Kum 2012-khân, thil hlui chanchin zir mite chuan kum 3,000 vêla rei tawh hlum bêl keh them pakhat an hmu a. Thil chhui mite chu an phûr hle a ni. Engvângin nge? Bêl them vâng ni lovin, bêl pâwn lama lehkha inziak vâng zâwk a ni.

Thil hlui chanchin zir mite’n bêl them zawng zawng an han remkhâwm chuan, chu bêl pâwn lama Kanaan ṭawnga lehkha ziak chu an chhiar thei ta a. Lehkha inziak chu: “Esbaala Ben Beda” tih a ni a, a awmzia chu “Bedaa fapa Esbaala,” tihna a ni. He hming hi thil hlui chanchin zir mite’n hmân lai thil inziak an hmuh chhuah zîngah an vawi khat hmuhna a ni.

Esbaala tih hming pu mi dang pakhat chu Bible-ah a chuang a. Ani chu Lal Saula fate zîng mi a ni. (1 Chronicles 8:33; 9:39) Chu bêl hmutute zînga pakhat, mi thiam Yosef Garfinkel-a chuan: “Bible-ah Lal Davida lal hun chhûngin Esbaala tih hming a chuang hi chhinchhiah tlâk tak a ni a, tichuan tûnah thil hlui chanchin chhinchhiahnaah kan hmu leh bawk,” tiin a sawi a. Hei hi hmân lai thil hluite’n Bible a thlâwpzia entîrtu pakhat a ni!

Bible-ah, Saula fapa Esbaala chu Is-bosetha ti pawha koh a ni a. (2 Samuela 2:10) Engvângin nge “baala” tih hi “bosetha” tia thlâk a nih? Samuela Pahnihna ziaktuin Esbaala tih hming a hman loh chhan chu, chu chuan Israel mite chu Kanaanho biak thlipui pathian Baala a hriat chhuahtîr vâng a ni mai thei tiin chanchin chhui mite’n an hrilhfiah a ni. Mahse, Bible-a Chronicles Pakhatna buah, Esbaala tih hming kan la hmu tho a ni.