1. Jehova’n kan zînga mi tinte tân eng thil nge a tih?

PATHIAN JEHOVA chuan a lamah min hîp ṭheuh va. (Joh. 6:44) Chumi awmzia chu han ngaihtuah teh. Jehova’n khawvêla mi maktaduai tam tak a han en hian, nangmahah thil hlu tak engemaw—amah hmangaih duhna thinlung ṭha i nei tih a hmu a ni. (1 Chro. 28:9) Jehova chuan a hria chein, a hre thiam che a, a hmangaih bawk che a ni. A va thlamuanthlâk tak êm!

2. Engtin nge Isua chuan Jehova’n a berâm tinte chu a ngaihsak tih a târ lan?

² Jehova chuan a ngaihsak hle chein, Kristian unau zawng zawngte pawh a ngaihsak a. Chumi hriatthiam nân, Isua chuan Jehova chu berâm vêngtu nên a khaikhin a ni. Berâm vêngtu chuan a berâm rual 100 zîngah 1 kal bo ta se, eng nge a tih ang? Ani chuan “sawmkua leh pakuate chu hnutchhiaha, tlângah han kalin, a bo chu a zawng” ngei ang. A zawn hmuh hunah pawh, a kal bo avângin a chungah a thinrim lo vang a. Chu aiin, a lâwm zâwk ang. Kan zir tûr chu eng nge ni? Berâm tinte hi Jehova tân an pawimawh ṭheuh va. Isua chuan: “Hêng mi tête zînga pakhat boral pawh hi in Pa vâna mi duh zâwng a ni lo ve,” tiin a sawi a ni.—Mt. 18:12-14.

3. He thuziakah hian eng nge kan sawiho vang?

³ Kan Kristian unaute tilunghnualtu nih chu kan duh ngai lo vang. A nih chuan, engtin nge mi dangte tihtlûk chu kan pumpelh theih? Tuemawin kan rilru a tina a nih chuan eng nge kan tih theih? He thuziakah hian chûng zawhnate chu chhân a ni ang. Tûnah, a hmasain, Matthaia bung 18-a târ lan “hêng mi tête” chungchâng hi hriat belh i lo tum ang u.

4. “Hêng mi tête” hi tute nge an nih?

⁴ “Hêng mi tête” hi Isua zirtîr a pui a pangte an ni a. An kum chu eng zât pawh ni se, anni chu inhuam taka Isua zirtîrna dawng duhtu “naupang tê ang” an ni. (Mt. 18:3) An seilen dân te, an hnam dân te, an thil thlîr dân te, leh an miziate chu inang lo hle mah se, an vaiin Krista an ring vek a. Krista pawhin anni chu a hmangaih hle a ni.—Mt. 18:6; Joh. 1:12.

5. Jehova chu tuemawin a mite zînga pakhat a titlu emaw, a rilru a tihnat emaw hian engtin nge a awm?

⁵ “Hêng mi tête” zînga tel zawng zawngte hi Pathian Jehova tân an hlu vek a. Jehova’n anmahni a thlîr dân hre thiam tûrin, naupangte kan thlîr dân hi han ngaihtuah teh. Naupangte chu kan tân an hlu hle a. Puitlingte anga chakna te, thiltawn te, leh finnate an la neih loh avângin vênhim kan duh a ni. Dik tak chuan, mi dangte hrehawm tuar lai hmuh chu kan duh lo va, a bîk takin, tuemawin naupang a tihduhdah hian kan tawrhpuiin, kan thin a rim hial a ni. Chutiang bawkin, Jehova chuan min vênhim a duh a. Tuemawin a mite zînga pakhat a titlu emaw, a rilru a tihnat emaw hian a tawrhpuiin, a thin a rim hial a nih chu!—Is. 63:9; Mk. 9:42.

6. Korinth thawn khat 1:26-29-a sawi angin, khawvêl mite’n Isua zirtîrte chu engtin nge an thlîr?

⁶ Eng kawng dangin nge Isua zirtîrte chu “mi tête” ang an nih? A nih leh, khawvêl mite hian tute nge mi pawimawh anga an ngaih? Mi hausa te, mi hmingthang te, leh mi thiltitheite an ni. Chumi nêna inkalh takin, Isua zirtîrte chu mi pawimawh lo, mi langsâr lo, leh “mi tête” anga thlîr an ni a. (1 Korinth 1:26-29 chhiar rawh.) Mahse, Jehova’n anni chu chutiang chuan a thlîr lo.

7. Jehova’n kan unaute chu eng anga thlîr tûrin nge min duh?

⁷ Pathian Jehova chuan a chhiahhlawh zawng zawngte chu, kum tam tak chhûng a rawng an lo bâwl tawh emaw, thutak an hriatna a la rei lo emaw pawh ni se, a hmangaih vek a. Kan unau zawng zawngte chu Jehova tâna an pawimawh angin, kan tân pawh an pawimawh tûr a ni. Unau ṭhenkhat chauh ni lovin, “unauhote chu hmangaih” kan duh a. (1 Pet. 2:17) Anmahni vênghim tûr leh ngaihsak tûrin inhuam takin kan tih theih apiang kan ti tûr a ni. Kan unau tuemaw rilru kan tina emaw, kan tilungni lo emaw a nih chuan, ani chu thinrim hma lutuk leh insiamrem mamawh anga ngaiin kan ngaihthah mai tûr a ni lo. Engvângin nge mi ṭhenkhat chu lungni lova an awm mai theih? Kan unau ṭhenkhat chuan enkawl seilen an nih dân avângin, mahni insitna thûk tak an nei thei a. Unau dangte chuan thutak an hriatna a la rei loh avângin, mite ṭhat famkim lohna chhân lêt dân an la thiam lo pawh a ni thei. A enga pawh chu ni se, remna siam tûrin kan tih theih apiang kan ti tûr a ni. Chu bâkah, mi dangte chunga lungnih lohna nei fotu chuan hei hi a hneh ngai mize ṭha lo tak a ni tih a pawm tûr a ni. Rilrua thlamuanna a neih theih nân leh mi dangte ṭhatna tûrin chutianga hma a lâk chu a ngai a ni.

8. Isua zirtîrte chu eng rilru put hmang lâr takin nge thunun?

⁸ Engvângin nge Isua’n “hêng mi tête” chungchâng hi a sawi? A zirtîrte chuan: “Vân ramah tu nge ropui ber ang le?” tiin an zâwt a. (Mt. 18:1) Chutih hun laia Juda tam tak chuan nihnate an ngai pawimawh hle a. Bible lama mi thiam pakhat chuan: “Mite chawimawina dawn te, hming ṭha neih te, hmingthan te, mi pawm hlawh te, leh mi zahkai nihte chu nuna an thil ngaih pawimawh ber a ni,” tiin a sawi.

9. Isua zirtîrte’n eng nge an tih ngai?

 ⁹ Isua chuan a zirtîrte’n Juda hnam dâna bet tlat inelna rilru put hmang chu an thinlung aṭanga a zung chawpa paih bo tûrin theih tâwp an chhuah a ngai tih a hria a. An hnênah: “In zînga ropui ber chu nau zâwk angin awm sela, lal ber chu rawngbâwltu angin awm zâwk rawh se,” tiin a hrilh a ni. (Lk. 22:26) ‘Mi dangte chu ṭha zâwka’ kan ruat hian “nau zâwk” angin kan awm tihna a ni. (Phil. 2:3) Chutiang rilru put hmang kan neih nasat poh leh mi dang kan titlu lo lehzual ang.

10. Paula pêk eng fuihna nge kan hriat reng ang?

¹⁰ Unau zawng zawngte hian kawng eng emawti takin kan aia ṭhat zâwkna an nei vek a. An mize ṭhate kan ngaihven tlat hian, chumi hriatthiam chu a awlsam lehzual a ni. Korinth khuaa mite hnêna tirhkoh Paula fuihna: “Nang tuin nge tilêm chuang che; i dawn loh chu eng nge i neih ni? I dawn a nih si chuan engati nge dawn ni lo anga i uanpui ni?” tih thu hi kan hre reng tûr a ni. (1 Kor. 4:7) Chuvângin, mahni chauh inngaihtuahna emaw, mi dang aia ṭha zâwk nia inngaihna emaw nei lo tûrin kan fîmkhur tûr a ni. Entîr nân, thusawi ṭha tak petu unaupa emaw, Bible zirpui tam tak nei ṭan theitu unaunu emaw chuan, Pathian Jehova an chawimawi vat ṭhîn tûr a ni.

11. Lal leh bâwih chungchânga Isua tehkhin thuin a sawi tum chu eng nge ni?

¹¹ Isua’n mi dangte titlu lo tûra a hnungzuitute a vaukhân hnu lawkah, lal leh bâwih chungchâng tehkhin thu a sawi a. Lal chuan bâwih chu a rulh theih ngai loh tûr a leiba tam tak a ngaidam a ni. A hnuah, chu bâwih chuan a bâwihpui leiba tlêm tê chu a ngaidam duh lo va. A tâwpah, lal chuan hmangaihna nei lo chu bâwih chu tân inah a khung ta a ni. Kan zir tûr chu eng nge ni? Isua chuan: “Mi tinin thinlung taka in unaute in ngaihdam loh chuan ka Pa vâna mi pawhin chutiang bawkin in chungah a ti ve ang,” tiin a sawi a ni.—Mt. 18:21-35.

12. Mi dang kan ngaihdam duh loh hian, engtin nge an rilru kan tihnat?

¹² Bâwih thiltih chuan ama chungah mai ni lovin, mi dangte chungah pawh chhiatna a thlen a. Pakhatna, hmangaihna leh ngilneihna nei lovin, a bâwihpui chu ‘a bâ a tlâk hma loh zawng tân inah a khung’ a. Pahnihna, a thiltih hmutu bâwih dangte rilru a tina a ni. “A bâwihpuite chuan a thiltih chu an hmuhin, an lungngai êm êm” si a. Chutiang bawkin, kan thiltih chuan mi dangte chungah nghawng a nei a ni. Dik lo taka min cheibâwltu tuemaw chu kan ngaidam duh lo a nih chuan eng thil nge thleng thei? Pakhatna, a chunga ngaihdamna, ngaihsakna, leh hmangaihna kan lantîr duh loh avângin a rilru kan tina a. Pahnihna, chu unaupa nên kan inrem lo tih an hriat hunah kohhrana unaute rilru kan tihrehawm ang.

13. Pioneer unaunu thiltawn aṭangin eng nge i zir?

¹³ Unaute kan ngaihdam hian mi dangte bâkah, keimahni ngeiin kan hlâwkpui a. Chutiang chu pioneer Unaunu Crystal-i’n a tawng a ni. Kohhrana unaunu pakhatin a rilru a tina a. Crystal-i chuan: “A châng chuan a ṭawngkam na takte chuan khandaih ang maiin min chhun a. Rawngbâwlnaah amah nêna thawh dun pawh ka duh lo. Ka ṭhahnemngaihna leh hlimnate pawh ka hloh ṭan a ni,” tiin a sawi. Unaunu Crystal-i chuan lungnih lohna tûr chhan ṭha nei niin a inhria a. Mahse, thinrim leh mahni inkhawngaihin a awm reng lo. Ani chuan Vênnainsâng October 15, 1999 chhuak “Thinlung Takin Ngaidam Rawh,” tih thuziaka Bible ṭanchhan fuihnate chu inngaitlâwm takin a nunpui a.  Tichuan, a unaunu chu a ngaidam ta a ni. Unaunu Crystal-i chuan: “Tûnah chuan, kan za hian theih tâwp chhuaha mihring thara inthuam kan tum ṭheuhvin, Jehova’n nî tin min ngaidam tih ka hre ta. Ka dâr aṭanga phurrit tak hlânthlâksak ang mai ni hian ka inhria. Hlimna ka nei leh ta,” tiin a sawi.

14. Matthaia 18:21, 22-a sawi angin, tirhkoh Petera’n eng harsatna nge a neih mai theih a, Isua chhân lêtna aṭangin eng nge kan zir?

¹⁴ Kan unaute chu kan ngaidam tûr a ni tih kan hria a; chu chu thil tih tûr dik tak a ni tih kan hre bawk. Mahse, chutianga tih chu harsa kan la ti mai thei. Tirhkoh Petera pawhin harsa tih châng a nei ngei ang. (Matthaia 18:21, 22 chhiar rawh.) A nih chuan, engin nge min ṭanpui thei? A hmasain, Jehova min ngaihdam nasatzia chhût ngun ang che. (Mt. 18:32, 33) A ngaihdamna chu phu lo mah ila, hmangaihna nei takin min ngaidam a ni. (Sâm 103:8-10) Chutih rualin, “keini pawh kan inhmangaih tawn ṭheuh tûr a ni.” Chuvângin, ngaihdamna hi duh thlan theih thil a ni lo. Unaute ngaihdam chu kan bat a ni. (1 Joh. 4:11) A dawtah, unaute kan ngaihdam avânga thilthlengte chu chhût ngun ang che. Dik lo taka min cheibâwltu kan ṭanpui pawh a ni thei a, kohhranah inpumkhatna awmtîrin, Pathian Jehova nêna kan inlaichînna kan vênhim bâkah, kan dâr aṭanga phurrit tak kan hlângthla ang a ni. (2 Kor. 2:7; Kol. 3:14) A tâwpah, ngaidam tûra min phûttu hnênah ṭawngṭai ang che. Setana’n unaute nêna in inlaichîna ṭha a tihchhiat chu phal ngai suh. (Eph. 4:26, 27) Setana thang pumpelh tûr chuan Pathian Jehova ṭanpuina kan mamawh a ni.

15. Kolossa 3:13-a sawi angin, kan unau thiltihin min tilungni lo a nih chuan eng nge kan tih theih?

¹⁵ A nih leh, i Kristian unauvin i rilru tina zâwngin thil ti ta se, engtin nge ni ang? Eng nge i tih ang? In inremna tûrin i tih theih  apiang ti ang che. Pathian Jehova hnênah tih tak zetin ṭawngṭai la. Nangmah tilungni lotu i unaupa chu malsâwm tûr leh amah A hmangaih chhan a mize ṭhate hmu thei tûrin a ṭanpuina dîl ang che. (Lk. 6:28) I chunga a thiltih chu i theihnghilh thei lo a nih chuan, amah i pan theih dân kawng ṭha ber ngaihtuah rawh. I unaupa chuan duh rêng vângin i rilru tinat a tum ngai lo vang tia ngaih chu a ṭha ber fo ṭhîn. (Mt. 5:23, 24; 1 Kor. 13:7) Amah i biak hunah, a chungah ngaihhnathiamna lantîr ang che. Mahse, inrem a duh loh chuan engtin nge ni ang? Ani chu ‘dawh hrâm hrâm’ la. A chungah beidawng mai suh. (Kolossa 3:13 chhiar rawh.) A pawimawh ber chu, Pathian Jehova nêna in inlaichînna tichhe theitu thinurna pai reng loh hi a ni. Eng mah intihtlûktîr ngai suh. Chutianga i tih chuan, tu dang zawng aiin Pathian Jehova i hmangaih zâwk tih i lantîr a ni ang.—Sâm 119:165.

16. Mi tin hian eng mawhphurhna nge kan neih?

¹⁶ “Vêngtu pakhat” hnuaia “pâwl khat” anga inpumkhat taka Jehova rawngbâwl theihna chanvo kan neih chu kan va ngaihlu tak êm! (Joh. 10:16) Jehova Duh Zâwng Ti Tûra Kan Inrêlbâwl Dân, tih lehkhabu phêk 165-na chuan: “Chu inpumkhatna chu hlâwkpuiin, inpumkhattîr chho zêl tûrin mawhphurhna i nei,” tiin a sawi. Chuvângin, “Jehova hmuh anga kan unaute hmuh kan tum” a ngai a. Kan za hian Pathian Jehova tân “mi tête” angin kan hlu vek a ni. I Kristian unaute chu chutiang chuan i thlîr em? Jehova chuan i unaute ṭanpui tûr leh ngaihsak tûra i thiltih zawng zawngte chu a hriain a ngaihlu hle a ni.—Mt. 10:42.

17. Eng tih nge kan tum tlat ang?

¹⁷ Kan Kristian unaute chu kan hmangaih a. Chuvângin, “mahni unau dâlna emaw, tlûkna emaw siam loh” chu kan tum tlat a ni. (Rom 14:13) Kan unaute chu mahni aia ṭha zâwkah kan ruat a; thinlung taka ngaihdam kan duh a ni. Mi dangte avânga tlûk chu i duh ngai lo vang u. Chu aiin, “inremna tûr leh intihsâwt tawnna tûr thilte chu i ûm” zêl zâwk ang u.—Rom 14:19.