ZIR TUR THUZIAK 27
Jehova Chu Beisei Tlat Rawh
“LALPA chu nghâk [“beisei,” NWT] reng rawh; chak takin awm la, i thinlung chu intihuai rawh se.”—SAM 27:14.
HLA 128 A Tâwp Thlenga Chhelin
THLIR LAWKNA *
1. (a) Jehova’n eng beiseina nge min pêk? (b) Jehova beisei tih awmzia chu eng nge ni? (“Ṭawngkam Hrilhfiahna,” tih chu en rawh.)
JEHOVA chuan amah hmangaihtu zawng zawngte chu beiseina duhawm tak a pe a. Natna te, lungngaihna te, leh thihnate chu a titâwp thuai ang a. (Thup. 21:3, 4) Lei hi paradis-a chantîr tûra amah beiseitu “thuhnuairawlhte” chu a ṭanpui ang. (Sâm 37:9-11) Chu bâkah, mi tinte chu tûna kan neih aia ṭha zâwk mi mal taka amah nêna inlaichînna ṭha nei tûrin min ṭanpui bawk ang. Beiseina ropui tak a va ni êm! A nih leh, Pathian thutiamte chu a lo thleng ngei dâwn tih rinna tûr chhan eng nge kan neih? Jehova chuan a thutiam a bawhchhe ngai lo. Chuvângin, Jehova beiseina * tûr chhan ṭha kan nei a. (Sâm 27:14) Chu chu a thiltum a hlen hun tûr chu dawhthei tak leh hlim taka nghâkin kan lantîr a ni.—Is. 55:10, 11.
2. Jehova’n eng nge a tih tawh?
2 Jehova chuan a thutiamte chu a hlen reng ṭhîn tih a lantîr tawh a. Entîrna langsâr tak pakhat hi han ngaihtuah teh. Thu Puan buah, Jehova chuan tûn kan hunah hian hnam tin, chi tin, ṭawng tin zînga mite chu hruai khâwmin, biakna thianghlimah a inpumkhattîr ang tih a tiam a. Tûn laiah, chu pâwl danglam tak chu “mipui tam tak,” tia hriat a ni. (Thup. 7:9, 10) Chu pâwla mite chu hnam te, ṭawng te, leh ṭo bul hrang hranga mi a hmei a pa, a pui a pangte ni mah se, anni chu khawvêl pum huap chhûngkaw inlungrual tak leh inrem tak an ni a. (Sâm 133:1; Joh. 10:16) Chûng mipui tam takte chu ṭhahnemngai taka thu hriltute an ni bawk. A ngaithla duhtu apiangte hnênah an beisei khawvêl ṭha zâwk lo awm tûr chungchâng chu hrilh an inpeih reng a ni. (Mt. 28:19, 20; Thup. 14:6, 7; 22:17) Mipui tam tak zînga mi i nih chuan, thil ṭha zâwk lo thleng tûr i beiseina chu i ngaihlu hle ngei ang.
3. Setana thiltum chu eng nge ni?
3 Diabola chuan i beiseina chu lâk bosak che a duh a. A thiltum chu Jehova’n a ngaihsak lo chein, a thutiamte pawh a hlen lo vang tih rintîr che hi a ni. Setana’n kan beiseina min lâk bosak thei a nih chuan, huaisenna kan hlohvin, Jehova rawngbâwlna kan bânsan hial pawh a ni thei. Kan la hriat tûr angin, Diabola chuan Joba chu a beiseina lâk bosak leh Jehova rawngbâwl bânsantîr a tum a ni.
4. He thuziakah hian eng nge kan sawiho vang? (Joba 1:9-12)
4 He thuziakah hian, Setana’n Joba rinawmna tichhe tûra a beih dânte chu kan bih chiang ang a. (Joba 1:9-12 chhiar rawh.) Joba entawn tûr siam aṭanga kan zir theihte leh Pathianin min hmangaihin, a thutiamte chu a hlen ngei ang tih kan rin a pawimawh chhante pawh kan sawiho bawk ang.
SETANA’N JOBA CHU A BEISEINA HLOHTIR A TUM
5-6. Hun rei lo te chhûngin Joba chungah eng thil nge thleng?
5 Joba chuan nun nuam tak a nei a. Jehova nêna inlaichînna ṭha tak a nei bawk. Chhûngkaw hung tak leh inpumkhat tak a neih bâkah, ani chu mi hausa tak a ni a. (Joba 1:1-5) Mahse, ni khat thil thu-ah a thil neih zawng zawng deuhthaw a chân vek a ni. A hmasa berah, a hausakna a chân a. (Job. 1:13-17) A hnuah, a hmangaih êm êm a fate a chân leh a ni. A chhiatna tawh chu han ngaihtuah teh. Nu leh pate chuan an fate zînga pakhatin a boralsan hian tawrh harsa an ti ṭhîn hle. Chuvângin, Joba leh a nupui chuan an fa neih zawng zawng sâwm an thi tih an hriat huna an tawrh dân tûr te, lungngaih dân tûr te, leh beidawn dân tûrte chu han mitthla teh. Joba chu a lung a chhiat êm avânga a puan pawt thlêr a, leia a tlu pawh kha a mak lo ve!—Job. 1:18-20.
6 Chumi hnuah, Setana chuan Joba chu natna khirh tak leh tenawm tak a veitîr a. (Job. 2:6-8; 7:5) Joba chu khawtlânga mi zahkai tak a ni ṭhîn a. Mite chuan a hnênah thurâwn an rawn dîl ṭhîn a ni. (Job. 31:18) Mahse, tûnah chuan, anni chuan an hawisan ta a. A unau te, a ṭhian hnai tak te, leh a chhiahhlawhte ngei pawhin an hawisan a nih chu!—Job. 19:13, 14, 16.
Tûn laia Thuhretu tam tak chuan Joba’n harsatna a hmachhawn laia a rilru put hmangte chu an hre thiam (Paragraph 7-na en rawh) *
7. (a) Joba’n a hrehawm tawrh chhan chu engvâng nge nia a rin a; mahse, eng tih nge a duh loh? (b) Engtin nge Kristianin milema kan hmuh nêna tehkhin theih fiahnate chu a hmachhawn mai theih?
7 Setana chuan Joba chu Jehova duhsakna a hloh avânga hrehawm tuar nia inngai tûrin a duh a. Entîr nân, thlipui hmangin Joba fa sâwmte chaw ei khâwmna in chu a tichim a. (Job. 1:18, 19) Chu bâkah, Joba rante mai ni lovin, chûng rante enkawltu a chhiahhlawhte pawh tiboral tûrin vân aṭangin mei a tlâktîr bawk. (Job. 1:16) Thlipui leh mei chu vân aṭanga lo kal a nih avângin, Joba chuan Jehova thlentîr niin a ngai a. Chuvângin, kawng eng emawti takin Jehova a tilungni lo niin a ngai a ni. Chuti chung pawhin, Joba chuan a Pa vâna mi chu ânchhe lawh a duh lo. Ani chuan kum tam tak chhûng Jehova hnên aṭangin thil ṭha tam tak a dawng tih a hria a. Thil ṭhate chu lâwm taka a dawng a nih chuan, thil ṭha lote pawh inhuam taka a dawn a ngai niin a ngaihtuah a. Chuvângin, “LALPA hming chu fakin awm rawh se,” tiin a sawi a ni. (Job. 1:20, 21; 2:10) Joba chuan sum leh pai te, a fa te, leh a hrisêlnate chu hloh mah se, Jehova chungah a rinawm reng a. Mahse, Setana chu a la beidawng lo.
8. Setana’n Joba beih nân eng tih dân dang nge a hman?
8 Setana chuan Joba beih nân tih dân dang a hmang leh a; Joba chu hlutna nei lo nia a inhriat theih nân a ṭhian der pathumte chu a hmang a ni. Anni chuan Joba hrehawm tawrh chhan chu thil sual chi hrang hrang a tih vâng niin an sawi a. (Job. 22:5-9) Tihsual a nei lo a nih pawhin, Pathian tilâwm tûra theih tâwp a chhuahnate chuan awmzia a nei lo tih rintîr an tum a ni. (Job. 4:18; 22:2, 3; 25:4) Dik tak chuan, Joba chu Pathianin a hmangaihin, a ngaihsak ang tih leh a rawngbâwlna chu a ngaihlu hle tih chungchângah rinhlelhna neihtîr an tum a. An thusawite chuan Joba chu beisei bo nia inhriatna a neihtîr thei a ni.
9. Engin nge Joba chu huaisen tak leh chak tak ni tûra ṭanpui?
9 He dinhmun hi han mitthla teh. Joba chu vut zîngah ṭhuin na a tuar reng a. (Job. 2:8) A ṭhiante chuan mi ṭha a nih loh thu leh a thiltih eng mahin hlutna a neih lo thu an hrilh reng a. A hmachhawn fiahnate chuan lung rit tak ang maiin a delh a, a fate a chân avânga a lungngaihna chuan a thinlung a la tina reng bawk. A tîr chuan, Joba chu a ngawi reng a. (Job. 2:13–3:1) Mahse, a ṭhiante’n ngawi renga a awmna chu Jehova phatsan a tum tih chhinchhiahna anga an ngaih chuan an tisual hle ang. Ṭum khat chu, Joba’n—hawi chhuaka a ṭhian derte chu enin—heti hian a sawi a ni: “Ka thih thlengin ka dikna [“ka rinawmna,” NWT] ka dah bo lo vang,” tiin. (Job. 27:5) Joba chu hrehawm tam tak tuar chung pawha huaisen tak leh chak taka awm tûrin engin nge ṭanpui? A lunghnual ber lai pawhin, hmangaihna nei tak a Pathianin a hrehawm tawrhte a la tihtâwpsak ang tih a beiseina chu a hloh ngai lo. A boral a nih pawhin Jehova’n a kaitho leh ang tih a hria a ni.—Job. 14:13-15.
ENGTIN NGE JOBA KAN ENTAWN THEIH?
10. Bible-a Joba chanchinin eng nge min zirtîr?
10 Bible-a Joba chanchin chuan Setana’n Jehova phatsan tûrin min tilui thei lo tih leh Jehova’n dinhmun engkim a hria tih min zirtîr a. Joba thiltawn chuan zir tûr pawimawh tak dangte pawh min zirtîr bawk a ni. A hnên aṭanga kan zir theih zir tûr ṭhenkhat chu i lo ngaihtuah ang u.
11. Jehova kan rinchhan zawm zêl a nih chuan eng nge kan chian theih? (Jakoba 4:7)
11 Joba chuan Jehova kan rinchhan zawm zêl a nih chuan fiahna eng pawh kan tuar chhuak theiin, Setana chu hlawhtling takin kan do thei tih a finfiah a ni. Chutianga tihna chuan eng nge a rah chhuah ang? Bible chuan Diabola’n min tlân bosan ang tih min tiam a ni.—Jakoba 4:7 chhiar rawh.
12. Engtin nge thawhleh beiseina chuan Joba chu a tihchak?
12 Thawhleh beiseina chu kan rin tlat a ngai a. Thuziak hmasaa târ lan tawh angin, Setana chuan thih kan hlauhna chu kan rinawmna vawng nghet lo tûra min beih nân a hmang a ni. Joba chungchângah Setana chuan a nun chhanhimna tûrin a rinawmna phatsan pawh tiamin, eng pawh tih a duh ang tih a sawi a. A sawi dik lo hle. Joba chu thi mai tawh tûr nia a inngaih hunah pawh Jehova chungah a rinawm reng a ni. Jehova ṭhatna a rin tlatna leh Jehova’n a tâwpah thil engkim a siam ṭha leh ang tih a beisei tlatna chuan rinawm reng tûrin a ṭanpui a. Dinhmun chu a dam chhûnga Jehova’n a siam ṭha lo a nih pawhin, nakin hunah a kaitho leh ang tih a ring tlat a ni. Joba tân chuan thawhleh beiseina chu a tak hle. Chu beiseina chu kan tân pawh a tak hle a nih chuan, thihna khawp dinhmmun hnuaiah pawh kan rinawmna chu kan vawng reng ang.
13. Engvângin nge Joba beih nâna Setana hman tih dânte chu kan ngaihven tlat a ngaih?
13 Setana chuan Joba beih nâna a hman tih dânte chu tûn laiah pawh a la hman reng avângin chûngte chu kan ngaihven tlat a ngai a. Setana puhna hi lo chhinchhiah teh: “Miin [Joba chauh ni lovin,] a neih zawng zawng a nunna atân a pe phal ang chu!” tih hi. (Job. 2:4, 5) Dik tak chuan, Pathian Jehova chu kan hmangaih tak tak lovin, kan nun chhanhimna tûr a nih phawt chuan Ani chu kan hawisan mai ang tia sawi ang a ni. Chu bâkah, Pathianin min hmangaih lo va, amah tilâwm tûra theih tâwp kan chhuahnate pawh min hriatsak hek lo vang tia sawi ang a ni bawk. Jehova beiseitute chu Setana thiltum kan hriat avângin a bumin kan awm lo.
14. Fiahnate chuan kan chungchângah eng nge a târ lan theih? Entîrna pe rawh?
14 Fiahnate chu mahni inhriat chianna hun remchâng angin kan thlîr tûr a ni. A hmachhawn fiahnate chuan Joba chu a chak lohna laite hre tûr leh siam ṭha tûrin a ṭanpui a. Entîr nân, inngaihtlâwmna a neih lehzual a ngai tih hre tûrin a ṭanpui a ni. (Job. 42:3) Keini pawh fiahnate kan hmachhawn hian mahni kan inhre chiang lehzual thei a. Natna khirh tak nei chung pawha tân ina khung Unau Nikolay-a * chuan: “Tân in hi X-ray ang a ni a, Kristiante chhûngril mizia târ langtu a ni,” tiin a sawi. Kan chak lohnate kan hriat chuan, chumi siam ṭha tûrin hma kan la thei a ni.
15. Tu thusawi nge kan ngaihthlâk ang a, engvângin nge?
15 Kan hmêlmate ni lovin, Jehova thusawi kan ngaihthlâk a ngai a. Joba chuan Jehova’n a biak laiin ngun takin a ngaithla a. Pathian Jehova chuan: ‘Ka thiltihtheihzia hi i hmu em? I chunga thilthleng zawng zawngte hi ka hre vek. Ka ngaihsak theih loh che i ring em ni?’ tia sawi a, chhûtpui ang a ni. Joba chuan inngaitlâwm taka chhâng lêtin, Jehova ṭhatna chu a ngaihlu tak zet a. “Benga hriatna mai zawngin ka hre tawh chia; mahse, tûnah zawng ka hmu ta che,” tiin a sawi a ni. (Job. 42:5) Chûng thute a sawi lai chuan Joba chu vut zîngah a la ṭhu a, a taksa pum chu pân chhiaa a la khah bâkah, a fate pawh a la sûn reng niin a lang. Mahse, Jehova chuan Joba chu a la hmangaih rengin, a la pawm reng tih a hriat chiantîr a ni.—Job. 42:7, 8.
16. Isaia 49:15, 16-a sawi angin, fiahnate kan hmachhawn hunah eng nge kan hriat reng ang?
16 Tûn laiah pawh, mite chuan min sawichhiain, hlutna nei lo angin min cheibâwl mai thei. A mi mal emaw, a pâwl emaw anga kan hming ṭhatna tihchhiat tumin “dâwta sual tinrênga” min hêk an tum pawh a ni thei bawk. (Mt. 5:11) Jehova chuan fiahnate kan hmachhawn hunah a chungah kan rinawm tlat ang tih a rinzia Joba chanchin aṭangin kan hre thei a ni. Ani chuan min hmangaihin, amah beiseitute chu a thlahthlam ngai lo vang. (Isaia 49:15, 16 chhiar rawh.) Pathian hmêlmate min sawichhiatna eng pawh chu ngaihven suh ang che! Turkey rama awm unau James-a te chhûngkua chuan fiahna nasa tak an tâwk a, ani chuan: “Pathian mite chungchânga dâwt thute ngaihthlâkna chuan min tilunghnual thei tih kan hria a. Chuvângin, Lalram beiseina chu kan ngaihven tlatin, Jehova rawngbâwlnaah ṭhahnemngai takin kan tel a. Chutianga kan tih avângin hlimna kan nei reng thei a ni,” tiin a sawi. Joba angin Jehova thusawi chu kan ngaithla a! Hmêlmate dâwt thu chuan kan beiseina min hlohtîr lo.
I BEISEINAIN A ṬANPUI ANG CHE
Joba chu a rinawmna avângin malsâwm a ni a. An nupain nun nuam tak neiin kum rei tak an dam (Paragraph 17-na en rawh) *
17. Hebrai bung 11-naa târ lan mi rinawm a hmei a pate entawn tûr siam aṭangin eng nge i zir?
17 Joba chu fiahna nasa tak tâwk chung pawha huaisen tak leh chak taka awm reng Jehova chhiahhlawhte zînga pakhat mai a ni a. Hebrai mite hnêna a lehkhathawnah, tirhkoh Paula chuan mi dang tam tak sawi langin, anni chu ‘chhûmpui nasa tak ang thlîrtute,’ tiin a ko a ni. (Heb. 12:1, 2) An zain fiahna nasa tak an tâwk ṭheuh va; mahse, Jehova chungah an rinawm tlat a ni. (Heb. 11:36-40) An chhelna leh thawhrimnate chu a thlâwn em? Thlâwn lo! An dam chhûngin Pathian thutiam zawng zawng thlen famkimna chu hmu hman lo mah se, Jehova chu an beisei zawm zêl a. Jehova duhsakna an dawng tih an chian avângin, chûng thutiamte thlen famkim hun chu an la hmu ang tih an ring tlat a ni. (Heb. 11:4, 5) An entawn tûr siamte chuan Jehova beisei zawm zêl kan tumna chu a tinghet thei a ni.
18. Eng tih nge i tum tlat? (Hebrai 11:6)
18 Suahsualna pun chhoh zêlna khawvêlah kan nung a. (2 Tim. 3:13) Setana chuan Pathian mite chu a la fiah zawm zêl a ni. Eng ang harsatna pawh tâwk mah ila, “Pathian nung chu kan rin (“beisei,” NWT) avângin,” A tâna theih tâwp chhuah chu i tum tlat ang u. (1 Tim. 4:10) Pathianin a hnua Joba a malsâwmna chuan, “Lalpa chu khawngaihnain a khahzia leh zah a ngaih theihzia” a finfiah tih hre reng ang che. (Jak. 5:11) Jehova chuan ‘amah zawngtute hnênah lâwmman’ a pe dâwn tih hriain, a chungah i rinawm tlat ang u.—Hebrai 11:6 chhiar rawh.
HLA 150 Chhandamna Atân Pathian Zawng Rawh
^ Fiahna nasa tak tuar chhuak tu emaw kan ngaihtuah hian, Joba kan hre chhuak ṭhîn a. Chu mi rinawm thiltawnte aṭang chuan eng nge kan zir theih? Setana chuan Jehova phatsan tûrin min tilui thei lo tih kan zir a. Chu bâkah, Jehova chuan dinhmun engkim a hre vek tih kan zir bawk. Ani chuan Joba fiahnate chu a tihtâwpsak ang bawkin, kan hrehawm tawrhna zawng zawng pawh engtik nîah emaw chuan a la titâwp ang. Chûngte chu kan ring tak zet a ni tih kan thiltiha kan lantîr chuan, Jehova beisei tak zettute zîngah kan tel ve tihna a ni ang.
^ ṬAWNGKAM HRILHFIAHNA: “Beisei” tia lehlin Hebrai thu mal hi a tlângpui thuin, beiseina sâng tak neia thil eng emaw “nghâk” tihna a ni a. Tu emaw rinchhan tlat tih awmzia pawh a kâwk thei bawk.—Sâm 25:2, 3; 62:5.
^ Hming ṭhenkhat chu thlâk a ni.