1-2. Lota angin, tûn laiah Kristiante’n eng harsatna nge an hmachhawn?

 KHAWVELIN a chawi lâr nungchang lama tehnate chungchângah, mi fel Lota rilru put hmang ang chu kan pu a. Ani chuan kan Pa vâna miin nungchang bawlhhlawhna a hua tih a hriat avângin, ‘mi sualte awm dân hur tak avângin a lungngai hle’ a. (2 Pet. 2:7, 8) Pathian a ṭihna leh a hmangaihna chuan, Lota chu a chhehvêla mite nungchang lama tehna hniam tak hnâwl tûrin a chêttîr a ni. Keini pawh nungchang lama Jehova tehna zah lotute hual vêlin kan awm a. Chuti chung pawhin, Pathian kan hmangaihna kan vawn reng a, amah ṭihna kan neih chhoh zêl chuan nungchang lamah kan thianghlim reng thei a ni.—Thuf. 14:2.

² Chutianga ti thei tûr chuan, Jehova’n Thufingte bu hmangin fuihna duhawm tak leh thiltithei tak min pe a. Kristian a hmei a pa, a pui a pangte chuan, chuta awm zilhna fing tak ngaihtuahna chu an hlâwkpui ṭheuh thei a ni.

3. Thufingte 17:3-in a sawi angin, kan thinlung kan vênhim a ngaih chhan pakhat chu eng nge ni? (Milem en bawk rawh.)

³ Entîr nei kan thinlung vênhim a ngaih chhan pawimawh tak pakhat chu Jehova’n kan thinlung a fiah ṭhin vâng a ni a. Chumi awmzia chu, mi dangte hmaa kan lan dân piah lam chhûngrila kan nihna dik tak a hmu tihna a ni. (Thufingte 17:3 chhiar rawh.) Chatuana nung tûra min ṭanpui thei a thurâwnte kan ngaihtuah reng chuan, ani chuan min hmangaih ang a. (Joh. 4:14) Chutiang chuan, Setana leh a khawvêla mi suaksualte nungchang leh dâwt thute hmanga tihchhiatin kan awm lo vang.  (1 Joh. 5:18, 19) Jehova kan hnaih zêl rualin, amah kan zahna leh kan hmangaihna chu a pung chho zêl ang a. Kan Pa rilru tihnat kan duh loh avângin sual lam ngaihtuah ringawt pawh kan duh lo vang. Thil sual ti tura thlêm kan nih hunah, heti hian kan inzâwt thei a ni, ‘Ka chunga hmangaihna nasa tak lantîrtu chu engvângin nge tum rêng vânga a rilru ka tihnat tehlul ang?’ tiin.—1 Joh. 4:9, 10.

4. Engtin nge Jehova a ṭihnain unaunu pakhat chu thlêmnaa tlu lût lo tûra a vênhim?

⁴ Nungchang bawlhhlawhnaa inhmang tûra thlêma awm, Croatia rama unaunu pakhat Marta-i chuan heti hian a ziak a: “Ngaihtuahna fîm hman leh rei lo te chhûng atâna sual nawmna chen duhna do chu harsa ka ti hle a. Mahse, Jehova ka ṭihna chuan min vênghim a ni,” tiin. b Engtin nge Pathian ṭihna chuan chutianga a vênhim? Marta-i chuan thu tlûkna ṭha lovin a thlen tûr sawhkhâwkte chu a chhût ngun thu a sawi a ni. Chutiang chuan kan ti ve thei a. A sawhkhâwk ṭha lo ber chu Jehova rilru kan tina tûr leh chatuana amah biakna kan pênsan tûr hi a ni.—Gen. 6:5, 6.

5. Leo-a thiltawn aṭangin eng nge i zir theih?

⁵ Jehova kan ṭih hian, nungchang ṭha lote chu ngaizam lo tûrin kan fîmkhur a. Congo rama chêng Leo-a chuan fîmkhur a ngaihzia chu a takin a tawng a ni. Baptisma a chan aṭanga kum li hnuah ṭhian sual a kâwm ṭan a. Amah ngeiin thil ṭha lote a tih ve loh chhûng chuan, Jehova chunga thil sual tiah a inngai lo va. Mahse, rei lo te hnuah a ṭhian sualte chuan zû hmang sual tûr leh nungchang bawlhhlawhnaa inhmang tûrin an thlêm thlu ta a ni. Tichuan, a Kristian nu leh pate zirtîrna leh Jehova rawng a bâwl laia a hlim ṭhinziate chu a ngaihtuah lêt a. Chu chuan eng nge a rah chhuah? Ani chuan thil dik tih a tum leh ta a ni. Upate ṭanpuinain Jehova hnênah a kîr  leh a. Tûnah chuan kohhran upa leh special pioneer niin hlim takin rawng a bâwl a ni.

6. Eng entîr nei hmeichhe pahnih chungchâng nge tûnah kan sawiho vang?

⁶ Hmeichhe pahnih anga târ lan, finna leh âtna chungchâng chuanna Thufingte bung 9-na chu i lo sawiho vang u. (Rom 5:14; Galatia 4:24 nên khaikhin rawh.) Chutianga kan tih rualin, Setana khawvêl hi nungchang bawlhhlawhna leh saruak lem leh thuziaktein a khat tih hre reng ang che. (Eph. 4:19) Chuvângin, Pathian ṭihna neih chhoh zêl leh sual kalsan chu a pawimawh tak zet a ni. (Thuf. 16:6) Mipa kan ni emaw, hmeichhia kan ni emaw kan zain he bunga thute hi kan hlâwkpui ṭheuh thei a. Chûng hmeichhe pahnihte chu tawnhriat nei lote—“hriatna nei lote”—an hnêna kal tûra sâwm anga târ lan ve ve an ni a. ‘Ka inah lo kal ula, chaw lo ei rawh u,’ tia sawi ang an ni. (Thuf. 9:1, 5, 6, 13, 16, 17) Mahse, an sâwmna pawmtute chunga thilthleng chu a inang lo hle.

7. Thufingte 9:13-18-in a sawi angin, hmeichhe â sâwmna pawmtute chungah eng nge thleng? (Milem en bawk rawh.)

⁷ “Hmeichhe â” sâwmna hi lo ngaihtuah ta ila. (Thufingte 9:13-18 chhiar rawh.) Ani chuan hriatna nei lote chu ‘he lamah lo kal ula,’ ei rawh u tiin zak thei lo takin a sâwm a ni. Eng thil nge thleng? “Chutah chuan mitthi an awm” a ni. Thufingte bu tîr lamah chutiang entîr nei ṭawngkam chu a awm tih i hre mai thei. “Hmeichhe sual” leh “thlêmtu” lakah vaukhân kan ni a. “A in chuan thihna lam a hawi,” tia hrilh kan ni. (Thuf. 2:11-19) Thufingte 5:3-10-ah chuan ‘a kê thihnaa chhuk’ “hmeichhe sual” dang chungchângah vaukhânna a chuang bawk a ni.

8. Eng duhthlanna nge kan siam ngai?

⁸ “Hmeichhe â” sâwmna dawngtute chuan a sâwmna chu an pawm dâwn nge, an hnâwl dâwn tihah duhthlanna an siam a ngai a. Keimahni ngei pawhin, chutiang duhthlanna chu kan siam a ngai thei a ni. Media leh internet-ah tu emawin nungchang bawlhhlawhna thil eng emaw ti tûra min tih hunah emaw, saruak lem leh thuziakte a lo lan thut hunah emaw eng nge kan tih ang?

9-10. Nungchang bawlhhlawhna kan pumpelh chhan tûr ṭhenkhat chu eng nge ni?

⁹ Nungchang bawlhhlawhna kan pumpelh chhan tûr ṭha takte a awm a. “Hmeichhe â” chuan “rûk tui chu a thlum” tia sawi anga târ lan a ni. “Rûk tui” chu eng nge ni? Bible chuan nupa inkâra mipat hmeichhiatna hman chu tui thar lâm nên a tehkhin a. (Thuf. 5:15-18) Dân ang taka inneite chuan hlim takin nupa nun an  hmang thei a. Mahse, “rûk tui” chu a danglam hle. Chu chuan nungchang bawlhhlawhna a kâwk thei a. Chutiang thil chu rûkruin thil a rû angin, a rûka tih a ni fo ṭhîn. Chutiang thil titute chuan an thiltih chu mite’n an hre dâwn lo nia an ngaih chuan “rûk tui” chu thil thlum tak angin a lang thei a ni. Inbumna lungchhiatthlâk tak a va ni êm! Jehova’n engkim a hmu vek si a. A duhsakna chân tluka thil lungchhiatthlâk a awm thei lo va; chuvângin, chumi chânna chuan “thlumna” rêng a nei lo. (1 Kor. 6:9, 10) Chu bâkah, sawhkhâwk ṭha lo dang pawh a la awm a ni.

¹⁰ Nungchang bawlhhlawhna chuan hmingchhiatna te, hlu lo nia inhriatna te, sâwn paina te, leh chhûngkaw kehchhiatnate a thlen thei a. Chuvângin, hmeichhe â ‘ina’ kal loh leh a ina chaw ei loh chu thil finthlâk tak a ni tih a chiang hle. Nungchang bawlhhlawhnaa inhmang mi tam takte chuan Jehova nêna inṭhianna an hloh mai bâkah, thihna thlen thei natnate an kai a ni. (Thuf. 7:23, 26) Bung 9 châng 18-na chuan: ‘A mi sâwmte chu Seol rilah an awm,’ tiin a tâwp a khâr a. A nih leh, engvângin nge chhiatna thlentu a sâwmna vervêk tak chu mi tam takin an pawm?—Thuf. 9:13-18.

11. Saruak lem leh thuziakte en chu engvângin nge thil hlauhawm tak a nih?

¹¹ Kan pumpelh tûrte zînga hluar tak pakhat chu saruak lem leh thuziakte en hi a ni a. Mi ṭhenkhat chuan chûngte en chu thil pawi lo angin an ngai a ni. A nihna takah chuan, saruak lem leh thuziakte en chu a hlauhawm a, mahni inhlutna a tihniamin, a ngawl a vei theih a ni. Lem ṭha lote chu rilruah nghet takin a châm thei a, paih bo a har hle. Chu bâkah, saruak lem leh thuziakte chuan châkna ṭha lote chu tihreh ahnêkin a tizual zâwk a. (Kol. 3:5; Jak. 1:14, 15) Chûng thil en ṭhîntu tam tak chuan a tâwpah nungchang bawlhhlawhna thilte an ti ṭhîn a ni.

12. Châkna ṭha lo min neihtîr thei milemte lakah kan invêng reng tih engtin nge kan lantîr theih?

¹² Kristiante kan nih angin, kan phone leh tablet-a rin loh taka saruak lem leh thuziakte a lo lang a nih chuan eng nge kan tih ang? Chu chu kan en chhunzawm tûr a ni lo. Pathian Jehova nêna kan inlaichînna chu kan thil neih hlu ber a ni tih kan hriat reng chuan, chutianga tih chu a awmlsam lehzual ang. A nihna takah chuan, saruak lem leh thuziak anga ngaih ni lo, milem ṭhenkhat pawhin châkna ṭha lo min neihtîr thei a ni. Engvângin nge chûngte chu kan pumpelh ang? Nungchang bawlhhlawhna lam thil min ngaihtuahtîr thei kawng chu chhe tê pawha kan zawh duh loh vâng a ni. (Mt. 5:28, 29) Thailand rama kohhran upa David-a chuan: “‘Ka thil en chu saruak lem leh thuziakte ni chiah lo mah se, ka en reng a nih chuan Jehova a lâwm ang em?’ tiin ka inzâwt ṭhîn a. Chutianga chhûtna chuan fing takin thil min tihtîr a ni,” tiin a sawi.

13. Engin nge fing taka thil ti tûrin min ṭanpui ang?

¹³ Jehova tihlâwm loh hlauhna chuan fing taka thil ti tûrin min ṭanpui a. Pathian ṭih chu “finna bul,” a nih loh leh “finna” innghahna a ni. (Thuf. 9:10) Chumi dikzia chu Thufingte bung 9 tîr lamah kan hmu thei a, chutah chuan “finna” chu entîr nei hmeichhe dang nêna tehkhin a ni.

14. Eng sâwmna dang nge Thufingte 9:1-6-ah kan hmuh?

¹⁴ Thufingte 9:1-6 chhiar rawh. Hetah hian finna dik tak lo chhuahna Hnâr leh Bul, finna zawng zawng neitu min Siamtu hnên aṭanga sâwmna chungchâng kan chhiar a. (Thuf. 2:6; Rom 16:27) Chutah chuan ban pasarih nei in lian tak chungchâng târ lan a ni a. Chu chuan Jehova chu thilphal tak a ni tih leh a finna nunpui duhtu zawng zawngte chu a lo lâwm a ni tih a târ lang a ni.

15. Eng ti tûrin nge Pathianin min sâwm?

 ¹⁵ Jehova chu nasa taka Petu, mi thilphal tak a ni a. Chûng miziate chu Thufingte bung 9-naa entîr nei hmeichhia anga târ lan ‘finnaah’ kan hmu thei a ni. Bible chângte chuan, chu entîr nei hmeichhia chuan rante a talh a, uainte a chawhpawlh a, a dawhkânah ei tûrte a hlui tih a târ lang a. (Thuf. 9:2.) Chu bâkah, châng 4 leh 5-nain a târ lan angin: “[Finna chuan] hriatna nei lote chu, ‘Lo kal ula, ka chhang ei ula,’” tiin a sâwm a ni. Engvângin nge finna dik ina kan kal ang a, a chaw min hlui chu kan ei ang? Jehova chuan a fate chu fing tûr leh him tûrin a duh a. Ani chuan thil tisuala a rah ṭha lo tak seng a, inchhîrna nasa tak nêna a harsa zâwnga kan inzir a duh lo a ni. Chuvângin, “Mi tluangte tân finna dik a chhêk khâwm ṭhîn.” (Thuf. 2:7) Jehova ṭihna kan neih chuan amah tihlâwm duhna kan nei ang a. A zilhna fing takte chu hriain, inhuam takin kan nunpui ang.—Jak. 1:25.

16. Engtin nge Pathian ṭihna chuan Alain-a chu thu tlûkna fing tak siam tûra a ṭanpui a, eng nge a rah chhuah?

¹⁶ Pathian ṭihnain Alain-a chu thu tlûkna fing tak siam tûra a ṭanpui dân hi han ngaihtuah teh. Kohhran upa leh school zirtîrtu ni bawk Alain-a chuan, “Ka thawhpui tam tak chuan saruak lem leh thuziakte chu mipat hmeichhiatna lama inzirtîrna angin an ngai a ni,” tiin a sawi. Mahse, ani chu chutiang ngaih dân bum chuan a awm lo. Ani chuan, “Pathian ka ṭih avângin chûng film-te chu en loh ka tum tlat a. Ka en loh chhan ka thawhpuite hnênah ka hrilhfiah bawk,” tiin a sawi. ‘Hriatna kawnga kal’ tûrin “finna” thurâwn pêk chu a nunpui a. (Thuf. 9:6) Alain-a rinawmna chuan an rilru a khawih êm avângin a hnathawhpui zirtîrtu ṭhenkhat chuan Bible an zir a, Kristian inkhâwmahte an tel tawh a ni.

17-18. “Finna” sâwmna pawmtute chuan eng malsâwmnate nge an dawn a, anni chu engin nge hmuak? (Milem en bawk rawh.)

¹⁷ Entîr nei hmeichhe pahnihte hmangin Pathian Jehova chuan hma lam hun hlimawm tak kan neih theih dân min kawhhmuh a. “Hmeichhe â” sâwmna pawmtute chuan nungchang bawlhhlawha inhmanna aṭangin hlimna hmuh an tum a. Mahse, anni chu hma lam hun ngaihthahin tûn hun atân chauh an nung a. An thiltih chuan thihna a thlen dâwn a ni.—Thuf. 9:13, 17, 18.

¹⁸ “Finna” sâwmna pawmtute dinhmun chu a va danglam tak êm! Anni chuan Jehova hnaih tûra an mamawh engkim an neih avângin an hlim hle a ni. (Is. 65:13) Jehova chuan zâwlnei Isaia kaltlangin: “Ka thu ngun takin ngaithla ula, thil ṭha chu ei rawh u, in nunna chu thil  thauvah chuan hlim rawh se,” tiin a sawi a. (Is. 55:1, 2) Jehova ngainat zâwngte ngainat leh a huat zâwngte huat chu kan zir a ni. (Sâm 97:10) Chu bâkah, “finna” chu hlâwkpui tûra mi dangte kan sâwm avângin kan hlim hle bawk. Chutianga kan tih chuan ‘khuaa hmun sâng ber ber aṭanga, “mi mâwl apiang chu he lamah hian lo kal rawh se,”’ tia au ang kan ni ang. Kan hlâwkna dawn tûr leh kan sâwmna pawmtute hlâwkna dawn tûr chu tûn atân chauh a ni lo va. Chûngte chuan ‘hriatna kawnga kan kal’ ruala chatuana “nung” reng tûrin min ṭanpui a ni.—Thuf. 9:3, 4, 6.

19. Thuhriltu 12:13, 14-na thu nêna inmilin, eng nge tih kan tum tlat ang? (“ Pathian Ṭih Chu Kan Hlâwkpui,” tih bâwm chu en bawk rawh.)

¹⁹ Thuhriltu 12:13, 14 chhiar rawh. Pathian ṭihna chuan kan thinlung a vênghimin, he ni hnuhnûng chhûng hian nungchang lam leh thlarau lama thianghlim taka awm tûrin min ṭanpui zawm zêl rawh se. Chutiang ṭihna chuan “finna” zawng tûr leh, hlâwkpui tûra mi a tam thei ang berte sâwm chhunzawm zêl tûrin min chêttîr ang.