Levia hnama puithiam ni lote hnathawh tam tak zînga pakhat chu tiangkengtute anga rawngbâwl hi a ni a. Chu chu biak in hotute kaihhruaina hnuaia thawh a ni. Juda mi lehkha ziaktu Philo-a chuan chûng tiangkengtute hnathawh chungchâng chu heti hian a sawi a ni: “Chûng [Levia mite] zînga ṭhenkhat chu biak in kawngka bulah kawngkhâr vêngtute angin an awm a, ṭhenkhat dang chu hmun thianghlim [biak in] hmaah chuan a chhûnga luh phal ni lote chu tum reng vâng emaw, tihpalh vâng emawa an luh loh nân an awm a ni. Ṭhenkhat dang leh chu biak in vêlah a chhûn a zâna fang kualin a inchhâwk tawn a ni,” tiin.

Sanhedrin chuan anmahni ṭanpui tûrin chûng tiangkengtute chu an ngên thei a. Anni chu Rom sawrkârin Juda mite zînga râlthuam keng thei tûra phalna a pêk awmchhun an ni.

Bible lama mi thiam Joachim Jeremias-a chuan: “Chûng tiangkengtute chu biak in vêngtute zînga mi ni lo se chuan, Isua’n amah man tûra an lo kal khân Biak ina nî tin a zirtîr laia an man loh chhan (Mt. 26.55) a zâwt lo vang,” tiin a ziak a. Chumi ziaktu vêk chuan tûn hma ṭum danga Isua man tûra an mi tirhte chu biak ina tiangkengtute tho an nih a ring a ni. (Joh. 7:32, 45, 46) A hnuah, Sanhedrin-in biak in hotute leh tiangkengtu ṭhenkhat chu an hnêna tirhkohte rawn hruai tûrin a tîr a. Chûng an mi tirhte chu biak in aṭanga tirhkoh Paula hruai chhuaktu tiangkengtute bawk an nih a rinawm hle.—Tirh. 4:1-3; 5:17-27; 21:27-30.