ZIR TUR THUZIAK 26
‘Ka Hnênah Lo Kîr Rawh U’
“Ka hnênah lo kîr ula; tichuan, in hnênah ka lo kîr ang.”—MAL. 3:7.
HLA 102 Chak Lote Ṭanpui Rawh U
THLIR LAWKNA *
1. A berâm zînga pakhat chhan chhuah a nih hian Jehova chu engtin nge a awm?
THUZIAK hmasaa kan sawiho tâk ang khân, Jehova chu hmangaihna nei taka a berâm tinte ngaihsaktu berâm vêngtu ṭha angin a insawi a. Ani chuan a berâm bote chu a zawng a. Amah kalsantu Israelte chu: “Ka hnênah lo kîr ula; tichuan, in hnênah ka lo kîr ang,” tiin a hrilh a ni. Ani chuan: “Ka danglam si lo,” tia a sawi avângin, chutiang rilru put hmang chu a la nei reng tih kan hria a ni. (Mal. 3:6, 7) Jehova kal bosantu a chhiahhlawhte zînga pakhat chauh pawh a hnêna a kîr leh hian, Jehova leh vântirhkohte chu an lâwm hle tih Isua’n a sawi.—Lk. 15:10, 32.
2. He thuziakah hian eng nge kan sawiho vang?
2 Jehova kal bosantute ṭanpui dân chungchâng târ langtu Isua sawi tenkhin thu pathumte chu i lo ngaihtuah ang u. Jehova hnêna lo kîr leh tûra berâm bote ṭanpui huna kan neih ngai mize ṭhenkhat kan sawiho vang a. Thlarau lama chak lote ṭanpui tûra theih tâwp chhuah chu thil manhla tak a nih chhan pawh kan sawiho bawk ang.
DULI BO ZAWNNA
3-4. Luka 15:8-10-a târ lan hmeichhia chuan engvângin nge a duli bo chu ngun taka a zawn?
3 Jehova hnêna kîr leh duhte zawng hmu tûr chuan theih tâwp kan chhuah a ngai a. Chanchin Ṭha Luka ziaka tehkin thu-ah, Isua chuan hmeichhe pakhatin a hlut tak a duli bo a zawn dân a sawi a. He tehkhin thu hian theih tâwp chhuaha a zawn dân min ngaihventîr a ni.—Luka 15:8-10 chhiar rawh.
4 Isua chuan duli hlu tak bo zawng hmutu hmeichhe rilru put hmang chu a târ lang a. Isua hun lai chuan Juda hmeichhe ṭhenkhat chuan an fanute pasal neih nîah duli sâwm an pe ṭhîn niin a lang. Chu duli bo chu a pasal neih nîa a dawn duli sâwm zînga mi a ni ngei ang. Chu hmeichhia chuan duli chu chhuatah a thlauh niin a hria a. Chuvângin, khâwnvâr a chhî a, a zawng vêl a; mahse, engmah a hmu lo. A sahriak khâwnvâr chu a duli bo hmu tûr khawpin a êng tâwk lo pawh a ni mai thei. A tâwpah, a in chhûng chu uluk takin a phiat ta a. A phiah khâwm vaivut kâra lo awm reng a duli bo hlu tak chu khâwnvâr êng chuan a chhun tle ta ser mai a. A va lâwm tak êm! Tichuan, amah lâwmpui tûrin a ṭhiante leh a vêngte chu a sâwm ta a ni.
5. Engvângin nge kohhran aṭanga tawlh bote zawn hmuh chu a harsat mai theih?
5 Isua tehkhin thua kan hmuh angin, thil bo zawng hmu tûr chuan theih tâwp kan chhuah a ngai a. Chutiang bawkin, kohhran aṭanga tawlh bote zawng hmu tûr chuan theih tâwp kan chhuah a ngai thei a ni. Kan zînga an tel tawh lohna chu kum tam tak a liam tawh pawh a ni thei. Anni chu tualchhûng unaute hriat lohna hmunah an insawn pawh a ni thei bawk. Mahse, rawngbâwlnaa tel tawh lo chûng mite zînga ṭhenkhat chuan tûnah ngei pawh Jehova hnêna lo kîr leh chu an duh tih kan chiang a ni. Kohhrana unaute ruala Pathian Jehova rawngbâwl leh chu an duh a; mahse, kan ṭanpuina an mamawh a ni.
6. Engtin nge kohhrana unau zawng zawngte chu rawngbâwlnaa tel tawh lote zawnnaa an tel theih?
6 Rawngbâwlnaa tel tawh lote zawnnaah tute nge tel thei? Kohhran upa te, pioneer te, an chhûng te, leh kohhrana thuchhuahtute pawh tiamin, kan vai hian kan tel thei a ni. Rawngbâwlnaa tel tawh lo ṭhian emaw, chhûngte emaw i nei em? In tina rawngbâwlnaah leh vântlâng hmuna thu hrilhnaah anni chu i tawng tawh ṭhîn em? Tlawh an duh dâwn chuan, anmahni biak pawh theihna chu tualchhûng kohhran upate hnêna pêk i duh thu hrilh ang che.
7. Kohhran upa Thomas-a thusawi aṭangin eng nge i zir?
7 Upate’n Jehova hnêna kîr leh duhte zawng hmu tûrin engtin nge hma an lâk theih? Kohhran upa Thomas-a * thusawi hi lo chhinchhiah rawh. Ani chu Spain rama awm a ni a, Thuhretu 40 aia tamte chu kohhrana lo kîr leh tûrin a ṭanpui tawh a ni. Ani chuan: “A hmasain, unaute hnênah rawngbâwlnaa tel tawh lote awmna an hriat leh hriat loh ka zâwt a. A nih loh leh, thuchhuahtute chu inkhâwma lo tel tawh lo unaute hriat an neih leh neih loh ka zâwt a ni. Kohhrana unau a tam zâwk chuan, chutiang mite zawnnaa tel ve nia an inhriat avângin phûr takin min hrilh ṭhîn a. A hnuah, rawngbâwlnaa tel tawh lo unaute ka va tlawh hian, an fate leh an chhûngkhat lainate chanchin pawh ka zâwt a. An zînga ṭhenkhat chuan tûn hmain an fate pawh inkâwmahte an hruai ṭhînin, a ṭhen phei chu thuchhuahtute an lo ni tawh ṭhîn a. Anni pawh Jehova hnêna kîr leh tûra ṭanpui theih an ni,” tiin a sawi.
JEHOVA FANU LEH FAPA BOTE CHU HRUAI KIR LEH RAWH
8. Luka 15:17-24-a kan hmuh fapa tlân bo tehkhin thu-ah, a pa chuan a fapa inchhîr chu engtin nge a cheibâwl?
8 Jehova hnêna kîr leh duhte ṭanpui tûrin eng miziate nge kan neih ngai? Fapa tlân bo luhlul tak chungchâng Isua tehkhin thu aṭanga kan zir theih ṭhenkhat chu lo chhinchhiah ang che. (Luka 15:17-24 chhiar rawh.) Isua chuan chu fapa tlân bo chu a tâwpah inhre chhuakin, ina haw leh a duh thu a sawi a. A pa chuan a fapa chu lo hmuakin, a hmangaihzia lantîr nân lâwm takin a lo pawm a ni. A fapa chuan mahni inthiam lohna a la neiin, a pa faa vuah tlâk ni tawh lovin a inngai a. A pa chuan a rilru sawi chhuak vektu a fapa chu a khawngaih ta êm êm a ni. Tichuan, a fapa chu chhiahhlawh ang ni lovin, a chhûngkaw zînga mi anga a lo pawmzia lantîrtu thil engemaw a ti ta a. Inchhîra lo haw a fapa tân ruai ṭhehsakin, puan ṭha ber berte a pe a ni.
9. Rawngbâwlnaa tel tawh lo unaute chu Jehova hnêna kîr leh tûra ṭanpui tûrin eng rilru put hmang nge kan neih ngai? (“ Kohhrana Kîr Leh Duhte Ṭanpui Theih Dân,” tih bâwm chu en rawh.)
9 Jehova chu, chu tehkhin thua pa ber ang a ni a. Ani chuan rawngbâwlnaa tel tawh lo unaute chu a hmangaihin, a hnêna kîr leh tûrin a duh a ni. Jehova entawnin, keini pawhin chûng mite chu lo kîr leh tûrin kan ṭanpui thei a. Chutianga ti tûr chuan dawhtheihna te, khawngaihna te, leh hmangaihna te kan neih a ngai a ni. Engvângin nge chûng miziate chu kan lantîr ang a, engtin nge kan lantîr theih?
10. Thlarau lama ṭha chho leh tûra tuemaw ṭanpuinaah dawhtheihna chu engtiang khawpa pawimawh nge a nih?
10 Mi chu thlarau lama tihdam ni tûr chuan hun pêk a ngaih avângin dawhtheihna kan neih a ngai a. Hun rei tak chhûng rawngbâwlnaa tel tawh lo mi tam tak chuan kohhran upate leh unau dangte’n vawi tam tak an tlawh hnuah chauh an lo kîr leh tih an sawi a ni. Asia Chhim-chhak lama awm unaunu Nancy-i chuan: “Kohhrana ka ṭhian hnai tak pakhatin min ṭanpui nasa hle a. Ani chuan pianpui unau angin mi hmangaih a ni. Tûn hmaa kan hun hman dun ṭhinte chu min hriat chhuahtîr a. Ka rilrua awmte ka sawi chhuah chuan dawhthei takin min ngaihthlâksak a, thurâwnte pawh min pe hreh lo. Ani chu ṭhian ṭha a ni tak zet a, eng hunah pawh min ṭanpui a inpeih reng,” tiin a sawi.
11. Engvângin nge rilru hliam tidam tûrin khawngaihna kan neih a ngaih?
11 Khawngaihna chu damdawi ṭha tak ang a ni a, rilru hliam a tidam thei a ni. Rawngbâwlnaa tel tawh lo mi ṭhenkhat chuan kum tam tak chhûng chu kohhrana tuemaw chungah lungnih lohna an nei thei a. Chu chuan Jehova hnêna kîr leh an duhna chu a dâl thei a ni. Mi ṭhenkhat chu dik lo taka cheibâwl niin an inngai mai thei. An thusawite ngaihthlâksaktu leh an rilru vei zâwngte hriatthiampuitu an mamawh a. (Jak. 1:19) Tûn hmaa rawngbâwlna lo chawlhsan tawh María-i chuan: “Ka thusawite min ngaithlâksak a, min thlamuan a, thurâwn ṭhate min petu tûr ṭhian ka mamawh a ni,” tiin a sawi.
12. Engtin nge Jehova hmangaihna chu hrui nên a inan?
12 Bible chuan Jehova’n a mite a hmangaihna chu hrui angin a târ lang a. Eng kawngin nge Pathian hmangaihna chu hrui ang a nih? He entîrna hi han ngaihtuah teh: Tuipui so but but kârah i tla a, tuemawin i lamah chhanhimna kawr a rawn theh a. Chu chuan tuia a tihlâng theih che avângin a ṭanpuina chu i hlut ngei ang. Mahse, i dam khawchhuah theih nân chhanhimna kawr chu a tâwk mai lo. Tui chu a vawh êm avângin chhanhimna lawnglênga i chuankai loh chuan i dam khawchhuak lo vang. I hnêna hrui rawn thehtu tûr leh chhanhimna lawnglênga hruai kaitu tûr che tuemaw i mamawh a ni. Jehova chuan amah kalsantu Israelte chungchângah heti hian a sawi a ni: “Hmangaihna hruite chuan anmahni ka kai a,” tiin. (Hos. 11:4) Pathian chuan tûn laia a rawngbâwlnaa tel tawh lote leh buaina leh lungngaihna chîm pila awmte chungah chutiang rilru put hmang chu a nei a ni. Anni chu a hmangaihin, amah hnaih tûrin a duh tih hria se tih a duh a. Jehova chuan an hnêna a hmangaihna lantîr tûrin a hmang thei che a ni.
13. Unau inhmangaihnain thil a tihtheihzia târ langtu thiltawn sawi rawh.
13 Rawngbâwlnaa tel tawh lote chuan Jehova’n a la hmangaih ang bawkin, keini pawhin kan hmangaih tih an hriat a pawimawh hle a. Thuziak hmasaa kan târ lan tâk unau Pablo-a chu kum 30 chuang rawngbâwlnaah a tel tawh lo va. Ani chuan: “Tûk khat chu, in aṭanga ka chhuah dâwn lai takin, kum upa lam unaunu ngilnei tak hian hmangaihna nei takin min bia a. Naupang ang maiin ka ṭap chhuak ta hlawl a. Min rawn be tûra Jehova mi tirh nia ka rin thu ka hrilh a. Chuta ṭang chuan Jehova hnêna kîr leh ka tum ta a ni,” tiin a sawi.
CHAK LOTE CHU HMANGAIHNA NEI TAKIN ṬANPUI RAWH
14. Luka 15:4, 5-a kan hmuh tehkhin thu angin, berâm vêngtuin a berâm bo a hmuh veleh eng nge a tih?
14 Rawngbâwlnaa tel tawh lote chuan kan ṭanpui zawm zêl an mamawh a. Isua tehkhin thu-a fapa tlân bo angin, chûng mite chuan rilru lamah hliam an nei mai thei a ni. Setana khawvêla an thiltawnte avângin thlarau lamah an chau hle pawh a ni thei bawk. Jehova chunga rinna an neih leh theih nân kan ṭanpui a ngai a ni. Berâm bo tehkhin thu-ah, Isua chuan berâm vêngtuin a berâm chu a kokîah puin berâm rual zînga a hruai kîr leh dân a sawi a. Berâm vêngtu chuan a berâm bo zawng hmu tûrin hun leh thate a sêng a. Mahse, berâm bo chuan berâm rual zînga amaha kîr leh tûra chakna a neih tawh loh avângin, a pawm haw a ngai tih a hria a ni.—Luka 15:4, 5 chhiar rawh.
15. Jehova hnêna kîr leh duh unau chak lote chu engtin nge kan ṭanpui theih? (“ Hmanraw Hlu Tak,” tih bâwm chu en rawh.)
15 Rawngbâwlnaa tel tawh lote chu Jehova hnêna kîr leh tûra kan ṭanpuinaah hun leh tha tam tak kan sên a ngai thei a. Mahse, Jehova thlarau thianghlim, a Thu, leh kohhran aṭanga kan dawn thu leh hla chhuahte hmangin thlarau lama chak leh tûrin kan ṭanpui thei a ni. (Rom 15:1) Chu chu engtin nge kan tih theih? Thiltawn ngah tak kohhran upa pakhat chuan: “Rawngbâwlnaa tel tawh lo a tam zâwk chuan Jehova hnêna kîr leh tûra thu tlûkna an siam hnuah Bible zirna neihpui an mamawh,” * tiin a sawi. Chuvângin, rawngbâwlnaa tel tawh lote Bible zirpui tûra hriattîr i nih chuan, engvângin nge chu chanvo hlu chu i pawm loh vang? Chu kohhran upa chuan heti hian a sawi belh a ni: “Anmahni Bible zirpuitu thuchhuahtu chu an tâna ṭhian ṭha tak leh an rinchhan ngam unau a ni tûr a ni,” tiin.
LEI LEH VANA HLIMNA
16. Vântihkohte’n min ṭanpui ang tih engtin nge kan hriat theih?
16 Jehova hnêna kîr leh duh rawngbâwlnaa tel tawh lote zawn chhuahnaah vântirhkote’n min thawhpui tih thiltawn tam tak chuan a târ lang a ni. (Thup. 14:6) Entîr nân, Ecuador rama unau Silvio-a chu kohhrana a lo kîr leh theih nân ṭanpuina dîlin, tih tak zetin a ṭawngṭai a. A ṭawngṭai lai mêk chuan, a kawngkâ chu an rawn kik a. Kohhran upa pahnih chu kawngka hmaah an lo ding reng a. A mamawh ṭanpuina an pêk theih avângin kohhran upate chu an hlim hle a ni.
17. Thlarau lama chak lote kan ṭanpui avângin eng malsâwmnate nge kan dawn?
17 Jehova hnêna kîr leh tûra thlarau lama chak lote kan ṭanpuinaah hlimna nasa tak kan hmu thei a ni. Rawngbâwlnaa tel tawh lote ngaihsak êm êmtu pioneer Salvador-a sawi hi chhinchhiah ang che: “A châng chuan, ka hlim avânga mittui tla lo tûra insûm chu harsa ka ti a. Jehova’n a berâm duh tak chu Setana khawvêl aṭangin a chhan chhuak tih leh chu chhan chhuahnaah chuan Amah thawhpui theihna chanvo hlu ka nei tih ka hriat avângin ka hlim hle,” tiin a sawi.—Tirh. 20:35.
18. Rawngbâwlnaa tel tawh lo i nih chuan eng nge i chian theih?
18 A mite zîngah i tel tawh lo a nih pawhin, Jehova chuan a la hmangaih reng che tih hre reng rawh. A hnêna kîr leh tûrin a duh che a ni. A hnêna kîr leh tûr chuan thil ṭhenkhat i tih a ngai a. Mahse, Isua tehkhin thua pa ber angin, Jehova chuan i lo kîr leh hun chu a nghâk reng a, chutianga i tih chuan lâwm takin a lo pawm leh ang che.
HLA 103 Mihringte Hnêna Thilpêk Berâm Vêngtute
^ par. 5 Jehova chuan inkhâwmna leh rawngbâwlnaa tel tawh lote chu a hnêna kîr leh tûrin a duh a. “Ka hnênah lo kîr ula,” tia Jehova sâwmna pawm duhte ṭanpui tûrin thil tam tak kan ti thei a ni. He thuziakah hian chutianga kan ṭanpui theih dânte chu sawiho a ni ang.
^ par. 7 Hming ṭhenkhat chu thlâk a ni.
^ par. 15 Rawngbâwlnaa tel tawh lo unau ṭhenkhat chu Pathian Hmangaihnaah Chuan Invawng Ṭha Rawh tih lehkhabu zirpuina hmangin ṭanpui theih a ni a, ṭhenkhat erawh chuan Draw Close to Jehovah tih lehkhabu ennawnpuina chu an hlâwkpui a ni. Kohhran-a Service Committee chuan chutiang mite Bible zirpuitu tûr chu uluk takin an thlang ang.
^ par. 68 MILEM HRILHFIAHNA: Unaupa pathumte chuan Jehova hnêna kîr leh duh unaupa chu an ṭanpui a. Anni chuan phone-a biain, an hmangaihzia an hrilh a, hriatthiamna nei taka a thusawite ngaithlain an ṭanpui a ni.
