1. Petera thawn khat 5:2-in a sawi angin, upate’n eng chanvo nge an dawn?

 KRISTIAN upate chu Jehova berâm hlu takte enkawl tûra mawhphurhna pêk an ni a. Hêng mi inpe takte hian an unaute rawngbâwlsak tûra an chanvo chu an ngaihlu hle a; chu bâkah, “anmahni ngaihsak tûr . . . berâmpu” ni tûrin theih tâwp an chhuah bawk. (Jer. 23:4; 1 Petera 5:2 chhiar rawh.) Kan kohhranah chutiang upate kan nei chu kan va lâwm tak êm!

2. Eng fiahnate nge upa ṭhenkhatin an tawh mai theih?

² An mawhphurhna hlenna kawngah upate’n harsatna tam tak an tâwk a. Chûng zînga pakhat chu, kohhran enkawl tûra an thawhrim hle a ngai hi a ni. United States-a kohhran upa pakhat Tony-a chuan mawhphurhna a pawm zât tûr chungchângah thuhnuairawlhna a neih lehzual a ngai tih a hria a. Ani chuan heti hian a sawi: “COVID-19 hripui a lên ṭan tirh khân inkhâwmna leh rawngbâwlna atân ruahmanna siam tûrin chanvo tam lehzual ka chelh a. Mahse, eng anga nasa pawhin thawk mah ila tih tûr dang a awm belh leh zêl a ni. A hnuah chuan, ka buai êm avângin Bible chhiar nân te, mahnia inzir nân te, leh ṭawngṭai nânte hun ka insiam thei tawh lo,” tiin. Kosovo rama kohhran upa Ilir-a chuan harsatna chi dang a tâwk ve bawk a. Indona hmuna a awm lai chuan inawpna pâwl aṭanga lo kal kaihhruaina chu zawm harsa a ti hle. Ani chuan: “Hmun râlṭia awm unaute ṭanpui tûra branch office-in mawhphurhna min pêk lai chuan ka huaisenna chu fiahin a awm a. Ka hlau hle a, kaihhruaina chu inâwm lo tak angin a lang a ni,” tiin a sawi. Asia rama missionary pakhat Tim-a chuan, “A châng chuan unaute ngaihsak thei lo khawpin ka chau ṭhîn,” tiin nî tina a tih ngaite tih chu harsa a tih thu a sawi. Chutiang harsatna tâwk upate chu engin nge ṭanpui thei?

3. Engtin nge Rorêltu Gideona chungchâng ngaihtuahna chu kan hlâwkpui ṭheuh theih?

 ³ Upate chu Rorêltu Gideona hnên aṭangin an inzir thei a. (Heb. 6:12; 11:32) Ani chu Pathian mite vênghimtu leh kaihruaitu a ni. (Ro. 2:16; 1 Chro. 17:6) Gideona angin upate chu hun khirh tak chhûnga Pathian mite ngaihsak tûra ruat an ni a. (Tirh. 20:28; 2 Tim. 3:1) Keini pawh Gideona thuhnuairawlhna, inngaihtlâwmna, leh thuawihna aṭangin kan inzir thei a ni. A mawhphurhnate a hlen rualin a chhelna chu fiah a ni a. Upa kan ni emaw, ni lo emaw kan kohhran upate kan ngaihhlutna chu kan tipung thei a. Kohhrana min ngaihsaktu hêng unaupa thawkrim takte hi kan ṭanpui thei a ni.—Heb. 13:17.

4. Engtin nge Gideona’n thuhnuairawlhna leh inngaihtlâwmna a lantîr?

⁴ Gideona chu thuhnuairawlh tak leh inngaitlâwm tak a ni a. b Midian mi chakte lak aṭanga Israelte chhan chhuak tûra thlan a ni tih Jehova vântirhkohvin a hrilh khân, mi inngaitlâwm tak Gideona chuan: “Manasea thlah zîngah hnam rethei ber kan ni a, kei lah hi ka pa chhûngte zînga tê ber ka ni si a,” tiin a chhâng a. (Ro. 6:15) Chu chanvo dawng tûr chuan tling lo niin a inhria a; mahse, Jehova chuan ani chu a tling tih a hria a ni. Gideona chuan Jehova ṭanpuinain a mawhphurhna chu ṭha takin a hlen ta a ni.

5. Engtin nge upa pakhat thuhnuairawlhna leh inngaihtlâwmna chu fiah a nih theih?

⁵ Upate chuan kawng engkimah thuhnuairawlhna leh inngaihtlâwmna lantîr tûrin theih tâwp an chhuah a. (Mik. 6:8; Tirh. 20:18, 19) An theihnate leh an thil hlen chhuah tawhte avângin an inchhuang lo va, an thil tihsual ṭhenkhat avângin hlu lo niin an inngai bawk hek lo. Chuti chung pawhin, upa chuan fiahnate a tâwk thei tho a ni. Entîr nân, chanvo tam tak a pawm thei a, hlen vek erawh harsa a ti mai thei. Chanvo pakhat a hlen dânah sawisêl a hlawh thei a, chanvo dang pakhat a hlen dânah erawh fak a hlawh thei thung. Upate chuan chutiang dinhmuna anmahni ṭanpui tûrin Gideona hnên aṭangin eng nge an zir theih?

6. Upate’n Gideona hnên aṭangin thuhnuairawlhna chungchângah eng nge an zir theih? (Milem en bawk rawh.)

 ⁶ Ṭanpuina dîl rawh. Mi thuhnuairawlh tak chuan a theih chin tâwk a hria a. Gideona chuan mi dangte ṭanpuina dîlin thuhnuairawlhna a lantîr a ni. (Ro. 6:27, 35; 7:24) Upa fing takte pawhin chutiang chuan an ti ve bawk. A hmaa kan sawi tâk Tony-a chuan: “Ka seilen dân avângin ka hlen theih tûr aia tam hna ka pawm ṭhîn a. Chuvângin, chhûngkuaa Pathian biaknaah thuhnuairawlhna chungchâng ka thlang a; tichuan, ka nupui ngaih dânte pawh ka zâwt a ni. Chu bâkah, jw.org-a Isua Angin Mi Dangte Zirtîrin, Ringin, Tichak Rawh tih video chu ka ennawn bawk,” tiin a sawi. Tony-a chuan a hnaa ṭanpui tûrin mi dangte puihna a dîl ṭan ta a. Chu chuan eng nge a rah chhuah? Ani chuan: “Kohhrana mawhphurhnate chu ṭha taka hlen chhuah a ni a; chu bâkah, Jehova nêna kan inṭhianna tinghet tûrin hun tam zâwk ka neih theih phah a ni,” tiin a sawi.

7. Sawisêl an nih hunah engtin nge upate’n Gideona an entawn theih? (Jakoba 3:13)

⁷ Sawisêl i nih hunah thuhnuairawlh takin chhâng lêt rawh. Sawisêlna chu upate tân fiahna dang a ni thei a. Hemi kawngah pawh hian Gideona entawn tûr siamin a ṭanpui thei a ni. Gideona chuan a ṭha famkim bîk lo tih a inhriat avângin, Ephraim hovin an sawisêl khân thuhnuairawlh takin a chhâng lêt a. (Ro. 8:1-3) Thinur takin a chhâng lêt lo. Rilrua inphah hniam takin an thusawi chu a ngaihthlâksak a, tichuan remhre takin dinhmun sosâng tûr chu a tidai a ni. Upa fing takte chuan sawisêl an nih hunah ṭha taka ngaithlain, leh thuhnuairawlh taka chhâng lêtin Gideona an entawn a. (Jakoba 3:13 chhiar rawh.) Chutiang chuan kohhranah remna an awmtîr a ni.

8. Upate chuan fak an hlawh hunah engtin nge an chhân lêt ang? Entîrna pe rawh.

⁸ Chawimawina zawng zawng Jehova hnênah hlân rawh. Midian-ho an hneh avânga chawimawi a nih khân Gideona chuan chawimawina zawng zawng Jehova hnênah a hlân a. (Ro. 8:22, 23) Engtin nge upate’n Gideona an entawn theih? An thil hlen chhuahte avângin Jehova an chawimawi tûr a ni. (1 Kor. 4:6, 7) Entîr nân, upa pakhat chu mite zirtîr thiam tak a nih avânga fak a nih hunah, ani chuan chutianga a tih theih chhan chu zirtîrna lo chhuahna hnâr Pathian Thu, a nih loh leh Jehova inawpna pâwl aṭanga kan dawn zirtîrna vâng a ni tih a sawi thei a. A châng chuan upate chuan ṭûl lo takin mi dangte ngaihven hlawh duhna an neih leh neih loh an ngaihtuah thei a. Kohhran upa Timothy-a thiltawn hi lo ngaihtuah ta ila. Kohhran upaa ruat a nih tirh chuan vântlâng tâna thusawi chu nuam a ti hle a. Ani chuan: “Thuhmahruai sei tak leh tehkhin thu chipchiar takte ka hmang ṭhîn a. Chu chuan mi dangte fak min hlawhtîr fo ṭhîn. Mahse, thil pawi tak chu mite’n Bible emaw, Jehova emaw ni lovin, keimah min ngaihven ta zâwk ṭhîn hi a ni,” tiin a sawi. A hnuah, Timothy-a chuan ṭûl lo taka ngaihven a hlawh loh nân mite a zirtîr dân chu a siamrem a ngai tih a hre ta a ni. (Thuf. 27:21) Chu chuan eng nge a rah chhuah? Ani chuan: “Unau hrang hrangte chuan ka thusawiin harsatna hmachhawn thei tûr te, fiahna tuar chhuak thei tûr te, leh Jehova hnaih lehzual tûrtea a ṭanpui dân min hrilh a. Chûng thute chuan kum tam tak kaltaa unaute’n keimah min fak ṭhin laia ka hlimna aia nasa zâwk hlimna min pe a ni,” tiin a sawi.

9. Gideona thuawihna leh huaisenna chu eng anga fiah nge a nih? (A kâwma milem en rawh.)

⁹ Gideona chu rorêltu atâna ruat a nih hnuah a thuawihna leh huaisenna chu fiah a ni a. A pa biak ṭhin Baala maichâm tichim tûra mawhphurhna hlauhawm tak pêk a ni a. (Ro. 6: 25, 26) A sipaite a hruai khâwm hnuah, Gideona chu a sipai zât ṭum hnih lai titlêm tûra kaihhruaina pêk a ni. (Ro. 7:2-7) A tâwpah, zân reia hmêlmate riah bûk bei tûra hrilh a ni bawk.—Ro. 7:9-11.

10. Engtin nge kohhran upa pakhat thuawihna chu fiah a nih theih?

¹⁰ Kohhran upate chu mi “tihnuam” tak an ni tûr a ni a. (Jak. 3:17) Upa thuawih tak chuan Bible sawi leh Pathian inawpna pâwl aṭanga lo kal kaihhruaina chu inhuam takin a zâwm a ni. Chutiang chuan mi dangte tân entawn tûr ṭha a siam a. Mahse, a thuawihna chu fiah a la ni thei tho a ni. Entîr nân, kaihhruaina a dawnte zawm nghâl chu harsa a ti thei a. Dinhmun ṭhenkhatah chuan kaihhruaina ṭhenkhat chu a inâwmin, a finthlâk em tih a ngaihtuah mai thei a. A nih loh leh, man tâwk thei dinhmuna dintîr thei mawhphurhna chelh tûra tih a ni thei bawk. Chutiang dinhmunah chuan upate’n Gideona thuawihna chu engtin nge an entawn theih ang?

11. Engin nge kohhran upate chu thu awih tûra ṭanpui thei?

¹¹ Kaihhruaina chu ngun takin ngaithla la, zâwm rawh. Pathianin Gideona chu a pa maichâm a tihchim dân tûr te, Jehova tâna maichâm a sakna tûr hmun te, leh inthawina atâna hlan tûr rante a hrilh a. Gideona’n kaihhruaina chu a sawisêl lo va, Jehova’n ti tûra a hrilh ang chiahin a ti a ni. Tûn laiah upate chuan thlarau lam leh tisa lama kan himna tûrin lehkha thawn te, thu puanchhuah te, leh kaihhruainate chu Jehova inawpna pâwl aṭangin an dawng a. Theocratic kaihhruainate chu rinawm taka an zawm avângin upate chu kan hmangaih a ni. Chu chu kohhran pumin a hlâwkpui bawk.—Sâm 119:112.

12. Engtin nge upate chuan an thiltih dân thlâk tûra Jehova inawpna pâwlin a hrilh hunah Hebrai 13:17-na hi an zawm theih?

¹² Inhuam takin insiamrem rawh. Jehova thupêkin Gideona’n a sipaite zaa 99 aia tama a tihtlêm kha han ngaihtuah lêt teh. (Ro. 7:8) Ani chuan heti hian a ngaihtuah mai thei, ‘He inthlâk thlengna hi a ṭûl tak zet em? Chumi zawm chu a sâwt tak zet ang em?’ tiin. Chuti chung pawhin, Gideona chuan thu a awih a ni. Tûn laiah upate chuan an thiltih dân thlâk tûra inawpna pâwlin a hrilh hunah, chu chu zâwmin Gideona an entawn a. (Hebrai 13:17 chhiar rawh.) Entîr nân, kum 2014 khân Governing Body chuan Kingdom Hall leh Assembly Hall-te sakna atâna sum leh paia chhawmdâwl a nih dân chu a thlâk danglam a. (2 Kor. 8:12-14) A hma chuan inawpna pâwlin chûngte sakna atân chuan kohhrante hnênah sum a pûktîr ṭhîn a, chu chu an rûl leh ṭhîn a ni. Mahse, tûnah chuan tualchhûng kohhran chuan thawhlâwm a thawh tam thei lo a nih pawhin, chûng Hall-te chu mamawhna hmun apianga sak a nih theih nân khawvêl puma kohhran zawng zawngte thawhlâwm chu hman a ni. José-a’n chu inthlâk danglamna chu a hriat chuan a sâwt a ring chiah lo va: ‘Kingdom Hall pakhat mah sak a ni ngai lo vang. Chu chu kan awmna hmuna tih dân a ni lo,’ tiin a ngaihtuah a ni.  Engin nge José-a chu kaihhruaina zâwm tûra ṭanpui? Ani chuan: “Thufingte 3:5, 6-a thute chuan Jehova rinchhan tûrin min hriatnawntîr a. A rah chhuah chu a ropui khawp mai! Kingdom Hall tam lehzual kan sak theih bâkah, kawng hrang hranga chawhrualna awmtîr theih dân kan zir bawk a ni,” tiin a sawi.

13. (a) Gideona’n eng nge a rinngheh tlat? (b) Engtin nge upate’n Gideona chu an entawn theih? (Milem en bawk rawh.)

¹³ Jehova duh zâwng huaisen takin ti rawh. Gideona chuan hlau chung leh a nunna atân a hlauhthâwnawm chung pawhin Jehova thu a zâwm a. (Ro. 9:17) Jehova hnên aṭanga tiamkamna a dawn hnuah, Pathian mite chhanhim tûrin Pathianin a ṭanpui dâwn tih a ring nghet tlat a ni. Kan rawngbâwlna khap behna hmuna chêng upate chuan Gideona an entawn a. Anni chuan man te, dâwp te, hna chânna te, leh tharum thawhnate an tâwk thei chung pawhin inkhâwmna leh rawngbâwlnaah huaisen takin hma an hruai a ni. c Hrehawm nasa tak chhûngin, upate chuan an nunna atâna hlauhawm thei dinhmunah pawh kaihhruaina an dawnte zâwm tûrin huaisenna an mamawh dâwn a. Entîr nân, rial den tluka na thuchah puan dân tûr leh Magog rama Goga beihnaa dam khawchhuak tûra kan tih ngaite chungchângah kaihhruainate kan dawng mai thei a ni.—Ezek. 38:18; Thup. 16:21.   

14. Gideona chhelna chu eng anga fiah nge a nih?

¹⁴ Gideona chu rorêltu a nih angin a thawhrim hle a ngai a. Zân indonaa Midian-hote an tlân chhiat khân, Gideona chuan Jezreel Ruam aṭangin Jordan Lui thlengin a ûm a, chu hmun chu hnim buka khat a nih a rinawm. (Ro. 7:22) Gideona chuan Jordan an thlenin a tâwpsan mai em? Tâwpsan mai lo! An chau hle chung pawhin, amah leh a mi 300-te chuan Jordan lui chu kânin an ûm zêl a. A tâwpah, Midian-hote chu ûm phain an that ta a ni.—Ro. 8:4-12.

15. Eng hunah nge upate chhelna chu fiah a nih mai theih?

¹⁵ Upate chuan kohhran leh an chhûngkua an enkawl avângin tisa lam leh rilru lamah chauh  châng an nei thei a. Chutiang hunah chuan engtin nge upate’n Gideona an entawn theih?

16-17. Gideona chu chhel tûrin engin nge ṭanpui a, upate’n eng nge an rinngheh tlat theih? (Isaia 40:28-31) (Milem en bawk rawh.)

¹⁶ Jehova’n a tichak ang che tih ring tlat rawh. Gideona chuan Pathian Jehova’n chakna a pe ang tih a ring tlat a, a tichak ngei bawk a ni. (Ro. 6:14, 34) Ṭum khat chu, Gideona leh a mite chuan Midian-ho lal pahnihte chu kein an ûm a–chûng lalte chu sanghâwngsei chunga chuanga tlan chhia ni tûra ngaih an ni. (Ro. 8:12, 21) Mahse, Pathianin ûm pha tûrin Israelte chu a ṭanpui a, indonaah hnehna an chang ta a ni. Chutiang bawkin, upate pawhin ‘chau ngai lo leh hah ngai lo’ Pathian Jehova chu an rinchhan thei a. Ani chuan an mamawh hunah chakna a pe dâwn a ni.—Isaia 40:28-31 chhiar rawh.

¹⁷ Hospital Liaison Committee (HLC) member pakhat Matthew-a thiltawn hi lo ngaihtuah ta ila. Engin nge ani chu chhel tûra ṭanpui? Matthew-a chuan: “Philippi 4:13 dikzia chu ka tawng a. Bei chhunzawm thei tawh lova inngai khawpa ka chauh hle chângte hian, ka unaute ṭanpui tûra ka mamawh tisa lam leh rilru lama chakna min pe tûrin Pathian hnênah nasa takin ka dîl a. Chûng hunahte chuan, Jehova thlarauvin bei hrâm hrâm tûra min ṭanpuiin min tichak a ni tih ka hria,” tiin a sawi. Gideona ang bawkin, upate chuan a awlsam reng ṭhîn lo chung pawhin Jehova mite ngaihsakin an thawkrim hle a. Chutih rualin, anni chuan an tisa lam leh rilru lam tlin tâwk hriain, chumi mila an thawh a ngai tih an hriat a ngai a. Mahse, Jehova’n ṭanpui an dîlna a ngaithlain, chhel tûrin a tichak ang tih an ring thei a ni.—Sâm 116:1; Phil. 2:13.

18. Ennawn nân, engtin nge upate’n Gideona an entawn theih?

¹⁸ Upate chuan Gideona hnên aṭangin thil tam tak an zir thei a. An mawhphurhna chelh tûr tam zâwngah leh sawisêlna emaw, fakna emaw an chhân lêt dân kawngah thuhnuairawlhna leh inngaihtlâwmna an lantîr a ngai a. Anni chuan a bîk takin, he kalhmang tâwpna a hnaih zêl rual hian thuawihna leh huaisenna an lantîr tûr a ni. Chu bâkah, eng harsatna pawh tâwk mah se, Pathianin a tichak thei tih an rin a ngai a. Chutianga rim taka thawk berâm vêngtute chungah chuan kan lâwmin, anni chu ‘kan ngaihlu’ hle a ni.—Phil. 2:29.