1-2. Sâm 25:14-in a sawi angin, Jehova nêna inṭhian ṭhatna neih kan duh chuan eng nge kan tih ngai?

 TU EMAW nêna inṭhian ṭhatna vawn reng i duh chuan, eng miziate nge pawimawha i rin? Ṭhian ṭhate chu an inhmangaihin, an inṭanpui tawn tûr a ni tia i chhân ngei a rinawm. Ṭihna chu inṭhian ṭhatna atâna mize pawimawh pakhat angin i ngai lo mai thei. Mahse, he thuziak thupuiin a sawi angin, Jehova nêna inṭhian ṭhatna neih duh apiangte chuan ‘amah an ṭih’ tûr a ni.—Sâm 25:14 chhiar rawh.

² Jehova rawng kan bâwlna chu engtianga rei pawh ni tawh mah se, kan za hian amah kan ṭih reng tûr a ni. Mahse, Pathian ṭih tih awmzia chu eng nge ni? Engtin nge Jehova ṭih chu kan zir theih? Lal in chhûng enkawltu Obadia te, Puithiam Lal Jehoiada te, leh Lal Joasa te hnên aṭangin Pathian ṭih chungchâng eng nge kan zir theih?

3. Hlauhnain min vênhim theih dân chu hrilhfiah rawh.

³ Nâ eng emaw kan tuar dâwn nia kan hriat hian hlauhna kan nei thei a. Chutiang hlauhna chuan thu tlûkna ṭhate siam tûra min ṭanpui theih avângin thil ṭha tak a ni thei a ni. Khâma tlâk hlauhna chuan khâm hnaih lutuka kal lo tûrin min vêng a. Inhliam palh hlauhna chuan dinhmun hlauhawm tlânsan tûrin min chêttîr thei a ni. Kan hmangaih tak tu emaw  nêna kan inṭhianna tihchhiat hlauhna chuan, a rilru tina thei thute sawia thil ti lo tûrin min vêng ang.

4. Setana’n Jehova chu eng anga hlau tûrin nge min duh?

⁴ Setana chuan Jehova chu mite’n sakei hlauhva hlau tûrin a duh a. Ani chuan Eliphaza ngaih dân—Jehova chu phuba lâk hmang leh tihlâwm hleih theih loh Pathian thinur hmang a ni tih—chu a theh lâr a. (Job. 4:18, 19) Ani chuan Jehova kan hlauh êm avânga a rawng bâwl tawh lo tûrin min duh a ni. Chu thang pumpelh tûr chuan, Pathian ṭihna kan neih chhoh a ngai a ni.

5. Pathian ṭih tih awmzia chu eng nge ni?

⁵ Pathian ṭihtu chuan amah a hmangaih a, Pathian nêna an inlaichînna tichhe thei eng thil mah tih a duh lo. Isua chuan chutiang ‘Pathian ṭihna’ chu a nei a ni. (Heb. 5:7) Ani chuan Jehova chu sakei hlauhvin a hlau lo va. (Is. 11:2, 3) Chu aiin, Pathian hmangaihna thûk tak a nei a, a thu zawm a duh bawk. (Joh. 14:21, 31) Pathian Jehova chu hmangaihna nei tak, fing tak, dik tak, leh thiltithei tak a nih avângin, Isua angin amah zahna thûk tak kan nei a ni. Jehova chuan min hmangaih hle tih leh a kaihhruaina kan chhân lêt dânin a chungah nghawng a nei tih kan hria a. Jehova rilru chu kan tinâ emaw, kan tilâwm emaw thei a ni.—Sâm 78:41; Thuf. 27:11.

6. Pathian ṭih kan zir theih dân kawng khat chu eng nge ni? (Sâm 34:11)

⁶ Jehova ṭihna chu kan pianpui loh avângin kan zir a ngai a. (Sâm 34:11 chhiar rawh.) Chutianga kan tih theih dân kawng khat chu thil siamte zir chian hi a ni. ‘Thil siama’ lang Pathian finna te, thiltihtheihna te, leh min hmangaihna thûk takte kan hmuh tam poh leh, amah kan zahna leh kan hmangaihna chu a thûk lehzual ang. (Rom 1:20) Unaunu Adrienne-i chuan, “Thil siamtea lang Jehova finna chu mak ka ti hle a, chu chuan ka tâna thil ṭha ber a hria tih hre tûrin min ṭanpui a ni,” tiin a sawi. Chutianga a chhût ngunna chuan, “Nunna min petu Jehova nêna kan inṭhianna tichhe thei thil chu engvângin nge tih ka duh teh lul ang?” tiin thu tâwp a siamtîr a ni. Tûn chawlhkâr chhûngin thil siam zînga pakhat chhût ngun nân hun i hmang thei ang em? Chutianga tihna chuan Jehova zahna leh hmangaihna thûk lehzual a neihtîr ang che.—Sâm 111:2, 3.

7. Engtin nge ṭawngṭaina chuan Jehova ṭihna nei chho tûra min ṭanpui theih?

⁷ Pathian ṭihna kan neih theih dân kawng dang leh chu ṭawngṭai ziah hi a ni a. Kan ṭawngṭai tam poh leh Jehova chu kan tân a tak lehzual ang. Harsatna hmachhawn thei tûra a hnêna chakna kan dîl apiang hian, a thiltihtheihna nasa tak chu hriatnawntîrin kan awm ṭhîn. A Fapa min pêk avânga lâwmthu kan hrilh hian, min hmangaihzia chu kan inhriatnawntîr a. Harsatna kan tawh huna Jehova hnêna ṭanpuina kan dîl hian, a finzia chu kan hre chhuak leh ṭhîn. Chutiang ṭawngṭainate chuan Jehova kan zahna chu a tithûk lehzual a. Chu bâkah, amah nêna kan inṭhianna tichhe thei thil eng pawh pumpelh tum tlat tûrin min ṭanpui a ni.

8. Pathian ṭihna nei reng tûrin eng nge kan tih theih?

⁸ Bible-a chuang entîrna ṭha leh ṭha lote aṭanga inzir tuma Bible kan zir chuan Pathian ṭihna kan nei reng thei ang. Jehova chhiahhlawh rinawm pahnih—Lal Ahaba in chhûng enkawltu Obadia leh Puithiam Lal Jehoiada chungchâng kan sawiho vang a. Chu bâkah, bul ṭan ṭha hle mah se, a hnua Jehova kalsantu Juda Lal Joasa hnên aṭanga kan zir theihte kan hmu bawk ang.

9. Engtin nge Jehova a ṭihna chuan Obadia a ṭanpui? (1 Lalte 18:3, 12)

⁹ Bible chuan Obadia b chungchângah: “Obadia chu LALPA ṭih mi tak a ni,” tiin min hrilh a. (1 Lalte 18:3, 12 chhiar rawh.) Engtin nge Pathian a ṭihna chuan Obadia a ṭanpui? A ṭanpui dân kawng khat chu mi rinawm leh mi rin tlâk a nihtîr a; chuvângin, lalin ani chu lal in hotuah a ruat a ni. (Nehemia 7:2 nên khaikhin rawh.) Pathian a ṭihna chuan Obadia chu a mamawh êm êm huaisenna nasa tak a pe bawk. Ani chu ‘a hmaa mite (lalte) zawng zawng aia LALPA mithmuha thil ṭha lo tak ti ṭhîn’ Lal Ahaba rorêl laia awm a ni a. (1 Lal. 16:30) Chu bâkah, Baala betu Ahaba nupui Jezebeli chuan Jehova a huat êm avângin, hmâr lam lalram ata biakna dik chu nuai bo a tum a. Pathian zâwlnei tam tak a that hial a ni. (1 Lal. 18:4) Obadia chuan hun khirh tak kârah Jehova a bia tih a chiang hle.

10. Engtin nge Obadia chuan huaisenna nasa tak a lantîr?

¹⁰ Engtin nge Obadia chuan huaisenna nasa tak a lantîr? Jezebeli’n Pathian zâwlneite tihhlum tuma a veh khân, Obadia chuan zâwlnei 100-te chu ‘50 ve vein pûkah a thukru a, chhang leh tuiin a châwm’ a ni. (1 Lal. 18:13, 14) A thiltih chu hriat chhuah a nih chuan mi huaisen tak Obadia chu tihhlum a ni ngei dâwn a. Mihring ve mai a nih avângin chu chu a hlau ngei ang. Mahse, Obadia chuan a nunna aiin Jehova leh A rawngbâwltute chu a hmangaih zâwk a ni.

11. Engtin nge tûn laia Jehova chhiahhlawhte chu Obadia ang an nih? (Milem en bawk rawh.)

¹¹ Tûn laia Jehova chhiahhlawh tam tak chu kan rawngbâwlna khap beh a nihna ramahte an chêng a. Thuneitute chungah a âwm tâwk zahna lantîr mah se, Obadia angin hêng unau duhawm takte hian Pathian Jehova hnênah a phu ang ngeiin inpêkna pumhlûm an hlân a ni. (Mt. 22:21) Mihring thu aia Pathian thu zâwmin Pathian ṭihna an lantîr a. (Tirh. 5:29) Chanchin ṭha hril zawm zêlin leh fîmkhur taka inkhâwmho zêlin chutiang  chuan an ti a ni. (Mt. 10:16, 28) An unaute’n an mamawh tak thlarau lam chaw an dawn theih dân tûr an ngaihtuahsak bawk. Hun eng emawti chhûng kan rawngbâwlna khap behna rama chêng Henri-a thiltawn hi lo ngaihtuah ta ila. Rawngbâwlna khap beh a nih chhûngin, Henri-a chu a Kristian unaute hnêna thlarau lam chaw sem tûrin a inpe a. Ani chuan: “Mi zakzum tak ka ni a. Chuvângin, ka mamawh huaisenna chu Pathian Jehova zahna thûk tak ka neihna aṭanga lo awm a ni tih ka hre chiang a ni,” tiin a sawi. Henri-a anga huaisen tak i nih theih i inring em? Pathian ṭihna i neih chhoh zêl chuan i ni thei ang.

12. Engtin nge Puithiam Lal Jehoiada leh a nupuiin Jehova chungah rinawmna nasa tak an lantîr?

¹² Puithiam Lal Jehoiada chuan Jehova a ṭih a, chu a ṭihna chuan rinawm tûr leh Jehova be tûra mi dangte fuih tûrin a chêttîr a. Chu chu Jezebeli fanu Athali’n Judai rama lalṭhutthlêng a chhuh khân a lang chiang hle. Mite chuan Athali hlauhna tûr chhan ṭha tak an nei a. Ani chu a nunrâwn êm avâng leh thuneihna a duh êm avângin lal thlah zawng zawng—a tupate ngei chu thah vek a tum a ni! (2 Chro. 22:10, 11) Chûng naupangte zînga pakhat—Joasa—chu Jehoiada nupui, Jehosabeathi’n a humhim a. Naupang chu an nupaa thukruin, an enkawl a. Chutiang kawng chuan Jehoiada leh Jehosabeathi chuan Davida lal thlah kal zêl humhimnaah an ṭanpui a ni. Jehoiada chu Jehova chungah a rinawm tlat a, Athali a hlauhna chu thil dik tih loh phah nân a hmang lo.—Thuf. 29:25.

13. Joasa chu kum sarih mi a nihin, engtin nge Jehoiada’n rinawmna a lantîr leh?

¹³ Joasa chu kum sarih mi a nihin, Jehoiada chuan Jehova chunga a rinawmna chu a lantîr leh a. Ruahmanna a siam a ni. Ruahmanna chu a hlawhtlin chuan Davida ro luahtu tûr dik tak, Joasa chu lal a ni ang a. Ruahmanna chu a hlawhchham erawh chuan, Jehoiada’n a nun a chân ngei ang. Jehova malsâwmnain ruahmanna chu a hlawhtling a. Chhûngkaw puipa leh Levi-hote’n Jehoiada chu thlâwpin Joasa chu lalah an siam a, Athali erawh chu tihhlum a ni ta a ni. (2 Chro. 23:1-5, 11, 12, 15; 24:1) Tichuan, Jehoiada chuan “LALPA leh lal leh mipuite kârah chuan LALPA mite an lo nihna tûr thu a thlung ta a.” (2 Lal. 11:17) Chu bâkah, ani chuan “thianghlim lo tawh phawt chu an luh loh nân LALPA in kawngkhâr vêngtute a ruat” bawk a ni.—2 Chro. 23:19.

14. Jehova a chawimawi avângin Jehoiada chu eng kawngtein nge chawimawi a nih?

¹⁴ A hmain Jehova’n: “Mi chawimawi apiangte chu ka chawimawi ang,” tiin a lo sawi tawh a. A sawi ang chiahin, Jehoiada chu a chawimawi a ni. (1 Sam. 2:30) Entîr nân, a hnên aṭanga kan inzir theih nân Bible-ah Jehoiada chanchin chu a chuantîr a. (Rom 15:4) Tichuan, Jehoiada chu a thih hnuin, “Israelte zîngah Pathian chungah leh a in chungchânga thil a tih ṭhat avângin Davida khawpuiah lalte zîngah an phûm a,” chutiang chuan chawimawina danglam tak pêk a ni.—2 Chro. 24:15, 16.

15. Jehoiada chanchin aṭangin eng nge kan zir theih? (Milem en bawk rawh.)

¹⁵ Jehoiada chanchin chuan Pathian ṭihna nei chho tûrin kan zain min ṭanpui thei a. Upate chuan harhvâng taka awm rengin leh Pathian berâmte rinawm taka vênghimin Jehoiada chu an entawn thei a ni. (Tirh. 20:28) Kum upate chuan Jehova an ṭih a, an rinawm reng chuan Jehova’n a thiltum tihhlawhtlin nân a hmang thei tih Jehoiada hnên aṭangin  an zir thei a. Pathian Jehova’n anni chu a ngaihthah lo. Ṭhalaite chuan kum upa, a bîk takin hun rei tak chhûng rinawm taka rawng lo bâwl tawhte chu zah taka cheibâwlin, Pathian Jehova’n Jehoiada a cheibâwl dân chu an entawn thei a ni. (Thuf. 16:31) A tâwp berah, Jehoiada thlâwptu chhûngkaw puipate leh Levi-hote hnên aṭangin kan zain zir theih kan nei a. “Hotute” thu zâwmin, rinawm taka thlâwp i tum tlat ang u.—Heb. 13:17.

16. Lal Joasa chu a chak lo tih engin nge târ lang?

¹⁶ Jehoiada chuan Lal Joasa chu mi ṭha tak ni tûrin a ṭanpui a. (2 Lal. 12:2) Chuvângin, lal chuan a naupan lai chuan Jehova tihlâwm a duh a ni. Mahse, Jehoiada a thih hnuah Joasa chuan kalpêng Juda mi liante thurâwn chu a pawm a. Chu chuan eng sawhkhâwk nge a neih? Amah leh a khua leh tuite chuan “Aserite leh milemte rawng an bâwl ta” a ni. (2 Chro. 24:4, 17, 18) Jehova chuan a rilru a na hle chung pawhin a “hnêna hruai leh tûrin an hnênah zâwlneite a tîr a, . . . nimahsela, an beng an chhi duh chuang lo.” Anni chuan Jehova zâwlnei leh puithiam chauh ni lo, Joasa unaupa ni bawk, Jehoiada fapa Zekaria thusawi hial pawh an ngaithla duh lo. A nihna takah chuan, a nunna chhanhimtu Zekaria chhûngkaw chungah lâwmna lantîr ahnêkin, Lal Joasa chuan Zekaria chu a tihlum zâwk a ni.—2 Chro. 22:11; 24:19-22.

17. Joasa chungah eng thil nge thleng?

¹⁷ Joasa chuan Jehova a ṭih reng loh avângin a chungah thil ṭha lote a thleng a. Jehova  chuan: “Mi hmusit apiangte chu ka ngaihnêp an ni dâwn si a,” tiin a lo sawi tawh a ni. (1 Sam. 2:30) A hnuah, Suria sipai tlêm tê chuan Joasa “sipai tam tak” chu an hneh a, ani chuan “natna nasa tak” a tuar bawk. Suria sipaite’n an hawsan hnuah, Joasa chu Zekaria a thah avângin ama mite ngeiin an tihlum a. Chu lal sual tak chu ‘lalte thlâna’ phûm tlâk lohva ngaih hial a ni.—2 Chro. 24:23-25.

18. Jeremia 17:7, 8-nain a sawi angin, engtin nge Joasa ang nih chu kan pumpelh theih?

¹⁸ Joasa chanchin aṭangin eng nge kan zir theih? Ani chu zung kaih nghet lo tak, ban rinchhana ding, thing ang a ni a. Chu ban—Jehoiada—a awm loh hnu chuan, kalpênna thlî chuan Joasa chu a chhêm thlu ta a ni. Hei hian kan chhûngte leh kohhrana mi dangte’n kan tân entawn tûr an siam avâng chauhva Pathian thu awih kan ni tûr a ni lo tih a târ lang chiang hle. Jehova hnaih reng tûr chuan inzirna te, chhût ngunna te, leh ṭawngṭainate nei ziahin amah hmangaihna leh zahna chu kan tithûk tûr a ni.—Jeremia 17:7, 8 chhiar rawh; Kol. 2:6, 7.

19. Jehova’n kan lakah eng nge a phût?

¹⁹ Jehova chuan kan lakah thil tam tak a phût lo va. A thil phûtte chu Thuhriltu 12:13 chuan: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin a khaikhâwm a ni. Pathian kan ṭih chuan Obadia leh Jehoiada te angin kan tawh tûr fiahnate chu kan hmachhawn thei ang a, kan ding chang thei ang. Chu bâkah, Jehova nêna kan inṭhianna chu eng thil mahin a tichhe thei bawk hek lo vang.