1-2. (a) Engtin nge Jehova’n mihringte a biakpawh? (b) He thuziakah hian eng nge kan sawiho vang?

JEHOVA chuan min biakpawh chu nuam a ti a. Tûn hma chuan a ngaihtuah dân min hriattîr tûrin zâwlnei te, vântirhkoh te, leh a Fapa, Krista Isua chu a hmang a ni. (Amos. 3:7; Gal. 3:19; Thup. 1:1) Tûn laiah a Thu, Bible hmangin min bia a. A ngaihtuahna leh a kawngte kan hriatthiam theih nân Bible min pe a ni.

² Isua leia a awm laiin, Jehova’n vân aṭangin vawi thum a rawn bia a. Tûnah, Jehova’n a rawn biak laia a thusawi te, a thusawi aṭanga kan zir theih te, leh kan hlâwkpui theih dânte chu kan sawiho vang.

3. Marka 1:9-11-a kan chhiar angin, Isua baptisma a chan laiin Jehova’n eng nge a sawi a, chûng thute chuan eng thu dik pawimawh nge a târ lan?

³ Marka 1:9-11-ah Jehova’n vân aṭanga a rawn biak hmasak berna chu chhinchhiah a ni a. (Chhiar rawh.) Jehova chuan: “Nang ka Fapa duh tak i ni a, i chungah ka lâwm êm êm a ni,” tiin a sawi. Isua chuan a Pa’n a hmangaihzia leh a rinzia a sawi a hriat chuan a thinlung a va khawih dâwn tak êm! Jehova thusawi chuan Isua chungchângah thil pawimawh pathum a târ lang a. Pakhatnaah, Isua chu a Fapa a ni. Pahnihnaah, Jehova’n a Fapa chu a hmangaih a. Pathumnaah, Jehova’n a Fapa chu a lâwm tak zet a ni. Chûngte chu pakhat têtêin i lo bih chiang ang u.

4. Isua’n baptisma a chan khân, Pathian nên eng inlaichînna thar nge an neih?

⁴ ‘Ka Fapa i ni.’ He thu hmang hian, Jehova chuan a Fapa duh tak, Isua nên inlaichînna thar an nei tih a târ lang a. Isua  vâna a awm lai chuan Pathian thlarau fa a ni a. Mahse, baptisma a chan khân, thlarau thianghlima hriak thih a ni. Chutih lai chuan, hriak thih a Fapa Isua chuan Lal leh Puithiam Lalber ni tûrin vâna kîr leh beiseina a nei tih Pathianin a târ lang a. (Lk. 1:31-33; Heb. 1:8, 9; 2:17) Chuvângin, Isua’n baptisma a chan khân, a Pain: ‘Nang ka fapa i ni,’ tia sawi chhan tûr ṭha tak a nei a ni.—Lk. 3:22.

5. Hmangaihna leh lâwmna lantîrna kawngah engtin nge Jehova kan entawn theih?

⁵ ‘Ka duh tak i ni.’ Hmangaihna leh lâwmna lantîrna kawnga Jehova entawn tûr siam chuan mi dangte fuihna tûr hun remchâng zawng tûrin min hriattîr a. (Joh. 5:20) Tuemawin min hmangaihzia lantîr a, kan thil ṭha tih avânga min fak hian kan phûr hle a ni. Chutiang bawkin, kohhrana unaute leh kan chhûngte chuan kan hmangaihna leh fuihna an mamawh a. Mite kan fak hian, an rinna kan tichakin, rinawm taka Jehova rawngbâwl tûrin kan ṭanpui tihna a ni. A bîk takin, nu leh pate chuan an fate an fuih a ngai a. An fate chu tih tak zeta an fak a, hmangaihna an lantîr chuan ṭha taka seilian tûrin an ṭanpui tihna a ni.

6. Engvângin nge Isua Krista chu kan rin ngheh tlat theih?

⁶ “I chungah ka lawm êm êm a ni.” He thu hian Jehova’n a Fapa Isua’n a duh zâwng a ti dâwn tih a rinzia a târ lang a. Jehova’n a Fapa chu chutianga a rin tlat avângin, Isua’n Jehova thutiam zawng zawng chu rinawm takin a hlen ang tih kan ring tlat thei a ni. (2 Kor. 1:20) Isua entawn tûr siam kan ngaihtuah chuan a hnên aṭanga inzir duhna leh a hniak hnung zui duhna kan nei  lehzual ang. Jehova chuan a chhiahhlawh zawng zawngte’n a Fapa hnên aṭangin an inzir zêl ang tih a ring nghet tlat bawk.—1 Pet. 2:21.

7. Matthaia 17:1-5-a târ lan angin, eng hunah nge Jehova’n vân aṭanga thu a sawi a, eng nge a sawi?

⁷ Matthaia 17:1-5 chhiar rawh. Jehova’n vân aṭanga a biak ṭum hnihna chu Isua ‘hmêl awmzia a lo danglam’ khân a ni a. Isua chuan Petera, Jakoba, leh Johana te chu a ruala tlânga lâwn tûrin a sâwm a. Chuta an awm lai chuan inlârna danglam tak an hmu a ni. Isua hmêl chu a lo êng a, a silhfênte chu êng angin a lo vâr ta a. Mosia leh Elija aiawhtu mi pahnih chu Isua nên a thih tûr thu leh a thawhleh tûr thu an sawiho va. Tirhkoh pathumte chu “muthlu,” mah se, he inlârna mak tak an hmuh chuan an harhfîm a ni. (Lk. 9:29-32) A hnuah, anni chu chhûm vârin a hliahkhuh a, vân aṭangin Pathian aw chu an hre ta a ni! Isua baptisma a chan lai khân, Jehova’n: “Hei hi ka Fapa duh tak, ka lawm êm êma chu a ni,” tia sawiin a Fapa a hmangaihzia leh a lawmzia a târ lang a. Mahse, tûn ṭumah erawh chuan Jehova’n: “Ama thu ngai rawh u,” tiin a sawi belh a ni.

8. Inlârna chuan Isua leh a zirtîrte chungah eng nghawng nge a neih?

⁸ Chu inlârna chuan Pathian Lalrama Lal nia, nakina Isua neih tûr ropuina leh thiltihtheihna chu min hmuhtîr lâwk a. Chu chuan hrehawm leh na tuara thi tûr Krista chu a tichakin, a tinghet ngei ang. Chu inlârna chuan zirtîrte rinna a tinghetin, nakina an tawh tûr rinawmna fiahna leh kum tam tak chhûng an hnathawh tûrte atân a tichak bawk. Kum 30 vêl a liam hnuah, tirhkoh Petera chuan, chu hmêl danglamna inlârna chu sawiin, chu inlârna chu a la hre reng tih a târ lang a ni.—2 Pet. 1:16-18.

9. Isua’n a zirtîrte hnênah eng fuihna ṭha tak nge a pêk?

⁹ “Ama thu ngai rawh u.” He thu hian Jehova’n a Fapa thu ngaithla a, zâwm tûrin min duh tih a târ lang chiang hle. Leia a awm laiin, Isua’n eng nge a sawi? Ngaihthlâk tûr thil pawimawh tam tak a sawi! Entîr nân, a zirtîrte chu chanchin ṭha hrilh dân a zirtîr bâkah, ngaihven reng tûrin a hriatnawntîr fo a ni. (Mt. 24:42; 28:19, 20) Thawk rim tûrin leh tlâwm lo tûrin a fuih bawk. (Lk. 13:24) Isua chuan a hnungzuitute hnênah inhmangaih tawn te, inpum khat tlat te, leh a thupêk zawmte a pawimawhzia a sawi uar a. (Joh. 15:10, 12, 13) Isua’n a zirtîrte hnêna a pêk fuihna chu a va ṭha tak êm! Chu fuihna chu, Isua’n a pêk hun lai ang bawkin tûn laiah pawh a pawimawh hle a ni.

10-11. Isua thu kan pawm tih engtin nge kan lantîr theih?

¹⁰ Isua chuan: “Tupawh thutaka mi apiangin ka thu an pawm ṭhîn,” tiin a sawi a. (Joh. 18:37) Kan ‘indawh tawn a, kan inngaihdam tawn zêl,’ chuan Isua thu kan pawm tih kan târ lang a ni. (Kol. 3:13; Lk. 17:3, 4) Ram chanchin ṭha chu “a hunah te, a hun lovah te pawh” ṭhahnemngai taka hrilin a thu kan pawmzia kan lantîr bawk.—2 Tim. 4:2.

¹¹ Isua chuan: “Ka berâmten ka aw an hre ṭhîn,” tiin a sawi a. (Joh. 10:27) Krista hnungzuite chuan Isua thusawi chu an ngaithla mai ni lovin, nunpuina hmangin a aw an hriatzia an lantîr a ni. Anni chu ‘dam chhûng khawsak ngaihtuahin,’ an buai lutuk lo. (Lk. 21:34) Chu aiin, dinhmun harsa tak kârah pawh Isua thupêk zawm chu an nunah an dah pawimawh tlat a. Kan unaute chuan dodâltute beihna, sum leh pai harsatna, leh leilung chhiatnate pawh tiamin, fiahna nasa  tak chu chhel takin an tuar a ni. Chûng fiahnate an tawrh chhûng chuan, engtiang khawpa hrehawm pawh ni se, Jehova chungah an rinawm tlat a. Chûng mite hnênah Isua’n: “Tupawh ka thupêkte neia zâwm chu mi hmangaihtu a ni; tupawh mi hmangaih chu ka Pain a hmangaih ang,” tiin a tiam a ni.—Joh. 14:21.

12. Isua thu kan pawm tih kan lantîr theih dân kawng dang chu eng nge ni?

¹² Isua thu kan pawmzia kan lantîr theih dân kawng dang leh chu: kan zînga hotua a ruatte nêna thawhho hi a ni. (Heb. 13:7, 17) Pathian inawpna pâwl chuan, tûn hnai kumahte khân kan rawngbâwlnaa hmanraw tharte leh tih dân thar te, chawlhkâr chhûng inkhâwm dân te, kan Kingdom Hall sak dân, siam ṭhat dân leh enkawl dânte pawh tiamin, inthlâk danglamna tam tak a siam a. Ngun taka ngaihtuah leh hmangaihna nei taka pêk kaihhruainate chu kan va hlut tak êm! Inawpna pâwlin a hun taka a pêk kaihhruainate zawm kan tum chuan Jehova’n mal min sâwm ang tih kan chiang thei a ni.

13. Isua thu pawmna aṭangin eng hlâwknate nge kan neih?

¹³ Isua zirtîrna zawng zawng pawm chu kan hlâwkpui a. A thu zirtîrte chuan a zirtîrte chu a tiharh ang tih a tiam a ni. Ani chuan: “In thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tiin a sawi a. (Mt. 11:28-30) Isua nun leh rawngbâwlna chungchâng sawina Chanchin Ṭha ziak pali pawh tiamin, Pathian Thu chuan min tiharhin, thlarau lamah min tichak a, min tifing bawk a ni. (Sâm 19:7; 23:3) Isua chuan: “Pathian thu hriaa zâwmte hi mi hamṭha an ni zâwk e,” tiin a sawi bawk.—Lk. 11:28.

14-15. (a) Johana 12:27, 28-a kan hmuh, vân aṭanga Jehova thusawi ṭum thumna chu eng nge ni? (b) Engvângin nge Jehova thu chuan Isua chu a thlamuan a, a tihchak?

¹⁴ Johana 12:27, 28 chhiar rawh. Jehova’n vân aṭanga a biak ṭum thumna chu Chanchin Ṭha Johana ziakah chhinchhiah a ni a. A thih hma niah chuan Isua chu Kalhlên Kût hnuhnûng ber hmang tûrin Jerusalemah a awm a. “Ka rilru a mangang e,” tiin a sawi a ni. Tichuan, “Ka Pa, i hming chawimawi rawh,” tiin a ṭawngṭai a. Vân aṭangin a Pa chuan: “Ka chawimawi tawh, ka chawimawi leh bawk ang,” tiin a rawn chhâng a ni.

 ¹⁵ Isua chu Jehova chunga rinawm tlat tûra a mawhphurhna pawimawh tak avângin a mangang a. Ani chuan hruihruala vuak tuarin, râwng taka tihhlum a ni dâwn tih a hria a ni. (Mt. 26:38) Eng dang zawng aiin, Isua chuan a Pa hming chawimawi a duh a. Ani chu Pathian sawichhetu nia puh a nih avângin, a thihna chuan Pathian hming a sawi chhia ang tih a hlau va. Chuvângin, Jehova thusawi chuan Isua chu a va tichak dâwn êm! Jehova hming chu chawimawiin a awm ang tih a hria a. A Pa thusawite chuan Isua chu nasa taka thlamuanin, a hrehawm tawrh tûrte tân a tichak ngei ang. Isua chu, chutih hun laia a Pa thusawi hre thiamtu awm chhun ni mah se, Jehova chuan a thute chu kan zaa hriat theih atân a chhinchhiah a ni.—Joh. 12:29, 30.

16. Engvângin nge Pathian hming sawi chhiat a nih kan hlauh châng a awm mai theih?

¹⁶ Isua angin, keini pawh Jehova hming sawi chhiata a awm chu kan hlau va. Isua anga dik lo taka cheibâwl kan ni mai thei. A nih loh leh, min dodâltute’n kan chanchin dik lo taka an sawi avângin kan mangang mai thei bawk. Chûng chanchinte chuan Jehova hming leh a inawpna pâwl a tihchhiat dânte chu kan ngaihtuah mai thei a. Chutiang hunah chuan, Jehova thute chuan min thlamuan tak zet a ni. A lutuka kan lungkham a ngai lo. “Pathian thlamuanna, rilru rêng rênga hriat sên loh khân, [kan]  thinlung leh [kan] ngaihtuahnate chu Krista Isuaah chuan [min] vênsak ang,” tih kan chiang thei a ni. (Phil. 4:6, 7) Jehova chuan a hming chawimawi lovin a awm lo vang. Pathian chuan a Lalram hmangin, a chhiahhlawh rinawmte chunga Setana leh a khawvêlin a thlentîr chhiatna zawng zawng chu a sût lêt vek ang.—Sâm 94:22, 23; Is. 65:17.

17. Isaia 30:21 nêna inmilin, engtin nge tûn laiah Jehova’n min biakpawh?

¹⁷ Jehova chuan tûn laiah pawh min be pawh reng a. (Isaia 30:21 chhiar rawh.) Vân aṭanga Pathian aw chu kan hre lo ngei mai. Mahse, a Thu, Bible aṭangin kan mamawh kaihhruaina min pe a. Chu bâkah, Jehova thlarau chuan “sum enkawltu rinawm” chu a chhiahhlawhte ei tûr chaw a pêktîr reng a ni. (Lk. 12:42) Thlarau lam chaw chu thu leh hla chhuah te, online aṭang te, video te, leh aw thunsate aṭangin kan va dawng nasa êm!

18. Engtin nge Jehova thu chuan i rinna a tihchak a, huaisenna a pêk che?

¹⁸ Isua leia a awm laia a hnêna Jehova thusawite chu i chhinchhiah tlat ang u! Bible-a chhinchhiah Pathian thute chuan Jehova’n thil engkim a thununin, Setana leh a khawvêl suaksualin kan chunga chhiatna a thlente chu a sût lêt vek dâwn tih min rinnghehtîr rawh se. Jehova aw chu ngun taka ngaihthlâk i tum ang u. Chutianga kan tih chuan, tûna kan hmachhawn buainate leh nakina kan hmachhawn tûr harsatna engpawh hlawhtling takin kan tuar chhuak thei ang. Bible chuan: “Pathian duhzâwng in tih hnuin thiltiam chu in hmuh theih nân chhelna in ngai asin,” tiin min hrilh a ni—Heb. 10:36.