin nge insûmtheihna lantîr chu a pawimawh?

Jehova duhsakna dawng tûr chuan insûmtheihna kan neih a ngai a. Hun rei tak chhûng rinawm takin Jehova rawng lo bâwl tawh mah ila, kan thusawi leh thiltiha insûmtheihna kan neih loh chuan, amah nêna kan inṭhian ṭhatna chu kan hloh thei a ni.

A hun laia “lei chunga mihring zawng zawnga zaidam lâwtlak” Mosia chungchâng hi han ngaihtuah teh. (Num. 12:3) Ani chuan kum sâwmbi tam tak chhûng dawhthei taka Israel mite phunnawina a tawrh hnuah, insûmtheihna a tlachham ta a. Tui an tlâkchham avânga an phunnawi leh khân a thinrim ta a ni. Ani chuan mipui hnênah chuan: “Helhmanghote u, ngai teh u, he lungpui ata hi tui kan lâk chhuahsak dâwn che u em ni?” tiin thinrim takin a sawi a ni.—Num. 20:2-11.

Mosia chuan insûmtheihna a nei ta lo va. Mak danglam taka tui Petu Jehova chu a chawimawi lo a ni. (Sâm 106:32, 33) Chuvângin, Jehova chuan Ram Tiama a luh a phal ve lo. (Num. 20:12) Mosia chu a thinrimna a thunun loh avângin, a thih dâwn hnaih khân a inchhîr ngei ang.—Deut. 3:23-27.

Kan tâna zir tûr chu eng nge ni? Thutakah kum tam tak chhûng kan lo awm tawh a nih pawhin, min tilungni lotute, a nih loh leh zilh ngai unaute chu zah lo takin kan be tûr a ni lo. (Eph. 4:32; Kol. 3:12) Ni e, kan lo upat chhoh zêl hian, a châng chuan dawhtheihna neih chu harsa kan ti lehzual thei a. Mahse, Mosia kha hre reng ang che. Insûmtheihna tlâkchham avânga Jehova hmaa kan hming ṭhatna tihchhiat chu kan duh ngai lo vang. A nih leh, engtin nge he mize pawimawh tak hi kan neih reng theih ang?

Thlarau thianghlim dîlin ṭawngṭai rawh. Engvângin nge? Insûmtheihna hi Pathian thlarau rah pêng pakhat a nih avâng leh Jehova’n a thlarau thianghlim chu a dîltute hnêna a pêk vâng a ni. (Lk. 11:13) Thlarau thianghlim hmangin Jehova chuan kan mamawh chakna min pe thei a. (Phil. 4:13) Ani chuan hmangaihna ang chi thlarau rah pêng dangte nei tûrin min ṭanpui thei a, chu chuan insûmtheihna nei reng tûrin min ṭanpui thei bawk.—1 Kor. 13:5.

Insûmtheihna tichhe thei thil rêng rêng chu pumpelh rawh. Entîr nân, nungchang ṭhat lohna chawi lârtu intihhlimna leh Internet website-te chu pumpelh ang che. (Eph. 5:3, 4) Dik tak chuan, thil ṭha lo min tihtîr theitu eng thil pawh kan pumpelh tûr a ni. (Thuf. 22:3; 1 Kor. 6:12)  Entîr nân, nungchang bawlhhlawhna lama thlêm awlsam takte chuan inngaihzâwnna lam ziahna lehkhabute leh film-te chu an hnâwl ṭhak pawh a ngai mai thei.

He fuihna hi zawm harsa kan ti mai thei. Mahse, theih tâwp kan chhuah chuan Jehova’n mahni inthunun thei tûrin kan mamawh chakna min pe ang a. (2 Pet. 1:5-8) Kan ngaihtuahna te, kan thusawi te, leh kan thiltihte thunun tûrin min ṭanpui bawk ang. Entîr nân, kan târ lan tâk Paul-a leh Marco-a te chuan thinrimna thunun dân an zir ve ve a ni. Motor khalh laia a thinrimna thunun zo lo va, motor dang khalhtute hau ṭhîntu unaupa chungchâng hi han ngaihtuah teh. Chumi chungchângah eng nge a tih? Ani chuan, “Nî tin hian tih tak zetin ka ṭawngṭai a. Insûmtheihna chungchâng târ lanna thuziakte chu zir chiangin, min ṭanpuitu Bible chângte chu ka chhinchhiah a. Chutianga ka tihna chu kum tam tak ni tawh mah se, zaidam tum tlata ni hman ṭan chu ka la hlâwkpui reng a ni. Chu bâkah, hmanhmawh taka ka kal a ngaih loh nân, ka hnaahte chuan hma takah ka kal ṭhîn,” tiin a sawi.

Insûmtheihna neih harsa tih châng kan nei a. Chutiang hunah chuan, ṭawngṭaia Jehova pan chu kan hreh mai thei a ni. Mahse, chu chu nasa taka kan ṭawngṭai a ngaih hun ber a ni zâwk. Chuvângin, a rang thei ang berin Jehova hnênah ṭawngṭai ang che. A ngaihdamna dîlin, a ṭanpuina zawng la, i thil tihsual chu tihnawn tawh loh tum tlat bawk rawh. (Sâm 51:9-11) Jehova chuan tih tak zeta i ṭawngṭaina chu a chhâng ngei ang. (Sâm 102:17) Tirhkoh Johana chuan Pathianin a Fapa thisenin “kan sual zawng zawng min tlenfaisak ṭhîn,” tih min hriatnawntîr a. (1 Joh. 1:7; 2:1; Sâm 86:5) Chu bâkah, Jehova chuan a chhiahhlawhte chu inngaidam nawn fo tûrin a hrilh tih hre reng bawk ang che. Chuvângin, ani pawhin kan chungah chutiang chuan a ti ang tih kan chiang thei a ni.—Mt. 18:21, 22; Kol. 3:13.

Mosia’n thlalêra hun rei lo te chhûng insûmtheihna a tlâkchham khân Jehova chu a lâwm lo hle. Mahse, ani chuan Mosia chu a ngaidam a ni. Chu bâkah, Pathian Thu chuan Mosia chu rinna kawnga entawn tûr ṭha tak angin a târ lang bawk. (Deut. 34:10; Heb. 11:24-28) Jehova chuan Mosia chu Ram Tiama a luh phal lo mah se, Paradis-ah hruai lûtin, chatuan nun beiseina chu a pe ang. Insûmtheihna mize pawimawh tak neih tuma theih tâwp kan chhuah chuan, chu beiseina chu kan nei ve thei ang.—1 Kor. 9:25.