ZIR TUR THUZIAK 24
Jehova—Ngaidamtu Ropui Ber
“Lalpa, nang chu i ṭha a, ngaihdam i peih a, a kotu che apiang chungah ngilneihna i ngah sî ṭhîn.”—SAM 86:5.
HLA 42 Pathian Chhiahhlawh Ṭawngṭaina
THLIR LAWKNA *
1. Thuhriltu 7:20-a sawi angin, Lal Solomona’n eng thu dik nge a sawi?
LAL Solomona chuan: “Thil ṭha titu, thil sual ti hauh lo khawpa mi fel chu lei chungah hian an awm lo tak zet a ni,” tiin a sawi. (Thur. 7:20) A va dik tak êm! Kan za hian thil kan tisual vek a. (1 Joh. 1:8) Chuvângin, Pathian leh kan mihringpuite ngaihdamna kan mamawh ṭheuh a ni.
2. Ṭhian ṭha takin min ngaihdam hian engtin nge kan awm?
2 I ṭhian ṭha tak i tihlungnih loh lai chu i la hre ngei ang. Buaina chinfel a, in inlaichînna siam ṭhat leh i duh avângin, thinlung takin ngaihdam i dîl a ni. I ṭhianin i ngaihdam dîlna a pawmsak che chuan engtin nge i awm? I hahdam huai em? Ni e, i hahdamin, i hlim hle ngei bawk ang.
3. He thuziakah hian eng nge kan sawiho vang?
3 Jehova chu kan Ṭhian ṭha ber nihtîr kan duh a; mahse, amah tilungni lotu thiltih chângte kan nei ṭhîn a ni. Mahse, ani chuan ngaihdam min duh tak zet tih engvângin nge kan chian theih? Eng kawngin nge Jehova ngaihdamna chu mihringte kan inngaihdam tawnna laka a danglam bîk? A tâwpah, tute’n nge Pathian ngaihdamna dawng thei?
JEHOVA CHUAN NGAIHDAM A PEIH
4. Engvângin nge Jehova’n ngaihdam a peih tih kan chian theih?
4 Bible chuan Jehova’n ngaihdam a peih reng tih min hrilh a. Sinai Tlânga Mosia hnêna a inlan khân, ani chuan ama chungchângah vântirhkoh pakhat hmangin: “Lalpa chu, Lalpa chu, Pathian lainatnaa khat, mi khawngaih thei tak, thinnel tak, ngilneihna leh thutak ngah, mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualnate ngaidam ṭhîn,” tiin a sawi a. (Ex. 34:6, 7) Jehova chu thil sual ti inchhîrte ngaidam tûra inpeih reng zahngaihna nei tak Pathian a ni.—Neh. 9:17; Sâm 86:15.
Jehova chuan kan nuna thilthleng zawng zawng chu a hria (Paragraph 5-na en rawh)
5. Sâm 103:13, 14-naa sawi angin, mihringte a hriat chiannain Jehova chu eng ti tûrin nge a chêttîr?
5 Min Siamtu a nih angin, Jehova chuan kan chanchin engkim a hre vek a. Han ngaihtuah teh! Ani chuan he leia mi tinte chanchin chu chip chiar takin a hre vek a ni. (Sâm 139:15-17) Chuvângin, kan nu leh pate hnên aṭanga kan rochun ṭhat famkim lohna zawng zawng chu a hmu vek a. Chu mai bâkah, kan miziate thununtu kan thiltawn zawng zawngte pawh a hre vek bawk. Chutiang khawpa mihringte a hriat chianna chuan Jehova chu eng ti tûrin nge a chêttîr? Kan chunga khawngaihna lantîr tûrin a chêttîr a ni.—Sâm 78:39; Sâm 103:13, 14 chhiar rawh.
6. Engtin nge Jehova’n min ngaihdam a duh tih a lantîr?
6 Jehova chuan ngaihdam a duhzia a lantîr tawh a. Ani chuan mihring hmasa ber Adama thiltihte avângin sual leh thihna ânchhe hnuaiah kan awm tih a hria a. (Rom 5:12) Chu ânchhe lak ata mahnia chhuah zalên dân kawng a awm lo va, kan mihringpuite zîngah min chhuah zalên theitu tûr tu mah an awm hek lo. (Sâm 49:7-9) Mahse, hmangaihna nei tak kan Pathian chuan kan chungah zahngaihna lantîrin, min chhuah zalên tûrin ruahmanna a siam a ni. Eng nge a tih? Johana 3:16-a târ lan angin, a Fapa mal neih chhun chu kan aia thi tûrin a rawn tîr a. (Mt. 20:28; Rom 5:19) Isua chuan a chunga rinna neitu zawng zawngte chhuah zalen tûrin kan aiin a thi a ni. (Heb. 2:9) Jehova’n hrehawm tak leh mualpho taka a Fapa duh tak a thi a hmuh lai chuan hrehawm a va ti dâwn tak êm! Ni e, ani chuan min ngaihdam duh lo se chuan, chutianga a Fapa thih chu a phal lo ngei ang.
7. Bible-a kan hmuh Jehova lo ngaihdam tawh mi ṭhenkhat chu tute nge ni?
7 Bible-ah hian Jehova’n a lo ngaihdam tawhte chanchin tam tak a chuang a. (Eph. 4:32) I rilruah tu nge lo lang? Lal Manasea a ni mai thei. Chu mi sual chuan Jehova chungah thil sual râpthlâk takte a ti a ni. Biakna dik lo a chawilâr a. A fate ngei pawh milem pathiante hnênah inthawi nân a hlân a ni. Jehova biak in thianghlimah pathian dik lo lim a din hial bawk. Bible chuan a chungchângah: “LALPA tithinur tûrin a mithmuhah thil ṭha Io a ti ṭhîn,” tiin a sawi. (2 Chro. 33:2-8) Mahse, inchhîrna dik tak a lantîr avângin ani chu Jehova’n a ngaidam a. Pathian chuan a lal nihna chu a chelhtîr leh hial a ni. (2 Chro. 33:12, 13) Uirêna leh tualthahna pawh tiamin, Jehova chunga sual lian tak titu Lal Davida pawh hi i hre chhuak mai thei. Mahse, a thil sual tihte pawm a, tih tak zeta a inchhîr avângin Jehova’n ani pawh a ngaidam a. (2 Sam. 12:9, 10, 13, 14) Ni e, Jehova chuan ngaihdam a duh tak zet tih kan chiang thei a ni. Chu bâkah, mihringte inngaihdam tawnna nêna khaikhin chuan a ngaihdam theihna chu a danglam bîk hle tih pawh kan la hmu ang.
JEHOVA NGAIHDAM THEIHNA DANGLAM BIK TAK
8. Engtin nge Rorêltu nia Jehova danglam bîkna chuan a ngaihdam theihnaah nghawng a neih?
8 Jehova chu “lei chung zawng zawng Rorêltu” a ni a. (Gen. 18:25) Rorêltu ṭha tak chuan dân hriatthiamna thûk tak a neih a ngai a ni. Jehova chu chutiang chiah chu a ni, kan Rorêltu a nih bâkah, dân min Petu a ni si a. (Is. 33:22) Amah ang tluka thil dik leh dik lo hre thei tu mah an awm lo. Rorêltu ṭha chuan eng dang nge a tih la ngai? Thu tlûkna a siam hmaa dinhmun engkim a hriat hmasak a ngai a. Chutiang kawngah pawh, Jehova chu Rorêltu tling ber a ni.
9. Ngaihdam tûr leh tûr loh chungchânga thu tlûkna siam a ngaih hunah Jehova’n eng thilte nge a hriat?
9 Mihring rorêltute nêna inang lo takin, Jehova chuan dinhmun engkim hi a hre vek a. (Gen. 18:20, 21; Sâm 90:8) Mihringte hmuh leh hriat theih piah lam thlengin a hmuin a hre thei a ni. Ani chuan mi chu a nu leh pate hnên aṭanga a rochun mizia te, zirtîrna a dawn te, a chênna hmun te, leh a rilru leh ngaihtuahnate’n a thiltihte a thunun dân chu a hre vek a ni. Jehova chuan thinlung pawh a hre thei a. Mi tinte chêttîrtu te, thiltum te, leh châknate pawh a hre vek bawk. A lakah eng mah thup theih a ni lo. (Heb. 4:13) Chuvângin, Jehova ngaihdamna chu dinhmun engkim a hriatnaah englai pawhin a innghat a ni.
Jehova chu a dikin, ani chuan mi duhsak bîk a nei lo va. Tham theih lah a ni hek lo (Paragraph 10-na en rawh)
10. Engvângin nge Jehova rorêlnate chu englai pawhin a dikin a fel tia kan sawi theih? (Deuteronomy 32:4)
10 Jehova rorêl dânte chu englai pawhin a dikin a fel a. Ani chuan mi duhsak bîk a nei ngai lo. A ngaihdamna chu mite pâwn lam lan dân te, an hausakna te, an hmingthanna te, leh an thiamnaahte a innghat ngai lo. (1 Sam. 16:7; Jak. 2:1-4) Ani chu tu ma tihluih theih a nih loh bâkah, tham theih lah a ni hek lo. (2 Chro. 19:7) Lungnih lohna emaw, thinrimna emaw avângin thu tlûkna a siam ngai lo bawk. (Ex. 34:7) Jehova chuan kan dinhmun leh kan chungchâng engkim a hriat avângin, ani chu Rorêltu tling ber a ni tih rinhlelh rual a ni lo.—Deuteronomy 32:4 chhiar rawh.
11. Engvângin nge Jehova ngaihdamna chu a danglam bîk?
11 Hebrai Pathian Lehkha Thu ziaktute chuan Jehova ngaihdamna chu a danglam bîk hle tih an pawm a. Lehkhabu pakhat sawi dân chuan, dinhmun ṭhenkhatah anni chuan Hebrai thu mal pakhat, “Pathianin thil sual titute a ngaihdamna sawi nân chauhva an hman” ṭhin thu mal chu an hmang a. “Chu thu mal chu miin a mihringpui chunga a lantîr chin tâwk nei ngaihdamna sawi nâna hman a ni ngai lo.” Jehova chauhvin thil sual ti inchhîrte chu a ngaidam pumhlûm thei a ni. Jehova’n min ngaihdam hian eng thil nge thleng?
12-13. (a) Miin Jehova ngaihdamna a dawn hian eng nge a neih theih? (b) Jehova ngaihdamna chu engtiang khawpin nge kan hlâwkpui?
12 Jehova’n min ngaidam tawh tih kan pawm hian rilrua thlamuanna leh chhia leh ṭha hriatna thiang tak pawh tiamin, “harh hunte” kan nei a. Chutiang ngaihdamna chu mihringte hnên aṭang ni lovin, “Lalpa” hnên aṭang chauhva neih theih a ni. (Tirh. 3:19) Jehova’n min ngaihdam hian amah nêna kan inlaichînna a siam ṭhat leh avângin thil sual eng mah ti lo ang mai kan ni.
13 Jehova’n min ngaihdam tawh chuan, kan thil tihsual avângin thiam loh min chantîr, a nih loh leh min hrem leh tawh lo vang. (Is. 43:25; Jer. 31:34) “Chhak leh thlang a inhlat ang hian,” kan bawhchhiatnate chu min dah bosak daih si a. * (Sâm 103:12) Min ngaihdam nasatzia kan ngaihtuah lêt hian, lâwmna leh mak tihnain kan khat a ni. (Sâm 130:4) A nih chuan, tute’n nge Jehova hnên aṭanga chutiang ngaihdamna chu dawng thei?
TUTE NGE JEHOVA’N A NGAIHDAM ANG?
14. Jehova ngaihdamna chungchângah eng nge kan hriat tawh?
14 Kan hriat tawh angin, Jehova ngaihdamna chu kan thil sual tih a len leh têtah a innghat lo. Chu bâkah, min Siamtu, Dân min Petu, leh kan Rorêltu a nih angin, Jehova chuan min ngaihdam dâwn leh dâwn loh chungchânga thu tlûkna a siam hunah a hriattheihna a hmang tih pawh kan hre tawh a ni. A nih chuan, Jehova’n engte nge a ngaihtuah tel?
15. Luka 12:47, 48-a sawi angin, Jehova ngaihtuah tel pakhat chu eng nge ni?
15 Jehova ngaihtuah tel pakhat chu thil sual tituin a thiltih chu a dik lo tih a hriat leh hriat loh hi a ni. Chumi chungchâng chu Isua’n Luka 12:47, 48-ah chiang takin a târ lang a. (Chhiar rawh.) Thil sual tih tum rântu—Jehova tilungni lo thil a ti tih hre chiangtu—chuan sual lian tak a ti a ni. Chutiang mi chuan ngaihdam a hlawh lo pawh a ni thei. (Mk. 3:29; Joh. 9:41) Mahse, a dik lo tih hre reng chunga thil tih châng kan nei tih kan pawm tûr a ni. Chutiang dinhmunah chuan ngaihdam kan inbeisei thei ang em? Thei e! Chu chuan Jehova ngaihtuah thil dang pawh min ngaihventîr a ni.
Inchhîrna dik tak kan lantîr chuan Jehova’n min ngaidam ang tih kan ring tlat thei (Paragraph 16-17-na en rawh)
16. Inchhîrna chu eng nge ni a, Jehova ngaihdam hlawh tûrin engvângin nge kan inchhîr a ngaih?
16 Jehova ngaihtuah thil dang leh chu thil sual tituin inchhîrna dik tak a lantîr leh lantîr loh hi a ni. Inchhîr tih awmzia chu eng nge ni? Inchhîr tih chu “rilru put hmang, a nih loh leh thiltum thlâk danglam,” tihna a ni a. Miin a thil sual tih avângin, a nih loh leh a tih tûr dik tak a tih loh avângin a inchhîrin, pawi a ti tak zet tihna pawh a ni. Inchhîrna lantîrtu chuan a thil sual tih avâng chauh ni lovin, chûng thil sual tihna thlentu thlarau lama a chak lohna avâng pawhin pawi a ti tak zet a ni. Lal Manasea leh Lal Davida chuan sual lian tak ti ve ve mah se, inchhîrna dik tak an lantîr avângin Jehova’n a ngaidam tih hre reng ang che. (1 Lal. 14:8) Ni e, Jehova chuan inchhîrna kan lantîr chauhvin min ngaidam a. Mahse, sual kawng kan zawh, a nih loh leh kan thil sual tih avânga pawi tihna mai chu a tâwk lo. Hma kan la tûr a ni a. * Chu chuan Jehova ngaihtuah thil dang pawh min ngaihventîr leh a ni.
17. Inthlâk danglamna chu eng nge ni a, engvângin nge chu chu kan thil sual tihte tinawn leh tawh lo tûra thil pawimawh tak a nih? (Isaia 55:7)
17 Jehova ngaihtuah thil pawimawh dang leh chu inthlâk danglamna a ni a. Inthlâk danglamna tih chu miin a kawng sual zawh bânsana, Jehova duh zâwnga nun hi a ni. (Isaia 55:7 chhiar rawh.) Mi chuan Jehova ngaihtuahnate a inkaihhruaitîr theih nân a rilru a thlâk danglam tûr a ni a. (Rom 12:2; Eph. 4:23) Tûn hmaa a ngaihtuah dân leh thil tih dân ṭha lote chu kalsan a tum nghet tlat tûr a ni. (Kol. 3:7-10) Krista inthawinaa rinna kan neih avângin Jehova chuan min ngaidamin kan sualte min tlenfaisak a. Kan nun kawng thlâk tûrin theih tâwp kan chhuah tih a hmuh hunah chu inthawina ṭanchhan chuan min ngaidam ang.—1 Joh. 1:7.
JEHOVA NGAIHDAMNA CHU RING TLAT RAWH
18. Jehova ngaihdamna chungchângah eng nge kan sawiho tawh?
18 Kan sawiho tâk thu pawimawh ṭhenkhat kha tawi têin han ennawn leh ta ila. Jehova chu lei leh vâna Ngaidamtu ropui ber a ni tak zet a ni. Eng ṭanchhanin nge chutianga kan sawi theih? Pakhatna, ani chuan ngaihdam a peih reng a. Pahnihna, ani chuan min hre chiang hle a. Kan taksa siam dân leh inchhîrna dik tak kan lantîr leh lantîr loh hre chiang bertu a ni. Pathumna, Jehova’n min ngaihdam hian kan thil sual tihte chu a thai bo vek a. Chu chuan chhia leh ṭha hriatna thiang tak min neihtîr bâkah, a duhsakna min dawntîr a ni.
19. Ṭha famkim lo leh thil sual la tipalh thei reng kan ni chung pawhin, engvângin nge kan hlim theih?
19 Ṭha famkim lo kan nih chhûng chuan, thil kan la tisual zawm zêl ang. Mahse, Insight on the Scriptures, Volume 2, phêk 771-naa: “Jehova chu mi khawngaih thei tak a nih bâkah, ani chuan a chhiahhlawhte chak lohna chu a hria a. Chuvângin, ṭhat famkim lohna avânga thil sual an tih hunah, inthiam lohna an neih reng a ngai lo. (Sâm 103:8-14; 130:3) Pathian duh zâwng mila nung tûra theih tâwp an chhuah chhûng chuan hlimna an nei thei a ni (Phil. 4:4-6; 1Joh. 3:19-22)” tih thute aṭang hian thlamuanna kan hmu thei a ni. A va thlamuanthlâk tak êm!
20. A dawta thuziakah eng nge kan sawiho vang?
20 Jehova chu kan thil sual tihte avânga inchhîrna dik tak kan lantîr huna ngaihdam a inpeih reng avângin kan lâwm hle a ni. A nih chuan, engtin nge Jehova ngaihdamna chu kan entawn theih? Eng kawngtein nge kan ngaihdamna chu Jehova ngaihdamna nêna a inan a, eng kawngtein nge a inan loh? Engvângin nge chu inan lohna hriatthiam chu thil pawimawh tak a nih? A dawta thuziakah chûng zawhnate chu chhân a ni ang.
HLA 45 Thinlunga Ka Ngaihtuahna
^ Jehova chuan thil sual ti inchhîrte chu ngaihdam a duh tih a Thu, Bible-ah chiang takin a târ lang a. Mahse, a ngaihdamna phu lo nia inhriat chângte kan nei mai thei. He thuziakah hian kan thil sual tih avânga inchhîrna dik tak kan lantîr hunah Pathianin min ngaihdam a peih reng tih kan chian theih chhante sawiho a ni ang.
^ ṬAWNGKAM HRILHFIAHNA: “Inchhîrna” tih ṭawngkam chuan kan nun kawng hlui te, kan thil sual tih te, a nih loh leh kan tih tûr dik tak kan tih loh avânga tih tak zeta inchhîrna neia rilru put hmang thlâkna a kâwk a. Inchhîrna dik tak chuan rah ṭha a chhuahin, inthlâk danglamna a thlen a ni.