1. Jehova nîa dam khawchhuak tûrin eng nge kan tih ngai?

 BIBLE-in “Lalpa nî” tia a sawi hian Jehova’n a hmêlmate a tihboral a, a mite a chhanchhuah hun a kâwk a. Hmân laiin Jehova’n hnam ṭhenkhat chu a lo hrem tawh a ni. (Is. 13:1, 6; Ezek. 13:5; Zep. 1:8) Kan hun laiah “Lalpa nî” chu Babulon Khaw Ropui beihnain a inṭan ang a, Armageddon indonaah a vâwr tâwp chu a thleng ang. Chu ‘nîa’ dam khawchhuak tûr chuan tûn aṭanga kan inbuatsaih a ngai a. Isua chuan “hrehawm nasa tak” atâna inpeih tûr mai ni lovin, chumi nî atâna ‘inring renga’ awm tûrin min zirtîr a ni.—Mt. 24:21; Lk. 12:40.

2. Engvângin nge Thessalonika thawn khatna hi kan hlâwkpui theih?

² Tirhkoh Paula chuan Thessalonika khuaa mite hnêna thlarauva thâwk khum a lehkhathawn pakhatnaah, Jehova rorêlna ni ropui tak atâna inring renga awm tûra Kristiante ṭanpui nân tehkhin thu ṭhenkhat a sawi a. Paula chuan chutih hun lai chuan Jehova nî a lo thleng nghâl dâwn lo tih a hria a. (2 Thes. 2:1-3) Chuti chung chuan, a unaute chu a tûka lo thleng tûr ang maiin chumi nî atâna inbuatsaih tûrin a fuih a, keini pawhin a fuihna chu kan nunpui thei a ni. Hêng thil pathumte a hrilhfiahna hi i lo ngaihtuahho vang u: (1) Jehova nî lo thlen dân tûr, (2) chumi nîa boral tûrte, leh (3) dam khawchhuak tûra kan inbuatsaih theih dânte hi.

3. Engtin nge Jehova nî chu zânah rûkru anga a lo thlen? (Milem en bawk rawh.)

³ “Zânah rûkru angin.” (1 Thes. 5:2) Hei hi Jehova nî lo  thleng tûr hrilhfiah nâna hman tehkhin thu pathumte zînga a hmasa ber a ni a. Rûkrute chuan rang taka chein zân thimah mite inrin loh lai an châng ṭhîn a ni. Jehova nî pawh mi a tam zâwkte rin loh lai takin a lo thleng thut ang. Kristian dikte hial pawhin thilte a thlen zung zung dân chu mak an ti mai thei. Mahse, mi suaksualte ang lo takin, keini chu tihboral kan ni ve lo vang.

4. Eng kawngin nge Jehova nî chu nau veina nên a inan?

⁴ “Hmeichhe nau vei angin.” (1 Thes. 5:3) Nu, naupai chuan a nau vei hun tûr tak chu a hre thei lo va. Mahse, a vei ngei dâwn tih a hria a ni. Chumi hunah chuan chawplehchilhin a vei ang a, nâ a tuarin dan theih a ni lo vang. Chutiang bawkin, Jehova nî inṭan hun tûr nî leh dârkâr chu kan hre lo va. Mahse, chu nî chu a lo thleng ngei ang tih leh Pathian rorêlna chu mi suaksualte chungah a lo thleng thut ang a, pumpelh theih a ni lo vang tih kan chiang a ni.

5. Eng kawngin nge hrehawm nasa tak chu vârṭian ang a nih?

⁵ Vârṭian angin. Paula tehkhin thu pathumna chuan zâna rûkru chungchâng a târ lang leh a. Mahse, tûn ṭumah chuan Paula chuan Jehova nî chu vârṭian nên a tehkhin niin a lang. (1 Thes. 5:4) Rûkrute chuan zâna an chêt laia hun a liam chak dân chu an hre chang lo thei a. Zîng khaw êng chuan nangchîngin an thiltih chu a pho lang dâwn a ni. Hrehawm nasa tak pawhin rûkru ang maia Pathian duh loh zâwng thilte ti zawm zêla thima awm tlatte chu a pho lang ang. Chutiang mite ang lo takin, keini chuan Jehova tilâwm lotu thiltihte hnâwlin leh ‘ṭhatna, felna, leh thutak zawng zawng’ ûmin chumi nî atân chuan kan inpeih thei a ni. (Eph. 5:8-12) A dawtah, Paula chuan dam khawchhuak lo  tûrte târ lan nân tehkhin thu pahnih a hmang a ni.

6. Eng kawngin nge mi a tam zâwk chu an muthilh? (1 Thessalonika 5:6, 7)

⁶ “Muhîlte.” (1 Thessalonika 5:6, 7 chhiar rawh.) Paula chuan Jehova nîa dam khawchhuak lo tûrte chu muhîlte nên a tehkhin a. Anni chuan an chhehvêla thilthlengte leh hun liam chak dân chu an hre lo. Chuvângin, thilthleng pawimawh takte chu an hriat loh bâkah, chhân lêt nachâng pawh an hre lo a ni. Tûn laia mi a tam zâwkte chu thlarau lamah an muhîl a. (Rom 11:8) Anni chuan ‘ni hnuhnûngah’ kan awm tih leh hrehawm nasa tak chu a lo thleng thuai dâwn tih târ langtu thilthlengte chu an ring lo. Khawvêla thilthleng langsâr zualte chuan mi ṭhenkhat chu thlarau lama an muthilhna ata tiharhin, kan Lalram thuchah chu ngaihven tûrin a chêttîr thei a. Mahse, mi tam tak chu harhvâng taka awm reng lovin, an muhîl leh a ni. Rorêlna nî a lo thlen ringtu ṭhenkhatte hial pawhin chu chu lo thleng lawk lo tûrah an ngai a. (2 Pet. 3:3, 4) Amaherawhchu, kan tân harhvâng taka awm chu a ni têlin a pawimawh telh telh a ni.

7. Engtin nge Pathian thinurna hmachhawn tûrte chu zu ruite ang an nih?

⁷ “Zu ruite.” Tirhkoh Paula chuan Pathian thinurna hmachhawn tûrte chu zu ruite nên a tehkhin a. Zu ruite chuan an chhehvêla thilthlengte chu an chhâng lêt vat thei lo va, thu tlûkna ṭha lo tak tak an siam a ni. Chutiang bawkin, mi sualte chuan Pathian vaukhânnate chu an chhâng lêt lo va. Boralna thlentu nun kawng zawh chu an thlang a ni. Mahse, Kristiante chu ngaihven reng tûr leh harhvâng taka awm tûra hrilh an ni a. (1 Thes. 5:6) Bible lama mi thiam pakhat chuan chu harhvânna chu “thilte dik taka chhûta bûktu rilru fîm leh nghet neih avânga thu tlûkna dik min siamtîr theitu,” tiin a hrilhfiah a ni. Engvângin nge rilru fîm leh nghet kan neih a ngaih? Tûn laia politics leh khawtlâng buainatea kan inhnamhnawih loh nân a ni. Jehova nî a hnaih zêl rualin, chûng thiltea ṭan lam nei tûra nawrna chu a nasa telh telh dâwn a. Mahse, chumi kan chhân lêt dân tûr chungchângah kan lungkham a ngai lo. Pathian thlarau chuan rilru fîm leh nghet neia, thu tlûkna fing takte siam thei tûrin min ṭanpui thei a ni.—Lk. 12:11, 12.

8. Thessalonika thawn khat 5:8-nain harhvâng taka awm tûr leh ngaihven renga awm tûra min ṭanpuitu miziate chu eng nên nge a tehkhin? (Milem en bawk rawh.)

⁸ ‘Awmphaw chu hain, lukhum chu khum rawh.’ Paula chuan indo tûra inthuam leh harhvâng taka awm sipaite nên min tehkhin a. (1 Thessalonika 5:8 chhiar rawh.) Sipai chu indo tûra inring renga awm tûra beisei a ni a. Keini pawh chutianga awm tûra beisei chu kan ni. Rinna leh hmangaihna âwmphaw chu hain leh beiseina lukhum chu khum tlatin Jehova nî atân inring rengin kan awm a. Hêng miziate hian nasa takin min ṭanpui thei a ni.

9. Engtin nge kan rinnain min vênhim?

⁹ Awmphaw chuan sipai lung a vênghim a. Rinna leh hmangaihna chuan entîr nei kan thinlung a vênghim a ni. Chûng miziate chuan Pathian rawng bâwl zawm zêl tûr leh Isua zui zêl tûrin min ṭanpui ang. Rinna chuan thinlung zawng zawnga amah kan zawn avângin Jehova’n lâwmman min pe ang tih min rinnghehtîr a. (Heb. 11:6) Chu chuan harsatnate kan tawrh a ngaih hunah pawh min Hruaitu, Isua chunga rinawm reng tûrin min chêttîr ang. Tihduhdahnate leh ei leh bâr lama harsatnate tuar chung pawha rinna vawng tlattu, tûn laia entîrnate aṭanga inzirin nî tina harsatnate  hmachhawn tûrin rinna kan nei chho thei a. Lalram dah hmasa tûra an nun tisamkhaitute chu entawnin, hausak âtchilhna thang chu kan pumpelh thei a ni. b

10. Engtin nge Pathian leh vêngte hmangaihna chuan chhel tûra min ṭanpui?

¹⁰ Hmangaihna chu harhvâng taka awm tûr leh ngaihven renga awm tûra kan neih ngai mize pawimawh tak a ni a. (Mt. 22:37-39) Pathian kan hmangaihna chuan thu hrilhnaa kan tawh theih harsatna eng pawh tuar chhuak tûrin min ṭanpui a ni. (2 Tim. 1:7, 8) Kan rinna min ṭâwmpui lotute pawh kan hmangaih avângin kan rawngbâwlna bialah thu kan hril chhunzawm zêl a, telephone leh lehkha thawnte hmangin thu kan hril bawk. Mite chuan engtik nîah emaw inthlâk danglamin, thil dik an ti ang tih kan beisei tlat a ni.—Ezek. 18:27, 28.

11. Engtin nge unaute kan hmangaihna chuan min ṭanpui? (1 Thessalonika 5:11)

¹¹ Vêngte hmangaihnaah chuan kan Kristian unaute hmangaihna pawh a tel a. ‘Infuih tawna intisâwt tawnin’ chu hmangaihna chu kan lantîr a ni. (1 Thessalonika 5:11 chhiar rawh.) Indonaa sipaite an thawkho angin, kan infuih tawn a. Indo laiin sipai chuan a sipaipui chu a tina palh thei a; mahse, tum rêng vângin a tina ngai lo. Chutiang bawkin, tum rêng vângin emaw, thungrulh nân emaw kan unaute chu kan tina ngai lo vang. (1 Thes. 5:12, 13, 15) Kohhran enkawltu unaupate chunga zahna lantîrin, hmangaihna kan lantîr bawk a. (1 Thes. 5:12, 13) Paula’n he lehkha thawn a ziah lai hian, Thessalonika khuaa kohhran din a nihna chu kum khat pawh a la tling lo va. Chu kohhrana upate chuan tawnhriat an ngah lovin, thil tihsualte pawh an nei mai thei. Chuti chung pawhin, anni chuan zah an phû a ni. Hrehawm nasa tak kan hnaih zêl rual hian, tûn hma zawng aiin tualchhûng upate kaihhruainaa kan innghah lehzual a ngai mai thei a. World headquarters leh branch office kan biak pawh theih loh hun pawh a la awm thei a; chuvângin, tûn aṭanga upate hmangaih leh zah kan zir  chu a pawimawh hle. Eng pawh thleng se, an ṭhat famkim lohna ni lovin, Jehova’n Krista hmanga hêng mipa rinawmte a kaihhruai dân hi ngaihtuah tlatin, i ngaihven chhunzawm zêl ang u.

12. Engtin nge kan beiseina chuan kan ngaihtuahna a vênhim?

¹² Lukhumin sipai lû a vênghim angin, chhandam nih kan beiseina chuan kan ngaihtuahna a vênghim a. Beiseina nghet tak kan neih avângin, he khawvêlin min pêk theih thilte chu eng mah lo mai a ni tih kan hria a ni. (Phil. 3:8) Kan beiseina chuan rilru fîm tak nei tûr leh nghet taka awm tûrin min ṭanpui a. Chu chu Africa rama rawngbâwl Wallace-a leh Laurinda-i te’n an tawng a ni. Chawlhkâr thum chhûngin pakhatin a nu a chân a, pakhatin a pa a chân bawk a ni. COVID-19 hripui lêng avângin an chhûngte bulah an awm thei lo va. Wallace-a chuan: “Thawhleh beiseina chuan he khawvêla an thih hmaa an awm dânte ni lovin, khawvêl thara an awm dân tûrte chu ngaihtuah tûrin min ṭanpui a. He beiseina hian ka lung a chhiat zual chângin rilru hahdamna min pe,” tiin a ziak a ni.

13. Thlarau thianghlim dawng tûrin eng nge kan tih theih?

¹³ “Thlarau chu timit suh ula.” (1 Thes. 5:19) Paula chuan thlarau thianghlim chu meialh nên a tehkhin a. Pathian thlarau kan dawn hian thil dik ti tûra ṭhahnemngaihna leh phûrna kan nei a, Jehova rawngbâwl tûrin tihchakin kan awm a ni. (Rom 12:11) Thlarau thianghlim dawng tûrin eng nge kan tih theih? Chumi dawng tûr chuan kan ṭawngṭai thei a, Pathian thlarauva thâwk khum Bible thu zirin, thlarauva kaihhruai a inawpna pâwl kan bêl tlat thei a ni. Chutianga tihna chuan “thlarau rah” nei chho tûrin min ṭanpui ang.—Gal. 5:22, 23.

14. Pathian thlarau dawng zawm zêl tûrin eng nge kan pumpelh ngai? (Milem en bawk rawh.)

¹⁴ Pathianin a thlarau thianghlim min pêk hnuah, “thlarau chu timit” lo tûrin kan fîmkhur a ngai a. Pathianin a thlarau chu ngaihtuahna leh nungchang thianghlim vawngtute hnênah chauh a pe a ni. Thil thianghlim lote  ngaihtuah renga chûngte kan ti a nih chuan, a thlarau chu min pe chhunzawm tawh lo vang. (1 Thes. 4:7, 8) Thlarau thianghlim dawng chhunzawm zêl tûr chuan ‘hrilhlâwknate kan ngainêp’ tûr a ni lo. (1 Thes. 5:20, Baptist Mid-Missions’ Translation) Heta “hrilhlâwknate” hian Jehova nî leh kan hun hmâwr tawhzia tiamin, Jehova’n a thlarau thianghlim hmanga min pêk thuchah eng pawh a kâwk a ni. Armageddon chu kan dam chhûngin a thleng lo vang tia, chu nî ngaihthah chu kan duh lo. Chu aiin, nî tin “Pathian ngaihsak kawngah” buaiin leh, nungchang thianghlim tak vawng rengin chumi nî chu a lo thleng thuai dâwn tih kan beisei, a nih loh leh rilruah kan vawng tlat a ni.—2 Pet. 3:11, 12.

15. Engtin nge thu dik lo leh ramhuaite thu thehdarh buma awm chu kan pumpelh theih ang? (1 Thessalonika 5:21)

¹⁵ Kan hma lawkah, Pathian dodâltute chuan “muanna leh himna” an puang dâwn a. (1 Thes. 5:3) Ramhuaite thu thehdarhin lei hi a khat ang a, mi tam tak hruai sual an ni ang. (Thup. 16:13, 14) Kan chungchâng hi eng nge ni ve? ‘Engkim kan fiah’ a nih chuan, bumin kan awm lo vang. (1 Thessalonika 5:21 chhiar rawh.) Heta “fiah” tia lehlin Grik thu mal hi mite’n rangkachak leh tangkarua a tak a nih leh nih loh an fiah dân sawi nân pawha hman a ni a. Chuvângin, kan thil hriat leh chhiarte chu a dik leh dik loh kan fiah a ngai a ni. Chu chu Thessalonika khuaa mite tân a pawimawh hle a, hrehawm nasa tak a hnaih zêl rual hian kan tân a pawimawh lehzual dâwn a ni. Mite thusawi zawng zawng chu ring tawp lovin, kan ngaihtuah theihna hmangin kan thu chhiar leh hriatte chu Bible leh Jehova inawpna pâwl sawi nên kan khaikhin tûr a ni. Chutianga kan tih chuan ramhuaite thu thehdarh bumin kan awm lo vang.—Thuf. 14:15; 1 Tim. 4:1.

16. Eng beiseina chiang tak nge kan neih a, eng nge tih kan tum tlat ang?

¹⁶ Pathian chhiahhlawhte chu hrehawm nasa takah a huhovin an dam khawchhuak dâwn a. Mahse, a mi mala kan tawh tûr erawh kan hre lo. (Jak. 4:14) Chutih rual chuan, hrehawm nasa takah kan dam khawchhuak emaw, chumi hmaa kan thi emaw a nih pawhin kan rinawm reng chuan chatuana nunna pêk kan ni ang. Hriak thihte chu Krista nên vânah an awm ang a. Berâm dangte chu lei paradis-ah an awm ang. Kan beiseina ropui tak chu thlîr tlatin, Jehova nî atân inring rengin i awm tlat ang u!