1. Miin in a sak hmain eng nge a tih ngai?

TUEMAW chuan in sak a tum angah han mitthla teh. A sak duh zâwng in chu a hria a. Hmanhmawh taka châkkhai ṭhenkhat leiin, in chu a sa nghâl ang em? Sa nghâl lo vang. In a sak hmaa a tih tûr thil pawimawh pakhat chu, in sak nâna a sênso zât, a nih loh leh a man tûr zât chhût hmasak hi a ni. Engvângin nge? In sa zo tûra a mamawh zât sum leh pai a neih leh neih loh a hriat a ngai a. A sênso zât tûr ngun taka a chhût hmasa a nih chuan, a in thar chu a sa zo thei ngei ang.

2. Luka 14:27-30-a sawi angin, baptisma chan hmaa ngun taka kan ngaihtuah tûr chu eng nge ni?

² Jehova i hmangaihna chuan baptisma chan duhna nei tûrin a chêttîr che em? A chêttîr che a nih chuan, in sak tumtu ang bawkin thu tlûkna siam tûr i nei a ni. Chu chu engvângin nge kan sawi theih? Luka 14:27-30-a kan hmuh Isua thusawite chu ngaihtuah ang che. (chhiar rawh.) Hei hi Isua’n a zirtîr nih awmzia a sawina a ni a. A hnungzuitu ni tûr chuan hrehawm tawrh leh inpêknate pawh tiamin, “a man tûr” chu inhuam takin kan pawm tûr a ni. (Lk. 9:23-26; 12:51-53) Baptisma i chan hmain, baptisma channain a ken tel thil engkim chu ngun takin i ngaihtuah a ngai a. Chitianga i tih chuan, baptisma chang tawh Kristian nia, rinawm taka Pathian rawngbâwl tûrin i inbuatsaih ṭha lehzual ang.

3. He thuziakah hian eng nge kan sawiho vang?

³ Baptisma chang tawh Krista zirtîr nih chu a manhla em? Manhla teh meuh mai! Baptisma channa chuan tûnah leh nakin hun atân malsâwmna chhiar sên loh dawn theihna kawng a hawng a ni. Baptisma chungchânga zawhna pawimawh ṭhenkhat i lo sawiho vang u. Chu chuan “Baptisma chang tûrin ka inpeih  tawh em?” tih zawhna chhâng tûrin a ṭanpui ang che.

4. (a) Inpumpêkna chu eng nge ni? (b) Matthaia 16:24-a târ lan angin, mahni “hrehawm” pawisa lo tih awmzia chu eng nge ni?

⁴ Inpumpêkna chu eng nge ni? Baptisma i chan theih hmain, i inpumpêk tûr a ni a. I inpumpêk hian Jehova hnênah tih tak zeta ṭawngṭaiin, i nun chu kumkhuaa a rawngbâwl nâna hmang tûrin i hrilh a. A hnêna i inpumpêk hian, mahni “hrehawm” i pawisa lo a ni. (Matthaia 16:24 chhiar rawh.) Tûnah chuan, Jehova ta i ni tawh a, chu chu chanvo hlu tak a ni. (Rom 14:8) Tûn aṭang chuan mahni lâwmna ni lovin, a rawngbâwlna chu i ngaihven tlat tawh ang tih i hrilh a. I inpumpêkna chu Pathian hnêna thutiam pawimawh tak a ni. Jehova chuan chutianga thu tiam tûrin min tilui lo. Mahse, thu kan tiam tawh chuan hlen tûrin min beisei a ni.—Sâm 116:12, 14.

5. Engtin nge inpumpêkna chu baptisma channa nên a inkûngkaih?

⁵ Engtin nge inpumpêkna chu baptisma channa nên a inkûngkaih? I inpumpêkna chu mi mal thil a ni a; nangmah leh Jehova inkâr thil a ni. Baptisma channa chu mipui hmaa thiltih a ni a; inkhâwmpuiah mipui hmaa chan a ni tlângpui ṭhîn. Baptisma i chan hian Pathian Jehova hnênah i inpumpêk tawh tih mi dangte i hriattîr a. * Chuvângin, baptisma i channa chuan Pathian Jehova chu i thinlung, i thlarau, i rilru, leh i chakna zawng zawngin i hmangaih tih leh kumkhuaa a rawngbâwl i tum tih mi dangte a hriattîr a ni.—Mk. 12:30.

6-7. Petera thawn khat 3:18-22-a sawi angin, baptisma chan a ṭûl chhan pahnih chu eng nge ni?

⁶ Baptisma chan chu a ṭûl tak zet em? Petera thawn khat 3:18-22-a kan hmuh thute hi han ngaihtuah teh. (chhiar rawh.) Lawng chu Nova rinna finfiahna hmuh theih a ni ang bawkin, baptisma i channa chu Jehova hnênah i inpumpêk tih finfiahna hmuh theih a ni. A nih leh, baptisma chan chu a ṭûl tak zet em? Ṭûl e. Petera’n a ṭûl chhante chu a sawi a. Pakhatnaah, chu chuan “a chhandam che” a ni. Isua kan rin a, kan tâna thiin, vânah kaihthawh a ni a, tûnah chuan “Pathian ding lamah” a awm tih kan rinna chu thiltiha kan lantîr chuan, baptisma channa chuan min chhandam thei a ni.

⁷ Pahnihnaah, baptisma channa chuan ‘chhia leh ṭha hriatna thiang’ min neihtîr a. Pathian hnêna inpumpêk a, baptisma kan chan hian amah nên a bîk taka inlaichînna kan nei a ni. Tih tak zeta kan inchhîrna leh tlanna kan rinna avângin Pathianin kan sualte min ngaidam a. Chuvângin, a hmaah chhia leh ṭha hriatna thiang kan nei thei a ni.

8. Baptisma chang tûra thu tlûkna i siam chhan ber chu eng nge ni ang?

⁸ Baptisma chang tûra thu tlûkna i siam chhan ber chu eng nge ni ang? Ngun taka Bible i zir avângin Jehova miziate leh a dânte chu i hre tam lehzual a. A chanchin i zirte chuan i thinlung a tilâwmin, amah hmanngaihna nasa tak a neihtîr che a ni. Jehova i hmangaihna chu baptisma chang tûra thu tlûkna i siam chhan ber a ni tûr a ni.

9. Matthaia 28:19-20-a sawi angin, Pa leh Fapa leh thlarau thianghlim hminga baptisma chang tih awmzia chu eng nge ni?

⁹ Baptisma chang tûra i thu tlûkna siam chu Bible ṭanchhan thutak i pawm vâng a ni bawk. Isua’n zirtîrte siam tûra thu a pêk laia a sawite kha han ngaihtuah teh. (Matthaia 28:19, 20 chhiar rawh.) Isua sawi angin, baptisma changte chuan ‘Pa leh Fapa leh thlarau thianghlim hminga’ an chan a ngai a ni. Chumi  awmzia chu eng nge ni? Jehova, a Fapa Isua, leh thlarau thianghlim chungchânga Bible thutak chu thinlung zawng zawngin i ring tûr a ni. Chûng thutakte chuan thil a titheiin, i thinlung a khawih hle thei a ni. (Heb. 4:12) Chûng zînga ṭhenkhat chu i lo ennawn ang u.

10-11. Pa chungchângah eng thutak nge i zir a, i pawm?

¹⁰ Pa chungchânga hêng thutak i zir laite kha han ngaihtuah leh teh: A hming “Jehova” a ni tih te, ‘leilung zawng zawng chunga Chungnungber,’ a ni tih te, leh ani chu “Pathian tak” awmchhun a ni tihte hi. (Sâm 83:18; Jer. 10:10) Ani chu min Siamtu a ni a, “chhandamna hi LALPA ta a ni.” (Sâm 3:8; 36:9) Ani chuan sualna leh thihna ata chhan chhuahna min buatsaihsak a, chatuan nun beiseina min pe a ni. (Joh. 17:3) Inpumpêk a, baptisma i channa chuan Jehova Thuhretute zînga mi i ni tih a târ lang ang a. (Is. 43:10-12) Pathian hming putu leh mi dangte hnêna a hming hriattîrtu khawvêl pum huap betu chhûngkaw zîngah i tel bawk ang.—Sâm 86:12.

¹¹ Pa chungchânga Bible zirtîrnate kan hre thiam thei chu chanvo hlu a va ni êm! Chûng thutak hlu takte i pawm chuan Jehova hnêna inpumpêk a, baptisma chan i duh ngei ang.

12-13. Fapa chungchângah eng thutak nge i zir a, i pawm?

¹² Fapa chungchânga hêng thutakte i zir hian engtin nge i chhân lêt? Isua chu lei leh vâna mi pawimawh ber pahnihna a ni a. Ani chu min Tlantu a ni. Kan tân inhuam takin a nun a pe a. Tlanna kan rinzia thiltiha kan lantîr chuan kan sualte chu ngaihdam a ni ang a, Pathian nên inṭhianna nei chhovin, chatuan nunna kan nei thei bawk ang. (Joh. 3:16) Isua chu kan Puithiam Lalber a ni a. Ani chuan tlanna hlâwkpui tûr leh Pathian nêna inlaichînna ṭha nei tûrin min ṭanpui a duh a ni. (Heb. 4:15; 7:24, 25) Pathian Lalrama Lalber a nih angin, Isua hmangin Jehova chuan A hming a tithianghlim ang a, suahsualna a titâwpin, lo awm tûr Paradis-ah chatuan malsâwmna a thlentîr ang. (Mt. 6:9, 10; Thup. 11:15) Isua chu kan entawn ber a ni a. (1 Pet. 2:21) Ani chuan Pathian duh zâwng ti tûra a nun hlânin kan tân entawn tûr a siam a ni.—Joh. 4:34.

¹³ Isua chungchânga Bible zirtîrte i pawm chuan Pathian Fapa duh tak chu i hmangaih ang a. Chu hmangaihna chuan Isua anga Pathian duh zâwng ti tûra i nun hmang tûrin a chêttîr ang che. Tichuan, Jehova hnênah inpumpêk a, baptisma chang tûra chêttîrin i awm ang.

14-15. Thlarau thianghlim chungchângah eng thutak nge i zir a, i pawm?

¹⁴ Thlarau thianghlim chungchânga hêng thutakte i zir hian engtin ngei i ngaih? Thlarau thianghlim chu mi ni lovin, Pathian chakna chevêl reng a ni a. Jehova chuan a thlarau thianghlim hmangin Bible ziaktute chu a thâwk khum a, chu thlarau thianghlim chuan kan thu chhiarte hre thiam a, nunpui tûrin min ṭanpui a ni. (Joh. 14:26; 2 Pet. 1:21) A thlarau thianghlim hmangin ‘thiltihtheihna nasa tak’ min pe a. (2 Kor. 4:7) Chu thlarau thianghlim chuan chanchin ṭha hril tûr te, thlêmna do tûr te, lunghnualna hmachhawn tûr te, leh fiahnate hneh thei tûrin min tichak a ni. “Thlarau rah” mize duhawm tak takte lantîr tûrin min ṭanpui bawk. (Gal. 5:22) Pathian chuan amah rinchhantute leh tih tak zeta dîltute hnênah a thlarau thianghlim chu phal takin a pe a ni.—Lk. 11:13.

¹⁵ Jehova betute kan nih angin, a rawng kan bâwlnaah a thlarau thianghlim ṭanpuina kan rinchhan thei tih hriat chu a va thlamuanthlâk tak êm! Thlarau thianghlim chungchânga thutak i zirte i pawm chuan Pathian hnêna inpumpêk a, baptisma chang tûra chêttîrin i awm ang.

16. Kan sawiho tâkte aṭangin eng thute nge kan zir?

 ¹⁶ Pathian hnêna inpumpêk a, baptisma chang tûra thu tlûkna i siam hian rahbi pawimawh tak i rap a. Kan hriat tâk angin, chumiin a ken tel hrehawm tawrh leh inpêknate chu inhuam takin kan pawm tûr a ni. Mahse, malsâwmnate chu a man tûr aiin a nasa zâwk daih a. Baptisma channa chuan a chhandam thei chein, Pathian hmaah chhia leh ṭha hriatna thiang tak a neihtîr thei che a ni. Baptisma i chan chhan ber chu Pathian Jehova i hmangaih vâng a ni tûr a ni. Pa leh Fapa leh thlarau thianghlim chungchâng i zirte chu thinlung zawng zawngin i ring tûr a ni bawk. Kan sawiho tâkte i ngaihtuah hnu chuan, “Baptisma chang tûrin ka inpeih tawh em?” tih zawhna chu engtin nge i chhân ang?

17. Baptisma chang tûra hma lâkna kawng ṭhenkhat chu eng nge ni?

¹⁷ Baptisma chang tûra inpeih tawh nia i inhriat chuan Jehova nên inlaichînna ṭha nei tûrin hma i la nasa tawh hle tih a chiang a. * Bible i zir ziah avângin, Jehova leh Isua chungchâng tam tak i hre tawh a. Rinna i nei tawh a ni. (Heb. 11:6) Bible-a kan hmuh Jehova thutiamte chu i ring tlat a, Isua inthawinain sual leh thihna ata a chhandam thei che tih i ring nghet tlat bawk. I sualte i sim tawh a; thil dik lo i tih avângin pawi i tih hle a, Jehova hnênah ngaihdam i dîl a ni. I nun chu i thlâk dang lam tawh a; i nun dân ṭha lote i bânsan a, Pathian tilâwmtu nun kawng i zawh ṭan ta a ni. (Tirh. 3:19) I rinna chungchâng mi dangte hrilh i châk hle a. Tichuan, baptisma la chang lo thuchhuahtu ni tûra i tlin tawh avângin, kohhranho rualin thu i hril ṭan ta a ni. (Mt. 24:14) Jehova chuan a ṭûl anga hma i lâk avângin a chhuang hle che a. A thinlung i tilâwm hle bawk.—Thuf. 27:11.

18. Baptisma i chan hmain, eng thil dangte nge i tih ngai?

¹⁸ Baptisma i chan hmain, i tih ngai thil ṭhenkhat dang a awm a. Kan hriat tâk ang khân, Pathian hnênah i inpumpêk tûr a ni. Ani chu mahni chauhvin pan la, a hnênah tih tak zeta ṭawngṭaiin, a duh zâwng tia i nun hmang tûrin thu tiam ang che. (1 Pet. 4:2) Tichuan, baptisma chan i duh tih kohhrana upahote râwn khâwmtu chu hriattîr rawh. Ani chuan nangmah kâwm tûr chein upa ṭhenkhat a ruat ang. Khawngahin, anni nêna ṭhutho chu hlau suh. Hêng unau duhawm takte hian an hria chein, an hmangaih che tih ring tlat ang che. Anni chuan Bible ṭanchhana i thu zirte chu an ennawnpui ang che. Chûng i thu zirte chu i hre thiam tih leh inpumpêk a, baptisma chan a pawimawhzia i hre chiang tih chian an duh a ni. Anni chuan i inpeih tawh tih an pawm chuan inkhâwmpui lo awm  tûrah baptisma i chang thei tih an hriattîr ang che.   

19-20. Baptisma i chan hnuah eng nge i tih ngai a, chu chu engtin nge i tih theih?

¹⁹ Baptisma i chan hnua i tih ngaite chu eng nge ni ang? * Inpumpêkna chu thutiamna a ni a, chu chu Jehova’n vawng tlat tûrin a beisei che tih hre reng ang che. Chuvângin, baptisma i chan hnu chuan inpumpêkna mila i nun a ngai a ni. Chu chu engtin nge i tih theih?

²⁰ In kohhran chu bêl tlat rawh. Baptisma chang tawh Kristian i nih angin, tûnah chuan “unaute” zînga mi i ni tawh a. (1 Pet. 2:17) Kohhrana unaute chu thlarau lama i chhûngte an ni. Kohhran inkhâwma tel ziahna chuan anmahni nêna in inlaichînna a tinghet ang. Nî tin Pathian Thu chhiarin, chhût ngun ṭhîn ang che. (Sâm 1:1, 2) Bible châng ṭhenkhat i chhiar hnuah, i thu chhiarte ngun taka ngaihtuah nân hun hmang ang che. Tichuan, chûng thute chuan i thinlung a khawih ang. “Ṭawngṭai reng rawh.” (Mt. 26:41, NW) Tih tak zeta i ṭawngṭainate chuan Jehova a hnaih lehzualtîr ang che. “A ram . . . chu zawng hmasa zâwk rawh.” (Mt. 6:33) Chu chu i nuna thu hrilh rawngbâwlna dah pawimawh berna hmangin i ti thei a ni. Rawngbâwlnaa i tel ziah chuan i rinna a chak reng ang a, chatuan nunna kawnga kal tûrin mi dangte i ṭanpui thei bawk ang.—1 Tim. 4:16.

21. Baptisma i channa chuan eng kawng nge a hawn ang?

²¹ Jehova hnêna inpumpêk a, baptisma chang tûra i thu tlûkna siam chu, thu tlûkna i siam azawnga pawimawh ber a ni a. Chu chuan hrehawm tawrhna leh inpêkna te a keng tel a ni. A nih leh, chûngte avâng chuan kan inchhîr ngai ang em? Chhîr ngai hauh lo vang! He khawvêl hluia i tawh mai theih harsatna eng pawh hi “tûn mit khap kâr chhûng chauhva awm tûr” a ni. (2 Kor. 4:17) Chumi nêna inkalh takin, baptisma i channa chuan tûna nun lungâwithlâk tak nei tûr leh nakina “nunna tak tak” nei tûrin kawng a hawng ang. (1 Tim. 6:19) Chuvângin, “Baptisma chang tûrin ka inpeih tawh em?” tih zawhna chhâng tûrin ngun takin ngaihtuah la, ṭawngṭai ang che.