Bible chuan a chhan a sawi lo. Mahse, an thu tlûkna siam nghawng theitu thil ngaihvenawm takte a târ lang thung a ni.

Vântirhkoh pakhatin Mari chu a rai ang a, fa a hring ang tih a hrilh a. Chu thuchah a sawi lai chuan Mari leh Josefate chu Galili rama Josefa pian leh mûrna Nazaret khuaah an chêng a. (Lk. 1:26-31; 2:4) A hnuah, Aigupta aṭanga an rawn lêt leh khân Nazaret-ah chuan an kîr leh a ni. Chu hmunah chuan Isua chu seilianin, Nazaret mi tia koh a ni ta a. (Mt. 2:19-23) Isua, Josefa, leh Marite hming kan hriat hian Nazaret tih chu rilruah a rawn lang nghâl ṭhîn a ni.

Mari chuan Judai rama chêng, laizâwn Elizabeti a nei a. Ani chu puithiam Zakaria nupui, baptistu Johana nu a ni. (Lk. 1:5, 9, 13, 36) Mari chu Elizabeti hnênah chuan va zinin thla thum lai a châm a. Tichuan, Nazaret-ah a haw leh a ni. (Lk. 1:39, 40, 56) Chuvângin, Mari’n Judai ram chu a hre chiang thawkhat hle ang.

A hnuah, Josefa chuan “hming ziak” tûra thupêk chu a zâwm a. Chuvângin, Nazaret aṭangin “Davida khua,” Bethlehem chu a pan a, chu chu hrilh lâwk anga Messia pianna hmun tûr a ni. (Lk. 2:3, 4; 1 Sam. 17:15; 20:6; Mik. 5:2) Mari’n Isua a hrin hnuah, Josefa chuan nausên nêna zin kawng thui tak zawhin Nazaret-ah a hawpui lo. Anni chu Jerusalem aṭanga km 9 vêl (mêl 6 vêla) hlaa awm Bethlehem-ah chuan an châm ta a ni. Chuvângin, an tân nausên chu biak ina hruai a, dânin a phût anga thilpêk hlan chu a awlsam phah ngei ang.—Lev. 12:2, 6-8; Lk. 2:22-24.

A hmain, Pathian vântirhkohvin Mari hnênah a fapa chu ‘Davida ṭhutphahah’ ṭhuin “a Lal ang” tih a lo hrilh tawh a. Mari leh Josefate chuan, Davida khuaa Isua a piang chu thil chhinchhiah tlâk tak niin an ngai ang em? (Lk. 1:32, 33; 2:11, 17) Anni chuan chuta awm chhunzawma Pathianin an tih tûr dang a hrilh hun nghah chu thil finthlâk niin an ngai a ni mai thei.

Khawchhak mi fingte an va thlen chuan, Bethlehem-ah engtia rei nge an awm tawh tih kan hre lo va. Mahse, chutih lai chuan an chhûngkuain inah an chêng tawh a, an fapa pawh nausên ni tawh lovin, “nautê” a ni tawh a ni. (Mt. 2:11) Chuvângin, Nazaret-a kîr leh lovin, Bethlehem-ah hun eng emaw chen an inbêngbel niin a lang.

Heroda chuan “Bethlehem khua leh a vêl zawng zawnga mipa naupang kum hnih achin hnuai lam” that vek tûrin thupêk a chhuah a. (Mt. 2:16) Chu thupêk chungchângah Josefa chuan Pathian hnên aṭanga vaukhânna a dawn avângin, Mari leh Isua hruaiin Aigupta ramah a tlânchhia a, Heroda thih thlengin chutah chuan an awm a. A hnuah, Josefa chuan a chhûngkua chu Nazaret-ah a awmpui a ni. Engvângin nge Bethlehem-ah an kîr leh loh? A chhan chu, chutih lai chuan Heroda fapa mi nunrâwng tak, Arkelausa’n Judai ramah ro a rêl avângin, chuta kal lo tûrin vântirhkohvin Josefa chu a hrilh a. Chuvângin Nazaret-ah, Isua chu Pathian betu dik ni tûrin him takin a enkawl seilian thei a ni.—Mt. 2:19-22; 13:55; Lk. 2:39, 52.

Isua’n vâna nun theihna kawng a hawn hmain, Josefa chu a thi a nih a rinawm a. Chuvângin, Josefa chu leia kaihthawh a ni ang. Chutih hunah chuan mi tam takin amah chu hmuin, Isua pian hnua Mari nêna Bethlehema an awm reng chhante an zâwt thei ang.