1. Engvângin nge Jehova chhiahhlawhte chuan mal nia inhriat châng an neih mai theih?

KAN zînga a tam zâwk chuan mal nia inhriat châng kan nei a. Mi ṭhenkhat chuan chutianga inhriatna chu hun rei lo te chhûng chauh an neih laiin, hun rei tak chhûng neite pawh an awm a ni. Mi dangte bula kan awm hunah pawh mal nia inhriatna kan nei thei a. Ṭhenkhat chuan kohhran thara an lawi hian ṭhian siam an harsat ṭhîn a. Mi dangte chu chhûngte nêna inpawh tak an nih avângin, hmun danga an insawn hian an khua a har hle ṭhîn a ni. An hmangaih tak chântu mi dang lehte chuan an kawppuite chu an ngai ngawih ngawih a. A bîk takin, thutaka an awmna la rei lo Kristian ṭhenkhat chu ring lotu an chhûngte leh an ṭhiante hnâwlna leh dodâlna an hmachhawn hian mal hle niin an inhria a ni.

2. Eng zawhnate nge kan sawiho vang?

² Jehova chuan kan chungchâng engkim a hre vek a. Mal nia inhriatna kan neih pawh a hria a, chûng kan ngaihtuahnate chu hneh tûrin min ṭanpui a duh a ni. A nih chuan, engtin nge min ṭanpui? Mal nia inhriatna hneh tûrin eng nge kan tih theih? Engtin nge mal nia inhriatna nei kohhrana unaute chu kan ṭanpui theih? Chûng zawhnate chhânna chu i lo sawiho vang u.

3. Engtin nge Jehova’n Elija a ngaihsak tih a târ lan?

³ Pathian Jehova chuan amah betu zawng zawngte chu a ngaihsak hle a. Ani chuan min hnaih ṭheuh va, kan lunghnualnate  pawh min hriatpui a ni. (Sâm 145:18, 19) A zâwlnei Elija a ngaihsak dân hi han ngaihtuah teh. Chu mi rinawm chu Israel chanchina hun harsat laia awm a ni. Pathian Jehova betute chuan tihduhdahna nasa tak an tâwk a, Elija chu Pathian dodâltu hmêlma thiltithei takte tum ber a ni. (1 Lal. 19:1, 2) Elija rilru tihahtu ni thei pakhat chu Jehova zâwlnei, a rawngbâwltu awmchhun nia a inhriatna pawh a ni thei. (1 Lal. 19:10) Pathian chuan Elija ṭanpui tûrin hma a la vat a. A zâwlnei hnênah chuan vântirhkoh pakhat tîrin Israel ramah Pathian ṭihtu tam tak an la awm tih leh amah chauh a ni lo tih a hriattîr a ni.—1 Lal. 19:5, 18.

4. Marka 10:29, 30-na chuan engtin nge Jehova’n chhûngte leh ṭhiante ṭanpuina châna a rawngbâwltute a ngaihsakzia a târ lan?

⁴ Pathian Jehova chuan a rawngbâwl tûra duh thlanna kan siam hian, kan zînga ṭhenkhatin thil tam tak kan chân a ngai tih a hria a. Chûng zîngah chuan ring lotu an chhûngte leh ṭhian ṭhate ṭanpuina pawh a tel thei a ni. Chu chu tirhkoh Petera’n Isua hnênah: “Ngai teh, keinin engkim kalsanin kan zui ta chia; eng nge kan hmuh ang le?” tia a zawh chhan pawh a ni thei a. (Mt. 19:27) Isua chuan a zirtîrte hnênah thlarau lam chhûngkaw hung tak an nei dâwn tih ngilnei takin a hrilh a. (Marka 10:29, 30 chhiar rawh.) Kan Pa vâna mi Jehova chuan a rawngbâwl duhtute chu a ṭanpui dâwn tih min tiam a ni. (Sâm 9:10) Mal nia inhriatna kan neih huna Jehova ṭanpuina dawng tûra kan tih theih thil ṭhenkhat chu i lo ngaihtuah vang u.

5. Pathian Jehova min ṭanpui dân ngaihtuah chu engtin nge kan hlâwkpui?

⁵ Pathian Jehova ṭanpui dân che ngaihtuah rawh. (Sâm 55:22) Chu chuan i dinhmun inbûk tâwk taka thlîr tûrin a ṭanpui ang che. A chhûngte thutaka awm lo Unaunu Carol-i * chuan: “Pathian Jehova’n hun hrehawm ka hmachhawn laia min ṭanpui dânte ka ngaihtuah lêt a, ka chhût ngun hian chu chuan mal nia inhriatna nei lo tûrin min ṭanpui a. Nakin hunah pawh Jehova’n min awmpui reng ang tih min hriat chiantîr a ni,” tiin a sawi.

6. Engtin nge 1 Petera 5:9, 10-na chuan mal nia inhriatna neite chu a tihchak theih?

 ⁶ Pathian Jehova’n mal nia inhriatna nei kan unaute a ṭanpui dân chu ngaihtuah rawh. (1 Petera 5:9, 10 chhiar rawh.) Kum tam tak chhûng an chhûngkaw zînga Thuhretu awmchhun lo ni tawh ṭhîn Unau Hiroshi-a chuan: “Kohhrana mi tinte hian harsatna kan nei ṭheuh va. Kan za hian Jehova rawngbâwl tûrin theih tâwp kan chhuah ṭheuh tih hriatna chuan chhûngte tel lova thutaka mahni chauhva awmte chu min tichak thei a ni,” tiin a sawi.

7. Engtin nge ṭawngṭainain a ṭanpui che?

⁷ Thlarau lam hun duan ṭha nei reng rawh. Chutah chuan Pathian Jehova hnêna i rilrua awm zawng zawng phawrh chhuahna hun neih a tel a. (1 Pet. 5:7) Unaunu Massiel-i chuan: “Mal nia inhriatna hneh tûra min ṭanpuitu thil pawimawh tak pakhat chu Jehova hnêna tih tak zeta ṭawngṭai hi a ni,” tiin a sawi. Ani chuan Jehova rawngbâwl tûra thu tlûkna a han siam chuan, a chhûngte chu thutaka an awm loh avângin mal nia inhriatna a nei a. “Pathian Jehova chu ka tân Pa tak tak a ni a, nî tin a hnênah vawi tam tak ṭawngṭaiin ka rilrua awmte ka hrilh ṭhîn,” tiin a sawi.

8. Engtin nge Bible chhiar leh chhût ngunna chuan a ṭanpui che?

⁸ Pathian Thu chu chhiar ziah la, Jehova’n a hmangaih che tih târ langtu Bible chângte chu chhût ngun ṭhîn ang che. A chhûngte sawisêlna tâwktu Unaunu Bianca-i chuan: “Bible thute chhiar a, chhût ngunna leh ka dinhmun anga ding Jehova chhiahhlawhte nun kawng chanchin chhiarna chuan min ṭanpui tak zet a ni,” tiin a sawi. Kan unau ṭhenkhat chuan min thlamuan thei tak Sâm 27:10 leh Isaia 41:10-na ang chi Bible chângte chu an by-heart a. Mi dang lehte chuan Bible an chhiar hunah leh inkhâwmte atâna an inbuatsaih hunah zir tûr thu leh hla chhuah aw thun sate ngaihthlâkna chuan mal nia inhriatna nei lo tûrin a ṭanpui tih an hria a ni.

9. Engtin nge inkhâwma tel chu i hlâwkpui?

⁹ Inkhâwmahte tel ziah tum rawh. Chutianga i tih chuan, i thu ngaihthlâkte chu i hlâwkpui ang a, unaute pawh i hre chiang thei bawk ang. (Heb. 10:24, 25) Kan sawi tâk Massiel-i chuan: “Mi zakzum tak ni mah ila, kohhran inkhâwmahte tel kim vek leh chhânna pêk ziah chu ka tum tlat a. Chu chuan kohhran zînga mi nia inhriatna nei tûrin min ṭanpui a ni,” tiin a sawi.

10. Engvângin nge Kristian rinawmte ṭhiana siam chu a pawimawh?

¹⁰ Kristian rinawmte chu ṭhianah siam rawh. In kum leh ṭobulte chu inang lo mah se, i entawn theih tûr kohhran chhûnga unaute chu ṭhianah siam rawh. Bible chuan, “upa hnênah”  finna a awm tih min hrilh a. (Job. 12:12) Chutih rualin, kum upate pawhin ṭhalai rinawmte hnên aṭangin thil tam tak an zir thei tho a ni. Davida chu Jonathana aiin naupang hle mah se, chu chuan an inṭhian ṭhatna a dâl lo. (1 Sam. 18:1) Davida leh Jonathana chu harsatna khirh tak kârah pawh Jehova rawngbâwl tûrin an inṭanpui tawn a ni. (1 Sam. 23:16-18) An chhûngkaw zînga Thuhretu awmchhun Unaunu Irina-i chuan, “Kan Kristian unaute chu thlarau lama kan chhûngte an ni tak zet a. Pathian Jehova’n anni chu kan mamawhte min phuhhrûksak tûrin a hmang thei a ni,” tiin a sawi.

11. Ṭhian nghet tak nei tûrin eng nge i tih ang?

¹¹ A bîk takin, mi zakzum tak kan nih chuan ṭhian thar siam chu harsa kan ti mai thei a. Dodâlna kâra thutak zirtu Unaunu Ratna-i chuan, “Thlarau lama ka chhûngte ṭanpuina leh thlâwpna chu ka pawm a ngai tih ka hria,” tiin a sawi. Tuemaw hnêna i rilru vei zâwngte hrilh chu a harsa thei a; mahse, chutianga tlang taka inbiak pawhna chu ṭhian ṭha neih nâna thil pawimawh tak a ni. I ṭhiante chuan fuih a, ṭanpui che chu an duh a; mahse, an ṭanpui theih dân tûr kawng i hriattîr a ngai a ni.

12. Engtin nge rawngbâwlna chuan ṭhian ṭhate siam tûra a ṭanpui che?

¹² Ṭhian neih theih dân kawng ṭha ber zînga pakhat chu kan Kristian unaute ruala rawngbâwlnaa tel hi a ni a. Kan sawi tâk Unaunu Carol-i chuan: “Rawngbâwlnaah leh theocratic thiltih danga unaute nêna hun kan hmanhona aṭangin ṭhian ṭha tam tak ka chhar a. Jehova chuan chûng ṭhiante hmangin kum tam tak chhûng min ṭanpui tawh a ni,” tiin a sawi. Kristian rinawmte nêna inṭhiana neih chu manhla tak a ni. Pathian Jehova chuan mal nia inhriatna ang chi, lunghnualnate hneh tûra ṭanpui tûr chein chutiang ṭhiante chu a hmang a ni.—Thuf. 17:17.

13. Kohhrana mi tinte hian eng mawhphurhna nge kan neih ṭheuh?

¹³ Kan zavai hian, kohhranah mal nia inhria an awm loh nâna boruak muanawm tak siam tûrin mawhphurhna kan nei ṭheuh va. (Joh. 13:35) Kan thiltih leh thusawite chuan mi dangte a va tichak thei tak êm! Unaunu pakhat sawi hi lo chhinchhiah teh, ani chuan: “Thutak ka han zir chuan kohhran chu ka chhûngkua a lo ni a. Unaute’n min ṭanpui lo se chuan, Jehova Thuhretute zînga mi ka ni thei lo vang,” tiin a sawi. Chhûngte tel lova mahni chauhva thutaka awmte chu kohhran zînga mi nia inhriatna nei tûra ṭanpui nân eng nge i tih theih?

14. Mi tharte ṭhiana siam tûrin eng nge i tih theih?

¹⁴ Ṭhiana siam tûrin hma la hmasa rawh. Chu chu kohhrana mi tharte lo lawmna hmangin i ti ṭan thei a. (Rom 15:7) Mahse, nêlawm taka lo lawm mai aia tam tih kan duh a ni. Hunte a liam zêl ruala kan inṭhianna tihngheh zêl chu kan duh a. Chuvângin, mi tharte chu lo lâwmin, an chungah ngaihsakna lantîr ang che. Anmahni tizak thei tûr zawhnate zâwt si lovin, harsatna an neih mai theihte chu hriat tum ang che. Mi ṭhenkhat chuan an rilrua awmte sawi chhuah chu an hreh mai theih avângin, sawi chhuak tûrin tilui suh. Chu aiin, ngilnei takin pan la, rem hre taka zawhnate zâwtin, an chhânnate chu ngun takin ngaihthlâksak ang che. Entîr nân, thutak an hmuh dânte i zâwt thei a ni.

15. Engtin nge Kristian mi puitlingte chuan kohhrana unaute chu an ṭanpui theih?

¹⁵ Kristian mi puitlingte, a bîk takin, kohhran upate’n unaute chunga ngaihsakna an  lantîr hian kohhrana mi tinte chuan thlarau lamah hma an sâwn a ni. A nu ṭanpuina avânga thutaka awm Unaunu Melissa-i chuan: “Kum tam tak chhûng ka thlarau lam pate anga min ṭanpui ṭhîntu unaupate chunga ka lâwmzia chu ka sawi chhuak thiam lo. Sawi duh ka neih apiangin, min ngaihthlâksaktu tûr ka nei reng a ni,” tiin a sawi. Amah Bible zirpuituin thutak a chhuahsan avânga kalsan nia inhria ṭhalai Unaupa Mauricio-a chuan: “Kohhran upate’n ka chunga mi mal ngaihsakna an lantîrna chuan nasa takin min ṭanpui a. Anni chuan min be ziah a. Rawngbâwlnaahte min thawhpui a, mi mala Bible an zirna aṭanga an thu hriatte min hrilh ṭhîn a, min infiampui ṭhîn bawk,” tiin a sawi. Tûnah chuan, Melissa-i leh Mauricio-a te chu hunbi kimin rawng an bâwl mêk a ni.

16-17. Eng kawng ṭangkai taktein nge mi dangte chu kan ṭanpui theih?

¹⁶ Kawng ṭangkai takin ṭanpui rawh. (Gal. 6:10) A chhûngte awmna aṭanga hmun hla taka missionary nia rawngbâwl Unau Leo-a chuan, “I mamawh chu a hun taka lantîr ngilneihna thiltih ho tê hi a ni fo ṭhîn. Motor accident ka tawh nî chu ka la hre reng a. In ka thlen chuan ka rilru a hah hle a. Mahse, nupa tuak khat chuan an ina chaw ei tûrin min sâwm a. Chumi nîa kan thil eite chu hre tawh lo mah ila, ka thusawite ngun takin min ngaihthlâksak tih erawh ka la hre reng a ni. A tâwpah chuan ka rilru a hahdam ta huai mai!” tiin a sawi.

¹⁷ Kan vai hian regional inkhâwmpui leh bial inkhâwmpuite ang chi theocratic hun pawimawha tel chu nuam kan ti hle a, a chhan chu mi dangte nêna inkhâwmpuia kan thu ngaihthlâkte sawiho theihna hun kan neih vâng a ni. Mahse, kan sawi tâk Unaunu Carol-i chuan, “Regional inkhâwmpui leh bial inkhâwmpuiahte chuan mal riau ni hian ka inhre ṭhîn,” tiin a sawi. Engvângin nge? Ani chuan, “Unau a za têl leh a sâng têlin min hual vêl mah se, anni chu an chhûngte nên an ṭhu tlâng ṭhîn a. Ka tân chuan mal ngawih ngawih ni hian ka inhria a ni,” tiin a sawi. Mi dangte chuan an kawppuite’n an boralsan hnua regional emaw, bial inkhâwmpui emawa tel chu hrehawm an ti hle a ni. Chutiang harsatna tâwk tuemaw hriat i nei em? Engvângin nge anni chu theocratic hun pawimawh a awm leh huna in chhûngkaw bula ṭhu tûra i sâwm loh vang?

18. Engtin nge 2 Korinth 6:11-13-na chu khualchhâwn thiamna kan lantîr hunah kan nunpui theih?

 ¹⁸ Hun hmanpui rawh. Inkawmhona in neih hunah unau hrang hrangte chu sâwm la, a bîk takin, mal nia inhriatna nei mai thei unaute chu sâwm ang che. Chutiang mite tâna ‘kan thinlung hawn’ chu kan duh a ni. (2 Korinth 6:11-13 chhiar rawh.) Kan sawi tâk Melissa-i chuan, “Unaute’n an ina lêng tûra min sâwm hunah leh anmahni nêna zinho tûra min sâwmte hian ka hlim thei hle,” tiin a sawi. In kohhranah khualchhâwn thiamna i lantîr theih tûr tuemaw an awm em?

19. Eng hunah nge Kristian unaute hun hmanpui chu a ṭangkai lehzual theih?

¹⁹ Kristian unaute chu hun nuam tak kan hmanpui hian an hlim thei hle a. Unau ṭhenkhat chuan ring lotu an chhûngte’n kût nî an hman laia an zînga lo awm ve chu nuam lo an ti mai thei a ni. Mi dangte chuan an hmangaih takte thih champha a lo thlen hian hrehawm an ti lehzual thei bawk. Chutiang harsatna tâwk kan unaute hun kan hmanpui chuan anmahni kan ngaihsakzia kan lantîr tihna a ni ang.—Phil. 2:20.

20. Engtin nge mal nia kan inhriat hunah Matthaia 12:48-50-a chhinchhiah Isua thusawite chuan min ṭanpui theih?

²⁰ Kristianin mal nia inhriat châng a neih theih chhan tam tak a awm a. Mahse, Pathian Jehova chuan chutianga inhriatna an neih chu a hre chiang tih kan theihngilh ngai tûr a ni lo. Ani chuan Kristian unaute hmangin kan mamawhte min pe ṭhîn a. (Matthaia 12:48-50 chhiar rawh.) Thlarau lama kan chhûngte ṭanpui tûra theih tâwp kan chhuah hian, Jehova hnênah a ruahmanna duhawm tak kan hlutzia kan lantîr tihna a ni. Mal nia inhriat châng nei mah ila, Jehova’n min awmpui reng avângin kan mal tak tak ngai lo!