Jehova’n “Amen” I Tih Chu A Hlut
JEHOVA chuan kan biakna chu a hlut a. Ani chuan a chhiahhlawhte fakna chu eng anga tê tham pawh ni se, “a lo ngaithla a, a lo hria a.” (Mal. 3:16) Entîr nân, vawi tam tak kan sawi mai theih ṭawngkam hi han ngaihtuah teh. Chu chu “amen,” tih hi a ni. Jehova’n chu ṭawngkam tluangtlam tak chu a hlut em? Hlut teh meuh mai! A hlut chhan hre tûrin, chu ṭawngkam awmzia leh Bible-a hman a nih dân i lo en chiang ang u.
“MIPUI ZAWNG ZAWNG CHUAN, ‘AMEN,’ AN LO TI TUR A NI”
Sâpṭawnga “amen” tih thu mal hi “ni rawh se” emaw, “a dik e” emaw tihna a ni a. Hei hi “rinawm rawh,” “rintlâk ni rawh” tih awmze nei Hebrai thu mal aṭanga lo chhuak a ni. A châng chuan rorêlna thiltiha hman a ni ṭhîn. Miin thu a tiam hnuah, a thusawi chu a dik tak zet tih nemngheh nân “amen” tiin a sawi ang a, a sawhkhâwk tûrte chu amah ngeiin mawh a phûr tûr a ni. (Num. 5:22) Tlâng hriata a sawi a nih chuan, a thusawi hlen tûrin mawhphurhna a nei lehzual a ni.—Neh. 5:13.
“Amen” tih ṭawngkam hman dân entîrna ṭha tak chu Deuteronomy bung 27-ah chhinchhiah a ni a. Israel mite chu Ram Tiama an luh hnuah, Dân chhiar chu an hriat theih nân Ebal Tlâng leh Gerizim Tlâng inkârah an kal khâwm a ngai a ni. Ngaithla tûr chauhva kal ni lovin, Dân thu an pawmzia an sawi chhuah pawh a ngai a. Thuâwih lohna sawhkhâwkte an chhiar chhuah chuan, an pawmzia târ lan nân “Amen!” tiin an chhâng a ni. (Deut. 27:15-26) Mipa, hmeichhia, leh naupang sang tam takin ring taka an chhâng chu han mitthla teh! (Jos. 8:30-35) Chu mi nîa an thusawi chu an theihnghilh leh tawh ngai lo vang. Bible chuan: “Josua dam chhûng leh, upaho Josua khûma dam te, LALPAN Israel-hote tâna thil a tih zawng zawng hretute dam chhûng chuan Israel-hoten LALPA rawng an bâwl ṭhîn a,” tia a sawi avângin, Israel mite chuan an thutiam chu an hlen a ni.—Jos. 24:31.
Isua pawhin a thusawi dikzia tihchian nân “amen” tih ṭawngkam hi a hmang a; mahse, danglam deuh hlekin a hmang a ni. Chu ṭawngkam chu thusawi engemaw chhân lêt nâna hmang lovin, ani chuan thutak hmêlhriattîr nân “amen” (Mizo ṭawnga lehlin dân chuan “tih tak meuhvin”) tih chu a hmang zâwk a ni. A châng chuan, “tih tak meuhvin, tih tak meuhvin” tia sawiin, chu ṭawngkam chu a sawinawn ṭhîn a. (Mt. 5:18; Joh. 1:51) Chutiang kawng chuan, a thusawite chu thu dik tak a nihzia a thu ngaithlatute a rinnghehtîr a ni. Isua chu Pathian thutiam zawng zawng thleng famkim tûra thuneitu a nih avângin, chutiang chuan chiang fakin a sawi thei a ni.—2 Kor. 1:20; Thup. 3:14.
“MIPUI ZAWNG ZAWNG CHUAN, “AMEN,” AN TI A, LALPA CHU AN FAK A”
Israel mite chuan Jehova an fak a, a hnêna an ṭawngṭai hunah “amen” tih ṭawngkam an hmang bawk a. (Neh. 8:6; Sâm 41:13) Ṭawngṭaina tâwpah a ngaithlatute’n “amen” tia sawiin, ṭawngṭaina chu an pawm tih an târ lang a ni. Chutiang chuan, chuta awm zawng zawngte chu Pathian Jehova biaknaah an tel vek thei a. Lal Davida’n Jerusalemah Jehova Bâwm a dah khân chutiang chuan an ti a ni. Chu mi hnua kût an hman laiin, thinlung takin a ṭawngṭai a, chu chu 1 Chronicles 16:8-36-naah hla thu anga chhinchhiah a ni. Chuta awmte chuan a ṭawngṭaina chu ṭha an tih êm avângin, “mipui zawng zawng chuan, ‘Amen,’ an ti a, LALPA chu an fak a.” Ni e, lungrual taka an ṭâwmpuina chuan chumi nîa an hlimna chu a tizual a ni.
Kum zabi khatnaa Kristiante pawhin Jehova an faknaah “amen” tih ṭawngkam hi an hmang a. Bible ziaktute chuan an lehkha ziahah chu ṭawngkam chu an telh fo va. (Rom 1:25; 16:27; 1 Pet. 4:11) Thu Puan bu pawhin vâna thlarau thil siamte’n “Amen; Halleluia,” tia sawiin Jehova an chawimawi tih a târ lang. (Thup. 19:1, 4) Kristian hmasate chuan inkhâwma an ṭawngṭai tâwpah “amen” tiin an sawi ṭhîn bawk. (1 Kor. 14:16) Mahse, he ṭawngkam hi ngaihtuah lova sawinawn mai mai tûr a ni lo.
“AMEN” I TIH A PAWIMAWH CHHAN
Jehova chhiahhlawhte’n “amen” tih ṭawngkam an hman dân kan hriat hnuah chuan, chu chu ṭawngṭai tihtâwpnaa awmze nei taka hman a nih chhan kan hre thei a. Kan mi mal ṭawngṭai tâwpa “amen” kan tih hian, kan thusawi chu tih tak zeta sawi kan ni tih kan lantîr tihna a ni. Vântlâng hmaa ṭawngṭaina chu a ri chhuak lo va kan “amen” a nih pawhin, kan ṭâwmpui tho tihna a ni. “Amen” tia kan sawi a pawimawhna chhan dang hi han ngaihtuah teh.
Pathian biaknaah kan phûrin, kan harhvang a ni. Ṭawngṭaia Jehova kan biak hian kan thusawi chauh ni lovin, kan awm dân pawh a tel a. Tih tak zêta “amen” tia sawi kan duhna chuan rilru dik tak nei tûr leh ṭawngṭaina ngaihven tlat tûrin min ṭanpui ang.
Pathian betute niin min inpumkhattîr. Vântlâng hmaa ṭawngṭaina chuan kohhrana mite hriat tûr thute min ngaihventîr a. (Tirh. 1:14; 12:5) Unaute ruala “amen” tia sawina chuan, min inpumkhattîr lehzual a ni. A ri chhuak emaw, chhuak lo emaw pawh ni se, “amen” kan tih hian, Jehova chu a ruala kan ngenna mila thil ti tûrin a chêttîr a ni.
“Amen” tia kan sawina chuan Jehova fakna a tipung
Jehova kan fak. Jehova chuan biakna atâna kan thiltih engkim chu a hria a. (Lk. 21:2, 3) Ani chuan min chêttîrtu leh kan thinlunga thil awmte chu a hmu a ni. Inkhâwma thusawite chu phone aṭanga kan ngaihthlâk hunah pawh, inngaitlâwm taka “amen” kan tih chu Jehova hriat lohvin a awm lo tih kan chiang thei a. Chu chuan Jehova a chawimawiin, inkhâwmah kan tel tih a târ lang a ni.
“Amen” tia kan sawi hi hlutna nei lo angin lang mah se, a pawimawh lo tihna a ni lo. Bible encyclopedia pakhat chuan Pathian chhiahhlawhte’n: “He thu mal pakhat hmang hian an thinlungah rinnghehna, tih tak zeta thlâwpna, leh beiseina phûrawm tak an neihzia,” a târ lang thei a ni tiin a sawi. “Amen” tia kan sawina chuan Jehova tilâwm zêl rawh se.—Sâm 19:14.
