UNAUNU Lisa-i chuan: “Ka chunga nghawng nei nasa bertu chu Kristian unaute ngilneihna hi a ni,” tiin a sawi. * Thutaka amah hîptu ber chungchâng a sawina a ni. Unaunu Anne-i pawhin: “A tîra thutaka min hîptu ber chu unaute thusawi ai mahin, ka chunga an lantîr ngilneihna a ni,” tiin a sawi bawk. Chûng unaunu pahnihte chuan Bible chhiar leh chhût ngun chu nuam an ti tawh hle a; mahse, ngilneihna chuan an chungah nasa takin nghawng a nei a ni.

Engtin nge min hual vêltute thinlung khawihtu ngilneihna chu kan lantîr theih ang? Kan ṭawngkam leh thiltih hmanga kan lantîr theih dân i lo enho ang u. Chumi hnuah, tute chunga ngilneihna lantîr tûr nge kan nih tih chungchâng pawh kan enho bawk ang.

Thufingte bung 31-naa târ lan nupui fel chuan “ngilneihna” ṭawngkam a hmang ṭhîn a. (Thuf. 31:26) Ngilneihna chuan a thusawite leh a sawi dânte a inthununtîr a ni. Pate pawhin chu ngilneihna ṭawngkam chu an hmang a. Nu leh pa a tam zâwkte chuan ṭawngkam vîn tak hmanna hian an fate chungah nghawng ṭha lo a nei thei tih an hre chiang hle a. Chutianga tawngkam bung tak leh vîn tak an hmang a nih chuan an fate’n an chhâng lêt ṭha lo ngei ang. Chuvângin, nu leh pate’n ngilneihna nei taka thu an sawi chuan an fate tân ngaihthlâk leh zawm a awlsam lehzual ang.

Nu leh pa i ni emaw, ni lo emaw pawh ni se, engtin nge ngilneihna nei taka thu i sawi theih? Thufingte 31:26-na tîr lama: “Finnain a kâ a âng a,” tih thu-ah hian a chhânna ṭhenkhat kan hmu a ni. Chutah chuan kan ṭawngkam hman tûr leh aw phawi dân tûr fing taka thlan a tel a. ‘Ka sawi tûr hian mi thin a tirim dâwn nge ni a, boruak so sâng a tidai zâwk dâwn?’ tia mahni inzawh hi a ṭha fo ṭhîn. (Thuf. 15:1) Ni e, thu kan sawi hmaa ngaihtuah hmasak chu a finthlâk a ni.

Thufingte bu-a châng dang leh chuan: “Khandaih chhun anga na taka mi chhun thu sawi an awm,” tiin a sawi a. (Thuf. 12:18) Kan thusawi dân leh aw phawiin mi dangte a nghawng theih dân kan ngaihtuah chuan, kan thusawite chu kan thunnun thei lehzual ngei ang. Ni e, “ngilneihna” lantîrna chuan ṭawngkam na tak hmang lo tûr leh vîn taka thu sawi lo tûrin min ṭanpui ang a. (Eph. 4:31, 32) Ngaihtuahna ṭha lo leh ṭawngkam ṭha lote chu ṭawngkam ngilnei tak leh ngaihthlâk nuam takin kan thlâk ang. Hemi chungchângah hian Jehova chuan hlauhna nasa tak nei a chhiahhlawh Elija tichakin entawn tûr a siam a. Jehova aiawhtu vântirhkoh chuan Elija chu ‘aw dam diaiin’ a va bia a ni. (1 Lal. 19:12) Ni e, mi ngilnei tak nihnaah chuan ṭawngkam ngilnei tak hman mai aia tam a tel a. Ngilneihna thiltihte pawh kan lantîr tûr a ni. Engtin nge?

Ngilneihna nei taka thu kan sawi a, thil kan tih hian Jehova kan entawn a ni. (Eph. 4:32; 5:1, 2) Kan târ lan tâk Unaunu Lisa-i chuan a chunga Thuhretute lantîr ngilneihna chu a sawi a. Ani chuan: “Kan chhûngkua chu insawn tûra hriattîr thut kan nih chuan, kan kohhrana nupa tuak hnih chuan chawlh lain, kan bungruate chu min khung felpui a. Chutih hun lai chuan, Bible pawh ka la zir lo!” tiin a sawi. Chûng ngilneihna thiltihte chuan Lisa-i chu thutak hriat chian duhna a neihtîr lehzual a ni.

 A tîr lama kan târ lan tâk Anne-i pawhin, a chunga Thuhretute lantîr ngilneihna chu a ngaihlu hle a. Ani chuan: “Khawvêla mi nâwlpuite mizia leh rilru put hmang avâng hian mite rinhlelh ka chîngin, mi dangte rin chu harsa ka ti hle a ni,” tiin a sawi. Chu bâkah: “Thuhretute nêna kan inhmuh chuan, anni chu ka ring lo va. ‘Engvângin nge ka chunga ngaihsakna an lantîr?’ tiin ka ngaihtuah a. Mahse, Bible min zirpuituin ka chunga ngilneihna dik tak a lantîrna chuan amah rin ngamna min neihtîr a ni,” tiin a sawi belh a ni. Chu chuan eng rah ṭha nge a chhuah? “Chumi hnu aṭang chuan, ka thu zirah rilru ka pe thei ṭan ta a ni,” tiin a sawi.

Lisa-i leh Anne-i te chu kohhrana unaute lantîr ngilneihna thiltihin an chungah nghawng ṭha tak a neiin, chu chuan thutak hriat belh duhna a neihtîr tih chhinchhiah ang che. Unaute lantîr ngilneihna chuan an thinlung inhawng tûrin a ṭanpui a ni.

Mi ṭhenkhat tân chuan enkawl seilen an nih dân leh an chênna hmun avângin ṭawngkam ngilnei tak hman leh nui hmêl put chu  thil pângngai tak a ni a. Hnam dân vâng emaw, pianpui mizia vâng emaw pawh ni se, hawihhâwmna lantîrtute chu an fakawm hle. Mahse, chutiang avâng chauhva lantîr kan nih chuan, Pathian ngilneihna entawntu kan ni lo vang.—Tirhkohte 28:2 nên khaikhin rawh.

Pathian ngilneihna dik tak chu thlarau rah pêngte zînga mi a ni a. (Gal. 5:22, 23) Chuvângin, ngilneihna dik tak lantîr tûr chuan Pathian thlarau thianghlim ṭanpuina kan mamawh a ni. Chu chu Jehova leh Isua entawn kan duhna nên pawh a inmil a. Chu bâkah, Kristiante kan nih angin, mi dangte chungah ngaihsakna dik tak kan lantîr bawk. Pathian Jehova hmangaihna leh kan mihringpuite hmangaihna chuan chutianga lantîr tûrin min chêttîr a ni. Chutiang chuan, kan ngilneihna chu thinlung aṭanga lo chhuak, Pathian lâwm zâwng mize ropui tak a ni ta a ni.

Kan chunga ngilneihna lantîrtute, a nih loh leh kan hmêlhriatte chunga ngilneihna lantîr chu a awlsam hle thei a. (2 Sam. 2:6) Lantîr theih dân kawng khat chu an hnêna lâwmthu sawi hi a ni. (Kol. 3:15) A nih leh, tu emaw chuan ngilneihna lantîr phu lo anga kan ngai a nih chuan engtin nge ni ang?

Hei hi han ngaihtuah teh: Jehova chuan kan phu loh ngilneihna lantîrna kawnga entawn tûr ṭha ber a siam bâkah, a Thu, Bible chuan chu mizia lantîrna chungchângah zir tûr pawimawh tak min hrilh a ni. “Kan phu loh ngilneihna,” a nih loh leh “Pathian khawngaihna,” tih ṭawngkam hi Kristian Girk Pathian Lehkha Thu-ah vawi tam tak hman a ni. A nih chuan, engtin nge Pathianin kan chungah ngilneihna a lantîr?

Jehova’n mi maktaduai tam takte hnênah an nunna atâna an mamawhte pe a, an chunga ngilneihna a lantîr reng dân hi han ngaihtuah teh. (Mt. 5:45) Dik tak chuan, Jehova chuan amah kan hriat hma pawhin kan chungah ngilneihna a lantîr reng a ni. (Eph. 2:4, 5, 8) Entîr nân, mi zawng zawng tân a Fapa mal neih chhun a pe a. Tirhkoh Paula chuan Jehova’n tlanna chu ‘a khawngaihna ngahzia ang zêlin’ a pe tih a ziak a ni. (Eph. 1:7) Chu bâkah, thil sualte ti a, kan tilungni lo chung pawhin, ani chuan min kaihruaiin min zirtîr zawm zêl a. A kaihhruaina leh a thute chu hlobet chunga “ruah ang” mai a ni. (Deut. 32:2) Kan chunga a lantîr ngilneihnate chu kan rûl sêng ngai lo vang. A nihna takah chuan, Jehova’n kan chungah kan phû loh ngilneihna lantîr lo se chuan, nakin hun beiseina pawh kan nei lo vang.—1 Petera 1:13 nên khaikhin rawh.

Jehova ngilneihna chu mize duhawm tak leh chêttîrtu ṭha tak a ni tih rinhlelh rual a ni lo. Chuvângin, mi ṭhenkhat chungah chauh ni lovin, mi zawng zawng chunga nî tin ngilneihna lantîrna hmangin Jehova entawn kan tum tlat tûr a ni. (1 Thes. 5:15) Ngilneihna kan lantîr zawm zêl hian, khaw vâwt tak kâra mei lum nuam tak ang kan ni a. Kan chhûng te, kan Kristian unau te, kan hnathawhpui te, kan school kalpui te, leh ṭhenawmte tân thlamuanna kan ni.

I ngilneihna ṭawngkam leh thiltihte hlâwkpui theitu tûr in kohhrana unaute, a nih loh leh i chhûngte chu han ngaihtuah teh. In kohhranah unau tu emaw chuan a in leh a chhehvêl enkawlsak tûrin, a nih loh leh bazârsak pawh tiamin, nî tina tih ngai hnate thawhna kawngah ṭanpuina a mamawh hle pawh a ni thei. Chu bâkah, rawngbâwlnaa ṭanpui ngai tu emaw i hmuh hunah kawng eng emaw takin i ṭanpui thei ang em?

Pathian Jehova entawnin, kan thusawite leh thiltihte chu “ngilneihna” hmanga thunun i tum tlat ang u.