1. Hlauhna tlânglâwn ṭhenkhat chu engte nge ni?

 HENG thilthleng tak takte hi han ngaihtuah teh. Unau Nestor-a leh a nupui María-i chuan mamawh zualna hmuna rawngbâwl an duh a. * Mahse, chutianga tithei tûr chuan an nun dân an siamrem a ngai a ni. Sum tlêm zâwk hmanga an nun chuan hlimna tak tak an neih theih loh an hlau va. Unau Biniam-a chuan kan rawngbâwlna dodâlna rama Jehova Thuhretu pakhat a rawn nih chuan, Pathian mite zînga mi a nih angin tihduhdahna a tâwk thei tih a hria a. Chu chuan hlauhna a neihtîr a. Chu ai mahin, a chhûngte’n a thurin thar chungchâng an hriat huna an chhân lêt dân tûr a ngaihtuah chuan a hlau lehzual a ni. Unaunu Valérie-i chuan cancer hlauhawm tak a vei a, thisen chungchânga Bible ṭanchhan a thurinte zahsaktu tûr doctor chu a zawng hmu thei lo va. Thih mai a hlau chu hriatthiamawm tak a ni.

2. Engvângin nge kan hlauhnate hneh tûra theih tâwp kan chhuah a ngaih?

² Chutiang hlauhna chu i nei tawh ngai em? Kan zînga tam tak chuan kan nei tawh ngei ang. Kan hlauhnate thunun dân kan zîr loh chuan, Jehova nêna kan inlaichînna tichhe hial theitu thu tlûkna ṭha lote kan siam thei a. Chu tak chu Setana duh zâwng a ni. Ani chuan kan hlauhna chu chanchin ṭha hril tûra thupêk pawh tiamin, Jehova dânte min zawm lohtîr nâna hman a tum ni. (Thup. 12:17) Setana chu suaksual tak, râwng tak, leh thiltithei tak a ni a. Mahse, a lakah i invêng thei a ni. Engtin nge?

3. Kan hlauhnate hneh tûrin engin nge min ṭanpui ang?

³ Jehova’n min hmangaih—min awmpui—tih kan rin tlat  hian Setana min beihnate chu kan hneh thei a. (Sâm 118:6) Entîr nân, Sâm 118-na ziaktu chuan dinhmun khirh tak takte a hmachhawn a. Ani chuan nihna sâng tak chelhtute pawh tiamin, hmêlma tam tak a nei a (châng 9, 10). Nêksâwrna nasa tak hnuaia awm chângte pawh a nei a ni (châng 13). Jehova hnên aṭangin zilhna khauh takte pawh a dawng bawk (châng 18). Chuti chung pawhin, chu fakna hla phuahtu chu: “Ka hlau lo vang,” tia sawi tûra chêttîrin a awm a ni. Engin nge ani chu chuti taka him nia inhriatna neihtîr? Jehova’n zilh mah se, a Pa vâna mi chuan a hmangaih tak zet tih a hria a. Eng dinhmun pawh hmachhawn mah se, hmangaihna nei tak a Pathian chu amah ṭanpui tûrin a inpeih reng tih a ring tlat a ni.—Sâm 118:29.

4. Pathianin min hmangaih tih kan rin tlat chuan, eng hlauhnate nge kan hneh theih?

⁴ Jehova’n a mi mal takin min hmangaih tih kan rin tlat a ngai a. Chutianga rin tlatna chuan hlauhna chi thum hneh tûrin min tanpui ang, (1) chhûngkaw châwm theih loh hlauhna, (2) mihring hlauhna, leh (3) thih hlauhnate chu. Paragraph hmasa bera târ lan tâkte khân Jehova’n a hmangaih tih an rin tlat avângin an hlauhnate chu an hneh thei a ni.

5. Eng dinhmunte’n nge chhûngkaw lû ber chu lungkhamna nasa tak neihtîr thei? (A kâwma milem en rawh.)

⁵ Kristian chhûngkaw lû ber chuan a chhûngkaw tisa lam mamawh ngaihsak tûra a mawhphurhna chu a ngai pawimawh hle a. (1 Tim. 5:8) Chhûngkaw lû ber i nih chuan, tûn hnaia hripui lên chhûngte khân, i hna chân i hlau hle pawh a ni thei. I chhûngte tân ei tûr leh chênna tûr in i pêk theih loh i hlau mai thei a. Hna i chân a nih chuan, hna dang i zawn hmuh theih tawh loh chu i hlau ngei ang. A nih loh leh, kan târ lan tâk Unau Nestor-a leh a nupui María-i angin, sum tlêm zâwk hmanga nun chu thil theih loh niin i ngai pawh a ni mai thei. Setana chuan mi tam tak chu chutiang hlauhna neihtîrin Jehova rawngbâwl a bânsantîr a ni.

6. Setana’n eng nge rintîr min tum?

⁶ Setana chuan Jehova’n a mi mal takin min ngaihsak lo tih leh kan chhûngkua kan enkawlnaah min ṭanpui lo tih rintîr min tum a. Chûngte avâng chuan, kan hna kan chelh zawm zêl theihna tûr a nih phawt chuan, Bible thu bulte ngaihthah a ṭûl a nih pawhin, eng pawh kan tih a ngai niin thu tlûkna kan siam palh thei a ni.

7. Isua’n eng nge min hriat chiantîr?

⁷ Tu dang zawng aia Jehova hre chiangtu Isua chuan Pathianin ‘amah kan dîl hmain engte nge kan mamawh tih a hria,’ tih min hriat chiantîr a. (Mt. 6:8) Isua chuan Jehova chu kan mamawhte min pe tûrin a inpeih reng tih pawh a hre bawk. Kristiante kan nih angin, Pathian chhûngkaw zînga mi kan ni a. Chhûngkaw Lû Ber a nih angin, Jehova chuan 1 Timothea 5:8-a chhinchhiah thu bul nêna inmilin thil a ti ang tih kan ring tlat thei a ni.

8. (a) Engin nge chhûngkaw châwm theih loh hlauhna chu hneh tûra min ṭanpui ang? (Matthaia 6:31-33) (b) Milema târ lan angin, engtin nge unaunu hnêna ei tûr petu nupa tuak khat entawn tûr siam chu kan zui theih?

⁸ Jehova’n keimahni leh kan chhûngte a hmangaih tih kan rin tlat chuan, kan mamawhte chu kan tlachham lo vang tih rin harsa kan ti lo vang. (Matthaia 6:31-33 chhiar rawh.) Jehova chu min ṭanpuitu a nih bâkah, hmangaihna nei tak leh phal taka kan mamawhte min Petu a va ni chiang tak êm! Leilung a siam khân, kan nun zawm zêl theih nâna kan mamawh bulpuite mai aia tam min pe a. Lei chu kan hlimpui theih tûr thil tam takin a tikhat a ni. (Gen. 2:9) A chuang a liam  ni lo va, kan mamawh tâwk chauh kan neih chângte pawhin, chûngte chu Jehova’n min pêk avânga nei thei kan ni tih kan theihnghilh tûr a ni lo. (Mt. 6:11) Tûna kan chân mai theih thilte hi Pathianin tûn la la leh nakina min pêk tûrte nêna khaikhin chuan eng tham mah a ni lo tih kan hriat reng a ngai a. Chu chu Unau Nestor-a leh a nupui María-i te’n a takin an tawng a ni.—Is. 65:21, 22.

9. Unau Nestor-a leh a nupui María-i entawn tûr siam aṭangin eng nge i zir theih?

⁹ Unau Nestor-a leh a nupui María-i chu Colombia ramah in leh hna ṭha tak neiin nuam takin an khawsa a. Anni chuan, “Nun tihsamkhai a, kan rawngbâwlna zauh chungchâng chu kan ngaihtuah ṭhîn a; mahse, sum tlêm zâwk hmanga kan nun chuan hlimna kan neih theih loh kan hlau a ni,” tiin an sawi. Engin nge an hlauhna hneh tûra ṭanpui? Jehova’n kawng tam taka an chunga hmangaihna a lantîr tawh dânte chu an ngaihtuah lêt a. Ani chuan a ngaihsak reng ang tih ring tlatin, sum tam tak lâk luh theihna an hna chu an bânsan a. An in chu an hralh a, an awmna rama Lalram thuchhuahtute mamawh zualna hmunah an insawn ta a ni. Engtin nge an thu tlûkna siam chu an ngaih? Unau Nestor-a chuan: “Matthaia 6:33-na dikzia chu a takin kan tawng a. Kan mamawhte chu kan tlachham ngai lo. Tûnah chuan nun hlimawm zâwk kan nei tawh a ni,” tiin a sawi.

10. Engvângin nge mihringte kan inhlau tawn hi hriatthiamawm tak a nih?

¹⁰ Mihringte hian intihchhiat tawnna kawngah chanchin duhawm lo tak kan nei a. (Thur. 8:9) Entîr nân, mite chuan an thuneihna chu dik lo takin an hmang a, mi sualte chuan tharum an thawh a, school-a mi hnehchhiah chîngte chuan an classmate-te chu an hmusitin an vau a, mi ṭhenkhat chuan an chhûngte chu râwng takin an cheibâwl hial a ni. Mihringte kan inhlau tawn pawh hi a mak lo ve! Engtin nge Setana chuan mihring hlauhna chu hman ṭangkai a tum?

11-12. Engtin nge Setana’n mihring hlauhna chu min beih nâna a hman?

¹¹ Setana chuan thu hril tawh lo tûr leh Jehova’n ti tûra min hrilh thil dangte ti tawh lo tûrin mihring hlauhna min neihtîr a tum a. Setana thununna hnuaia awm sawrkârte chuan kan rawngbâwlnate khap betin min tihduhdah a ni. (Lk. 21:12; Thup. 2:10) Setana khawvêlah hian mi tam tak chuan  Jehova Thuhretute chungchângah chanchin dik lo tak tak an theh darh a. Chûng dâwt thu ringtute chuan min nuihsawhin, kut min thlâk hial pawh a ni thei. (Mt. 10:36) Setana tih dânte chu mak kan ti em? Ti lo ve. Ani chuan kum zabi khatnaah pawh chûng tih dân tho chu a lo hmang tawh ṭhîn a ni.—Tirh. 5:27, 28, 40.

¹² Sawrkârte dodâlna hlauhna chu Setana hmanraw hman awm chhun a ni lo. Unau ṭhenkhat tân chuan an chhûngte’n thutak an chhân lêt dân tûr hlauhna chu kutthlâk tawrh an hlauhna ai pawhin a nasa zâwk a. An chhûngte an hmangaih hle a, Jehova hriaa hmangaih ve tûrin an duh a ni. An chhûngte’n Pathian dik leh a chibai bûktute zah lo taka an sawi chhiat hian hrehawm an ti thei hle a. Amaherawhchu, dinhmun ṭhenkhatah chuan, a tîra dodâltu an chhûngte zînga ṭhenkhat chu a hnuah thutakah an rawn lût a ni. A nih leh, kan chhûngte’n kan thurin thar avângin min tuithlâr ta se, engtin nge kan chhân lêt ang?

13. Engtin nge Pathian hmangaihna kan rin tlatna chuan chhûngte hnâwlna hmachhawn thei tûra min ṭanpui theih? (Sâm 27:10)

¹³ Sâm 27:10-a târ lan thutak mawi tak aṭangin thlamuanna kan hmu thei a. (Chhiar rawh.) Jehova’n min hmangaih tak zet tih kan hriat hian dodâlna kan hmachhawn hunah pawh him nia inhriatna kan nei a ni. Ani chuan kan chhelna avângin lâwmman min pe ang tih kan ring bawk. Jehova chuan tu dang zawng aiin kan tisa lam, rilru lam, leh thlarau lam mamawhte chu min ngaihsak ang! Chu chu kan târ lan tâk Unau Biniam-a thiltawn a ni.

14. Unau Biniam-a thiltawn aṭangin eng nge i zir theih?

¹⁴ Biniam-a chu tihduhdahna nasa tak a tuar thei tih hre reng chungin Jehova Thuhretu pakhat a rawn ni a. Jehova’n a hmangaih tih a hriatnain mihring hlauhna hneh tûra a ṭanpui dân hi han ngaihtuah teh. Ani chuan, “Ka rin aia nasain tihduhdahna ka tuar a. Mahse, sawrkârte tihduhdahna aiin ka chhûngte min dodâl chu ka hlau zâwk a ni. Jehova Thuhretu ni tûra ka thu tlûkna siam avânga ring lotu ka pa a lungnih loh emaw, ka chhûngte’n mi tlâktlai lo nia min ngaih emaw chu ka hlau hle,” tiin a sawi. Mahse, Biniam-a chuan Jehova’n a hmangaihte chu a ngaihsak reng ṭhîn tih a ring tlat a. Ani chuan: “Jehova’n sum leh pai harsatna te, inpâwng huatna te, leh tharum thawhnate chhel taka tuar chhuak thei tûra unau dangte a ṭanpui dânte chu ka ngaihtuah a. Jehova ka hnaih tlat a nih chuan, mal  min sâwm ang tih ka hria. Vawi tam tak man ka tawh lai leh tihduhdahna ka tawrh laite chuan, a chunga kan rinawm tlat avânga ṭanpuina kan mamawh huna Jehova’n nasa taka a mite a ṭanpui dân chu a takin ka tawng a ni,” tiin a sawi. Jehova chu Unau Biniam-a tân Pa tak tak a ni a, A mite pawh a chhûngte tak tak an ni.

15. Engvângin nge thih hlauhna neih chu thil pângngai tak a nih?

¹⁵ Bible chuan thihna chu hmêlma a ni tih a sawi a. (1 Kor. 15:25, 26) Thih hlauh châng kan nei mai thei; a bîk takin, keimahni emaw, kan hmangaih takte emaw nasa taka an dam loh hian kan nei mai thei a ni. Engvângin nge thih kan hlauh? Jehova’n chatuana nun duhna neia min siam vâng a ni. (Thur. 3:11) Mahse, thih hlauhna chuan kan nun humhim tûrin min ṭanpui thei a. Entîr nân, kan ei leh in leh taksa sawizawina kawngah te, a ṭûl huna doctor-te leh damdawi lam ṭanpuina zawng tûr te, leh kan nun chu ṭûl lo taka dinhmun hlauhawma dah lo tûrtea thu tlûkna ṭha siam tûrin min chêttîr thei a ni.

16. Engtin nge Setana’n thih kan hlauhna chu hman ṭangkai a tum?

¹⁶ Setana chuan kan nun hi kan ngaihlu hle tih a hria a. Mahse, ani chuan tûna kan nun humhim nân Jehova nêna kan inlaichînna pawh tiamin, kan thil neih engkim chân kan huam ang tih a sawi a ni. (Job. 2:4, 5) A va sawi sual chiang tak êm! Chuti chung pawhin, “thihna thuneitu” a nih angin, Setana chuan thih kan hlauhna chu Jehova min phatsantîr nâna hman ṭangkai a tum a ni. (Heb. 2:14, 15) Dinhmun ṭhenkhatah, Setana thununa awmte chuan Jehova chibai bûktute chu an rinna an phatsan loh chuan tihhlum an nih tûr thu sawiin an vau va. Dinhmun dangahte chuan, thih hlauhawm khawpa kan dam loh hian, chu chu kan rinna min phatsantîr nâna hman ṭangkai a tum bawk a ni. Doctor-te, a nih loh leh ring lotu kan chhûngte chuan Pathian dân bawhchhiaa thisen thun tûrin min nawrlui pawh a ni thei. A nih loh leh, tu emawin Bible thu bulte nêna inmil lo inenkawlna pawm tûrin min thlêm pawh a ni thei bawk.

17. Rom 8:37-39-na nêna inmilin, engvângin nge thih kan hlauh a ngaih loh?

¹⁷ Thih chu duh lo mah ila, kan lo thi ta a nih pawhin, Jehova chuan min la hmangaih zawm zêl ang tih kan hria a ni. (Rom 8:37-39 chhiar rawh.) Ani chuan a ṭhiante an thih hian, la dam zawm zêl ang maiin a hre reng a. (Lk. 20:37, 38) Anni chu kaihthawh a châk hle a ni. (Job. 14:15) Ani chuan ‘chatuana nunna kan neih’ theih nân man tam takin min lei a. (Joh. 3:16) Min hmangaihzia leh min ngaihsakzia chu kan hria a ni. Chuvângin, kan dam loh hunah, a nih loh leh thih hlauhawm dinhmuna kan awm hunah Jehova hnuchhawn aiin, thlamuanna te, finna te, leh chaknate kan neih theih nân amah kan pan zâwk ang. Unaunu Valérie-i leh a pasal chuan chutiang chiah chuan an ti a ni.—Sâm 41:3.

18. Unaunu Valérie-i thiltawn aṭangin eng nge i zir theih?

¹⁸ Kum 35 mi a nihin, Unaunu Valérie-i chuan cancer hlauhawm tak a vei a. Jehova hmangaihnain thih a hlauhna hneh tûra a ṭanpui dân hi han ngaihtuah teh. Ani chuan: “Ka natna avângin ka nun chu zan khat thil thu-ah a inthlâkthleng thawk a. Ka dam khawchhuah theih nân inzaipui ka hmachhawn a ngai a. Inzai thiam doctor tam tak ka pan a; mahse, an zavaiin thisen tel lova min zai chu an hnâwl vek a ni. Ka hlau hle a; mahse, Pathian thupêk avângin, thisen thun chu pawm tumna ka nei lo! Ka nunah hian Jehova’n a hmangaihna chu nasa takin a lantîr tawh a. Tûnah, a chunga hmangaihna lantîr theihna hun remchâng  ka nei ve ta a ni. Chanchin ṭha lo ka dawn apiangin, chu chuan Jehova tilâwm tûr leh Setana hneha awm lo tûrin tum ruhna min neihtîr lehzual a ni. A tâwpah, thisen tel lovin hlawhtling takin ka inzai thei ta a. Ka natna chu dam hlen lo mah se, Jehova chuan ka mamawhte min pe reng a ni. Entîr nân, ka natna ka’n hriat hma chawlhkâr chhûng inkhâwmah chuan ‘Tûn Laia Harsatnate Chu Huaisen Takin Hmachhawn Rawh,’ * tih thuziak kan zir a. Chu thuziak chu kan tân chuan nun chhanhimtu a ni. Chu chu kan chhiar nawn fo va. Chutiang thuziakte leh thlarau lam hun duan ṭha neihnate chuan chhûngrila thlamuanna min neihtîrin, inbûk tâwk taka awm tûr leh thu tlûkna ṭhate siam tûrin min ṭanpui a ni,” tiin a sawi.

19. Nakin lawkah eng thil nge thleng ang?

¹⁹ Khawvêl puma kan unaute chuan Jehova ṭanpuinain dinhmun harsa tak takte hnehin, Diabola chu hlawhtling takin an do va. (1 Pet. 5:8, 9) Nang pawhin chutiang chuan i ti ve thei a ni. Nakin lawkah, Jehova chuan Isua leh a rorêlpuite chu ‘Diabola hnathawhte tiboral’ tûrin thu a pe tawh ang. (1 Joh. 3:8) Chumi hnuah chuan, leia Pathian rawngbâwltute chuan eng mah ‘an hlau lo vang a; thil râpthlâk takte pawh an hlau lo vang.’ (Is. 54:14; Mik. 4:4) Mahse, chumi hun a thlen hma chu kan hlauhnate hneh tûra theih tâwp kan chhuah a ngai a ni.

20. Engin nge kan hlauhnate hneh tûra min ṭanpui ang?

²⁰ Jehova’n a chhiahhlawhte chu a hmangaihin a vênghim tih kan rinna kan tihchak chhunzawm zêl a ngai a. Chu chu Jehova’n tûn hmaa a chhiahhlawhte a lo vênhim tawh dân chungchâng chhût ngunna leh mi dangte hnêna hrilh chhâwnna hmangin kan tithei a ni. Chu bâkah, dinhmun khirh takte hmachhawn thei tûra mi mal taka min ṭanpui dânte pawh kan hre reng thei bawk. Ni e, Jehova ṭanpuinain, kan hlauhnate chu kan hneh thei a ni.—Sâm 34:4.