KAN zaiin he “ni hnuhnûngahte” hian Jehova’n a mite chu thlarau lamah a kaihruaiin, a châwm tih kan ring ṭheuh va. (2 Tim. 3:1) Mahse, mi tin hian chu chu kan chhân lêt a ngai a ni. Kan dinhmun chu thlalêra Israel mite dinhmun nên kan khaikhin thei a. Anni chuan tawtawrâwt ham ri an hriat chuan an chhân lêt a ngai a ni.

Jehova chuan Mosia chu “mipuiho koh khâwm nân leh chhuahhtîr nân” tangkaraw tawtawrâwt pahnih siam tûrin a hrilh a. (Num. 10:2) Puithiamte chuan mipui tih tûr hriattîr nân chûng tawtawrâwtte chu kawng chi hrang hrangin an hâm ṭhîn a ni. (Num. 10:3-8) Tûn laiah pawh, Pathian mite chuan kawng chi hrang hrangin kaihhruaina kan dawng a. He thuziakah hian, kaihhruaina kan dawn dân kawng thumte leh chûngte chu hmân lai Israelte hun laia tawtawrâwt ham dân nêna kan khaikhin theih dânte sawiho a ni ang. Chûng kawng thumte chu inhmuhkhâwmnaa tel tûra sâwmna te, zirtîrna dawng tûra kohhran upate sâwmna te, leh kohhran zawng zawng tâna theocratic ruahmanna siamremnate hi a ni.

Jehova’n “mipui zawng zawng chu” inbiakna puan in chhak lam kawngka bula inhmukhâwm tûra a duh hunah, puithiamte chuan tawtawrâwt chu a pahnihin an hâm a. (Num. 10:3) Inbiakna puan in hual vêla awm Israel hnam zawng zawng chuan chu kohna danglam tak chu an hria a ni. Kawngka bul hnai deuhva awmte chuan hun rei lote chhûngin an chhâng lêt thei ngei ang. Mahse, mi dangte tân chuan an awmna a hlat deuh avângin, rawn kal khâwm tûrin hun leh tha tam tak an sên pawh a ngai thei a. A enga pawh chu ni se, Jehova chuan mi zawng zawng chu kal khâwm vêk tûr leh a kaihhruainate hre tûrin a duh a ni.

Tûn laiah chuan, inbiakna puan inah kan kal khâwm tawh lo va; mahse, Pathian mite inhmuhkhâwmnaa tel tûra sâwm kan ni. Chutah chuan regional inkhâwmpui leh hriattîrna leh kaihhruaina pawimawh tak kan dawnna hun pawimawh dangte pawh a tel a ni. Khawvêl puma Jehova mite chuan kaihhruaina leh ruahmanna inang an dawng vek a. Chuvângin, chûng inkhâwmtea lo tel tûra sâwmna chhâng lêttute chu mi hlim thei takte zînga mi an ni. Ṭhenkhat tân hmun hla tak aṭanga an rawn pan a ngai ṭhîn a. Mahse, sâwmna chhâng lêttute chuan an inpêkna chu manhla tak a ni tih an pawm a ni.

A nih leh, chûng inhmuhkhâwmna hmun aṭanga hla taka awmte chungchâng hi eng nge ni ve? Anni chuan tûn lai thiamna hmanga kaihhruaina leh ruahmanna inang an hlâwkpui theih avâng leh kan zînga tel ve anga inhriatna an neih theih avângin a lâwmawm hle a ni. Entîr nân, headquarter aiawhtuin Benin branch a tlawh ṭumin, program chu Sahara Thlalêr chhûnga awm Niger rama lungalhthei  laih chhuahna hmun Arlit khuaah pêk chhuah a ni a. Kan unau sawmhnih leh pakhatte leh tuina neite chu thusawi ngaithla tûrin an kal khâwm a ni. Hmun hla taka an awm chung pawhin, Benin rama mi 44,131 kal khâwmte nên inpumkhat niin an inhria a. Unaupa pakhat chuan: “Program kan en theih nâna ruahmanna min siamsak avângin thinlung takin lâwmthu kan sawi a ni. Hei hian min ngaihsakzia a târ lang chiang hle,” tiin a sawi.

Israel puithiamte’n tawtawrâwt pakhat chauh an ham chuan, “hotu puipate chauh” inhmuhkhâwmna puan inah an kal tûr a ni. (Num. 10:4) Chutah chuan Mosia hnên aṭanga hriattîrna leh zirtîrnate an dawng thei ang. Chu chuan mahni hnam ṭheuh enkawl tûra an mawhphurhna hlen thei tûrin a ṭanpui dâwn a ni. Chûng hotu puipate zînga pakhat ni ta la, chutiang inhmuhkhâwmnaa tel tûr leh hlâwkpui tûrin i tih theih apiang chu i ti dâwn lâwm ni?

Tûn laiah, kohhran upate chu “hotu puipate” an ni tawh lova; Pathian berâm rualte an enkawlnaah an intilal hek lo. (1 Pet. 5:1-3) Mahse, berâm rualte chu a ṭha thei ang berin an enkawl a. Chuvângin, Lalram Rawngbâwlna School ang chi, a bîk taka zirtîrna dawng tûra sâwm an nih hian inhuam takin an chhâng lêt a ni. Chutiang zirtîrna an dawn chhûng chuan, upate chuan kohhran thilte ṭha lehzuala an enkawl theih dân an zir a. Chu chu kan za atâna thlarau lama hmasâwnna tûr a ni. Chu school chu i kal ve lo a nih pawhin, a kalte hnên aṭangin hlâwkna i hmuh ngei a rinawm.

Israel puithiamte chuan tawtawrâwt chu râlkhêl hama an ham châng a awm a. Chu chuan riahhmuna awm zawng zawngte chu Jehova’n insawn tûrin a duh tih a hriattîr a ni. (Num. 10:5, 6) Riahhmun aṭanga mite an insawn hunah, fel tak leh ṭha taka insawn thei tûr chuan theih tâwp an chhuah a ngai a ni. A châng chuan, mi ṭhenkhatin chutianga an insawn chhan chu a hre lo mai thei. Engvângin nge?

A ṭhen chuan insawn tûra hriattîrna chu zing lutuk leh rin loh taka thleng niin an ngai mai thei. “A châng chuan chhûm chu tlai lam aṭanga zîng thlengin a awm a.” Hun dangah chuan “ni hnih emaw, thla khat emaw, kum khat emaw” a awm ṭhîn a ni. (Num. 9:21, 22) A nih leh, awmhmun chu vawi eng zât chiah nge an insawn? Number bung 33-na chuan Israel mite’n hmun 40 vêla awmhmun an khuar thu a sawi a ni.

Israel mite chu daihlima awmhmun an khuar chângte a awm a. ‘Thlalêr zau tak leh râpthlâk takah’ chuan, chutiang hmun daihlima awmhmun khuar chu a duhawm hle ang. (Deut. 1:19) Chuvângin, insawn leh chu hmun hrehawm zâwk panna mai nia ngaih chu a awlsam hle thei ang.

Israelte’n an awmna hmun an sawn ṭan chuan, mi ṭhenkhat tân an insawn hun tûr nghah chu thil harsa tak a ni thei a. Mi zawng zawngin râlkhêl hama ham tawtawrâwt rî chu hre vek mah se, a rualin an insawn vek thei lo a ni. Râlkhêl hama ham tawtawrâwt ri hmasa ber chu chhak lama awmhmun khuar Juda hnam te, Isakara hnam te, leh Zebuluna hnamte insawn tûra hriattîrna a ni a. (Num. 2:3-7; 10:5, 6) Chûng hnamte an insawn hnuah puithiamte’n tawtawrâwt chu râlkhêl hama an ham leh chuan, chu chu chhim lama awm hnam chi thumte insawn tûra hriattîrna a ni. An zavaia an insawn hma chu, puithiamte chuan an hâm zawm zêl a ni.

Inawpna pâwlin thil ṭhenkhat a siamrem chhan chu i hre thiam lo pawh a ni thei. Beisei lo taka insiamremna tam tak a awm hian, ngaih dân tam tak min neihtîr mai thei a. A nih loh leh, a hmaa thiltih dân chu ṭha i tiin, siamrem ngai i ti lo pawh a ni mai thei. A chhan chu engpawh ni se, insiamremnate a awm fo avângin dawhtheihna lantîr chu harsa i ti mai thei a ni. Mahse, chûng insiamremnate chu kan tâna ṭha tûr a ni tih hriaa kan zawm chuan Jehova malsâwmna kan dawng ngei ang.

Mosia hun laiin, Jehova chuan a hmei a pa, leh naupangte pawh tiamin, mi maktaduai têlte chu thlalêrah a kaihruai a. A ṭanpuina leh kaihhruaina dawng lo se chuan an dam khawchhuak hauh lo vang. Tûn laiah pawh, Jehova chuan he hun hnuhnûng khîrh tak chhûng hian min kaihruai a. Ani chuan amah hnaih reng tûr leh rinna nghet tak nei tûrin min ṭanpui a ni. Chuvângin, kan zavai hian, Israel mi rinawmte angin chi hrang hranga ham tawtawrâwt rî chu chhân lêt i tum tlat ang u!