HMAN lai aṭang tawhin, Israel mite chuan biakna dik chu sum leh paiin an ṭanpui ṭhîn a. Mahse, Isua hun laia Juda mite chuan chhiah tam tak an chawi a ngaih avângin, an tân phurrit tak a lo ni ta a ni.

Hmun thianghlima biakna ṭanpui nân, Juda mi puitling tawh phawt chuan sekel chanve (biak in tangka) an pêk a ngai a. Kum zabi khatnaah khân, chu chhiah chu Heroda sak biak in enkawl nân leh chuta inthawina atântea hman a ni a. Juda ṭhenkhatin Petera hnênah biak in chhiah chawi chungchânga Isua ngaih dân an zawh chuan, Isua’n chhiah chawi chu a sawisêl lo. Dik tak chuan, Petera hnênah chhiah chawi tûr sum a hmuh theih dân tûr a hrilh zâwk a ni.—Mt. 17:24-27.

Chutih hun laia Pathian mite chuan an buh leh bâlte, a nih loh leh an sum lâk luhte zînga sâwma pakhat chu an pêk a ngai ṭhîn a. (Lev. 27:30-32; Num. 18:26-28) Sakhaw hruaitute chuan “pudina te, mohuri te, leh zira te” pawh tiamin, thlaite zîngah pawh sâwma pakhat chu hmaih lova pe tûrin an phût a. Isua chuan sâwma pakhat pêk chu sawisêl lo mah se, lehkhaziaktute leh Pharisaite rilru put hmang vervêk tak chu a hailang a ni.—Mt. 23:23.

Chutih hun laia Juda mite chuan Rom rorêlna hnuaia an awm avângin, chhiah chawi tûr tam tak an nei a. Entîr nân, lo neitute chuan an lo atâna chhiah chu sumin emaw, thlai tharin emaw an pêk a ngai a. Chu chhiah chu an thlai thar zaa 20 aṭanga 25 thleng nia chhût a ni. Juda mite tân bîka pêk tûr chhiah pawh a awm a. Chu chhiah chu a ni, Pharisaite’n Isua hnêna an zawh tak chu ni. Ani chuan: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tia sawiin chhiah chawi chungchânga kan thlîr dân tûr chu a khaikhâwm a ni.—Mt. 22:15-22.

Bungrua lâk luh leh thawn chhuah chungah pawh chhiah an chawi a ngai a. Chu chhiah chu lawng chawlhna hmunah te, lei dawhah te, kawngpui ṭhuamahte, leh khawpui luhna leh bazârahte khawn a ni ṭhîn.

Rom rorêlna hnuaia awm mipuite tân chuan chhiah chawi tûr a tam êm avângin, phurrit tak a ni a. Rom chanchin ziaktu Tacitus-a chuan Isua leia a awm lai, Lal Tiberius-a rorêl laiin, “Syria leh Judai rama awmte tân phurrit tak a nih avângin, chhiah tihtlêmsak tûrin an ngên a ni,” tiin a sawi.

Chu an phurrit chu chhiah an khawn dânin a tizual a. Chhiah khawn hna chu sum pe tam bertu hnêna pêk a ni ṭhîn a. Sum lâk luh zât aṭanga hlâwkna tam tak têltu tûr, chhiah khawntu chuan a hnuaia chhiah khawntu tûr mi dangte a ruai lehchhâwng a; chutiang chuan, an zain sum hlêp an tum ṭheuh a ni. Zakaia pawhin a hnuaiah chutiang chhiah khawntute chu a nei niin a lang. (Lk. 19:1, 2) Chuvângin, mite’n he chhiah khawn dân kalphung hi hua a, an hnên aṭanga chhiah khawntute an ngaisâng lo pawh hi hriatthiamawm tak a ni.