KAN za hian mite’n mi ṭha nia min ngaih chu kan duh ṭheuh va. Mahse, tûn lai khawvêlah ṭhatna lantîr chu harsa tak a ni. Mi tam tak chu “ṭha duh hauh lo te,” an ni a. (2 Tim. 3:3) Anni chuan thil dik leh dik lo chungchângah mi mal tehna an nei a, “thil ṭha lo chu thil ṭha tia, thil ṭha chu thil ṭha lo,” tia sawi ang an ni. (Is. 5:20) Kan tûn hma nun chuan kan chungah nghawng ṭha lo a neih mai theih avâng leh ṭha famkim lo kan nih avângin thil ṭha tih chu kan tân a harsa hle thei a. Chuvângin, kum tam tak chhûng Jehova rawng lo bâwl tawh mah se, “Mi ṭha ni thei hian ka inring ngam chiah lo” tia sawitu Anne-i, * angin kan inngai mai thei a ni.

Thil lâwmawm tak mai chu, kan za hian ṭhatna kan nei ṭheuh thei hi a ni! He mizia hi Pathian thlarau thianghlim rah pêng pakhat a ni a, chu chu kan hmachhawn mai theih pâwn lam leh chhûng lama harsatnate aiin a chak zâwk daih a. Tûnah, ṭhatna mizia chu bih chiang lehzualin, kan lantîr lehzual theih dânte i lo en ang u.

Awlsam taka sawi chuan, ṭhatna chu mize ṭha, a nih loh leh mi ṭha tak nihna a ni a. Chutah chuan sualna leh chhiatna a tel lova, nungchang lama ṭhatna leh hlutna a tel a ni. Ṭhatna chu mi dangte chunga nghawng ṭha tak neiin a lang chhuak a. Hei hi mi dangte kan ṭanpuinaa lang chhuak mize duhawm tak a ni.

Mi ṭhenkhat chuan an chhûngte leh ṭhiante tân thil ṭha an ti ṭhîn chu i hmu ṭhîn ngei ang; mahse, chutah chuan kan duhtâwk tûr a ni em? Bible-in “thil ṭha titu, thil sual ti hauh lo khawpa mi fel chu lei chungah hian an awm lo takzet a ni,” tia a sawi avângin, he mizia kan lantîrnaah theih chin tâwk kan nei a ni. (Thur. 7:20) Tirhkoh Paula chuan: “Keimahah (chu chu ka tisaah tihna a ni) thil ṭha rêng a awm lo tih ka hria,” tiin tlang takin a sawi a. (Rom 7:18) Chuvângin, he mizia hi neih kan duh chuan ṭhatna lo chhuahna Bul ber, Jehova hnên aṭanga kan zir a ngai tih a chiang hle.

Pathian Jehova chuan ṭhatna chungchângah tehna a siam a. A chungchângah heti hian kan chhiar a ni: “Nang chu i ṭha a, thil ṭha i ti bawk a;i thuruatte chu mi zirtîr ang che,” tiin. (Sâm 119:68) He Bible chânga târ lan Jehova ṭhatna hmêlhmang pahnih hi i lo bih chiang ang u.

Jehova chu a ṭha. Ṭhatna chu Jehova mizia aṭanga ṭhenhran theih a ni lo. Mosia hnêna Jehova thusawi hi han ngaihtuah teh: “Ka ṭhatna zawng zawng chu i hmaah ka lantîr ang,” tih hi. Jehova chuan Mosia hnênah a ṭhatna pawh tiamin, a ropuina a lantîr a, Mosia chuan hetianga Jehova sawi hi a hria a ni: “LALPA chu, LALPA chu, Pathian lainatnaa khat, mi khawngaih thei tak, thin nel tak, ngilneihna leh thu tak ngah, mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualna te ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn chu,” tih hi. (Ex. 33:19; 34:6, 7) Chuvângin, ṭhatna chu Jehova mizia zawng zawngah  a lang tih kan hre thei a. Isua chu mihring ṭha famkim ni mah se, ani chuan: “Mi pakhat chauh lo chu tumah ṭha an awm lo, chu chu Pathian a ni,” tiin a sawi.—Lk. 18:19.

Jehova thiltihte chu a ṭha. Ṭhatna chu Pathian thiltih zawng zawngah a lang a. “LALPA chu engkim chungah pawh a ṭha a ni; a lainatnate chu a thil siam zawng zawng chungah a awm a.” (Sâm 145:9) Jehova chu a ṭha a, duhsak bîk a neih loh avângin mi zawng zawng hnênah nunna a pe a, an nun zawm zêl theih nâna an mamawhte pawh a pe a ni. (Tirh. 14:17) Min ngaihdam hian a ṭhatzia a lantîr bawk. Fakna hla phuahtu chuan: “Lalpa, nang chu i ṭha a, ngaihdam i peih a,” tiin a ziak a. (Sâm 86:5) Chuvângin, Jehova chuan “dik taka awmte lakah chuan thil ṭha rêng rêng a ui lo vang,” tih kan chiang thei a ni.—Sâm 84:11.

Pathian anpuia siam kan nih avângin, mi ṭha kan ni theiin, thil ṭha kan ti thei a. (Gen. 1:27) Chuvângin, Pathian Thu chuan a chhiahhlawhte chu “thil ṭha tih zir tawh rawh u,” tiin a fuih a ni. (Is. 1:17) A nih leh, engtin nge thil ṭha tih chu kan zir theih? Kan tihtheih dân kawng thum hi han ngaihtuah teh.

A hmasain, ṭhatna dik tak lantîr tûra Kristiante ṭanpui theitu thlarau thianghlim dîlin kan ṭawngṭai thei a. (Gal. 5:22) Ni e, Pathian thlarau thianghlim chuan thil ṭha ngaina tûr leh sual haw tûrin min ṭanpui thei a ni. (Rom 12:9) Dik tak chuan, Jehova’n “thil tihṭhat leh thusawi ṭhat tinrêngah,” min tinghet thei tih Bible chuan a târ lang a ni.—2 Thes. 2:16, 17.

Pahnihnaah, thlarauva thâwk khum Pathian Thu chu kan chhiar tûr a ni. Chutianga kan chhiar chuan, Jehova’n “kawng ṭha tinrêng” min kawhhmuh ang a, “hna ṭha tinrêng thawk” tûrin min thuam thei ang. (Thuf. 2:9; 2 Tim. 3:17) Bible kan chhiar a, kan chhût ngun hian kan thinlung chu Pathian leh a duh zâwng chungchânga thil ṭhatein kan tikhat a ni. Chutiang kawng chuan, nakina kan hman leh theih tûr ro kan khawlkhâwm a ni ang.—Lk. 6:45; Eph. 5:8-10.

Pathumnaah, theih tâwp chhuahin “ṭha chu zir” kan tum a. (3 Joh. 11) Bible-ah entawn tûr ṭhate kan hmu a ni. Entawn tûr ṭha ber chu Jehova leh Isua an ni tih chu a dik ngei mai. Chu bâkah, ṭhatna an lantîr avânga hriat hlawh tak mi dangte pawh kan ngaihtuah thei bawk. Kan rilrua lo lang mai thei mi pahnih chu Tabithi leh Barnaba an ni a. (Tirh. 9:36; 11:22-24) Bible-in an chanchin a sawite i zir chuan an entawn tûr siam ṭha tak chu i hlâwkpui thei ang. In chhûngkua, a nih loh leh kohhrana mite ṭanpui tûra hma i lâk theih  dân han ngaihtuah teh. Mi dangte chunga ṭhatna an lantîr avânga Tabithi leh Barnabate’n hlâwkna an hmuh dânte chu chhinchhiah ang che. Nang pawhin, chutiang chuan i hlâwkpui ve thei a ni.

Tûn laiah, mi dangte chunga thil ṭha titute entawn tûr siam ṭhenkhat pawh kan ngaihtuah thei a. Entîr nân, ‘ṭha lam duhtu’ kohhrana upa thawk rimte hi han ngaihtuah teh. An thusawi leh thiltiha ‘ṭha lam zirtîrtu’ unaunu rinawm takte pawh kan hmuh hmaih tûr a ni lo. (Tit. 1:8; 2:3-5) Unau Roslyn-i chuan: “Ka ṭhiannu chuan kohhrana mite ṭanpui leh fuih tûrin theih tâwp a chhuah a. Unaute dinhmun chu a ngaihtuah a, tichuan, thilpêk tlêm azâwng a pe a, kawng dangte pawhin a ṭanpui ṭhîn bawk. Ani chu mi ṭha tak ni hian ka hria,” tiin a sawi.

Jehova chuan a mite chu “ṭhatna zawng” tûrin a fuih a. (Amos. 5:14) Chutianga kan tih chuan, Pathian tehnate kan ngaina mai ni lovin, thil ṭha tih duhna kan nei lehzual ang.

Mi ṭha ni tûr chuan mi dangte ngaihsân zâwng thil kan tih emaw, thil man to tak kan pêk emaw a ngai kher lo. Entîr nân: Lem ziaktuin lem a ziah hunah vawi hnih khat mai a thai i ring em? Chu aiin, a lemziahah chuan vawi tam tak a thai ngei ang. Chutiang bawkin, kan ṭhatna chu vawi tam tak mite kan ṭanpuinaah a hmuh theih a ni.

Bible chuan thil ṭha ti tûra “inpeih sa,” leh “inpeih tûr” tein min fuih a. (2 Tim. 2:21; Tit. 3:1-2) Mite dinhmun kan hriatthiampui chuan, kan vêngte “tihsâwt nân an ṭhatna tûrin” anmahni tihlâwm dân kawng kan hre ngei ang. (Rom 15:2) Chutah chuan kan thil neihte pêk a tel thei a. (Thuf. 3:27) Mi tuemaw chu chaw ei tûrin emaw, inkawmhona nei tûrin emaw kan sâwm thei a ni. Tuemaw chu a dam lo tih kan hriat chuan, card kan pe thei a, a nih loh leh kan va tlawh emaw, kan phone emaw thei bawk. Ni e, ‘a ṭûlzia ang zêla siam ṭha tûrin, a ngaithlatute tân khawngaihna a lo nih theih nân’ hun remchângte kan zawng thei a ni.—Eph. 4:29.

Jehova angin, keini pawhin mi zawng zawng chungah ṭhatna lantîr kan tum a. Chuvângin, mi dangte chu thlei bîk nei lovin kan cheibâwl a ni. Chutianga kan tih dân langsâr tak pakhat chu mi zawng zawng hnêna Ram chanchin ṭha kan hrilhna hi a ni. Isua thupêk angin, min haw mai theitute chungah pawh ṭhatna lantîr kan tum tlat a. (Lk. 6:27) Mi dangte chunga ngilneihna lantîr a, thil ṭha tih chu thil sual a ni ngai lo, a chhan chu ‘chutiang kalhzâwngin Dân thupêk rêng a awm loh’ avângin. (Gal. 5:22, 23) Dodâlna leh fiahna kârah pawh nungchang ṭha lantîrin, mi dangte chu thutak hre tûr leh Pathian chawimawi tûrin kan hîp thei a ni.—1 Pet. 3:16, 17.

“Mi ṭha chu amah leh amah a intilungawi ang.” (Thuf. 14:14) Chûng malsâwmna ṭhenkhatte chu eng nge ni? Mi dangte chunga ṭhatna kan lantîr hian ṭha takin min chhâng lêt tlângpui ṭhîn. (Thuf. 14:22) Min chhâng lêt lo a nih pawhin, thil ṭha tih kan tum tlatna chuan an rilru put hmang a thlâk theiin, a hnuah ṭha takin min chhâng lêt thei a ni.—Rom 12:20.

Sual bânsan a, thil ṭha kan tih hian mahni ngeiin kan hlâwkpui ṭhîn a, chutiang chu unau tam takin an tawng a ni. Nancy-i thiltawn hi han ngaihtuah teh. “Pawisak nei lo, nungchang bawlhhlawh, leh inzah tawnna nei lo tak chhûngkuaa seilian ka ni a. Mahse, thil ṭha chungchânga Pathian tehnate ka hriat a, ka nunpui chuan hlimna ka nei ṭan a ni. Tûnah chuan zahawmna leh mahni inzahna ka nei tawh,” tiin a sawi.

Ṭhatna kan lantîrna chhan ber chu, chu chuan Jehova a tihlâwm vâng a ni. Mi tam takin kan thiltihte chu hmu lo mah se, Jehova’n a hmu a. Kan thiltih ṭhat leh ngaihtuahna zawng zawng chu a hria a ni. (Eph. 6:7, 8) Engtin nge mal min sâwm? “Mi ṭha chuan LALPA duhsakna a hlawh ang.” (Thuf. 12:2) Chuvângin, ṭhatna i lantîr chhun zawm zêl ang u. Jehova chuan “thil ṭha titu apiang hnênah chuan ropuina te, chawimawina te, thlamuanna te pêk a ni ang,” tih a tiam a ni.—Rom 2:10.